Naimbag a Samaritano, ni Annie Henrie Nadar

Abril 23

Kasano a Maipakitak ti Dakdakkel nga Ayatko kadagiti Adda iti Aglawlawko?

Mateo 18; Lucas 10

Agiinnuman

Idauluan ti maysa a miembro ti panguluen ti korum wenno klase; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook,, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti kaudian a padas nga ad-adda a nangyasideg kadatayo iti Nailangitan nga Ama ken ni Jesucristo?

• Aywanan dagiti agkasapulan. Adda kadi maysa a tao a kaak-akar iti ward wenno nabiit pay a nagkameng iti Simbaan? Kasano a makatulongtayo kadakuada a makarikna iti nabara a pannakapasangbay?

• Awisen ti amin nga umawat iti ebanghelio. Ania dagiti aktibidad a sumangbay a mabalin a pangawisan kadagiti gagayyemtayo a dumar-ay?

• Pagkaykaysaen dagiti pamilia para iti kinaagnanayon. Ania dagiti panagkagumaan a maaramidtayo a mangisurat kadagiti bukodtayo a pakasaritaan?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Kalpasan nga insuro ni Jesus ti “maysa a masirib iti linteg” ti pateg ti dua a dakkel a bilin—panagayat iti Dios ken panagayat iti kaarrubatayo—dinamag ti masirib iti linteg, “Asino ti kaarrubak?” (kitaen iti Lucas 10:25–29; Mateo 22:35–40). Kas sungbat, imbinglay ti Mangisalakan ti maysa a pangngarig maipapan iti maysa a Samaritano a nangpapeggad iti biagna tapno mangaywan iti nasugatan a lalaki a Judio, innalana ti lalaki iti maysa a pagdagusan tapno maaywanan, ket binayadanna ti gatad ti pannakapaimbagna. Saan nga impamaysa ti Samaritano dagiti pagdumaan ti bagina ken ti lalaki, nga imbilang a maysa a kabusor dagiti taona, wenno manghusga kenkuana wenno mangsapul kadagiti gapu a saan a panangtulong. Pinagserbianna ti lalaki nga agkasapulan, iti baet ti bukod a saan a pannakagin-awa ken sakripisio, iti kasta panangipakita iti ayat para iti lalaki ken para iti Dios. Bayat ti panangutob kadagiti pannursuro iti Lucas 10:25–37, panunoten maipapan iti no ania ti talaga a kaipapanan ti “ayatem … ti kaarrubam kas iti bagim” (bersikulo 27).

Kasano a matulongam dagiti sursuruam a makaawat a no agserbida kadagiti adda iti aglawlawda, ipakpakitada iti ayatda iti Dios? Ania ti mabalin a mangparegta kadakuada nga agayat ken agserbi iti dadduma? Bayat ti panagsaganam, mabalinmo nga irebyu ti mensahe ni President Russell M. Nelson “The Second Great Commandment” (Liahona, Nob. 2019, 96–100).

Aggigiddan a Masursuruan

Tapno marugian ti panaglilinnawag maipapan iti panangipakita iti dakdakkel nga ayat kadagiti adda iti aglawlawtayo, mabalinmo nga idawat kadagiti miembro ti klase wenno korum a mangibinglay iti nasursuroda maipapan iti panagayat iti dadduma manipud iti pangngarig ti naimbag a Samaritano, a masarakan iti Lucas 10:25–37, 121. Ania ti masursurotayo maipapan iti pagnaigan ti umuna ken maikadua a dakkel a bilin manipud iti Lucas 10:27 ken ti palawag ni President Dallin H. Oaks iti “Dagiti Pangsuporta a Resources”? Makatulong kenka dagiti sumaganad a kapanunotan a mangituloy iti panaglilinnawag maipapan iti panangipakita iti dakdakkel nga ayat kadagiti adda iti aglawlawtayo.

• Ni Jesucristo ti naindaklan a pagwadantayo iti panangipakita iti ayat iti Dios babaen ti panangserbi iti dadduma, ken maparegta dagiti miembro ti klase wenno korum babaen ti panangadal iti pagwadanna. Awisem ti tunggal tao a mangutob iti mortal a biag ni Jesucristo ken mangpili iti padas manipud iti biagna a mangipakita iti naindaklan nga ayatna iti dadduma a tao. Idawat iti tunggal tao a mangibinglay iti padas a mapilida, ken no apay a napnuan kaipapanan kadakuada daytoy. Awisem dagiti sursuruam a mangpanunot iti maysa a wagas a kayatda a suroten ti pagwadan ti Mangisalakan iti ayat. Mabalinda pay nga iburay dagiti kapanunotanda maipapan iti maysa a tao nga am-ammoda a sumurot iti daytoy a pagwadan.

• Ibinglay ken ilawlawag kadagiti miembro ti klase wenno korum ti palawag ni President Russell M. Nelson a masarakan iti “Dagiti Pangsuporta a Resources.” Awisem dagiti miembro ti klase wenno korum a a mangrebyu iti maysa wenno ad-adu pay kadagiti mensahe ti sapasap a komperensia a nadakamat iti daytoy a balabala, a mangsapsapul kadagiti pannursuro a mabalin a mangtarabay kadatayo kadagiti panagkagumaantayo nga agayat iti dadduma. Mabalinda nga agpokus iti sumaganad: dagiti pagarigan ti no kasano a makapagserbitayo manipud iti “The Second Great Commandment” ni President Nelson; sections I, II, ken VI iti mensahe ni President Oaks “Loving Others and Living with Differences”; ken ti estoria maipapan kadagiti koneho ken ti balakad kadagiti agtutubo manipud iti “Hearts Knit Together” ni Elder Gary E. Stevenson. Mabalin pay nga aggigiddankayo a mangbasa iti Mosiah 2:17 ken Moroni 7:45–48. Mabalin a makatulong nga isurat iti pisarra dagiti pannursuro a napaglilinnawagan dagiti agtutubo. (scriptures.ChurchofJesusChrist.org). Kalpasanna mabalin nga agiinnuman ti klase wenno korum maipapan kadagiti naipangruna a wagas a nasaysayaat a mayaplikarda dagitoy a pannursuro iti relasionda kadagiti miembro ti pamilia, iti gagayyem, ken iti uneg ti komunidadda, nupay kasla narigat kadagiti tao ti agayat.

• Dagiti panagkagumaan dagiti miembro ti klase wenno korum iti aramid ti pannakaisalakan wenno pannakaitan-ok ket napatpateg ken naragrag-o no maparegtada iti ayat. Tapno matulongan ida a mangkita no kasano a ti tunggal aspekto ti aramid ti pannakaisalakan ken pannakaitan-ok (kitaen iti Sapasap a Handbook, 1.2) ket maguyugoy iti ayat, isurat ti uppat nga aspekto iti pisarra. Kalpasanna idawat kadagiti agtutubo a mangilawlawag no kasano a ti kaadda iti puso a napnuan iti ayat para iti dadduma ket makapagbalbaliw iti no kasano a makiramanda iti tunggal aspekto. Mabalin nga addaanda kadagiti padas manipud iti bukodda a biag wenno ti biag dagiti dadduma a mabalinda nga ibinglay.

Isuro ni President Russel M. Nelson kadatayo, “No ayatentayo ti Dios iti amin a pusotayo, iturongna ti puspusotayo iti pagsayaatan ti dadduma.”

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Dallin H. Oaks, “Loving Others and Living with Differences,” Liahona, Nob. 2014, 25–28

• Gary E. Stevenson, “Hearts Knit Together,” Liahona, Mayo 2021, 19–23

• “A Good Samaritan,” “The Greatest Commandment” (videos), ChurchofJesusChrist.org

• Insuro ni President Dallin H. Oaks: “Ti regtatayo nga agtungpal [iti] maikadua a bilin ket saan koma a gapu a lipatentayo ti umuna, ayatentayo ti Dios iti amin a puso, kararua, ken isiptayo. … Ikarigatantayo koma a tungpalen ti agpada a dakkel a bilin. Tapno aramiden daytoy, magnatayo iti natimbeng a linteg ken ayat—panagtungpal kadagiti bilin ken pannagna iti dana ti katulagan, bayat ti panagayattayo iti padatayo a tattao. Agkasapulan daytoy a pannagna nga agsapultayo iti nadiosan a pammaregta no ania ti suportaran ken no ania ti suppiaten ken no kasano nga ayaten ken denggen a sidadayaw ken suruan iti dayta a wagas. Idawat ti pannagnatayo a ditayo agikompromiso kadagiti bilin ngem ipakitatayo ti naan-anay a pannakaawat ken ayat” (“Two Great Commandments,” Liahona, Nob. 2019, 73–75).

• Kinuna ni President Russell M. Nelson: “Dagiti Santo iti Ud-udina nga Aldaw … sipupudno nga agkalikagumda nga agtungpal iti umuna ken maikadua a dakkel a bilin. No ayatentayo ti Dios iti amin a pusotayo, pagbalinenna dagiti pusotayo iti pagsayaatan dagiti dadduma iti napintas, nasagudayan a siklo. … Panangted iti tulong iti dadduma—naganetget a panagkagumaan a mangaywan iti dadduma a nangnangruna pay wenno ad-adda pay ngem iti panangaywantayo iti bagbagitayo—ti rag-otayo. Nangnangruna pay, mainayonko, no saan a pagnam-ayan ken yadayonatayo manipud iti nanam-ay a kasasaadtayo. Ti panagtungpal iti dayta a dakkel a bilin isu ti tulbek iti panangbalin a pudno a disipulo ni Jesucristo” (“The Second Great Commandment,” Liahona, Nob. 2019, 97, 100).

Panangisuro iti Wagas ti Mangisalakan

Ti bukod a padasmo iti panagbiag iti ebanghelio ti mangpabaelto kenka a mangiburay iti nabileg a pammaneknek maipapan kadagiti pagbatayan nga isurom. Gapu ta agbibiagka a mayannurot kadagitoy, maipaneknek ti Espiritu a pudno dagiti isursurom.