Ena Tobu, mai vei Crystal Suzanne

At the Well [Ena Tobu], mai vei Crystal Suzanne

12 ni Feperueri

Au na Vakavinakataka Vakacava na Noqu Sokalou Vua na Kalou?

Joni 2–4

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava kina na veika sa veivosakitaki.

• Bulataka na kosipeli. Eda toso voleka vakacava vua na iVakabula? Eda tovolea tiko vakacava meda vakataki Koya vakalevu cake?

• Vukei ira na gadreva tu na veivuke. O cei e tiko ena noda vakasama na gauna oqo? Eda na vukei ira vakacava na tamata yadua oqo?

• Sureta na tamata kecega mera ciqoma na kosipeli. Eda na sauma vakacava na nodra taro na noda itokani me baleta na Lotu ena sala e vaqaqacotaka na nodra vakabauta na iVakabula?

• Vakaduavatataki ni matavuvale me tawamudu. Na cava eso na sala e rawa nida sema vakavinaka cake kina vei ira na isema ni lewe ni matavuvale, me vakataki ira na tubuda kei na tavaleda?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na marama ni Samaria ka vakamacalataki ena Joni 4 e rairai dau lako vakawasoma kina tobu ni wai me taki wai. Ia e duidui ena gauna qo. A sotava o koya e dua na turaga Jiu ka kerei koya me gunu. Oqori duadua ga e duatani baleta nira sega ni veiriti na Jiu kei ira na kai Samaria. Ia e dua tale na ka e matalia me baleta na tamata oqo. Raica nio Koya e dua beka na parofita, a tarogi Koya ena taro me baleta na sokalou vua na Kalou. E vakadonui beka na sokalou vua na Kalou e Samaria? Se mera sokalou na tamata e Jerusalemi, me vaka era tukuna na Jiu? (raica na Joni 4:19–20). E vakamacalataka na turaga ni vanua eda sokalou kina e sega soti ni bibi me vaka na ivakarau ni noda sokalou: “Era na lotu vakayalo ka vakaidina vei Tamada ko ira na lotu dina: ni sa qara ko Tamada me vakaoqo ko ira sa lotu vua” (Joni 4:23). Sa qai tukuna vua na turaga se o cei o Koya—o Koya na Karisito, na iVakabula kei vuravura (raica na Joni 4:25–26).

Era sa kila vinaka beka na itabagone o vakavulica na ibalebale ni sokalou vua na Tamada Vakalomalagi? Me ikuri ni sokalou ena lotu (raica na Vunau kei na Veiyalayalati 59:9–10), ena madigi cava tale e so mera na sokalou kina Vua, oka kina na kena era sega ni kila ni wili vaka sokalou? Na ivurevure eso oqo e rawa ni vukei iko mo vakavakarau ka vakavulica vei ira na sala me vakavinakataki kina na nodra sokalou vua na Kalou: Same 95:1–7; Maciu 4:8–10; Alama 32:4–11; Vunau kei na Veiyalayalati 20:17–19; 93:19–20, kei na itukutuku nei Bisopi Dean M. Davies “Na Veivakalougatataki ni Sokalou” (Liaona, Nove. 2016, 93–95).

Vulica Vata

Me tekivutaki e dua na veivosaki me baleta na vakavinakataki ni sokalou, sa rawa mo sureti ira na lewe ni kalasi se kuoramu mera railesuva yadudua na Joni 4:19–26 ka vola na isau ni taro vakaoqo: Na cava na vuna au sokalou kina vua na Kalou? Na cava na kena ibalebale vei au meu sokalou vua na Kalou? Ena veivuke talega me railesuvi vata na ibalebale ni “Sokalou Qarava” ena iDusidusi ki na iVolanikalou (scriptures.ChurchofJesusChrist.org). Ni oti na gauna mera vakasamataka vakatitobu kina na veitaro oqo, sureti ira mera wasea na nodra nanuma. Na veitaviqaravi oqo e rawa ni vukei ira mera ciqoma na veivakauqeti ni Yalo Tabu.

• O ira na lewe ni nomu kalasi se kuoramu era na kunea na veivakararamataki yaga me baleta na ibalebale ni sokalou vua na Kalou. O na rairai kerei ira mera wasea e dua na gauna era vakila kina nira qarava tiko na Kalou. Na veitiki ni ivolanikalou vakaoqo e rawa ni vakuria na nodra kilaka ka solia vei ira na vakasama eso me baleta na ivakarau me vakaibalebale vakalevu cake kina na nodra sokalou vua na Kalou: Same 95:1–7; Maciu 4:8–10; Alama 32:4–11; Vunau kei na Veiyalayalati 20:17–19; 93:19–20. E rawa talega nira veivosakitaka na itukutuku nei Elder Bruce R. McConkie ena “iVurevure Veitokoni.”

• Me vukei ira na itabagone me vakavinakataka na nodra sokalou vua na Kalou, vakasamataka mo vola na ulutaga oqo ena vava: O cei, Na vuna, Evei, kei na iValavala. Kerei ira me ra railesuva na ivolanikalou e volai tu ena “Sokalou Qarava” ena iDusidusi ki na iVolanikalou (scriptures.ChurchofJesusChrist.org), ka vaqara na tikina e vukei ira me ra kila o cei, na vuna, evei, kei na ivalavala ni noda sokalou. Nira kunea e dua na tikina veisemati, sureti ira me ra veivosakitaka vata kei na kalasi se kuoramu ka vola na idusidusi ena ruku ni ulutaga veidonui. Vakayaloqaqataki ira me ra wasea na veika era sotava nira vakila nodra voleka vua na Kalou ena sokalou.

• Na itukutuku nei Bisopi Dean M. Davies “Na Veivakalougatataki ni Sokalou” e tiko kina na i vakaraitaki eso ni nodra sokalou vua na Kalou na tamata. Ena rawa beka moni wilika vata na iwase “Na Cava na Sokalou?” Me ra qai railesuva na tamata yadua e dua na ivakaraitaki ni nodra sokalou na tamata ka kunei ena tolu na iwasewase ka tarava ena itukutuku. Na cava e vakatavulica vei keda na ivakaraitaki yadua me baleta na sokalou vua na Kalou? Na cava e vakavulica na iotioti ni wase ni itukutuku me baleta na veivakalougatataki e yaco mai ena noda sokalou Vua ena yalodina? Na cava eda sa vakauqeti meda cakava me vakavinakataki kina na noda sokalou vua na Kalou?

cauravou e wilivola tiko

Na sokalou e oka kina na vulici ni ivolanikalou kei na ivalavala tale eso e vakaraitaka na yalodina kei na lomana na Kalou.

Cakacaka ena Vakabauta

Uqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• “iVakarau ni Sokalou,” Nodra iVakavuvuli na Peresitedi ni Lotu: David O. McKay (2003), 29–37

• Donald L. Hallstrom,“Nodra Saumaki Mai na Luve ni Kalou” (Kakaburaki ni Semineri kei na Inisitute ni Lotu, 13 ni Jiune, 2017), broadcasts.ChurchofJesusChrist.org

• E vakavulica o Elder Bruce R. McConkie: “Na sokalou dina ka uasivi sara sai koya na noda muria na ikalawa ni Luve ni Kalou; sai koya na muri ni ivunau kei na talairawarawa ki na lewa nei Tamada ki na ivakatagedegede oya me da sa toso cake mai na loloma soliwale ki na loloma soliwale me yacova ni da sa vakalagilagi ena vukui Karisito me vaka sa tu vei Tamana. E levu cake mai na masu kei na vunau kei na sere. Sa i koya na bula ni cakava kei na talairawarawa. Sa i koya na vakatotomuria na bula nei koya na iVakaraitaki cecere” (“How to Worship,” Ensign, Tise. 1971, 130; vakavoui na matanivola levu).

Veivakavulici ena iVakarau ni iVakabula

Na ivunau e kune ena ivolanikalou kei na nodra vosa na parofita nikua e tiko kina na kaukauwa me veisautaka na yalo, ka vakatubura na vakabauta. O iko kei ira o vakavulica moni “tovolea na kena mana na vosa ni Kalou,” oni na qai raica ni “dau vakayarayarataki ira na tamata mera vakayacora na ka e dodonu” (Alama 31:5).