Umay Manen Tapno Agturay ken Agari, ni Mary R. Sauer

Mayo 28

Ania ti Maaramidko Itan a Makapagsagana para iti Maikadua a Yaay ti Mangisalakan?

Joseph Smith—Mateo 1; Mateo 24–25; Marcos 12–13; Lucas 21

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania ti napaglilinnawagantayo itay napalabas, ken ania dagiti naaramid nga awis wenno naidutok nga aramiden? Ania ti naaramidtayo tapno agtignay kadagita nga awis wenno naidutok nga aramiden?

• Aywanan dagiti agkasapulan. Ania ti maaramid wenno maisaotayo a makatulong kadagiti mabalin a makarikna iti panagmaymaysa wenno adayo manipud iti Nailangitan nga Ama?

• Awisen ti amin nga umawat iti ebanghelio. Ania dagiti sumagmamano a wagas a pakatulongantayo kadagiti dadduma a makarikna iti ayat ni Jesucristo?

• Pagkaykaysaen dagiti pamilia para iti kinaagnanayon. Ania dagiti kapanunotan a maibinglaytayo iti tunggal maysa a makatulong a mangpapigsa kadagiti pamiliatayo?

Iti ungto ti adalen, no maitutop, aramiden dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Kasano ti rikna dagiti agtutubo a sursuruam maipapan iti panagbiag kadagiti maudi nga aldaw sakbay ti Maikadua a Yaay ni Jesucristo? Pudno a dagitoy ti napeggad nga aldaw, a natandaan iti rigat, kinadangkes, ken pannakadadael. Ngem iti inladawan ti Mangisalakan ti aldawtayo kadagiti disipulona idi umasideg ti gibus ti mortal a biagna, inikkannatayo iti namnama. Bayat ti panangbigbigna iti umay a kinasipnget, inkarina a ti silawna “[saknapenna] ti intero a daga” iti panagsublina (kitaen iti Joseph Smith—Mateo 1:22–26; kitaen met iti Doktrina ken Katulagan 45:34–38).

Kasano a matulongam dagiti agtutubo a makaawat a nasaysayaat kadagiti bendision ken gundaway ti panagbiag kadagiti ud-udina nga aldaw? Ania ti maaramidyo a mangparegta kadakuada a mangisagana iti bagbagida ken iti lubong para iti Maikadua a Yaay ti Mangisalakan? Kas nayon iti panagadal kadagiti binatog iti nasantuan a kasuratan itoy a lawas, ibilang ti panangrebyu iti sumagmamano a resources a nailista iti “Second Coming of Jesus Christ” iti Gospel Topics (topics.ChurchofJesusChrist.org).

Aggigiddan a Masursuruan

Tapno matulongan dagiti tao a mangrebyu iti nabasadan kadagiti nasantuan a kasuratan itoy a lawas, mabalinmo nga isurat dagitoy a paulo iti pisarra: Dagiti Naliday a Padto ken Dagiti Nadayag a Pakdaar (kitaen iti Russell M. Nelson, “Embrace the Future with Faith,” Liahona, Nob. 2020, 73–76). Kalpasanna mabalin nga irebyu ti tunggal tao ti Joseph Smith—Mateo 1:22–37 ket ilista dagiti “naliday” ken “nadayag” a banag a mapasamakto sakbay ti panagsubli ti Mangisalakan. Apay a napateg nga ammotayo dagitoy a pasamak? Tapno matulongan dagiti agtutubo a masursuruan iti ad-adu pay maipapan iti no kasano ti agsagana para iti yaay ti Mangisalakan, ibilang dagiti sumaganad nga aktibidad wenno ti maysa a bukodmo.

• Dagiti nasantuan a kasuratan iti “Dagiti Pangsuporta a Resources” makatulong kadagiti agtutubo a makaawat no kasano nga isagsagana ti Nailangitan nga Ama ti dalan para iti Maikadua a Yaay ti Anakna. Ibilang ti panangisurat kadagiti pasamak a nailadawan kadagiti nasantuan a kasuratan iti pisarra ken panangidawat iti tunggal tao a mangbasa iti maysa kadagiti binatog iti nasantuan a kasuratan. Mabalin ti tunggal tao nga iparis ti binatogda iti maysa a pasamak iti pisarra ken ilawlawag ti binatog iti klase. Ania ti isingasing dagitoy a pasamak maipapan iti akemtayo iti panagsagana para iti Maikadua a Yaay ti Mangisalakan? Ania ti makaparegta nga aramidentayo kas maysa a klase wenno korum?

• Imbalakad ni President Russell M. Nelson: “Kasano a nasken a sanguentayo dagiti agpada a naliday a padto ken dagiti nadayag a pakdaar iti aldawtayo? Imbaga ti Apo kadatayo no kasano iti simple, ngem nakaskasdaaw, a pammatalged: ‘No nakasaganakayo saankayo nga agbuteng.’[Doktrina ken Katulagan 38:30]” (“Embrace the Future with Faith,” 74). Tapno matulongan dagiti agtutubo nga ad-adda a nakasagana para iti panagsubli ti Mangisalakan, ibilang ti panangidawat iti tunggal maysa kadakuada a mangbasa iti maysa kadagiti tallo a pagbatayan ti panagsagana nga imbinglay ni President Nelson iti mensahena. Awisen ida a mangibinglay no ania ti nasursuroda. Ania ti nakaparegtaantayo nga aramiden tapno agtignay iti balakad ni President Nelson?

• Iti rugi ti mensahena a napauluan iti “Preparing for the Lord’s Return,” inladawan ni Elder D. Todd Christofferson no anianto ti langa ti lubong kalpasan ti Maikadua a Yaay ni Jesucristo (Liahona, Mayo 2019, 81–84). Awisem dagiti agtutubo a mangrebyu iti panangiladawanna ket idasig daytoy iti no ania ti langa ti lubong ita. Mabalinda a paglilinnawagan no ania ti maaramidtayo itan tapno makapagsagana nga agindeg iti kita ti lubong nga inladawan ni Elder Christofferson. (Ti uppat a parapo ti mensahena mangrugi iti “Umuna, ken napateg iti panagsubli ti Apo” ket makatulong.) Kasano a tulongannatayo ti Simbaan ti Mangisalakan nga isagananatayo para iti Maikadua a Yaayna? Inlista ni Elder Christofferson ti tallo a wagas a ti Simbaan ket “naidumduma a napabileg ken nabilin a mangipatungpal kadagiti kasapulan a panagsagana para iti Maikadua a Yaay ti Apo.” Mabalin nga ilasin ken paglilinnawagan dagiti miembro ti klase dagitoy a banag.

No nakasagatayo, ditayo nasken nga agbuteng kadagiti pasamak a mangiturong iti Maikadua a Yaay ti Mangisalakan.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Doktrina ken Katulagan 65:1–2 (Pannakaisubli ti ebanghelio)

• Doktrina ken Katulagan 20:8–12 (Idadateng ti Libro ni Mormon)

• Malakias 4:5–6; Doktrina ken Katulagan 110:13–16 (Pannakaisubli dagiti tulbek ti priesthood)

• 3 Nephi 21:1, 8 (Pannakaummong ti Israel)

• Joseph Smith—Mateo 1:28–30 (Gubat, riribuk, ken basol)

• Joseph Smith—Mateo 1:31 (Naikasaba ti ebanghelio iti lubong)

• Gary E. Stevenson, “A Good Foundation against the Time to Come,” Liahona, Mayo 2020, 48–52

Panangisuro iti Wagas ti Mangisalakan

Suruan dagiti agad-adal a no dadduma ti Espiritu ti mangisuronto kadakuada kadagiti banag kabayatan ti klase ti panaglilinnawag a saan a maisao iti napigsa.