iTukutuku ni Veikidavaki
Oni sa kidavaki ki na koniferedi raraba kei na madigi ni vakarogoca na domo ni Turaga.
Kemuni na taciqu, ganequ, kei na itokani lomani e vuravura taucoko, o ni sa kidavaki vakayadua ki na koniferedi raraba oqo. Eda sa soqoni vaka matavuvale e vuravura taucoko ena gagadre ni sokalou kivua na noda Turaga ka iVakabula, o Jisu Karisito. Vinaka na veitomani vata kei keimami.
Na yabaki sa oti e sa dua na kena e vola itukutukutaki. Sega ni vakatitiqataki na noda sa vulica vakayadua na veika eda a sega ni kila taumada. Eso na lesoni au a kila tu eliu e sa volai tu e utoqu ena sala vou ka veidusimaki eso.
Me ivakaraitaki, au sa kila deivaki ni sa liutaka tu na Turaga na cicivaki ni Nona Lotu. E a kaya, “Au na vakaraitaka vei [iko] niu sa rawa ni cakava na noqu cakacaka vakai au.”1
Vakawasoma, na noqu raica tonawanawa tu kei rau na noqu daunivakasala na Nona veivuke ena veigauna drakidrakita veibolei ni oti na neitou caka vinaka duadua ka sega ni cakava rawa tale e dua na ka. Keitou sa kidroa vakalevu sara vakaidina.
Au sa kila vakavinaka sara tu ga oqo na ka a vakaibalebaletaka ni a kaya, “Raica, au na vakusakusataka na noqu cakacaka ena kena gauna.”2 Sa vakavuqa sara na noqu dau marautaka na Nona veidusimaka ka liutaka tiko na vakusakusataki ni Nona cakacaka—ena gauna sara madaga ni mate veitauvi raraba.
Kemuni na taciqu kei na ganequ lomani, na kaukauwa ni Lotu sa koto ena sasaga kei na vakatuburi ni nodra ivakadinadina na vavakoso. Na ivakadinadina esa bucini saraga e vale. Ena yabaki sa oti, e vuqa vei kemuni sa vakalevutaka sara na vulici ni kosipeli ena nomuni tikotiko. Au vakavinavinakataki kemuni, ka ra vakavinavinakataki kemuni na luvemuni.
Sa tomani tiko na cakacaka levu ni kena vakavoutaki na Valetabu e Salt Lake. Mai na noqu valenivolavola au raica vinaka na cakacaka e vakayacori tiko ena plaza ni valetabu.
Niu raica tiko na nodra kelia na tamata cakacaka na waka ni vunikau qase, vakadavo paipo, livaliva, kei na dua na igunugunu turu, au vakananuma na gagadre kivei keda vakayadua ena kena vagalalataki, ena veivuke ni iVakabula, na veisoqosoqowa makawa ena noda bula.
Na kosipeli i Jisu Karisito e sa kosipeli ni veivutuni.3 Ena vuku ni Veisorovaki ni iVakabula, sa vakarautaka na Nona kosipeli na veisureti meda sa veisau, tubu, ka caka dodonu vakalevu tikoga. E sa kosipeli ni vakanuinui, ni veivakabulai, kei na toro cake. Vakakina, na kosipeli sa itukutuku ni reki Sa reki na yaloda ena veikalawa lailai eliu eda taura.
Sa tiki ni vakasokomuni i Isireli, ka dua na tikina bibi, oya na ivakaro meda sa tamata bula kilikili ka lomasoli ka vukea na vakarautaki ni vuravura ena iKarua ni Lako Mai ni Turaga.
Ni da vakatudaliga ki na itukutuku sa vakarautaki vakavinaka mai vei ira na noda iliuliu ena veidusimaki ni Yalo Tabu, au sureti kemuni mo ni masulaka mo ni kila na veika sa dodonu me vagalalataki mai na nomuni bula mo ni rawa ni bula kilikili vakalevu sara kina.
Au lomani kemuni, na taciqu kei na ganequ, ka vakadinadinataka ni sa kilai ka lomani kemuni vakayadua na Tamada Vakalomalagi kei na Luvena Daulomani. Rau sa tu vakarau me vukei iko ena veicavu kalawa iliu o taura. Oni sa kidavaki ki na koniferedi raraba kei na madigi ni vakarogoca na domo ni Turaga. Ena yaca i Jisu Karisito, emeni.