Na Kalou sa Lomani ira na Luvena
Au na vinakata me’u wasea e tolu na sala vakatabakidua e dau vakaraitaka kina na Tamada Vakalomalagi na Nona loloma me baleti keda, na Luvena.
Kemuni na taciqu kei na ganequ, au reki vata kei kemuni ena kosipeli i Jisu Karisito. Au kauta vata tiko mai kei au na loloma mai vei ira na lewenilotu gugumatua ena yatu Filipaini ka kaya yani, ena vukudra, Mabuhay!
Ena mataka ni Siganimate oqo, au vakadinadinataka na Karisito Bula, ni a tucake o Koya mai na mate, ka sa savasava sara ka tawamudu na Nona loloma me baleti keda kei na Tamada mai Lomalagi. Nikua, au gadreva meu vakanamata ena loloma i Tamada Vakalomalagi kei Jisu Karisito me baleta na tamata kecega, ka sa vakatakilai ena Veisorovaki ni Luvena, o Jisu Karisito. “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura.” (Joni 3:16).
Ena gauna a tarogi kina na parofita o Nifai mai vua e dua na agilosi me baleta na nona kila na Kalou, a sauma o Nifai ena yalomalumalumu, “Au kila ni sa lomani ira na luvena ko koya” (raica na 1 Nifai 11:16–17).
E dua na tikina mai na iVola i Momani: E Dua Tale na iVakadinadina kei Jisu Karisito, e vakamacalataka ena qaqa na loloma uasivi ni iVakabula: “Kei na vuravura, ena vuku ni nodra caka ca, era na okati Koya me ka wale; … era sa vakanakuitataki Koya, … ra sa yaviti Koya, … era kasiviti Koya, ka sa vosota ga, ena vuku ni nona yalololoma kei na nona dauvosoti ira vakadede na luve ni tamata” (1 Nifai 19: 9). Na loloma raraba ni iVakabula sa ikoya na kaukauwa veivakauqeti ena daku ni veika kece e cakava o Koya. Eda kila ni sa ikoya vata ga na loloma e lomani keda kina na Tamada mai Lomalagi, baleta ni a vakatavulica ena yalomalumalumu na iVakabula ni o Koya kei na Tamada erau sa “dua bauga” (raica na Joni 10:30; 17:20–23).
Meda na, qai, dolea ka vakaraitaka beka vakacava na noda vakavinavinaka me baleta na Nodrau lomani vuravura raraba? A vakavulici keda na iVakabula ena veisureti rawarawa, vei-kovuti oqo: “Kevaka dou sa lomani au, dou talairawarawa ki na noqu vunau” (Joni 14:15).
A vakavulica o Peresitedi Dallin H. Oaks, “Na Nona loloma raraba ka uasivi sara na Kalou e vakaraitaki ena veivakalougatataki kece sara ena Nona ituvatuva vakosipeli, ka okati kina na dina ni Nona veivakalougatataki digitaki sa maroroi tu me baleti ira era talairawarawa ki na Nona lawa.”1
Au na vinakata me’u wasea e tolu na sala vakatabakidua e dau vakaraitaka kina na Tamada Vakalomalagi na Nona loloma me baleti keda, na Luvena.
iMatai, Veiwekani kei na Kalou kei na Matavuvale e Vakatakila Nona Loloma
Na noda veiwekani taleitaki duadua sa ikoya na kena vata kei na Tamada kei na Luvena kei na noda matavuvale vakai keda, baleta na keda isema kivei ira e sa tawamudu. Na ituvatuva cecere ni marau e sa dua na vakaraitaki totoka ni loloma ni Kalou me baleti keda. Ena mata e vakoti matua ena ituvatuva ni Kalou, eda digitaka ena lomasoli meda siviraka laivi na qele kei na vatu mai lomada ka dau tokona tu na gagadre kocokoco ka sosomitaka ena yavu eso e taracake na veiwekani tawamudu. Ena dua na kena vakasama, oqo e rawa ni vakatokai me “vakekeli vakayalo.” Ena noda vakayacora noda vakekeli vakayalo, meda goleva taumada na Kalou, ka tagi kivei Koya (raica na Jeremaia 29:12–13).
Na golevi Koya kei na tagi kivei Koya ena tekivuna na ivakarau ka vakarautaka na maliwa me taraicake ka vaqaqacotaki kina na noda veiwekani tawamudu. E vakarabailevutaka noda rai vakayalo ka vukei keda meda vakanamata ena veisautaki ni veika eda rawa ni lewa, ka sega mai na ririko ena taudaku ni veika eda lewa. Na vulici ni bula kei na ilesilesi ni noda iVakabula o Jisu Karisto ena rawa kina vei keda meda raica na kauwai tale eso oqo ena dua na kena irairai tawamudu.
Na veika veivakasesei e rawa ni tarovi keda ena so na gauna mai na noda vakila na loloma ni Kalou ena noda veimaliwai kei na itaviqaravi vakamatavuvale. E dua na tina, ni vakila ni sa suguraka tiko na nona veimaliwai vakamatavuvale na misini veikauyaki eso, a kauta cake mai e dua na kena iwali. Ena tepeli ni vakayakavi kei na veigauna tale eso ni matavuvale, sa dau kaci ga yani o koya, “Talefoni kece ena fuloa, sa noda gauna ni mata qo.” E kaya o koya ni sa ivakarau vou ni nodratou matavuvale oqo ka sa vaqaqacotaka na nodratou veimaliwai vakamatavuvale ni ratou sa dau qarava nodratou gauna ni mata dina. Eratou sa dau marautaka vata oqo na veivosakitaki totoka ni Lako Mai, Mo Muri Au vaka dua na matavuvale.
iKarua, E Vakatakila Okoya Nona Loloma ki vei ira na Luvena ena Nona Kacivi ira na Parofita
Na noda vuravura edaidai e sa luvuci tu ena dua na “ivalu vosa kei na sosa ni vakasama eso” (Josefa Simici Ai Tukutuku— 1:10). E vakananuma vei keda o Paula ni “sa vuqa na vosa sa duidui e vuravura” (1 Korinica 14:10). Na vosa cava mai vei ira kece qori e basika cake vakamatata ka vakaibalebale sara mai na veilecayaki qo? Sa ikoya na vosa mai vei ira na parofita, daurairai, kei na dauvakatakila ni Kalou.
Au nanuma vakamatata ni oti na noqu a sele ena 2018, ni’u lesu tiko ki cakacaka, au a tu ena ikelekele ni motoka ena itikotiko liu ni Lotu. Vakasauri ga, au a rogoca na domo i Peresitedi Russell M. Nelson ni kaci tiko mai, “Taniela, Taniela.” Au a cici yani vua, ka taroga o koya se’u sa vakaevei tiko.
Au a kaya, “Au sa bula vinaka sara tiko mai, Peresitedi Nelson.”
A vakasalataki au ka mokoti au o koya. Au a vakila dina na veiqaravi ni tamata yadua mai vua e dua na Parofita ki na “dua.”
Sa lakova oti o Peresitedi Nelson e vuqa na veimatanitu e vuravura. Ena noqu vakasama, o koya e sega walega ni veiqaravi tiko ki na udolu, ia e veiqaravi tiko ki na udolu na “dua.” Ena nona cakava oqori, sa wasea tiko o koya na loloma ni Kalou vei ira kece na Luvena.
Wale tikoga qo, na vosa nei Peresitedi Nelson e sa dua na ivurevure ni yaloqaqa kei na veivakauqeti kivei ira na tamata ena yatu Filipaini. Me vaka ga na veimatanitu e vuravura, ena 2020 a vakaleqai sara vakaca na yatu Filipaini mai na matedewa na COVID-19, vakatalega kina na kacabote ni ulunivanua kama, uneune, cagilaba kaukauwa, kei na ualuvu veivakarusai.
Ia, me vaka e dua na duru ni rarama ni cila basikata na o loaloa ni rere, galili, kei na taqaya, a yaco mai na vosa ni parofita. A okati kina na kaci me baleta na lolo kei na masu e vuravura raraba kei na ivakasala meda toso ki liu veitalia na matedewa oqo. A sureti keda o koya me da cakava me noda vanua tabu ni vakabauta ni tamata yadua na noda itikotiko. O koya a vakamasuta na Yalododonu Edaidai e veivanua kecega me rokovi ira kece na luve ni Kalou ka laiva me qaqa duadua ga na Kalou ena noda bula.2
A veivakauqeti vakakina na vidio ivakadinadina wale tikoga qo nei Peresitedi Nelson me baleta na kaukauwa ni yalo dauvakavinavinaka, kei na nona itini masu a voqa takosava na yatu Filipaini.3 Ena yasana o Leyte, a vakaraitaki kina na vidio ena dua na soqoni veicurumaki vakamatalotu ka a cavuti talega vaka tiki ni dua na vunau ni bete. Na yatu Filipaini, ni sala vata kei na vuravura taucoko, e sa rui vakalougatataki me vakila na loloma ni Kalou ena vosa eso ni Nona parofita digitaki.
iKatolu, Na Veivunauci e Rawa Ni dua na iVakaraitaki ni Loloma ni Kalou vei ira na Luvena
Ena so na gauna, e dau vakatakila Nona loloma na Kalou ni vunauci keda. E sa dua na sala ni veivakananumi vei keda ni lomani keda o Koya ka sa kila se o cei o keda. Na Nona veivakalougatataki ni vakacegu yalataki e sa dola tu vei ira kece era yabeta ena yalodei na salatu ni veiyalayalati ka ra lomasoli mera ciqoma na veivakadodonutaki.
Ni da sa kila vinaka na veivunauci ka da lomasoli me ciqoma, e sa yaco me dua na veisele-veivakabulai vakayalo. Ia me tei wawa mada, o cei e dau taleitaka na veisele? Ia kivei ira era gadreva ka ra sa lomasoli me ciqoma, e sa rawa ni veivakabulai. Na Turaga sa dau vunauci ira e lomana. E tukuna vei keda na ivolanikalou (raica na Iperiu 12:5–11; Ilamani 12:3; Vunau kei na Veiyalayalati 1:27; 95:1). Na veivunauci oya, se veisele-veivakabulai vakayalo ena kauta mai na veisau e gadrevi ena noda bula. Eda na qai kila, kemuni na taciqu kei na ganequ, ni vakasavasavataka ka vakamakaresesetaka na noda waqawaqa e loma.
Ko Josefa Simici, na Parofita ni Veivakalesui Mai, a vunauci. Ena kena mai yali na 116 na draunipepa ena iVola i Momani, e a veivakadodonutaki ka vakaraitaka na Turaga na loloma ni a kaya: “E sega ni dodonu mo rerevaka vakalevu na tamata mai vua na Kalou. … Ia ko iko a dodonu mo yalodina. … Raica, sai iko ko Josefa, ko sa digitaki. … Nanuma, na Kalou sa rui yalololoma; okoya, mo veivutuni” (Vunau kei na Veiyalayalati 3:7–10).
Ena 2016, ni’u a veiqaravi tiko ena kaulotu e Little Rock, Arkansas, au a kerei Baraca Cava me kauta e dua nai oloolo kivei ganequ qase, ka tiko ena dua na yanuyanu e Viti. Na nona sauma mai a sega ni dua na ka au a namaka. “I Peresitedi Wakolo,” a kaya o koya ena rarawa, “o ganemu sa takali yani ka a sa bulu ena 10 na siga sa oti.” Au a lomalomani-au ka via rarawa vakalailai ni ratou sega mada ga ni bau vakaraitaka mai vei au na noqu matavuvale.
Ena siga tarava, ni vakavulici ira tiko na daukaulotu na watiqu, a curuma na yaloqu na vakasama oqo, “Taniela, na veika kece oqori ko na yalomatua ka torocake kina. Ko sa vakavulica ka wasea tiko nomu ivakadinadina me baleta na veisorovaki i Jisu Karisito; ia oqo mo bulataka vakakina.” Au a qai vakananumi kina ni “sa kalougata na tamata sa vunauca ko koya na Kalou; a ka oqo [meda] kakua kina ni beca [na nona vei]vakararawataki…ko Koya sa Kaukauwa” (Jope 5:17). O ya a dua na veisele-veivakabulai vakayalo me baleti au, ka a vakasauri ga na veika e vakavotukana mai kina.
Ni’u a se qai vakasamataka sara tikoga na ka sotavi oya, au sa kacivi me’u solia na noqu iotioti ni vakasama ki na veivosaki oya. Ena maliwa ni veika tale eso, au a wasea na lesoni ka’u se qai vulica ga: dua, au se qai vunauci oti ga mai vua na Yalo Tabu ka’u a taleitaka baleta, ni’u a rogoca duadua ga; rua, baleta na solibula kei na i voli ni iVakabula, au na sega tale ni raica kina na noqu bolebole me vaka na veivakatovolei kei na veika rarawa, ia au sa na raica ga me veika ni vuli sotavi; kei nai ka tolu, baleta na Nona bula uasivi sara ka tawa-cala, au na sega tale ni raica kina na noqu yaco-koso kei na tawa-rawaka me vaka na malumalumu eso, ia, me vaka ga noqu madigi ni torocake tikoga. Na ka sotavi oqo a vukei au me’u kila kina ni Kalou e dau vunauci keda baleta ni lomani keda o Koya.
Meu tinia. Ni Tamada Tawamudu kei na Luvena o Jisu Karisito erau vakaraitaka Nodrau loloma ena Nodrau cakava me rawa vei keda meda rawata na veiwekani tawamudu kei Rau kei na noda lewe ni matavuvale, ena Nodrau kacivi ira na parofita ni gauna oqo mera vakavulici ka veiqaravi kivei keda, kei na Nodrau vunauci keda me vukei keda meda vuli ka torocake. “Me vakavinavinakataki na Kalou me baleta na isolisoli tawa-vakatauvatani rawa ni Luvena Tabu,”4 noda Turaga vakaturicaketale, okoya na Karisito bula. Ena yaca i Jisu Karisito, emeni.