Oqo Na Noda Gauna!
Sa talai keda mai ike na Kalou, ena gauna oqo, ena igauna vakaitukutuku oqo.
Ena 1978, au duri tu ena dua na rara ni qito ena vale ni sarasara ka vutucoqa tu ena 65,000 na dausarasara E tu e liu vei au e vuqa na ito era sagata mera kidomoki au. Oqo e se qai matai ni noqu qito vaka quarterback ena National Football League, ka keitou sota vata tiko kei na timi qaqa ni Super Bowl. Vakaidina, au vaqaqa tu ke ganiti au vinaka meu vakaitavi e loma ni rara. Au suka imuri meu solia na matai ni noqu pasi, na gauna au laiva kina na polo, au vakila e dua na icumu kaukauwa au se qai bau sotava.vakadua. Ena gauna oya, niu davo tu ena rukudra na ilala dauqito levu oya, au vakananuma se cava au cakava tu ekea. Meu cakava edua na vakatulewa. Meu na laiva beka na noqu vakatitiqa me rawai au, se meu na yaloqaqa ka kaukauwa tu ni duri cake ka toso tikoga?
Na Veika e Sala vata kaya Mai
Au sega ni kila tu ena gauna oya ni na vakarautaki au ki na veimadigi muri mai na ka e sotavi oqo. Sa gadrevi meu vulica ni sa rawa meu na kaukauwa ka yaloqaqa tu ena veituvaki drakidrakita eso.
Ena rairai sega beka ni bibi sara tu e dua na qito rakavi ni Merika me vaka na bolebole eso o na sotava. Ena levu na ituvaki, ena sega na vale ni sarasara ka sinai tu na tamata era sarava. Ia na nomu vakatulewa yaloqaqa ena vakavotukana tawamudu.
De rairai beka eda sega ni dau taleitaka na bolebole. Ia e raici keda tu na Tamada Vakalomalagi vaka e dua na dautaravale qaqa ena Nona matanitu. O ya na vuna e talai keda kina ike ka donuya na gauna bibi ni vakatulewa oqo ena itukutuku kei vuravura. Oqo na noda gauna!
Rogoca na ka a tukuna o Peresitedi Russell M. Nelson ni oti toka ga na nona vakatikori me Peresitedi ni Lotu: “Na noda iVakabula ka Dauveivueti, o Jisu Karisito, ena vakayacora eso na Nona cakacaka cecere duadua ena maliwa ni gauna oqo kei na Nona lesu mai. Eda na raica na veivakatakilakila veivakurabuitaki ni sa vakatulewataka tu na Lotu oqo na Kalou na Tamada kei na Luvena, o Jisu Karisito ena sala vakaturaga ka lagilagi” (“iVakatakilakila ki na Lotu, iVakatakilakila ki na Noda Bula,” Liaona, Me 2018, 96).
Cakacaka cecere duadua? Vakatakilakila veivakurabuitaki? Ena vakaevei tu na kena irairai? Na cava ena noda itavi, ka da na kila vakacava na ka me caka? Au sega ni kila na isaunitaro taucoko, ia au kila ga ni sa gadreva na Turaga meda vakarau tu! Na cakacakataki ni kaukauwa vakamatabete ena bula kilikili e se sega mada ni bibi sara.
Eda sa vakabauta li na parofita ni Kalou? Eda rawa li ni raica ka vakamaucokotaka na noda icavacava? Io sa rawa, ka sa dodonu me vakakina, baleta oqo sa noda gauna!
Ni da rogoca nai talanoa ni talai qaqa ni Kalou era liu vei keda—vakataki Mosese, Meri, Moronai, Alama, Eseta, Josefa, kei na vuqa tale—sa vaka era levu cake o ira mai na bula. Ia era sa sega ni duidui sara mai vei keda. Era sa tamata ga vakataki keda ka sotava na dredre eso. Era a vakararavi vua na Turaga. Era a digidigi donu ena gauna drakidrakita eso. Ka mai na nodra vakabauti Jisu Karisito, era sa qarava na cakacaka e gadrevi tu ena nodra gauna.
Masima Vinaka
Vakasamataka na qaqa o Josua ena Veiyalayalati Makawa. O koya e dua na imuri matua i Mosese, e dua na iliuliu levu sara vakaitukutuku. Ni leqa oti tu o Mosese, e sa gauna i Josua. O koya me sa na liutaki ira na luvei Isireli ki na vanua yalataki. Me na kitaka vakacava o koya? A sucu ka susugi tu vakabobula o Josua e Ijipita. A sega tu na nona ivoladusidusi se iyaloyalo veivakasalataki eso me vukei koya. E sega tu mada ga na nona talevoni tuberi. Ia e taukena tu o koya na yalayala oqo mai vua na Turaga:
“Me vaka kau a tiko vata kei Mosese, au na sega ni weletaki iko, se biuti iko.
“Mo kaukauwa ka qaqa” (Josua 1:5–6).
Niu se qai dua na Vitusagavulu vou, au ciqoma e dua na qiri bibi mai na Valenivolavola ni Mataveiliutaki Taumada, ena kena kerei tu meu matataka na parofita ena sikovi ni dua na cauravou ena valenibula—kusarawa. Na yaca ni cauravou o Zach. A vakavakarau tu o koya me lai kaulotu ia a sotava e dua na vakacalaka ka mani mavoa vakaca sara na uluna.
Niu draiva tu ki valenibula, a veiciriyaki na noqu vakanananu. E dua na ilesilesi ni parofita—o veiwali tiko? Na cava au na sotava tu? Au na vukea vakacava na cauravou oqo? E veirauti tu beka na noqu vakabauta? Sa yaco me noqu itakele na masu deivaki kei na kila ni sa tiko vei au na dodonu ni lewa ni matabete.
Niu yaco yani, a davo tu o Zach ena dua na idavodavo ni valenibula. A vakarau tu e dua na dauveiqaravi me kauti koya ki na rumu ni veisele me rawa ni ra vakamamadataka na vuniwai na icolacola ni nona qavokavoka. Au a raica na matatagitagi i tinana kei na yaloqaqa ni tokani ka duri voleka tu, kau kila saraga ni sa gadreva tu e Zach e dua na veivakalougatataki ni matabete. A se qai vakatikori ga na nona itokani ena Matabete i Melikiseteki, kau a kerei koya me vukei au. Au a vakila na kaukauwa ni matabete ni keirau solia ena yalomalumalumu e dua na veivakalougatataki vei Zach. Sa qai vakusakusataki yani o koya ki na veisele, ka vakadeitaka e dua na vakanananu veivakacegui ni sa na vakayacoka na iVakabula me vaka na Nona lewa.
A vakayacora na dauveiqaravi vakavuniwai e dua na iotioti ni dikevi yago ni bera ni tekivuna na veisele. Era dikeva tu, ena nodra kurabui, ni na sega ni gadrevi na veisele.
Ni oti na veivakasalataki tale eso, sa rawa kivei Zach me lako ka vosa tale. A vakacavara vinaka o koya na nona kaulotu ka sa qarava tiko oqo e dua na matavuvale totoka.
Vakaidina, oya e sega ni kena icavacava. Au sa solia oti eso tale na veivakalougatataki vakamatabete ena vakabauta vataga, ka sa sega ni solia vakataucoko na Turaga na veivakabulai ena bula oqo. Eda nuitaka na Nona inaki ka laiva tu na kena macala Vua. Eda sega ni rawa ni digitaka tu ga na icavacava ni noda qaravitavi, ia eda rawa ni digitaka me da sa tu vakarau na veiqaravi.
E na sega beka ni o kerei mai na Mataveiliutaki Taumada mo mataki iratou ena dua na ituvaki ni vakarerei-bula. Ia eda sa kacivi taucoko me da cakava na ka veisautaki-bula eso vaka na mata ni Turaga. Ena sega ni biuti keda o Koya. Oqo na noda gauna!
A tiko o Pita, na Apositolo liu ni iVakabula ena dua na waqa e wai ni sa raici Jisu ni lako voli e dela ni wai. A via tomani Koya o Pita, ka kaya na iVakabula, “Lako mai.” Ena yalodoudou ka veivakurabuitaki, a biuta tu na waqa o Pita ka tekivu lako yani vua na iVakabula. Ia na gauna sa goleva kina o Pita na kaukauwa ni cagi, sa luluqa na nona vakabauta. “Sa qai rere; sa tekivu me lutudromu, a tagi, ka kaya, Turaga, ni vakabulai au. Sa qai dodoka sara na ligana ko Jisu, a sa taura.” (Raica na Maciu 14:22–33.)
Ni liwava na noda bula na cagi, evei na vanua eda rai kina? Nanuma, ni sa tiko ga e dua na ivurevure nuitaki ni kaukauwa kei na yaloqaqa. Sa dodo tu vei keda na ligai Jisu, me vaka ga a dodoki vei Pita. Ni da torovi Koya yani, ena vakabulai keda o Koya ena yalololoma. Eda sa Nona. A kaya o Koya, “Kakua ni ko rere: niu a voli iko, au a kacivi iko ena yacamu; ko sa noqu” (Aisea 43:1). Ena qaqa duadua ga o Koya ena nomu bula kevaka o vakatarai Koya. Sa nomuni na digidigi. Raica na Russell M. Nelson, “Me Qaqa Duadua ga na Kalou,” Liaona, Nove. 2020, 92–95.)
Ni sa mai cava na nona bula, a vakamasuti ira na nona tamata o Josua, “Mo ni digitaki koya edaidai kemuni na qarava; … ia koi au kei ira na noqu lewe-ni-vale, keitou na qaravi Jiova” (Josua 24:15). Ena vuku ni digidigi a cakava o koya me qarava na Turaga, a yaco o Josua me dua na iliuliu rogolevu ena nona gauna. Kemuni na noqu itokani lomani, oqo na noda gauna! Ka navuca na noda icavacava na noda digidigi eso (raica na Thomas S. Monson, “Decisions Determine Destiny” [Brigham Young University fireside, Nov. 6, 2005], speeches.byu.edu).
Niu a veiqaravi tu vaka bisopi, a dua tu na neimami ibole ena tabanalevu: Na digidigi vinaka sa tautauvata na bula marau—tawamudu tu. Era na lakosiviti au na itabagone ena olo ni ra kaya tu, “Bisopi, au sa caka digidigi vinaka tiko!” O ya na tatadra ni dua na bisopi!
Na cava eda vakaibalebaletaka ena “digidigi vinaka”? E dua a tarogi Jisu, “A cava na ivakaro levu ena vunau?” A sauma o Koya:
“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.
“Ai matai ni vunau oqo ka levu.
“A sa tautauvata na kenai karua, Mo lomana na kai nomu me vaka ko lomani iko” (Maciu 22:36–39
Au sega ni kila baleti iko, ia niu wiliiki rau nai vunau levu oqo, au siqema tu nai katolu ni vunau vakabibitaki: mo lomani iko.
O sa bau vakasamataka tu mo lomani iko me dua nai vunau? Eda rawa li ni lomana vakaidina na Kalou kei ira na Luvena kevaka eda sega ni lomani keda tu?
E dua na iliuliu yalomatua a vakasalataka wale toka ga oqo e dua na tamata ka tovolea tiko me ulabaleta na yabaki eso ni digidigi veivakacalai. Sa madua sara na tamata oya, ka vakatitiqataka tu ni sa kilikili kaya o koya na loloma ni dua na tamata.
A kaya vua na nona iliuliu, “Na Turaga sa kilai iko, lomani iko, ka sa taleitaki iko [tu] kei na veikalawa yaloqaqa o sa cakava tiko.” Ia qai vakuria o koya, “Sa gadrevi [mo] rogoca na ivunau mo lomani iko mo rawa ni vakila tu na loloma ni Kalou ka lomani ira na tani.”
Ni sa rogoca na turaga oqo na ivakasala oya, sa raica na bula o koya ena mata vou. A kaya e muri o koya, “Au sa vakayagataka tu na noqu bula taucoko ena sagai ni qara vakacegu kei na veiciqomi. Au sa vakaraica tu na veika oya ena vuqa na veivanua cala. Ena loloma duadua ga ni Tamada Vakalomalagi kei na iVakabula au sa rawa ni kune vakacegu kina. Au kila ni Rau sa vinakata meu lomani au, e sa sala duadua sara vakaidina au rawa ni vakila kina na Nodrau loloma kivei au.
Sa vinakati keda na Tamada Vakalomalagi meda lomani keda—sega ni mai dokadoka se nanumi keda tu, ia meda raici keda me vaka sa raici keda o Koya: eda sa Luvena vakamareqeti. Ni sa lutudromu na dina oqo ki na lomada, sa tubu na noda lomana na Kalou. Ni da raici keda tu ena veidokai dina, sa tadola na lomada meda vakayacora vakakina vei ira na tani. Na levu ga ni kena kilai na noda yaga vakalou, na vinaka cake ni noda kila vakamatata na dina vakalou oqo: ni sa talai keda mai kike saraga na Kalou, ena gauna oqo, ena ituvaki ni gauna vakaitukutuku oqo, meda rawa ni caka vinaka sara vakalevu ena taledi kei na isolisoli eso e tiko vei iko. Oqo na noda gauna! (Raica na Russell M. Nelson, “Yaco Mo Meleniumi Dina” [worldwide devotional for young adults, Jan. 10, 2016], broadcasts.ChurchofJesusChrist.org).
E vakavulica o Josefa Simici ni parofita vakayadua, ena yabaki vakayadua, “a vakanamata tu ena nanamaki rekitaki ki na siga eda sa bula tu kina; … era sa lagata ka vola ka parofisaitaka na noda siga oqo; … sai keda na tamata taleitaki e sa [digitaka] na Kalou me vakavutuya na lagilagi Edaidai” (Nodra iVakavuvuli na Peresitedi ni Lotu: Josefa Simici [2007], 186).
Ni ko sotavi bolebole tu e veisiga, nanuma na veivakadeitaki oqo mai vei Elder Jeffrey R. Holland: “Sa tau tu ki na usouso ni tabada e levu na ka, ia e sa na dua na ka bulataki lagilagi ka sautu sara. … E sa vakatakilai oti tu na qaqa ena iotioti ni veisivisivi oqo. Na qaqa oqo e sa tiko ena ivolatukutuku … , na ivolanikalou!” Kakua ni Rere, Mo Vakabauta ga” [address to Church Educational System religious educators, Feb. 6, 2015], broadcasts.ChurchofJesusChrist.org).
Ena mua ni macawa totoka ni Siganimate oqo, meu veisureti tu meda sa masulaka kece ni kila ka vakabibitaka na noda dui tavi ni da vakavakarau ki na siga lagilagi ena lako tale mai kina na iVakabula. Sa lomani keda vakalevu na Turaga mai na noda kila dei tu, ka na sauma o Koya na noda masu! Se da tiko ena dua na rara ni qito, ena rumu ni valenibula, se ena dua tale na vanua, sa rawa ni da dua na tiki bibi ni veika vakamareqeti oqo—baleta oqo sa noda gauna! Ena yacai Jisu Karisito, emeni.