COVID-19 kei na Valetabu
Maroroya tiko na nomuni veiyalayalati kei na kalougata ni valetabu vakabibi ena vakasama kei na yalomuni. Mo dina tiko ki na veiyalayalati o ni sa cakava.
Kemuni na taciqu kei na ganequ lomani, eda sa mai kana magiti sara vakayalo. Au vakavinavinaka vakalevu ena masu, itukutuku, kei na sereivakatagi kece ni koniferedi. Vinaka vakalevu vei kemuni yadua na sema mai, mai na veivanua cava ga.
Tekivu na yabaki sa oti, ena vuku ni mate na COVID-19 kei na noda gagadre meda lewei vuravura vinaka, a dredre sara na lewa me sogo toka vakawawa na valetabu kece. Ena veivula a tarava, keimami vakila na veivakauqeti mera sa dola tale vakamalua na valetabu ena kena qarauni vinaka. Era sa dola tale tiko na valetabu ena va na iwasewase, ka muria tiko vakadodonu na lawa ni matanitu kei na ivakarau ni veitaqomaki.
Na valetabu ena iwasewase 1, baleti ira na veiwatini era sa ciqoma oti na nodra dui edaumeni sa rawa me rau vauci me dua na veiwatini.
Na valetabu ena iwasewase 2, baleta nodra cakacaka vakalotu kece na bula, oka kina nona vakaedaumeni e dua, nodrau vauci e dua na veiwatini, kei ira na nodra vauci na gone vei nodra itubutubu. Eda se qai veisautaka oti na lawa ni iwasewase 2 ka rawa vei ira na itabagone, lewenilotu vou, kei na so tale era vakaivolatara vakaiyalayala mera na papitaisotaki ena vukudra na nodra qase e liu.
Baleta na valetabu ena iwasewase 3, baleti ira sa lokuci tu nodra gauna mera vakaitavi sega walega ena cakacaka vakalotu ni bula ia ena cakacaka vakalotu kece ni veisosomitaki vei ira na qase e liu.
iWasewase 4 sai koya na lesu, ki na veiqaravi taucoko ni valetabu.
Keimami sa vakavinavinaka ena nomuni vosota kei na veiqaravi yalodina ena gauna ni veisau kei na ibolebole oqo. Sa noqu masu ni nomuni gagadre mo sokalou ka veiqaravi e valetabu mena caudre ka ramase sara vakalevu.
Ia, o na rairai vakasamataka tiko na gauna cava beka o na lesu kina ki valetabu. Kena isau: Na nomuni valetabu ena dola ni sa vakatara vakalawa na nomuni matanitu me dola. Ni yaco na revurevu ni COVID-19 ena nomu vanua me sa taqomaki vinaka, ena dola na nomuni valetabu. Mo ni cakava kece na kena o ni rawata me vakalailaitaki na levu ni COVID ena nomuni vanua me levu na madigi ni nomuni valetabu
Ia, mo ni maroroya tiko na nomuni veiyalayalati kei na kalougata ni valetabu vakabibi ena vakasama kei na yalomuni. Mo dina tiko ki na veiyalayalati o ni sa cakava.
Eda sa tara valetabu tiko ki na veisiga ni mataka. E vasagavulu ka dua na valetabu sa tara tiko nikua se vakavinakataki tiko. Ena yabaki sa oti, ni yaco tiko na mate raraba, a caka na vakasobuduru ni 21 na valetabu vou.
Eda gadreva me kau mai vakavoleka na vale ni Turaga kivei ira noda lewenilotu, mera rawata nodra madigi vakalou mera dau tiko wasoma e valetabu ni sa rawa vei ira.
Niu kacivaka yani na ituvatuva e tiko me tara e 20 tale na valetabu, au vakananumi ira ka vakacaucautaki ira na painia—ena veigauna sa oti kei na siga nikua—ka sa veivuke vakalevu na nodra bula vakatabui me rawa ni yaco tu na veika vakairogorogo, nikua. Ena tara na valetabu vou ena veivanua oqo: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; kei Smithfield, Utah.
Na cakacaka ni valetabu sa tiki cecere ka bibi ni Vakalesui mai ni kosipeli i Jisu Karisito ena kena taucoko. Na cakacaka vakalotu ni valetabu e vakasinaita noda bula ena kaukauwa kei na qaqaco—sega ena dua tale na sala. Eda sa vakavinavinakataka na Kalou ena veivakalaougatataki oqo.
Ni mai sogo tiko na koniferedi oqo, keimami kaya tale ni keimami lomani kemuni. Sa neimami masu ni Kalou ena sovaraka mai na Nona kalougata kei na veikaroni vei kemuni yadua. Eda duavata, ena vakaitavi ena Nona veiqaravi tabu. Ena yaloqaqa, meda sa qai guta tiko na cakacaka lagilagi ni Kalou! Sa noqu masu kina oqo ena yaca tabu i Jisu Karisito, emeni.