Ti Pannubbot ti Mangisalakan: Pundasion ti Pudno a Kristianismo, ni Kirk Richards

Hunio 25

Ania ti Kaipapanan Kaniak ti Pannubbot ni Jesucristo?

Mateo 27; Marcos 15; Lucas 23; Juan 19

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Kasano nga ad-adda nga immasidegtayo iti Mangisalakan? Kasano a padpadasentayo ti agbalin nga ad-adda a kas Kenkuana?

• Aywanan dagiti agkasapulan. Asino ti adda iti panunottayo itay laeng? Kasano a matulongantayo dagitoy a tao?

• Awisen ti amin nga umawat iti ebanghelio. Kasano a masungbatantayo dagiti saludsod dagiti gagayyemtayo maipapan iti Simbaan iti wagas a mangpapigsa iti pammatida iti Mangisalakan?

• Pagkaykaysaen dagiti pamilia para iti kinaagnanayon. Ania dagiti sumagmamano a wagas a nasaysayaat a maikonektatayo kadagiti miembro a kabagyan ti pamilia, a kas kadagiti lelang ken lelong ken kasinsin?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Napaliiw ni Elder David A. Bednar a ti sumagmamano a Santo iti Ud-udina nga Aldaw “kasla adda pammatida iti Mangisalakan, ngem saanda a mamati a sidadaan a magun-od dagiti naikari a bendisionna kadakuada” (“If Ye Had Known Me,” Liahona, Nob. 2016, 104). Iti sabali a pannao, nupay mamatitayo a nagsagaba ken natay ni Jesucristo para iti basbasol ti lubong, mabalin a masmasdaawtayo no nagsagaba ken natay a naipangpangruna para iti basbasoltayo. Nariknayo kadin ti kasdiay? Kasano a mangted iti pagsayaatan dagiti tao iti klasem wenno korummo ti pannakaawat a personal a mayaplikar kadakuada ti Pannubbot ti Mangisalakan? Kasano a matulongam ida?

Utobem dagitoy a saludsod bayat ti panangbasam maipapan iti Pannakailansa ti Mangisalakan iti krus. Bayat ti panagsaganam a mangisuro maipapan iti personal a kasasaad ti Pannubbot ni Cristo, mabalinmo nga adalen ti mensahe ni President Dallin H. Oaks “What Has Our Savior Done for Us?” (Liahona, Mayo 2014, 70–77).

Aggigiddan a Masursuruan

Awisem dagiti miembro ti klase wenno korum a mangibinglay iti maysa a banag a nasursuroda maipapan iti Pannakailansa ti Mangisalakan iti krus itay napalabas a lawas iti Baro a Tulag ken ti riknada maipapan iti Mangisalakan. Tapno matulongan a maparegtada, mabalin a damagem ti saludsod kas iti “Ania ti masursurotayo maipapan ken ni Jesucristo manipud kadagiti banag a kinunana ken inaramidna kabayatan dagiti maudi nga orasna?” Kas pagarigan, mabalinmo ti agsukisok kadagiti pagarigan idi ti Mangisalakan, bayat ti panagsagabana para iti amin, nariknana pay laeng kadagiti adda iti aglawlawna iti kaasi (kitaen, kas pagarigan, iti Lucas 23:34, 39–43; Juan 19:25–27). Mabalin a mangiturong daytoy iti panaglilinnawag maipapan iti no kasano nga agpada a sapasap ken personal ti Pannubbot ni Jesucristo. Dagiti aktibidad a kas iti sumaganad ti makatulong kenka a mangituloy a mangilawlawag iti Pannubbot ti Mangisalakan.

• Iti umuna a parapo ti mensahena a “What Has Our Savior Done for Us?,” inladawan ni President Dallin H. Oaks ti pannakisaritana iti maysa a babai a saan a nakumbinsi a nagaramid ni Jesucristo iti ania man a banag para kenkuana. Nalabit a mabalin a basaen dagiti miembro ti klase wenno korum dayta a parapo, nga ikabilda ti bagbagida iti lugar ni President Oaks. Ania koma ti isungbattayo iti daytoy a babai? Mabalinmo nga ikkan ti tunggal miembro ti klase wenno korum iti maysa kadagiti nanumeruan a benneg ti mensahe ni President Oaks. Iti panagaramat iti masursuroda, kasta met dagiti bukodda a padas, mabalinda kalpasanna nga ibingaly dagiti bukodda a sungbat iti saludsod nga “Ania ti inaramid ni Jesucristo para kaniak?”

• Tapno maparegta ti panaglilinnawag maipapan iti no kasano a personal nga apektuannatayo ti Pannubbot ti Mangisalakan, mabalinmo nga isurat iti pisarra ti ragup ti balikas kas iti Gapu ta nagsagaba ken natay ni Jesucristo para iti amin a tao … . Mabalin nga isingasing dagiti miembro ti klase wenno korum dagiti wagas a mangkumpleto iti binatog. Kalpasanna mabalinmo a baliwan ti ragup ti balikas a mabasa a Gapu ta nagsagaba ken natay ni Jesucristo para kaniak … ket yawis dagiti ania man a nayon pay a singasing. Mabalin a paglilinnawagan dagiti miembro ti klase wenno korum dagitoy a binatog, allukoyem ida a mangbasa kadagiti nasantuan a kasuratan iti “Dagiti Pangsuporta a Resources.” Ania ti isuro dagitoy a nasantuan a kasuratan maipapan iti impluensia ti Pannubbot ti Mangisalakan iti bukodtayo a biag?

• Sabali pay a wagas a panagadal kadagiti nasantuan a kasuratan iti “Dagiti Pangsuporta a Resources” ket mabalin a mangawis kadagiti agtutubo a mangsukat kadagiti bersikulo tapno direkta a maipaay kadakuada dagiti bersikulo. Kasano a ti panangaramid iti daytoy ket mangapekto kadagiti riknatayo maipapan kadagiti kinapudno kadagitoy a bersikulo? Kasano a maipakitatayo ti panagyamantayo iti sakripisio ti Mangisalakan para kadatayo?

• Mabalin a sibibileg nga ipaneknek ti sagrado a musika ti maipapan ken ni Jesucristo. Ibilang ti panangawis kadagiti miembro ti klase wenno korum nga umay a nakasagana a mangibinglay kadagiti himno a mangtulong kadakuada a mangrikna iti bileg ti Pannubbot ti Mangisalakan iti bukodda a biag. (Mabalinda ti kumita kadagiti himno ti sakramento wenno iti entry “Jesus Christ—Savior” iti topics index ti Hymns.) Idawat kadagiti miembro ti klase wenno korum a mangilasin kadagiti ragup ti balikas kadagiti himno a mangtulong kadakuada a makarikna iti ayat ti Mangisalakan para kadakuada. Mabalinmo pay nga isarita maipapan iti no kasano nga apektuan ti sakripisio ti Mangisalakan ti inaldaw a biagtayo. Kas pagarigan, kasano nga apektuan daytoy dagiti pili nga aramidentayo?

Ni Cristo iti Getsemani, ni Dan Burr

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• 1 Taga Corinto 15:20–22; 2 Taga Corinto 12:7–9; Alma 7:11–12; 3 Nephi 11:10–11

• Tad R. Callister, “The Atonement of Jesus Christ,” Liahona, Mayo 2019, 85–87

Panangisuro iti Wagas ti Mangisalakan

Dagiti naimpusuan a panangipeksa iti ayat a kas ken Cristo ket addaan iti dakkel a pannakabalin a mangpalukneng iti puspuso dagiti miembro ti klase a marigrigatan iti ebanghelio. Masansan a nasken a maammuan laeng dagitoy a tao a kasapulan ken maipatpategda.