Agpakita ni Jesus ken ni Maria Magdalena

Abril 9

Kasano a Mapapigsak ti Pammaneknekko maipapan iti Panagungar ni Jesucristo?

Paskua ti Panagungar

icon ti panagiinnuman

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna, kas nayon iti panagiinnuman maipapan iti naipangruna a pakaseknan ti klase wenno korum, mabalin a kayatmo nga ilawlawag dagiti impresion ken tema manipud iti sapasap a komperensia. Makatulong dagiti sumaganad a saludsod:

• Ania dagiti tema wenno mensahe a napateg kadatayo? Ania ti nangpapigsa iti pammatitayo ken ni Jesucristo?

• Ania ti nangpatibker kadagiti pammaneknektayo maipapan kadagiti sibibiag a propeta? Ania ti nariknatayo a makaparegta nga aramiden gapu iti no ania ti nasursuro wenno nariknatayo?

• Ania ti kasapulantayo nga aramiden kas maysa a klase wenno korum tapno malagip ken agtignay a mayannurot iti balakad a nangngegantayo iti sapasap a komperensia?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

icon iti isuro ti doktrina

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Paneknekan dagiti apostol, agpada a nagkauna ken agdama, a sibibiag ni Jesucristo! Nagsagaba ket natay iti krus, naitanem iti maysa a tanem, ken iti maikatlo nga aldaw nagungar manen. Gapu ta Isu ket nagballigi ken patay, agungartayonto amin. Ti Panagungar ti Mangisalakan ti nangyeg iti kari ti imortalidad ken ti namnaama ti agnanayon a biag. Adda daytoy a kari iti puso ti Paskua ti Panagungar.

Kas miembro ti Ti Simbaan ni Jesucristo dagiti Santo iti Ud-udina nga Aldaw, addaantayo iti naisangsangayan a gapu a mamati a nagungar ni Jesucristo. Kas nayon kadagiti saksi dagiti tao manipud iti panawen ti Baro a Tulag, addaantayo kadagiti pammaneknek dagiti tao a nagbiag iti panawen ti Libro ni Mormon, ni Propeta Joseph Smith, ken dagiti sibibiag a propeta ken apostoltayo. Makaawattayo pay iti bukod a saksi ti panangungar babaen ti Espiritu Santo. Kasano a matulongam dagiti agtutubo a mangpapigsa kadagiti pammanekknekda a nagungar ni Jesucristo? Bayat ti panagsaganam, ibilang ti panangadal iti mensahe ni Sister Reyna I. Aburto a “The Grave Has No Victory” (Liahona, Mayo 2021, 85–86) ken ti mensahe ni Elder S. Mark Palmer nga “Our Sorrow Shall Be Turned into Joy” (Liahona, Mayo 2021, 88–89).

Aggigiddan a Masursuruan

Mabalinmo a rugian ti panaglilinnawag maipapan iti Panagungar ni Jesucristo babaen ti panangawis kadagiti agtutubo a mangibinglay no ania ti inaramidda itoy a lawas a mangrambak iti Paskua ti Panagungar. Mabalinmo a saludsoden ida no ania ti inadal wenno inaramid ti tunggal maysa kadakuada wenno kadua ti pamiliada a mangpapigsa kadagiti pammaneknekda maipapan iti Panagungar ti Mangisalakan. Iti baba dagiti aktibidad a mangtulong kadagiti miembro ti klasem wenno korummo a mangpapigsa kadagiti pammaneknekda.

• Paglilinnawagan a sangkamaysa no apay a napateg dagiti saksi iti inaldaw a biag. Kalpasanna mangaramid iti listaan ti adu a saksi ti Panagungar ni Jesus agingga a kabaelan a mapanunot ti klasem wenno korummo. Kalpasanna mabalin nga agpili ti tunggal tao iti nasantuan a kasuratan manipud kadagita a nailista iti “Dagiti Pangsuporta a Resources” tapno masursuro maipapan iti sumagmamano kadagitoy a saksi. Awisem dagiti miembro ti klase wenno korum a mangibinglay no ania ti nasursuroda. Allukoyem pay ida a mangibinglay no kasano a papigsaen dagitoy a saksi dagiti pammaneknekda maipapan iti Panagungar ni Jesucristo.

• Ania dagiti sumagmamano a situasion no mabalin a kabaelantayo nga ibinglay dagiti pammaneknektayo maipapan iti Panangungar ti Mangisalakan? No addan padas ti asino man iti klase wenno korum iti pannakisarita iti maysa a tao maipapan iti Panagungar ti Mangisalakan, ibilang ti panangawis kenkuana a mangibinglay iti dayta a padas. Allukoyem dagiti miembro ti klase wenno korum a mangpanunot maipapan no kasano a matulonganda ti maysa a tao a makaawat iti Panagungar ni Jesucristo ken manggun-od iti pammaneknek a gapu Kenkuana mabalintayo amin ti agungar. Ania dagiti napateg a kinapudno maipapan iti Panagungar ti amin a tao nga agbalin a napateg a mangisuro iti dadduma? Mabalin a sapulen dagiti miembro ti klase wenno korum dagiti sungbat iti nasantuan a kasuratan iti “Dagiti Pangsuporta a Resources.”

• Idi imbaga dagiti Apostol ken ni Tomas a nakitada ti nangungar a Mangisalakan, kinuna ni Tomas a saan a mamati malaksid no makitana mismo. Idi agangay imbaga ni Jesus ken ni Tomas, “Nagasat dagiti saan pay a nakakita, ngem namatida.” Aggigiddan nga irebyu ti padas ni Tomas a masarakan iti Juan 20:24–29. Kasano a nabendisionantayo iti panangpati iti Mangisalakan nga awan panangkita Kenkuana? Kasano a mapapigsatayo ti pammatitayo ken ni Jesucristo? Awisem dagiti miembro ti klase wenno korum a mangsukisok iti maysa wenno ad-adu pay kadagiti mensahe manipud kadagiti lider ti Simbaan iti “Dagiti Pangsuporta a Resources” ket ibinglay no apay nga agyamyamanda iti Panangungar ti Mangisalakan. Kasano nga apektuan ti pannakaammotayo nga agungartayonto ti wagas a panangpanunottayo maipapan kadagiti bagitayo ken dagiti pangngeddeng nga aramidentayo?

Tapno Maammuanyo, ni Gary L. Kapp

Tapno Maammmuanyo, ni Gary L. Kapp

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Mateo 28:1–10; Lucas 24:13–35; Lucas 24:36–48; Juan 20:11–29; 1 Taga Corinto 15:3–8; 3 Nephi 11:1–15; Ether 12:38–39; Doktrina ken Katulagan 76:19–24 (Dagiti Saksi ti Panagungar)

• 2 Nephi 9:10–15; Mosiah 16:8–11; Alma 11:42–45; Alma 40:23–25; Doktrina ken Katulagan 93:33–34 (Dagiti nasantuan a kasuratan a mangisuro maipapan iti Panagungar ti amin a tao)

• Todd Christofferson, “The Resurrection of Jesus Christ,” Liahona, Mayo 2014, 111–14

• Gerrit W. Gong, “Hosanna and Hallelujah—The Living Jesus Christ: The Heart of Restoration and Easter,” Liahona, Mayo 2020, 52–55

• Reyna I. Aburto, “The Grave Has No Victory,” Liahona, Mayo 2021, 85–86

• S. Mark Palmer, “Our Sorrow Shall Be Turned into Joy,” Liahona, Mayo 2021, 88–89

• Masarakan dagiti video iti Paskua ti Panagungar iti ChurchofJesusChrist.org/study/video/easter-videos.

Panangisuro iti Wagas ti Mangisalakan

Ti maysa a tao a nalaing a mangala iti kaipapanan manipud kadagiti nasantuan a kasuratan ken mangusar kadagitoy iti inaldaw ket umawatto iti nadiosan a pannarabay tapno maparmek ti ania man a karit. Kabayatan ti panangisurom, agdamag kadagiti saludsod a mangidawat a kasapulan dagiti agad-adal ti mangsapul kadagiti sungbat iti nasantuan a kasuratan.