Rairai o Jisu vei Meri Makitala

9 ni Epereli

Au Na Vaqaqacotaka Vakacava na Noqu iVakadinadina me baleta na Tucaketale i Jisu Karisito?

Siganimate

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Me, ikuri ni veivakasalataki ena kuoramu se kalasi, ena rawa mo ni veivosakitaka na vosa kei na ulutaga eso mai na koniferedi raraba. E na rawa ni veivuke na taro eso oqo.

• Na vosa kei na itukutuku cava soti e bibi vei keda? Na cava e vakaqaqacotaka na noda vakabauti Jisu Karisito?

• Na cava e vakaqaqacotaka na noda ivakadinadina me baleti ira na parofita bula? Na cava eda sa vakauqeti kina me da cakava ena vuku nika eda sa vulica se vakila?

• Na cava e gadrevi meda na cakava vaka kuoramu se kalasi meda na nanuma kina ka vakayacora na ivakasala eda sa rogoca ena koniferedi raraba?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Era vakadinadinataka na Apositolo makawa kei na gauna oqo ni bula tiko o Jisu Karisito! A vakararawataki ka mate ena kauveilatai, a bulu o Koya ena dua na ibulubulu, ia ena ikatolu ni siga a tucaketale o Koya. Me vaka ga ni sa qaqa mai na mate o Koya, eda na tucake kece tale. Na Tucaketale ni iVakabula sa kauta mai na yalayala ni tawamate rawa kei na inuinui ni bula tawamudu. Na yalayala oqo e uto ni Siganimate.

Nida lewena Na Lotu i Jisu Karisito ni Yalododonu Edaidai, e sa tiko na vuna vakatabakidua meda vakabauta nio Jisu Karisito a tucaketale. Me ikuri ni nodra ivakadinadina na tamata mai na gauna ni Veiyalayalati Vou, sa tu vei keda na nodra ivakadinadina na tamata era bula ena gauna ni iVola i Momani, na parofita o Josefa Simici, kei ira na noda parofita kei nai apositolo bula. E rawa talega nida ciqoma e dua na ivakadinadina ni Tucaketale mai vua na Yalo Tabu. O na vukei ira vakacava na itabagone me ra vaqaqacotaka na nodra ivakadinadina ni sa tucaketale o Jisu Karisito? Nio vakavakarau, navuca mo vulica na itukutuku nei Sisita Reyna I. Aburto “Sa Sega Kina na Kaukauwa Ni iBulubulu” (Liaona, Me 2021, 85–86) kei na itukutuku nei Elder S. Mark Palmer “Noda Rarawa Ena Vuki me Reki” (Liaona, Me 2021, 88–89).

Vulica Vata

Sa rawa mo tekivuna e dua na veivosaki me baleta na Tucaketale i Jisu Karisito ena nomu sureti ira na itabagone me ra wasea na veika era sa cakava ena macawa oqo me marautaki kina na Siganimate. Sa rawa mo tarogi ira se cava era sa vulica se cakava yadudua se vakamatavuvale me vaqaqacotaki kina na nodra ivakadinadina ni Tucaketale ni iVakabula. Sa koto oqo e ra na itaviqaravi me vukei ira na lewe ni nomu kalasi se kuoramu me vaqaqacotaka na nodra ivakadinadina.

• Veivosakitaka vata na vuna era bibi kina na ivakadinadina ena bula ni veisiga. Qai cakava e dua na lisi ni vuqa na ivakadinadina ni Tucaketale i Jisu me vaka e rawa ni vakasamataka na nomu kalasi se kuoramu. Sa rawa ki na tamata yadua me digitaka e dua na ivolanikalou mai na kena e volai tiko ena “iVurevure Veitokoni” me vulici kina eso vei ira na ivakadinadina oqo. Kerei ira na lewe ni kalasi kei na kuoramu mera wasea na veika era sa vulica. Vakayaloqaqataki ira mera wasea talega na sala era vaqaqacotaka kina na vei ivakadinadina oqo na nodra ivakadinadina me baleta na Tucaketale i Jisu Karisito.

• Na cava eso na ituvaki eda rawa ni wasea kina na noda ivakadinadina me baleta na Tucaketale ni iVakabula? Kevaka e dua ena kalasi se kuoramu e sotava oti e dua na gauna ni veivosaki kei na dua me baleta na Tucaketale ni iVakabula, vakasamataka mo sureti koya me wasea na veika a sotava. Vakayaloqaqataki ira na lewe ni kalasi se kuoramu mera vakasamataka na sala era na vukea kina e dua me kila vinaka na Tucaketale i Jisu Karisito ka rawata e dua na ivakadinadina ni ena Vukuna eda rawa ni tucake tale kina. Na cava soti na dina bibi me baleta na Tucaketale ni tamata kecega ka na bibi me vakavulici vei ira na tani? Sa rawa kina lewe ni kalasi se kuoramu mera kunea na isaunitaro ena ivolanikalou ena “iVurevure Veitokoni.”

• Ni ratou tukuna na Apositolo vei Tomasi ni ratou sa raica na iVakabula sa tucaketale, a kaya o Tomasi ni na sega ni vakabauta vakavo kevaka e raici koya sara ga e matana. E muri sa qai tukuna o Jisu vei Tomasi, “Sa kalougata ko ira era sa sega ni raica, ka ra sa vakadinata.” Railesuva vata na veika a sotava o Tomasi ka kunei ena Joni 20:24–29. Eda sa vakalougatataki vakacava ni da vakadinata na iVakabula ka sega ni raici Koya? E rawa vakacava meda vaqaqacotaka na noda vakabauti Jisu Karisito? Sureta na lewe ni kalasi se kuoramu mera vakasaqara e dua se sivia na itukutuku mai vei ira na iliuliu ni Lotu ena “iVurevure Veitokoni” ka wasea na vuna era vakavinavinakataka kina na Tucaketale ni iVakabula. Na sala cava e vakayacoka kina kina sala eda vakasamataka kina na yagoda kei na digidigi eda cakava na noda kila nida na tucaketale?

Mo Dou Kila Kina, mai vei Gary L. Kapp

Mo Dou Kila Kina, mai vei Gary L. Kapp

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Maciu 28:1–10; Luke 24:13–35; Luke 24:36–48; Joni 20:11–29; 1 Korinica 15:3–8; 3 Nifai 11:1–15; Ica 12:38–39; Vunau kei na Veiyalayalati 76:19–24 (iVakadinadina ni Tucaketale)

• 2 Nifai 9:10–15; Mosaia 16:8–11; Alama 11:42–45; Alama 40:23–25; Vunau kei na Veiyalayalati 93:33–34 (iVolanikalou e vakavuvulitaka na Tucaketale ni tamata kecega)

• D. Todd Christofferson, “Na Tucaketale i Jisu Karisito,” Liaona, Me 2014, 111–14

• Gerrit W. Gong, “Osana kei na Aleluya—O Jisu Karisito sa Bula Tiko: Na Uto ni Vakalesui Mai kei na Siga ni Mate,” Liaona, Me 2020, 52–55

• Reyna I. Aburto, “Sa Sega Kina Na Kaukauwa ni iBulubulu,” Liaona,, Me 2021, 85–86

• S. Mark Palmer, “Noda Rarawa Ena Vuki me Reki,” Liaona, Me 2021, 88–89

• Na vidio ni Siganimate e rawa ni kunei ena ChurchofJesusChrist.org/study/video/easter-videos?lang=fij.

Veivakavulici ena iVakarau ni iVakabula

Na tamata e kila na sala me kilana ibalebale ni ivolanikalou ka dau goleva e veisiga ena rawata na veituberi vakalou me vorata na veibolebole kecega. Nio veivakavulici, dau taroga na taro ka gadrevi kina mera vakasaqaqara ena ivolanikalou o ira na vuli mera kunea na kena isau.