Au Taleitaka Meu Raica na Valetabu
Ena loma ni valetabu sa rawa kina meda ciqoma na veivakadeitaki ni isema lomani ni matavuvale ka na tomani tiko ni oti na mate ka na tu ga me tawamudu.
Kemuni na taciqu kei na ganequ lomani, au vakavinavinaka niu tiko kei kemuni ena imatai ni soqoni oqo ni koniferedi raraba. Ira na vosa, na sereivakatagi, kei na masu e sa kauta mai na Yalo—ka vaka kina na vakilai ni rarama kei na vakanuinui.
Na veika e vakilai oya e kauta lesu mai ki na noqu vakanananu na imatai ni siga ni noqu lako yani ki na Valetabu e Salt Lake. Au a se cauravou. E rau a noqu itokani ga ena siga oya na noqu itubutubu. E rau tu mada vakadua e loma, ka kidavaki mai vua e dua na cakacaka e valetabu. Au a taubale eliu vei rau, kau tu duadua ena dua na gauna.
Au a kidavaki mai vua e dua na marama ulu vula ka tokara tu na ivinivo vulavula totoka ni valetabu. E a raici au cake mai ka dredre, ka kaya mai vakamalua sara, “Ko sa kidavaki ki valetabu, Brother Eyring.” Au nanuma ena gauna oya ni dua na agilosi baleta ni kila na yacaqu. Au a sega ni kidava ni dua na kadi lailai ka a tu kina na yacaqu e a kabi tu ena bele ni noqu kote.
Au kalawa siviti koya kau tu vakadua. Au rai cake ki na doka vulavula cere ni vale vaka raramataka dina na rumu ka vaka sara ga ni tadola ki lagi. Ia ena gauna oya, e a lako mai vei au na vakasama ena vosa matata: “Au a sa tiko ena vanua serau oqo eliu.” Ia e a qai lako totolo mai ki na noqu vakasama, e sega ena domoqu, na vosa oqo: “E sega, o a se sega ni bau tiko eke eliu. O a nanuma tikoga na gauna ni bera nomu a mai sucu. O a tiko ena dua na vanua tabu vakaoqo.”
Ena tautuba ni noda valetabu, eda biuta kina na vosa “Sa Tabu me Nona na Turaga.” Au kila vakai au ni dina na vosa oya. E vanua tabu na valetabu ka dau lako rawarawa mai kina na ivakatakila kevaka e tadola tu kina na lomada ka da kilikili kaya.
Emuri ena imatai ni siga oya au a vakila tale na Yalo. Na soqo ni valetabu ka oka kina eso na vosa e kauta mai na katakata ni lomaqu, e vakadeitaka ni ka e vakatayaloyalotaki tiko e dina. Na ka au a vakila e a ka yadudua me baleta na noqu veimataka, ka a vakavotukana ena 40 na yabaki ki muri ena dua a kaci ni veiqaravi mai vua na Turaga.
Au a vakila ka sotava na ka vata oya niu a vakamau ena Valetabu e Logan Utah. Sa i Peresitedi Spencer W. Kimball ka a vakayacora na veivauci. Ena veivosa leleka ka a cavuta, e a solia kina na ivakasala: “Hal kei Kathy, drau bula me rawa kina ni gauna e yaco mai kina na kaci, mo drau biubiu rawarawa.”
Ni tukuna na vosa e vica oya, au a raica matata e noqu vakasama, ena roka dina, e dua na batikailili kei na dua na sala ka mua ki cake. E dua na bai vulavula e cici toka e yasai mawi ni gaunisala ka yali yani ki na dua na iyatu vunikau ena dela ni tokaitua. E dua na vale vulavula e basika vakalailai mai na veivunikau.
Dua na yabaki ki muri, au a raica na delana ni draiva cake tiko ko noqu momo ena gaunisala oya. E a tu vakamakare mai na ka au raica ni solia tiko nona ivakasala o Peresitedi Kimball.
Ni keirau yaco ki na dela ni tokaitua, e a kele ko noqu momo e yasa ni vale vulavula. E a tukuna ni rau sa volia tiko kei watina na qele oya ka rau vinakata me keirau tiko kei luvena yalewa ena valenivulagi. Erau na tiko e vale levu, ka vica ga na kalawa. Io, ena loma ni 10 na yabaki keirau tiko kina ena loma ni ituvatuva lomani ni matavuvale oya, voleka ni veisiga keirau dau kaya vakaveiwatini, “Me daru marautaka mada qo, baleta ni daru na sega ni dede eke.”
E dua na kaci e a yaco mai vua na Komisina ni Matabose ni Vuli ena Lotu, o Neal A. Maxwell. Na ivakaro ka a solia o Peresitedi Kimball me rawa ni “biubiu rawarawa” e sa vakavotukana. Oqo e dua na kaci me biuta tu na ituvaki yadudua ka daumaka me laki veiqaravi ena dua na ilesilesi ki na dua na vanua kau sega mada ni kila kina e dua na ka. Na neirau matavuvale e a rawa ni biubiu ena gauna taleitaki oya baleta e dua na parofita, ena dua na valetabu, e dua na vanua ni ivakatakila, e a raica e dua na ka yaco ni gauna e muri ka keirau sa na vakavakarau kina.
Au kila ni valetabu ni Turaga era vanua tabu. Sa noqu inaki nikua me vosa baleta na valetabu meu vakatubura na nomuni gagadre kei na noqu me bula kilikili ka tu vakarau ki na madigi vakalevutaki ni ka e sotavi ni valetabu ka na lako tiko mai vei keda.
Vei au, na igu meu cakava levu duadua me bula kilikili kei na kasotavi e valetabu sai koya na ka e a tukuna na Turaga baleta Nona vei vale tabu:
“Ia kevaka era sa tara e dua na noqu vale ena yaca ni Turaga ko ira na noqu tamata, ka ra sega ni vakatara me curu kina e dua na ka tawasavasava, me kakua kina ni vakadukadukalitaki, ena tiko kina na noqu lagilagi;
“Io, ena tiko kina na noqu iserau, niu na curu yani kina, ia ko ira sa savasava na lomadra era sa curu kina era na raica na Kalou.
“Ia kevaka sa vakadukadukalitaki, au na sega ni curu yani kina, ka na sega ni tiko kina na noqu lagilagi; ni’u na sega ni curu ki na valetabu tawasavasava.”1
E a vakamatatataka vei keda o Peresitedi Russell M. Nelson ni da rawa ni da “raica” na iVakabula e loma ni valetabu ena kena ibalebale ni sa sega tale ni tawakilai tiko vei keda o Koya. E a tukuna na ka oqo o Peresitedi Nelson: “Eda kilai Koya. Eda kila vinaka na Nona cakacaka kei na Nona lagilagi. Ia eda tekivu vakila na vakayacoka tawamudu ni Nona bula tawa vakatauvatani.”2
Kevaka e daru lako ki na valetabu ka sega ni savasava veirauti, e daru na sega ni rawa ni raica, ena kaukauwa ni Yalo Tabu, na ivakavuvuli vakayalo baleta na iVakabula ka rawa ni da ciqoma ena valetabu.
Ni da sa bula kilikili me ciqoma na ivakavuvuli oya, sa qai rawa eke a ni da vakatubura mai na noda kasotavi ni valetabu na inuinui, reki, kei na nuidei e noda bula kece. Na inuinui, reki, kei na nuidei oya e rawa ga mai na ciqomi ni cakacaka vakalotu e vakayacori ena valetabu savasava. Ena loma ni valetabu sa rawa kina meda ciqoma na veivakadeitaki ni isema lomani ni matavuvale ka na tomani tiko ni oti na mate ka na tu ga me tawamudu.
Ena vuqa na yabaki sa oti, niu a se bisopi kina, e a coqa kina e dua na cauravou rairai totoka na noqu veisureti me bula kilikili me laki bula kei na Kalou kei na matavuvale me tawamudu. A tukuna vei au me baleta na gauna vinaka vata kei ira na nona itokani. Au a laiva ga me vosa. A qai tukuna vei au me baleta e dua na tiki ni gauna ena dua na nona soqo, ena loma ni mauwe kosakosa, ni a kilavotu vakasauri na vakila ni galili. Au a tarogi koya se cava e a yaco. E a kaya ni a nanuma lesu e dua na gauna ni a se gonetagane lailai, ni a tenei koya tiko o tinana, ka ovici koya e ligana. Ena gauna oya ni talanoa tiko o koya, sa tekivu me luluvu. Au a tukuna vua na ka au kila ni dina: “Na sala duadua ga e rawa ni nomu kina na vakila ni veikaroni tawamudu vakamatavuvale oya mo bula kilikili vakai iko ka vukei ira na tani mera ciqoma na cakacaka vakalotu ni veivauci ena valetabu.”
Eda sega ni kila na matailalai ni isema ni matavuvale ena vuravura ni yalo se na cava ena yaco ni sa oti na tucaketale. Ia eda kila ga ni parofita o Ilaija e a lako mai me vaka na yalayala me vukica na yalodra na qase vei ira na gone kei ira na gone vei ira na qase.3 Ia eda sa kila ni noda marau tawamudu e vakatau ki na noda cakava na noda vinaka duadua meda solia na marau tudei vata ga vei ira na kena levu ni wekada ka da rawata.
Au vakila na gagadre vata ga meu gumatua ni sureti ira na lewe ni matavuvale ka ra bula tiko me ra vinakata me ra bula kilikili me ra ciqoma ka doka na cakacaka vakalotu ni veivauci ena valetabu. Oya e sa tiki ni nodra vakasoqoni yalataki na Isireli ena iotioti ni veisiga ena yasa ruarua ni ilati.
E dua na noda madigi vinaka duadua oya ni ra se gone na lewe ni noda matavuvale. Era a sucu vata kei na Rarama nei Karisito me isolisoli. E soli kaukauwa vei ira me ra vakila na ka vinaka kei na ka e ca. Oya na vuna, ni ra raica mada ga na valetabu se na itaba ni dua na valetabu e rawa ni bucina e lomadra na vinakata na galala ni curu ki loma ena dua na siga.
Na siga oqori ena rawa ni yaco mai ni, sa itabagone, ka ra ciqoma na ivolatara ni valetabu me caka papitaiso veisosomitaki ena valetabu. Mai na ka e sotavi oya, sa rawa kina ni tubu na nodra vakila ni cakacaka vakalotu ni valetabu e dusi tu ga vua na iVakabula kei na Nona Veisorovaki. Ni ra sa vakila ni ra dulaka tiko vua e dua na tamata ena vuravura ni yalo e dua na madigi me savai mai na ivalavala ca, sa na tubu kina na nodra vakila ni ra vukea tiko na iVakabula ena Nona cakacaka tabu me vakalougatataka e dua na luvena na Tamada Vakalomalagi.
Au sa raica na kaukauwa ni ka e sotavi oya ni veisautaka na bula ni dua na tamata gone. Ena vuqa na yabaki sa oti, au a lako kei na dua na luvequ yalewa ki valetabu ena yakavi. E a iotioti o lewa me veisosomitaki ki na tobu. E a kerei ko noqu lewa ke rawa ni tiko vakalailai me vakacavara na cakacaka vakalotu vei ira kece na tamata sa vakarau tu na yacadra. E kaya ko lewa io.
Au a sarava ni kalawa sobu na luvequ ki na tobu ni papitaiso. E a tekivu na papitaiso. E a drodro sobu na wai mai mata ni luvequ yalewa lailai e veigauna e laveti cake kina mai wai. E a tarogi ena vei vei gauna, “E rawa ni ko cakava tale eso?” Ena veigauna e kaya ko lewa io.
Me vaka e dua na tama kauwai, au a tekivu vakanuinui voli ni rawa ni vakuwai o koya mai na cakava tiko e levu cake. Ia au nanuma tiko na nona yalodei ni tarogi me cakava e levu cake ka tukuna ena domo dei lailai, “Io.” E a tiko ga o lewa me yacova ni sa ciqoma na iotioti ni tamata ka tiko ena ituvatuva ena siga oya na veivakalougatataki ni papitaiso ena yaca i Jisu Karisito.
Niu curu tani mai na valetabu kei lewa ena siga oya, au a kurabui ena ka au a raica. E dua na gone e sa laveti ka veisautaki e mataqu mai na nona qarava na Turaga ena Nona vale. Au se nanuma tiko na vakila na rarama kei na vakacegu ni keirau taubale mai na valetabu.
Sa sivi e vuqa na yabaki. E se kaya tiko ga o lewa na io ki na taro mai vua na Turaga ke rawa ni cakava e levu cake vei Koya ni sa rui dredre. Oya na ka e rawa ni cakava na veiqaravi ni valetabu me veisautaki ka laveti keda. Oya na vuna e sa noqu vakanuinui kina vei kemuni kei ira kece na nomuni matavuvale lomani mo ni tubu ena vinakata kei na gu mo ni bula kilikili mo ni curuma na vale ni Turaga me vakawasoma me vaka e vakatara na nomuni ituvaki.
E vinakata o Koya me kidavaki iko mai kea. Au sa masu ni o ni na tovolea mo ni tara cake na gagadre ena lomadra na luvena na Tamada Vakalomalagi me ra lako ki kea, na vanua era na vakila na voleka Vua, ka ko na sureti ira talega na nomu qase eliu mera rawata me ra tiko kei Koya kei iko me tawamudu.
Sa rawa ni noda na vosa oqo:
Au taleitaka meu raica na valetabu.
Au na lako kina ena dua na siga
Meu vakila na Yalo Tabu,
Meu vakarorogo ka masu.
Ni valetabu e Vale ni Kalou,
E dua na vanua ni veilomani ka rui totoka.
Au na vakavakarau niu se gone;
Oqo na noqu itavi tabu.4
Au solia na noqu vakadinadinataka bibi ni oi keda na luvena na Tamada Vakalomalagi dauloloma. E a digitaka na Luvena Daulomani, o Jisu Karisito, me sa noda iVakabula ka Dauveivueti. Na sala duadua ga me da lesu ka laki bula vata kei Rau kei na noda matavuvale sai koya mai na cakacaka vakalotu ni valetabu savasava. Au vakadinadinataka ni o Peresitedi Russell M. Nelson e taura tu ka vakayagataka na idola taucoko ni matabete ka na rawa kina na bula tawamudu vei ira kece na luvena na Kalou. Au sa vakadinadinataka ena yaca tabu i Jisu Karisito, emeni.