Jisu kei na yalewa dautagane

26 ni Feperueri

E Vukei Au Vakacava na iVakavuvuli ni iVakabula Meu Vakatulewa Dodonu?

Maciu 6–7

ivakatakilakila ni veivakasalataki vata

Veivakasalataki Vata

Me liutaka mai e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na ulutaga cava soti eratou sa veitalanoataka na matabisopi ena noda bose ni matabose ni itabagone ni tabanalevu? Na cava soti eda na rawa ni cakava vakalasi se kuoramu ka me na yavutaki ena veitalanoa oqori?

• Vukei o ira era gadreva na veivuke. Eda na dodoliga yani vakacava vei ira na tamata ena sala vaKarisito ni da raica e dua na gagadre ka sega ni kila na ka meda kaya?

• Sureta na tamata kece mera ciqoma na kosipeli. Na cava eda sa kunea ena kosipeli i Jisu Karisito e kauta mai vei keda na reki? E rawa vakacava ni da wasea na reki oqori vei ira tale eso?

• Vakaduavatataki ni matavuvale me tawamudu. Na cava eda cakava tiko me kunei kina na yacadra na noda qase e liu era gadreva tu na cakacaka vakalotu ni valetabu? Na cava eda rawa ni cakava meda vukei ira tale eso mera kunea na yacadra na nodra qase e liu?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Sa vaka me matau tu vei keda yadua—na vuku ni lutu tani—me da vakalewai ira na tani, ena so na gauna e tawadodonu se vakadonui koya vakaikoya. Ia e vakavulica na iVakabula, “Kakua ni vakatulewa vakatawadodonu, mo dou kakua kina ni lewai; ia dau vakatauca na lewa dodonu” (Josefa Simici iVakadewa, Maciu 7:1 [ena Maciu 7:1, footnote a]). Vakasamataka vakatitobu na sala e rawa ni vakalougatataki iko kina kei ira o vakavulica na nomu muria na ivakasala oqo. A vakaraitaka na iVakabula ena ivakaraitaki na ka e vakaibalebaletaka o Koya me “lewa dodonu.” Me kena ivakaraitaki, vakasamataka mada na Nona raici koya na marama a veibutakoci. A sega ni cudruvi koya, ia a sega talega ni duavata kei na nona ivalavala ca. A sureti koya me “lako, ka mo kakua ni valavala ca tale” (Joni 8:11). Na cava o vulica me baleta na vakatauca na lewa dodonu mai vua na iVakabula?

Nio vakasamataka vakatitobu na sala mo vukei ira kina na itabagone mera kila vakavinaka na vakatauca na lewa dodonu, o na rairai vulica na Maciu 7:1–2 kei na itukutuku nei Elder Lynn G. Robbins “Na Turaganilewa Yalododonu” (Liaona, Nove. 2016, 96–98).

Vulica Vata

Sa rawa mo tekivuna e dua na veivosaki me baleta na vakatauca na lewa dodonu ena nomu kerea na kalasi se lewe ni kuoramu mera vakasamataka e dua na gauna era a vakalewai cala kina mai vei ira tale eso. Era vakila beka? Na cava eda vulica me baleta na daulelewa mai na ivakavuvuli ni iVakabula ena Maciu 7:1–5? (raica na Joseph Smith Translation in footnote 1a). Cava beka na ibalebale ni malanivosa na “vakatauca na lewa dodonu”? Sa rawa mo veivosakitaka na veitikina oqo ena nomu sureti ira na lewe ni kalasi se kuoramu mera cavuta tale na vei tikina yadua ena nodra vosa ga. Na vei itaviqaravi vakaoqo e rawa talega ni vukei ira o vakavulica me ra vakatauca na lewa dodonu.

• Na ivakavuvuli ni iVakabula ena Maciu 6–7 e rawa ni vukei keda meda “vakatauca na lewa dodonu.” Ni gadrevi mera vukei na lewe ni kalasi se kuoramu mera raica na ivakavuvuli oqo, sa rawa mo solia vei ira yadua e dua vei ira na vei tikina oqo mera vakasamataka vakatitobu: Maciu 6:14–15; 7:3–5; 7:12; 7:15–20. Na cava e vakatura na vosa ni iVakabula ena veitikina oqo me baleta na ibalebale ni vakatauca na lewa dodonu? Na cava eda rawa ni vulica mai na ivakaraitaki ni iVakabula ena Joni 8:1–11 kei na Maciu 9:10–13? Na duidui cava eda raica ena sala e dau lewai keda kina na iVakabula kei na sala eda dau veivakalewai vakawasoma kina vakaikeda?

• Baleta ni tu kece vei keda na galala ni digidigi, sa dodonu meda dau vakatulewa ena veigauna me baleta na veika eda na cakava ka sega ni cakava. Ia nida sa dau muria na iVakabula, eda segata meda kua ni daulelewa se vakalewai ira tale eso. Me vukei ira na itabagone me ra kila na duidui, wasea vei ira na itukutuku nei Peresitedi Dallin H. Oaks ena “iVurevure Veitokoni.” Ni cakacakavata vakalasi se kuoramu, me vakasamataki na ivakaraitaki ni kena vakalewai e dua na ituvaki—me vaka e dua na itaviqaravi, dua na soqo, se dua na veivosaki—ka kua ni vakalewai e dua na tamata e vakaitavi kina. Na cava na vuna e vinaka cake kina meda vakalewa e dua na ituvaki ka sega ni dua na tamata? E rawa ni tiko vei ira na itabagone eso tale na taro me baleta na vakataulewa dodonu (raica na ivakaraitaki ena “iVurevure Veitokoni”). Veivosakitaka vata na nodra taro ena vakayagataki ni itukutuku ena ruku ni “iVurevure Veitokoni” me kunei kina na isaunitaro. Sureti ira na itabagone mera vakasamataka vakatitobu ka wasea na veika era vakila ka vakauqeti mera cakava ena vuku ni veika era vulica.

• Ena nona itukutuku ena koniferedi raraba “Tauyavutaki ni Lewa Vinaka ka Kakua ni Vakalewai Ira Eso” (Liaona, Me 2010, 103–5), a talanoataka o Elder Gregory A. Schwitzer e rua na italanoa—ni itokani i Jisu o Marica kei na dua na tagane a vukea o Elder Schwitzer. Na cava e vakavulica vei keda na veitikina oqo me baleta na noda rai kei na noda ivalavala vei ira na tani? Na ivakavuvuli cava e rawa ni vukei keda meda vaKarisito vakalevu cake ka vakatauca na lewa dodonu? Na vei vidio “Rai tiko mai na Katubaleka” kei na “Vakalelewa? Sa Rauta!” (ChurchofJesusChrist.org) e rawa ni kuria tale eso na vakasama.

veivosaki tiko na itabagone qase cake

Nida vulica meda vaKarisito vakalevu cake, sa rawa ni da vakataulewa vakadodonu cake.

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra na nodra veiveimaliwai.

iVurevure Veitokoni

• Na ivakaraitaki eso ni taro me baleta na vakalewai ira na tani: “Au sa vakavulici meu digitaki ira vakavinaka na noqu itokani. Ia meu cakava vakacava ka sega ni vakalewai ira na tamata?” “Niu tovolea meu bulataka na kosipeli, au dau beitaki niu dau vakalelewa. E rawa vakacava niu dina kina veika au vakabauta ka vakaraitaka na loloma vei ira era sega ni duavata?”

• 1 Samuela 16:7; Moronai 7:12–19; Vunau kei na Veiyalayalati 11:12

• Gospel Topics, “Judging Others,” topics.ChurchofJesusChrist.org

• A vakavulica o Peresitedi Dallin H. Oaks: “Ena veigauna kece e rawa kina meda kakua ni vakalewai ira na tamata ia me vakalewai ga na ituvaki. E ka bibi oqo ena gauna eda segata kina meda cakacakataka na ivakatagedegede duidui eso mai vei ira tale eso e dodonu meda veimaliwai—e vale, e vanua ni cakacaka, se ena itikotiko raraba. E rawa nida tuvanaka ka cakacakataka na ivakatagedegede cecere me baleti keda se na noda vuvale ka sega ni vakacacani ira era sega ni cakava vakakina” (“‘Judge Not’ and Judging,” Ensign, Okosi. 1999, 11).

Veivakavulici ena iVakarau ni iVakabula

Na nomu sasaga e dodonu me tokona na nodra sasaga na itubutubu. Wasea vei ira na nodra itubutubu na itabagone na veika o vakavulica tiko. Veivakasalataki vata kei ira mera vulica me baleta na nodra gagadre na itabagone ena nomu kalasi kei na sala vinaka duadua me sotavi kina na gagadre oqori.