Kalpasan ti Panagungarna, indauluan ti Mangisalakan ti Simbaanna babaen dagiti Apostolna, agraman ni Pedro.

Hulio 9

Kasano nga Idauluan ni Jesucristo ti Simbaanna?

Dagiti Aramid 1–5

Agiinnuman

Idauluan ti maysa a miembro ti panguluen ti klase wenno korum; agarup 10–20 a minuto

Iti rugi ti miting, aggigiddan a mangulit iti Tema ti Young Women wenno ti Tema ti Korum ti Aaronic Priesthood. Kalpasanna idauluan ti panaglilinnawag maipapan iti aramid ti pannakaisalakan ken pannakaitan-ok nga us-usaren ti maysa wenno ad-adu pay a saludsod iti baba wenno saludsod a bukodmo (kitaen iti Sapasap a Handbook, 10.2, 11.2). Mangplano kadagiti wagas nga agtignay iti no ania ti paglilinnawaganyo.

• Agbiag iti ebanghelio. Ania dagiti topiko nga inlawlawag ti bishopric kadagiti mitingtayo iti ward youth council? Ania ti mabalintayo nga aramiden kas maysa a klase wenno korum maibatay kadagita a panaglilinnawag?

• Aywanan dagiti agkasapulan. Kasano a makatulongtayo kadagiti tao iti wagas a kas ken ni Cristo no makitatayo ti panagkasapulan ket ditayo ammo no ania ti isaotayo?

• Awisen ti amin nga umawat iti ebanghelio. Ania ti nasarakantayo iti ebanghelio ni Jesucristo a mangisangbay kadatayo iti rag-o? Kasano a maibinglaytayo ti ayatna kadagiti dadduma?

• Pagkaykaysaen dagiti pamilia para iti kinaagnanayon. Ania ti ar-aramidentayo a mangsapul iti nagnagan dagiti kapuonantayo nga agkasapulan kadagiti ordinansa ti templo? Ania ti maaramidtayo a makatulong kadagiti dadduma a mangsapul iti nagnagan dagiti kapuonanda?

Iti ungto ti adalen, no maitutop, aramidem dagiti sumaganad:

• Paneknekam dagiti pagbatayan a naisuro.

• Palagipam dagiti miembro ti klase wenno korum maipapan kadagiti plano ken awis a naaramid bayat ti miting.

Isuro ti Doktrina

Idauluan ti nataengan a lider wenno agtutubo; agarup 25–35 a minuto

Isaganam ti Bagim a Naespirituan

Maysa a banag a maammuan a nasayaat ti Simbaan, a mangisuro ti Simbaan kadagiti pudno a pagbatayan, wenno a matulongannaka ti Simbaan nga agbalin a nasaysayaat a tao. Sabali pay a banag a maammuan a ti Simbaan ita ket talaga a Simbaan ni Jesucristo, nga impasdekna ken personal ken agtultuloy nga idauluanna babaen ti maysa a sibibiag a propeta. Ti libro ti Dagiti Aramid mangted iti adu a pakakitaan a nasinged a makiraman ti Mangisalakan iti panangidaulo iti Simbaanna. Bayat ti panagadalmo kadagiti kapitulo 1–5, sapulem ti pakakitaan, ket utobem no kasano nga ammom nga itultuloyna nga idauluan ti Simbaanna iti agdama. Kasano a nabendisionannaka daytoy a pannakaammo?

Adda kadi pammaneknek dagiti agtutubo a sursuruam a ti Simbaan a nagkamenganda ket idauluan ti Mangisalakan Mismo? Kasano a bendisionan ida ti kasta a pammaneknek? Kasano a matulongam ida a manggun-od wenno mangpatibker iti daytoy a pammaneknek? Kas nayon iti panagadal iti Dagiti Aramid 1–5, mabalinmo a basaen ti mensahe ni Elder Quentin L. Cook “The Blessing of Continuing Revelation to Prophets and Personal Revelation to Guide Our Lives” (Liahona, Mayo 2020, 96–100).

Aggigiddan a Masursuruan

Tapno marugian ti panaglilinnawagyo, mabalinmo nga isurat iti pisarra ti Idauluan ni Jesucristo ti Simbaanna babaen ti paltiing kadagiti Apostolna. Mabalin a mangibinglay dagiti miembro ti klase wenno korum iti maysa a banag a nasarakanda iti panagadalda iti Dagiti Aramid 1–5 a mangsuporta iti daytoy a binatog. (No kasapulan, mabalinmo nga iturong ida iti Dagiti Aramid 1:1–8; 2:36–39; 4:1–13, 31–33.) Ania a pakakitaan a makitatayo nga idauluan ni Jesucristo ti Simbaanna iti isu met la a wagas iti agdama? Dagiti aktibidad kas iti sumaganad ti makatulong pay kadagiti sursuruam a mangpapigsa iti pammatida iti daytoy napateg a kinapudno.

• Mabalinmo ti mangisagana iti sumagmamano a saludsod kas kadagitoy: Kasano nga idauluan ni Jesucristo ti Simbaanna? Kasano a mapapigsatayo ti pammatitayo nga idadauluan ni Jesucristo ti Simbaanna? Apay nga agtalekkayo kadagiti propeta ken apostol ti Apo? Ikkam ti tunggal miembro ti klase wenno korum iti maysa kadagiti saludsod, ken awisem ida a mangutob iti saludsod ken mangpanunotka kadagiti nasantuan a kasuratan a makatulong kadakuada a mangsungbat iti daytoy (no kasapulan, kitaen iti “Dagiti Pangsuporta a Resources” para iti sumagmamano a kapanunotan). Kalpasanna mangted iti gundaway nga ibinglay ken ilawlawag ti tunggal maysa no ania ti nasursuroda.

• Tapno matulongan a makita ti klase wenno korum no kasano nga idauluan ti Apo ti Simbaanna, mabalinmo nga awisen ida a mangrebyu iti umuna a benneg ti mensahe ni Elder Quentin L. Cook a “The Blessing of Continuing Revelation to Prophets and Personal Revelation to Guide Our Lives.” Nalabit a mabalin ti tunggal miembro ti klase wenno korum a mangibinglay iti maysa a banag manipud iti mensahe a mangtulong kadakuada a mangammo a sireregta ken personal nga idadauluan ni Jesucristo ti Simbaanna. Ania dagiti dadduma pay a nalawag a pannakaammo ken pannakaawat a masarakantayo kadagiti nasantuan a kasuratan iti babaen ti “Dagiti Pangsuporta a Resources”?

• Mabalin a makatulong pay kadagiti agtutubo a makasursuro iti ad-adu pay maipapan iti no kasano nga idadauluan ti Apo ti wardyo. Mabalinmo nga idawat kadagiti agtutubo a mangibinglay kadagiti pagarigan ti no kasano a tartarabayen ti Apo dagiti lider ti tunggal ward, agraman ti presidente ti klase wenno korum. Kabayatan ti lawas sakbay ti klase, mabalinmo nga idawat iti sumagmamano a lider ti ward tapno mangibinglay—sangunsango wenno online—kadagiti padpadas a mangipakita iti no kasano a tarabayen ida ti Apo. Mabalin a mangsarak dagiti miembro ti klase wenno korum kadagiti nayon a pagarigan iti mensahe ni President Henry B. Eyring “The Lord Leads His Church” (Liahona, Nob. 2017, 81–84). Apay a napateg a maaddaan iti pammati a parparegtaen ti Apo dagiti lider ti wardtayo?

• Marikna ti sumagmamano a tao a no nasayaattayo a tattao ken agaramidtayo kadagiti nasayaat a banag, ditayo kasapulan ti maysa a simbaan. Mabalinmo a damagen kadakuada no kasano ti isusungbatda iti daytoy. Iti mensahena a “The Need for a Church” (Liahona, Nob. 2021, 24–26), nangted ni President Dallin H. Oaks iti sumagmamano a gapu no apay a napateg dagiti simbaan, agraman ti naisubli a Simbaan ti Apo. Mabalin a sukisoken dagiti agtutubo daytoy a mensahe iti kada paris, iti babassit a grupo, wenno kas maysa a klase wenno korum ket ibinglayda no ania ti masarakanda.

Iwanwan ti Apo ti Simbaanna babaen iti paltiing, agraman dagiti panguluen ti klase ken korum.

Agtignay iti Pammati

Allukoyem dagiti miembro ti klase wenno korum a mangutob ken mangisurat no anianto ti aramidenda nga agtignay kadagiti impresion nga inawatda ita nga aldaw. No kayatda, mabalinda nga ibinglay dagiti kapanunotanda. Awisem ida a mangpanunot maipapan iti no kasano a ti panagtignay kadagiti impresionda ti mangpapigsanto kadagiti relasionda iti Nailangitan nga Ama ken ni Jesucristo.

Dagiti Pangsuporta a Resources

• Taga Efeso 2:19–20; 4:11–15; Doktrina ken Katulagan 1:38; 21:1–6; Pagannurotan ti Pammati 1:5–6

Panangisuro iti Wagas ti Mangisalakan

Tapno maawis ti Espiritu iti panangisurom, allukoyem dagiti dadduma pay a mangiburay iti personal a pammaneknekda maipapan ti kinapudno nga ilawlawagmo.