Hunio 11

Kasano a Makapagdur-asak nga As-asideg iti Nailangitan nga Ama ken ni Jesucristo?

Juan 14–17

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti nabiit pay a padas a nangpapigsa kadagiti pammaneknektayo?

• Aywanan dagiti agkasapulan. Asino ti agkasapulan iti tulong ken karkararagtayo? Ania ti mariknatayo a nakaawisan ti riknatayo a makatulong?

• Awisen ti amin nga umawat iti ebanghelio. Kasano a makapagbalintayo a silaw kadagiti miembro ti pamilia wenno gagayyem a saantayo a kapada iti pammati?

• Pagkaykaysaen dagiti pamilia para iti kinaagnanayon. Kasano a maipakitatayo ti ad-adda pay nga ayat ken suporta para kadagiti pamiliatayo ken makaaramid iti positibo a pakaidumaan kadagiti pagtaengantayo?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Saan a dumakkel ti bunga iti maysa a sanga a naisina manipud iti kayo. Iti isu met la a wagas, ditayo makapagdur-as a naespirituan no naisinatayo manipud iti Dios (kitaen iti Juan 15:4–6). Ngem nakaad-adu dagiti puersa nga agkalikagum a mangisina kadatayo manipud Kenkuana—no dadduma ti bukodtayo a kinapalangguad wenno madi a pili ngem masansan a dagiti laeng kasasaad ti mortal a biag. Idi nakipagkita ni Jesus kadagiti disipulona iti maudi a gundaway iti mortalidad, ammona nga iti mabiit maisinanton manipud kadakuada. Ngarud sinuruanna ida maipapan iti pateg ti panangpatalinaed iti nasinged a koneksion Kenkuana ken iti Amana—ti panagbalin a nakaykaysa kadakuada kas iti maysa a sanga iti maysa a kayo. Inawaganna daytoy a “panagtalinaed” Kenkuana. Sinuruanna dagiti disipulona no kasano nga aramiden daytoy. Kapatgan ti amin, babaen ti pangsubbot nga ayatna, inaramidna a posible ti koneksion.

Utobem ti koneksionmo iti Nailangitan nga Ama ken ni Jesucristo bayat ti panagadalmo iti Juan 14–17. Panunotem pay maipapan kadagiti tao a sursuruam ken dagiti tarigagayda nga ad-adda nga umasideg iti Dios. Anianto ti aramidem a makatulong kadakuada? Mabalinmo nga utoben ti Doktrina ken Katulagan 88:62–68 bayat ti panagsaganam a mangisuro.

Aggigiddan a Masursuruan

Ibilang no kasano a mabalinmo a paregtaen dagiti agtutubo a mangilawlawag kadagiti pannursuro ti Mangisalakan maipapan iti ubas ken dagiti sanga iti Juan 15:1–12. Nalabit a mabalinmo nga usaren ti maysa a drowing, maysa a ladawan, wenno ti aktual a sanga a mangtulong kadakuada a mangiladawan iti panunotda no ania ti insuro ni Jesus. Mabalinmo nga idawat kadakuada a mangisarita maipapan kadagiti panawen a nariknada nga asidegda iti Nailangitan nga Ama ken Jesucristo—wenno dagiti panawen a nariknada nga adayoda Kadakuada. Ania ti isuro dagitoy a bersikulo maipapan iti no kasano a makapagtalinaedtayo nga asideg Kadakuada? Dagiti aktibidad a kas iti sumaganad ti makatulong a mangituloy itoy a panagsasarita.

• Mabalin a napateg a mangbubos iti sumagmamano a kanito a mangsukisok iti saludsosd “Ania ti mangyadayo kadatayo manipud iti Nailangitan nga Ama ken ni Jesucristo?” Mabalinmo nga isurat ti saludsod iti pisarra ket agdawat kadagiti sungbat. Nalabit a mabalinmo ti agsarita maipapan iti no ania ti aramidentayo a mangbangon iti relasion iti maysa a gayyem wenno miembro ti pamilia. Kasano a maipada daytoy iti—ken maigidiat iti—wagas a panangbangon iti relasion iti Nailangitan nga Ama ken ni Jesucristo? Kasano a tulongannatayo ni Jesucristo nga umasideg Kenkuana ken iti Amana? Allukoyem dagiti miembro ti klase wenno korum a mangbasa kadagiti nasantuan a kasuratan iti “Dagiti Pangsuporta a Resources” a mangtulong kadakuada a mangsungbat itoy a saludsod. Mabalin a pakairanudan dagiti agtutubo ti panangbasa kadagitoy a bersikulo iti kada paris ken panangiburay no ania ti masursuroda.

• Awan ti as-asideg iti Dios Ama no di ti Ay-ayatenna nga Anak, ni Jesucristo. Ania ti masursurotayo manipud iti Mangisalakan maipapan iti ad-adda nga yaasideg iti Dios? Mabalin nga utoben dagiti miembro ti klase ken korum daytoy a saludsod bayat ti panangbasada iti Lucas 22:41–43; Juan 6:38; 17:3, 20–23; 3 Nephi 11:11; Doktrina ken Katulagan 50:43. Kasano a makapagbalintayo a maymaysa iti Nailangitan nga Ama ken ni Jesucristo?

• Iti mensahena nga “Our Personal Savior,” nalagip ni Elder Michael John U. Teh ti maysa a panawen idi naamirisna, “No ania ti ammok maipapan iti Mangisalakan ket nagpalabes unay ti kadakkel ti pudno a pannakaammok Kenkuana” (Liahona, Mayo 2021, 99). Mabalinmo nga idawat iti klasem wenno korummo a mangilawlawag kadagiti pagdumaan ti panangammo maipapan ken ni Jesucristo ken ti pudno a panangammo Kenkuana. Mabalinda nga isarita maipapan iti no ania ti ar-aramidenda a mangammo maipapan Kenkuana ken no ania ti ar-aramidenda a pudno a mangam-ammo Kenkuana. Kalpasanna mabalinda ti agsukisok kadagiti paset ti mensahe ni Elder Teh a mangsapul iti balakad nga intedna maipapan iti pudno a panangam-ammo iti Mangisalakan. Kasano a naparaburan ti biagtayo babaen ti panagkalikagum a mangam-ammo Kenkuana?

• Iti video a “He Knows Me,” inladawan ti dua nga agtutubo iti Ghana dagiti panagkagumaanda nga umas-asideg iti Dios. Nalabit a mabalin a buyaen dagiti miembro ti klase wenno korum ti video ken, no aramidenda, ilistada dagiti kapanunotan a mangted kadakuada maipapan iti no kasano a mapadur-as ti relasionda iti Amada iti Langit. Awisem ida a mangibinglay iti maysa a banag manipud iti listaanda. No mabalin, mabalin a magustuanda ti panagaramid iti bukodda nga ababa a video a mangiladladawan no kasano nga umas-asidegda iti Dios.

Bayat ti panangam-ammotayo iti Mangisalakan ken panagtungpal kadagiti bilinna, agtalinaedtayto iti ayatna (kitaen iti Juan 15:10).

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Juan 14:6; 1 Timoteo 2:5–6; Jacob 4:11; Mosiah 3:19; Doktrina ken Katulagan 88:63; Moises 6:52

Panangisuro iti Wagas ti Mangisalakan

Insagana ti Mangisalakan ti panagministrona iti daga babaen ti panagkararag ken panagayuno tapno mayasideg iti Amana (kitaen iti Mateo 4:1–2; Lucas 4:1–2). Bayat ti panagsaganam a mangisuro, maaddaanka iti gundaway nga agpaiwanwan iti Nailangitan nga Ama, gapu ta isursurom dagiti annakna!