Mayo 14

Kasano a Tulongan ti Apo dagiti Lallaki ken Babbai nga Agkaykaysa nga Agtrabaho iti Panagkallaysa?

Mateo 19–20; Marcos 10; Lucas 18

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano a ti yaasideg iti Apo makatulong kadatayo a mangsango kadagiti karit ken pannubok?

• Aywanan dagiti agkasapulan. Asino ti am-ammotayo nga agkasapulan kadagiti kararagtayo ken iti pannakigayyemtayo?

• Awisen ti amin nga umawat iti ebanghelio. Ania dagiti plano a mangibinglay iti ebanghelio ti napaglilinnawagan kadagiti miting ti youth council iti ward? Kasano a mairaman ti klase wenno korumtayo?

• Pagkaykaysaen dagiti pamilia para iti kinaagnanayon. Kasano a ti panangitrabaho iti aramid iti family history ket mangpapigsa kadagiti relasiontayo iti Nailangitan nga Ama ken ni Jesucristo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Mangrugi kada Adan ken Eva, nagkalikagum ti Nailangitan nga Ama ken ni Jesucristo a mangpapigsa ken mamagkaykaysa kadagiti agassawa iti panagkallaysa. Insuro ti Mangisalakan, “Gapu itoy ti lalaki panawannanto ti ama ken inana, ket makitiponto iti asawana: ket isuda a dua maymaysadanto a lasag” (Mateo 19:5). Kagiddanna, aramiden ni Satanas ti amin a kabaelanna a mamagsisina kadagiti panagasawa ken mangdadael kadagiti pamilia. Nalabit nga ammo dagiti miembro ti klasem wenno korummo ti adu a karit a maipasango kadagiti kallaysa ita. Nalabit pay a nakakitadan kadagiti agassawa nga agtintinnulong nga agtrabaho ken agkalkalikagum iti tulong ti langit a manggun-od iti kaykaysa. Utobem no kasano a mabalin a mangisuro kadakuada dagitoy a padas maipapan iti no ania ti kasapulan tapno magun-od ti panagkaykaysa iti panagasawa. Ania ti maaramidmo a mangisuro kadakuada iti pateg ti panangsagana itan para kadagiti masakbayan a relasion iti panagasawa?

Itay napalabas a lawas, naaddaan dagiti miembro ti klase wenno korum iti gundaway a mangbasa kadagiti pannursuro ti Mangisalakan iti panagasawa iti Mateo 19:4–6. Tapno agsagana a mangisuro, adalen dagitoy a bersikulo, kasta met ti mensahe ni President Dieter F. Uchtdorf nga “In Praise of Those Who Save” (Liahona, Mayo 2016, 77–80) wenno dadduma pay a mensahe a naisingasing iti daytoy a balabala.

Aggigiddan a Masursuruan

Mabalin nga awan pay iti panunot ti adu nga agtutubo ti panagasawa. Nupay kasta, maysa a banag a napateg unay ti maikari iti naannad a panagsagana. Nalabit a mabalinmo nga awisen dagiti agtutubo a mangipapan a nakaparintumengda iti maysa nga altar iti templo tapno mailantip ket imbalakad kadakuada ti agilanlantip a mangadal iti Mateo 19:4–6. Ania a kinapudno a masarakantayo kadagitoy a bersikulo ti makatulong iti apagkallaysa nga agassawa? Kasano nga agbalin a “maymaysa” ti agassawa? Kasano a tumulong ti Mangisalakan? Dagiti aktibidad a kas kadagitoy ti makatulong iti klasem wenno korummo a makaawat no kasano a magun-od ti panangkaykaysa iti panagasawa.

• Mangted da Adan ken Eva iti naindaklan a pagwadan ti maysa nga agassawa nga agtintinnulong nga agtrabaho iti panagkaykaysa. Mabalinmo nga i-display ti maysa a ladawanda (kitaen iti Libro ti Arte ti Ebanghelio [2009], no. 5) ket idawatmo iti klasem wenno korummo a mangbasa iti Moises 5:1–12, a mangsapsapul kadagiti wagas a nakapagtinnulong a nagtrabaho da Adan ken Eva iti panagkaykaysa. Ania ti inaramidda tapno mabendisionan ti Dios ti relasionda? Tapno matulongan dagiti agtutubo a mangsursuro iti ad-adu pay maipapan iti panagasawa, mabalinda nga adalen dagiti nasantuan a kasuratan iti “Dagiti Pangsuporta a Resources.”

• Insuro ni President Dieter F. Uchtdorf nga iti adu a gimong iti agdama, “kasla apagkanito lang a mausar ti amin a banag.” Ngem nasken a saan a mayaplikar daytoy nga ugali iti panagasawa ken pamiliatayo; ngem ketdi nasken nga “idatontayo ti kasayaatan a panagkagumaantayo a mangisalakan ken mangpabaknang [kadagitoy]” (“In Praise of Those Who Save,” 77). Tapno matulongan a mailadawan daytoy a punto, mabalinmo nga awisen dagiti agtutubo a mangpanunot iti maysa a banag a nabiit pay a sinukatanda a nabuong, nadadael, wenno awanen iti uso. Apay a maisabali dagiti panagasawa ikadagiti banag a masukatan kas kadagitoy? Kalpasanna mabalin a basaen ti klase wenno korum ti benneg ti mensahe ni President Uchtdorf a napauluan iti “Saving Our Marriages” ken ibinglay dagiti wagas a makapagtinnulong nga agtrabaho dagiti agassawa ken kadua ti Mangisalakan tapno mangpapigsa iti panagasawada. Ania ti maaramidtayo itan tapno agsagana para kadagiti kasta a karit?

• Ibilang ti panangisurat iti Panagkaykaysa iti Kallaysa iti pisarra ken panangawis kadagiti agtutubo a mangilista kadagiti banag a mabalin nga aramiden dagiti agassawa tapno agbalin a nakaykaysa. Kalpasanna idawat kadagiti agtutubo a mangsukisok iti “The Family: A Proclamation to the World” (ChurchofJesusChrist.org) para kadagiti kapanunotan a mainayonda iti listaanda. Ania dagiti kababalin a makita dagiti miembro ti klasem wenno korummo iti tunggal maysa wenno kadagiti nagkallaysa nga agassawa nga am-ammoda a napateg iti kaykaysa iti panagasawa? Apay a napateg ti mangpadur-as ken mangyaplikar kadagitoy a pagbatayan kadagiti relasiontayo ita? Dagiti video iti “Dagiti Pangsuporta Resources” ti mangted iti sumagmamano a pagarigan dagitoy a kababalin a maipatpatungpal.

• No addaan saludsod wenno pakaseknan dagiti miembro ti klasem wenno korummo maipapan iti diborsio, ibilang ti panaggigiddan a panangrebyu kadagiti paset ti mensahe ni President Dallin H. Oaks a “Divorce” (Liahona, Mayo 2007, 70–73).

Mangrugi kada Adan ken Eva, nagkalikagum ti Nailangitan nga Ama ken ni Jesucristo a mangpapigsa ken mamagkaykaysa kadagiti agassawa iti panagkallaysa.

Agtignay iti Pammati

Allukoyem dagiti miembro ti korum wenno klase a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• 1 Taga Corinto 11:11; Doktrina ken Katulagan 42:22; 49:15–17; Moises 3:18, 21–24 (Ti pateg ti panagkaykaysa iti panagasawa)

• “Renaissance of Marriage,” “Let Us Be Men,” “Expressions of Love” (videos), ChurchofJesusChrist.org

Panangisuro iti Wagas ti Mangisalakan

Dagiti naimpusuan a panangipeksa iti ayat a kas ken Cristo ket addaan iti dakkel a pannakabalin a mangpalukneng iti puspuso dagiti miembro ti klase a mangikarkarigatan. Tapno matulongan dagiti miembro ti klase a makarikna a kasapulan ken maipategda, mabalinmo nga idawat kadakuada a makiraman iti umay a lesson babaen ti panangibinglay iti maysa a padas wenno riknada maipapan iti maysa a nasantuan a kasuratan.