Dou Na Qai Sereki Dina
Ko Jisu Karisito sa iKoya na rarama e dodonu me da dulaka cake ena gauna butobuto sara ga ni noda bula vakayago.
Kemuni na taciqu kei na ganequ lomani, au sa vakavinavinaka vakalevu ni soli vei au na gauna me‘u vosa yani vei kemuni mai Aferika. Sa ka kalougata ni tiko na tekinoloji nikua ka me vakayagataki ena sala vinaka duadua me rawa kina na veitaratara yani vei kemuni ena vanua cava ga o ni tiko kina.
Ena Sepiteba ni 2019, o Sister Mutombo kei au, ena neirau i lesilesi vaka veiliutaki ena Maryland Baltimore Mission, a neirau na madigi me keirau sikova eso na vei itikotiko makawa ni Lotu e Palmyra, New York, ena neirau tiko ena semina ni veiliutaki ni kaulotu. Keirau a lak‘i vakacavara na neirau veisiko ena Veikau Tabu. Na neirau inaki ni sikova na Veikau Tabu a sega ni baleta me keirau raica edua na raivotu mai lomalagi, ia keirau a vakila ni tiko na Kalou ena vanua tabu oqo. E a sinai na lomai keirau ena vakavinavinaka vua na Parofita o Josefa Simici.
E na neirau a lesu voli mai a raica o Sister Mutombo ni‘u a matadredre voli ena noqu a draiva tiko, ka mani taroga, “Na cava na vu ni nomu malaude?”
Au a sauma yani, “Noqu daulomani Nathalie, na dina ena dau qaqa tikoga mai na veika cala ena veigauna kece ga, kei na butobuto ena sega ni tiko vakadua e vuravura baleta ni sa vakalesui mai na kosipeli i Jisu Karisito.”
Na Kalou na Tamada kei Jisu Karisito e rau a sikova na cauravou ko Josefa Simici me vakavotuya mai na veika a vunitaki tu, me rawa vei keda me da ciqoma “na kena kilai na veika ena kedra ituvaki ena gauna oqo, … kedra ituvaki ena veigauna sa oti, kei na kedra ituvaki ena veigauna e [sa bera mai]” (Vunau kei na Veiyalayalati 93:24).
Sa oti e 200 na yabaki, ka vuqa era se vakasaqara tiko ga na dina e gadrevi me ra sereki kina mai na vei itovo eso kei na lasu eso ka sa vakatetea tu e vuravura na meca. Era sa lewe vuqa sara era sa “vakamatabokotaki ena nodra ivadi qaseqase na tamata” (Vunau kei na Veiyalayalati 123:12). Ena nona ivola ki Efeso, a vakavulica o Paula: “O iko sa moce mo yadra mai, ka tucake mai na mate, ena qai vakararamataki iko na Karisito” (Efeso 5:14). Sa yalataka na iVakabula ni o Koya ena rarama kivei ira kece era rogoca na Nona vosa (raica na 2 Nifai 10:14).
Ena tolusagavulu ka lima na yabaki sa oti, o irau na noqui tubutubu e rau a vakamatabokotaki talega ka rau a vakasaqaqara voli vakaukauwa me rau kila na dina ka rau a lomaleqataka se na vanua cava me rau goleva me rau na kunea kina. O irau na noqu itubutubu e rau a sucu ruarua ena koro, na vanua ka yavutaki vinaka tu kina na itovo vakavanua ena bula ni tamata yadua kei na vei matavuvale. E rau a biuta ruarua mai na nodrau dui koro ni rau a se itabagone ka rau a gole mai ki na siti, ena vasaqarai ni dua na bula e vinaka cake.
E rau a vakamau ka tauyavutaka na nodrau matavuvale ena sala rawarawa ga. Keitou a voleka ni lewe walu na tiko ena dua na vale lailai—o irau na noqu itubutubu, o rau na ganequ kei au, kei na dua na tavalequ ka dau tiko voli ga kei keitou. Au a dau lomatarotarotaka tu se keitou dua dina na matavuvale, baleta ni keitou sega ni dau vakatarai na gone me keitou kana vata kei rau na neitou itubutubu mai na duavata ga na teveli. Ni dau suka mai ena cakacaka o ta, ena gauna ga e curu mai kina ki vale, keitou sa dau kerei sara me keitou biubiu ka gole ki tuba. E dau lekaleka ga vei keitou na bogi, baleta ni dau dredre na neitou moce ena kena vakilai ni sega na veiyaloni kei na veilomani dina ena nodrau bula vakaveiwatini na noqu itubutubu. Na neitou itikotiko e a sega walega ni lailai na kena levu, ia e a vanua butobuto. Ni bera na neitou sotavi rau na daukaulotu, keitou a dau lako ilotu ena vei lotu duidui eso ena vei Sigatabu. E a matata vinaka ni o irau na noqu itubutubu e rau a vakasaqara voli e dua na ka ka sega ni rawa ni vakarautaka o vuravura.
A vaka tiko oqo me yacova ni keitou a sotavi Elder kei Sister Hutchings, o irau na imatai ni daukaulotu qase ka kacivi me veiqaravi e Zaire (ka kilai tu nikua me DR e Koqo se Koqo-Kinshasa). Ni tekivu na neitou sota vata tiko kei rau na daukaulotu totoka oqo, ka rau a vaka na agilosi ni Kalou, au a raica ni dua na ka sa tekivu me veisau ena neitou matavuvale. Ni oti na neitou papitaiso, sa tekivu veisau vakamalua ka vakaidina na itovo ni neitou bula ena vuku ni kosipeli vakalesuimai. Na vosa i Karisito sa tekivu me vakalevutaka na yaloi keitou. Sa tekivu me vakavinakataka na neitou kila ka, ka yaco me sa kanakana vinaka mai vei keitou, baleta ni dina keitou a ciqoma e rawa me laurai ka vakavuna me keitou raica kina na rarama, ka sa yaco me sa serau tikoga mai e veisiga na rarama oqo.
Na kilai matata ni inaki ni kosipeli a vukei keitou me keitou bula vakataka cake na iVakabula. Na levu ni neitou vale a sega ni veisau; se na neitou ituvaki ni bula vakatamata. Ia au a vakadinadinataka e dua na veisau ena lomadrau na noqui tubutubu ni keitou masu e veisiga, ena mataka kei na yakavi. Keitou a vulica na iVola iMomani; lotu vakavuvale ena yakavi; keitou a yaco dina me dua na matavuvale. E vei Sigatabu kece keitou dau yadra ena 6 ena mataka lailai me keitou vakavakarau ena lako ki Lotu, ka dau taura e vica vata na auwa na neitou i lakolako ki Lotu ena veimacawa ka keitou sega ni vosakudrukudru taka. Sa dua dina na ka sotavi e totoka me vakadinadinataki. O keitou, ka a lako voli ena butobuto ena dua na gauna, sa yaco me keitou vakasava tani na butobuto mai na keitou maliwa (raica na Vunau kei na Veiyalayalati 50:25) ka raica edua na “rarama levu” (2 Nifai 19:2).
Au nanuma ena dua na siga ni a sega ni lomaqu me‘u yadra vakamataka lailai me keitou masu vakavuvale, au a kaya lo yani vei ganequ, “Sa sega dina ni dua tale na ka eda rawa ni cakava ena itikotiko oqo, eda sa masu, masu, masu ga.” A rogoca o tamaqu na veika au a tukuna. Au nanuma deivaka na ka a vakayacora ena nona vakavulici au ena yalo dei kei na loloma, “Na dede ga ni nomu tiko ena itikotiko oqo, ko na masu, masu, masu.”
E dau voqa tu ga e daligaqu na domoi tamaqu ena veisiga. Na cava o ni nanuma ni keirau dau cakava kei Sister Mutombo kei iratou na luvei keirau ena gauna oqo? Keitou dau masu, masu, ka masu. Sa ikoya oqo na keirau idivi.
Na tagane ka sucu mataboko ka vakabulai koya ko Jisu Karisito, ni sa vakasosataki mai vei ira na tu voleka kei ira na Farisi, a kaya:
“Na tamata sa vakatokai ko Jisu sa ulia na soso, ka boroya na mataqu, ka kaya vei au, Lako ki Sailoama, ka tavoi: ia ka’u a laki tavoi, ka’u sa qai rai rawa. …
“… E dua na [ka] kau sa kila, niu a mataboko e liu, au sa [qai] rai rawa” (Joni 9:11, 25.
O keitou talega a mataboko e liu, ia oqo sa rawa ni rai. Na kosipeli vakalesuimai sa vakayaco ka ki na neitou matavuvale tekivu mai na gauna o ya. Na kilai matata ni inaki ni kosipeli sa vakalougatataki kina e tolu na itabatamata ena noqu matavuvale ka tomana tiko me vakalougatataka na vei itabatamata ka se bera mai.
Ko Jisu Karisito na rarama sa cila ena loma ni butobuto. “Ko koya sa muri Koya “ena sega ni lako ena butobuto, ena tu ga vei koya na rarama ni bula” (Joni 8:12).
Voleka ni dua taucoko na yabaki ena maliwa ni 2016 kei na 2017, era a sotava kina e dua na leqa vakarerevaki na tamata ena iwase ni vanua e Kasai. E a dua na gauna dredre vei ira na tamata baleta e dua na veileqaleqati ena kedrau maliwa e dua na ilawalawa bati vakavanua kei na ilawalawa sotia ni matanitu. E a tete na veiraravui mai na vei tauni e Loma ni Yasana e Kasai ki na dua na iwase levu ni vanua o Kasai. E vuqa na tamata era a dro mai na nodra itikotiko me ra vaqara bula ka ra lak‘i vuni e veikau. E a sega na kedra kakana se wainigunu, se bau dua tale na ka, ka ra a maliwai ira tiko oqori eso na lewe ni Lotu i Jisu Karisito ni Yalododonu Edaidai ena iwasewase o Kananga. Eso na lewenilotu era a vakamatei mai vei ira na sotia tuvakawawa ni matanitu.
O Brother Honoré Mulumba ena tabanalevu na Nganza Ward e Kananga kei na nona vuvale e a so vei ira na vica ka ra a vunitaki ira tiko ena nodra vei vale, ni ratou sa sega ni kila na vanua me ratou lako kina baleta ni sa vuki na veisalatu me vanua ni veivanavanai. Ena dua na siga eso vei ira na sotia tuvakawawa ni matanitu e ratou a raici Brother Mulumba kei na nona vuvale, ni ratou a gole ki tautuba ena dua na yakavi me ratou vakasaqaqara kakana draudrau ena iteitei ni vuvale. E dua na ilawalawa sotia tuvakawawa e ratou a gole mai ki na nodratou vale ka dreti iratou ki tautuba ka tukuna vei iratou me ratou digitaka me ratou to vei iratou ke sega eratou na vakamatei.
A tukuna o Brother Mulumba ena yaloqaqa vei ira “Au lewe ni Lotu i Jisu Karisito ni Yalododonu Edaidai. O au kei na noqu vuvale keitou sa ciqomi Jisu Karisito oti ka vakabauti Koya. Keitou na yalodina tikoga ki na neitou veiyalayalati ka keitou sa tu vakarau me keitou mate.”
Era a sauma lesu mai, “Me vaka ni dou sa digitaki Jisu Karisito, na yagomudou era na kania na koli,” ka ra yalataka me ra na lesu tale mai. Ia era a mani sega ni lesu tale mai, ka ratou a tiko ga e kea na matavuvale me rua na vula ka ratou sega ni raici ira tale. O Brother Mulumba kei na nona matavuvale e ratou a tudei tikoga ena nodratou vakabauta. E ratou a nanuma na nodratou veiyalayalati ka ratou a taqomaki.
Ko Jisu Karisito sa iKoya na rarama e dodonu me da dulaka cake ena gauna butobuto sara ga ni noda bula vakayago (raica na 3 Nifai 18:24). Ni da digitaka me da muri Karisito, eda sa digitaka me da sa veisau. Na tamata e veisau vei Karisito ena liutaki mai vei Karisito, ka da na taroga tiko me vakataki Paula, “Kemuni naTuraga, na cava ko ni sa vinakata me‘u cakava?” (Cakacaka 9:6). Eda na “muria na we ni yavana” (1 Pita 2:21). Eda na “ia nai valavala sa vaka na nonai valavala” (1 Joni 2:6). (Raica na Ezra Taft Benson, “Born of God,” Tambuli, Okot. 1989, 2, 6.)
Au vakadinadinataki Koya e mate, bulu, ka tucake tale ena ikatolu ni siga ka kau cake ki lomalagi me rawa vei iko kei au me daru ciqoma na veivakalougatataki ni tawamate rawa kei na vakacerecerei. O Koya “na rarama, … na bula, kei na dina” (Ica 4:12). Sa iKoya na wainibula kei na iwali ni veilecayaki e vuravura. Sa iKoya na ivakaraitaki uasivi duadua me da rawata kina na vakacerecerei, io sa iJisu Karisito. Ena yacai Jisu Karisito, emeni.