Sa Sega Kina Na Kaukauwa ni iBulubulu

Mai vei Reyna I. Aburto

iKarua ni Daunivakasala ena Mataveiliutaki Raraba ni iSoqosoqo ni Veivukei

Ena vuku ni Veisorovaki veivueti kei na Tucaketale veivakurabuitaki i Jisu Karisito, e vakabulai na kavoro ni uto, mosi ena vakacegui, kei na yalolailai ena vuki me inuinui.

Ena mataka ni Sigatabu ni Siga ni Mate vakasakiti oqo, era marautaka na lagata na luveda, “Vulaitubutubu, Jisu yadra mai, qara vatu sa tadola, o mate sa guce.”¹

Eda vakavinavinakataka na veika eda mai kila me baleta na Tucake tale nei Jisu Karisito. Ia, e tiko e so na gauna ena noda bula, eda na vakila na vutugu ni mai takali e dua e da lomana vakavoleka. Ena gauna oqo ni ravuti vuravura tu na matedewa, e vuqa vei keda e sa takali kina o ira eda lomana vakavoleka— mai na noda vuvale se itokani.² Eda masulaki ira era lolosi tu mai na mate vakaoqo.

E tukuna o Peresitedi Russell M. Nelson:

Veitalia na yabaki ni bula cava, eda na tagicaki ira eda lomana ka sa takali. Na tagiyaso e dua na ivakaraitaki bibi ni loloma.

E dina, ni da na sega ni rawa ni marautaka sara na noda na sota tale ena gauna e muri kevaka eda sega ni veitagicaki mai na veitawasei ena gauna oqo. Na sala duadua ga meda kauta tani kina na rarawa mai na mate oya kevaka eda kauta tani na loloma mai na noda bula.”³

E rawa meda vakananumi ira na nona itokani o Jisu, e ratou ka daumuria ka dau qaravi Koya,⁴ na nodra vakila ka raica na nona Vakoti kei na Nona mate kei na ivakatakilakila a vakaraitaki ena veika a yaco.⁵ Eda kila ni ra rarawa ka tagiyaso.”⁶ Ena siga ni nona Vakoti, se sega ni ra kila na veika ena yaco ena Sigatabu, era nuiqawaqawa ena rere, ka vakananuma voli se rawa vakacava na mua ki liu ni sa sega na Turaga. Ia, lako tikoga na nodra veiqaravi Vua dina ga ni sa mate.

Ko Josefa na kai Arimacea a qai kerekere vei Pailato me solia vua na yagoi Jisu. Sa kauta sobu ko Koya na yago, solega ena lineni, ka vakotora ena dua na ibulubulu sa ta ena vatu, a sa vaqiqica e dua na vatu ki na katuba ni bulubulu.⁷

Kauta mai o Nikotimo na mura kei na alo. A vukei Josefa me kauta na yago me solegi ena lineni vatakei na veikaboi vinaka.⁸

O Meri Makitala, kei na so tale na marama a qai muri Josefa kei Nikotimo, raica na ivalavala ni kena koto na yagoi Jisu, qai vakarautaka e so na ka boivinaka kei na ilumu ka vakatabuia. kina.⁹ Me vaka na lawa qaqa ni vanua ena gauna oya, era waraka sara na siga tarava me vakarautaki ka vakatabui na yagona baleta ni Sigatabu tiko na siga Vakarauwai.¹⁰ Mataka caca ni Sigatabu, era lako ki na ibulubulu. Nodra liaca ni sa sega ni tiko kina na yagona na iVakabula, era laki tukuna vei ratou na tisaipeli, o ira na nona iApositolo o Jisu. Era lako mai na iApositolo vatakei ira ki na ibulubulu vatu ka raica ni sa lala. O ira kece vakavo ga o Meri Makitala e biubiu mai, ka vakananuyaka se na cava a yaco vua na yagona na iVakabula¹¹

Tiko taudua o Meri Makitala ena ibulubulu. Ena vica walega na siga sa oti a raica na mate nei nona itokani kei na nona Turaga. Sa lala na Nona ibulubulu, ka sega ni kila evei na vanua e sa tiko kina ko Koya. Sa levu sara nona leqataka ka sa tagi. Ena gauna bibi oya, na iVakabula ka Tucaketale e lako mai vua ka taroga e sa tagi ena vuku ni cava kei o cei e vakasaqara. A nanuma ni vosa tiko vua na ivakatawa ni were a sa kaya vua, kevaka ko sa kauti koya tani, me tukuna vua na tikina sa vakotori koya kina ka me laki kauti koya.¹²

Au vakasamataka kevaka e vakatara na Turaga me lolosi o Meri Makitala ka vakaraitaka na mosi ni yalona.¹³ E qai kacivi koya ena yacana. a qai vuki yani na marama me raici koya e qai kilai koya. E raica na Karisito ni sa tucaketale ka vakadinadinataka na veivakurabuitaki in Nona Tucaketale.¹⁴

Vakataki kemuni, eso na gauna au rawa ni vakila na vutugu nei Meri Makitala kei na nona itokani ni ra lolosi taka na mate ni Turaga. Noqu se yabaki ciwa, a mate na ganequ qase ena dua na uneune veivakarusai. Baleta ni yaco vakasauri, a taura e dua na gauna meu qai kila vinaka na dina ni veika a yaco. Sa kavoro na yaloqu ena rarawa, kau qai taroga , “Na cava a yaco vei ganequ? Ivei o koya?” E lako ivei? Ena rawa li meu raica koya tale?”

Ena gauna oya, se sega niu se kila na iyavu ni Vakabauta ni Kalou, ka tiko ga e dua na gagadre meu kila na vanua au lako mai kina, na inaki ni noqu bula, kei na cava e yaco vei keda ni da sa mate. E sega li vei keda kece na vakasaqaqara ni dau mate e dua eda lomana se ni da lako curuma na veika dredre ena noda bula?

E vica na yabaki sa oti, sa tekivu meu vakasamataki ganequ ena dua na sala matalia. Au dau tatadrataka ni sa mai tukituki tiko ena neitou mata ni katuba. Niu dolava yani na katuba, sa tucake tu mai o koya, ka tukuna sara mai, “Au sega ni mate. Au se bula tiko. Au sega ni rawa ni lako mai vei iko, io qo au sa rawa ni tiko ka sega tale ni lako.” Na vakanananu oya, me vakataka na tadra, e vukei au meu ciqoma rawa kina na mosi kei na vutugu au vakila tu mai na nona sa mai takali. Na vakanananu ni na mai tiko vatakei au e dau lako mai vakawasoma. E so na gauna au dau wadrava tu na katuba, ena inuinui ni na tukituki mai kau na qai raici koya tale.

Via 40 na yabaki sa oti yani, ena gauna ni Siganimate, au vakananuma na nona Tucaketale o Jisu Karisito kau tekivu meu vakasamataki ganequ. Ena gauna oya, a kasa mai ena noqu vakasama edua na ka. Au vakananuma mai noqu dau vakasamataka nona na lako mai me raici au.

Na siga oya, au liaca saraga ni na Yalotabu a vakalomavinakataki au ena dua na gauna dredre. Au ciqoma e dua na ivakadinadina ni na yaloi ganequ e sega ni mate; e bula tiko o koya. E gugumatua tiko o koya ena nona bula vaka tawamudu. Au kila ni na tucake tale na ganequ”¹⁵ ena gauna vakasakiti oya, baleta ni sa Tucaketale o Jisu Karisito, eda na tucaketale. Kena ikuri, e vakatara o Koya me da veisotari kece vaka vuvale ka bula marau tawamudu ena nona iserau na Kalou kevaka e da digia na vakayacori ka bulataki ni veiyalayalati tabu vakatakei Koya.

Me vaka e vakavulica o Peresitedi Nelson:

“Na mate is dua na tiki bibi ni noda bula tawamudu. E sega ni dua e kila na gauna e na yaco kina, ia e tiki bibi ni nona yavu ni marau na Kalou. E da vakavinavinaka ena nona Veisorovaki na Turaga, na nona tucaketale e na yaco vakaidina, io na bula tawamudu ena rawa ni yaco vei keda kece na kawatamata.

“… Vei ira na veiwekani era lolosi tiko mai … na batigaga nei mate e vakameau taki ena vakabauti Karisito, na rarama uasivi ni nuinui, na lomana na Kalou, kei na gagadre titobu ni veiqaravi. Na vakabauta oya, na inuinui, kei na loloma ena vakatarai keda meda mua ki na nona itikotiko tabu na Kalou, vatakei ira na watida kei na noda vuvale tawamudu, ka bula vatakei Koya me tawamudu.”¹⁶

Au vakadinadinataka ni kevaka a sega ni tucake tale mai na mate na Karisito, ka gutuva na ivau ni mate me sega kina na kaukauwa ni ibulubulu, kei na bati gaga nei mate, ke na sega ni rawa na tucake tale mai na mate.

Ia ena yaco na tucake tale mai na mate, o koya sa sega kina na kaukauwa ni ibulubulu, ka sa tiloma ko Karisito na bati gaga nei mate.

“Sai koya na rarama kei na bula kei vuravura; io, na rarama sa tawacava, ka sega ni vakabutobutotaki rawa; io, kei na bula talega sa tawacava, ni sa sega tale na mate.”¹⁷

A cauraka na iVakabula, “Oi au na vu ni tucaketale, kei na vu ni bula, ko koya sa vakabauti au, kevaka sa mate, ena bula ga.”¹⁸

Au vakadinadinataka ena vuku ni Veisorovaki veivueti kei na Tucaketale veivakurabuitaki i Jisu Karisito, e vakabulai na kavoro ni uto, mosi ena vakacegui, kei na yalolailai ena vuki me inuinui. Ena solegi keda na ligana loloma, vakalomavinaka, vakaukauwataki ka veivakabulai vei keda kece. Ena yaca i Jisu Karisito, emeni.