14 nō Mē

Nāhea te Fatu i te tauturu i te mau tāne ’e te mau vahine ’ia ’ohipa tāhō’ē i roto i te fa’aipoipora’a ?

Mataio 19–20 ; Mareko 10 ; Luka 18

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e fa’ahiti ’āmui i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea te fāriura’a i ni’a i te Fatu i te tauturu ia tātou ’ia fa’aruru i te mau tītaura’a ’e te mau tāmatara’a ?

• Aupuru i te feiā tei hina’aro i te tauturu. ’O vai tā tātou i mātau ’o tei hina’aro i tā tātou mau pure ’e tō tātou auhoara’a ?

• Ani i te mau ta’ata ato’a ’ia fāri’i i te ’evanelia. E aha te mau fa’anahora’a nō te fa’a’ite i te ’evanelia i tāu’aparauhia i roto i te ’āpo’ora’a pāroita a te feiā ’āpī ? Nāhea tā tātou piha ’aore rā pupu e nehenehe e fa’aō atu ?

• Tāhō’ē i te mau ’utuāfare ē a muri noa atu. Nāhea te ravera’a i te ’ohipa ’ā’amu ’utuāfare i te ha’apūai i tō tātou mau aura’a ’e tō tātou Metua i te ao ra ’e ia Iesu Mesia ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Ha’amata mai nā roto ia Adamu ’e ia Eva, ’ua ’imi tō tātou Metua i te ao ra ’e ’o Iesu Mesia i te ha’apūai ’e i te tāhō’ē i te vahine ’e te tāne i roto i te fa’aipoipora’a. ’Ua ha’api’i te Fa’aora, « e fa’aru’e ai te ta’ata i tāna metua tāne ’e tāna metua vahine ’a ’ati atu ai i tāna vahine ; e riro ho’i rāua ’ei hō’ē » (Mataio 19:5). I taua ato’a ra taime, tē ’ohipa ra Sātane mā tōna pūai ato’a i te ha’apararī i te mau fa’aipoipora’a ’e i te ha’amou i te mau ’utuāfare. E mea pāpū, ’ua ’ite te mau melo o te piha ’aore rā o te pupu i te mau tāmatara’a e rave rahi tā te mau fa’aipoipora’a e fa’aruru nei i teie mahana. ’Ua ’ite ato’a paha rātou i te mau vahine ’e te mau tāne fa’aipoipo e ’ohipa ’āmui nei ’e e ani nei i te tauturu nō te ra’i mai, nō te fa’atupu i te hō’ēra’a. ’A feruri na, nāhea teie mau ’itera’a rau i te ha’api’i ia rātou, nō ni’a i te mau mea e tītauhia nō te fa’atupu i te hō’ēra’a i roto i te hō’ē fa’aipoipora’a. E aha tā ’oe e rave nō te ha’api’i ia rātou i te faufa’a rahi nō te fa’aineine i teieneira’a ra, nō tō rātou mau aura’a i muri nei o te fa’aipoipora’a ?

I te hepetoma i ma’iri a’e nei, ’ua fāna’o na te mau melo o te piha ’aore rā o te pupu i te tai’o i te mau ha’api’ira’a a te Fa’aora nō ni’a i te fa’aipoipora’a e vai ra i roto i te Mataio 19:4–6.. Nō te fa’aineine i te ha’api’i, ’a tuatāpapa i teie mau ’īrava e tae noa atu i te poro’i a te peresideni Dieter F. Uchtdorf « ’Ei fa’ahanahanara’a i te feiā ’o tē fa’aora nei » (Liahona, Mē 2016, 77–80) ’aore rā te tahi atu mau poro’i i roto i teie pene.

Ha’api’i ’āmui

’Aita paha te parau nō te fa’aipoipora’a i roto i te ferurira’a o te feiā ’āpī e rave rah. Noa atu rā, nō te faufa’a o te reira parau e ti’a ’ia fa’aineine-māite-hia te reira. E ani atu paha i te feiā ’āpī ’ia feruri ē, tē tūturi ra rātou i mua i te fata i roto i te hiero ’ia tā’atihia rātou, ’e ’a parau mai ai te ta’ata tā’ati ia rātou ’ia tuatāpapa i te Mataio 19:4–6. E aha te mau parau mau tā tātou e ’ite mai i roto i teie mau ’īrava ’o te tauturu i nā ta’ata fa’aipoipo-’āpī-hia ? Nāhea te tāne ’e te vahine fa’aipoipo e riro ai ’ei « hō’ē » ? Nāhea te Fa’aora ’ia tauturu ? E tauturu te mau ’ātivite mai teie te huru i tā ’oe piha ’aore rā pupu ’ia māramarama, nāhea ’ia fa’atupu i te hō’ēra’a i roto i te fa’aipoipora’a.

• Tē hōro’a mai nei Adamu ’e ’o Eva i te hō’ē hi’ora’a maita’i rahi nō te tāne ’e te vahine fa’aipoipo e ’ohipa ’āmui nei i roto i te hō’ēra’a. E fa’a’ite i tō rāua hōho’a (hi’o Gospel Art Book [2009], N°5) ’e e ani i te piha ’aore rā i te pupu ’ia tai’o te Mose 5:1–12, ma te ’imi mai i te mau rāve’a i reira tō Adamu ’e Eva ha’a-’āmui-ra’a ma te tāhō’ē. E aha tā rāua i rave i ha’amaita’i ai te Atua i tō rāua aura’a ? Nō te tauturu i te feiā ’āpī ’ia ha’api’i rahi mai atu ā i te parau nō te tāhō’ēra’a i roto i te fa’aipoipora’a, e tuatāpapa rātou i te mau pāpa’ira’a mo’a i roto i te « Pu’e parau ha’amāramaramara’a ».

• ’Ua ha’api’i te peresideni Dieter F. Uchtdorf ē, i roto i te mau tōtaiete e rave rahi i teie mahana, « e au ra, e mea fa’aru’e te mau mea ato’a ». Tera rā, e’ita teie huru e tano nō tō tātou mau fa’aipoipora’a ’e nō tō tātou mau ’utuāfare ; e ti’a rā ia tātou ’ia « hōro’a i tā tātou mau tūtavara’a maita’i roa a’e nō te pāruru ’e nō te fa’ananea [ia rātou] » (« ’Ei fa’ahanahanara’a i te feiā o te fa’aora nei », 77). Nō te tauturu i te fa’ahōho’a i teie parau, e ani i te feiā ’āpī ’ia feruri i te hō’ē mea tā rātou i mono ’aita i maoro a’enei ’o tei pararī, tei tahito roa ’aore rā tei hope te tau. Nō te aha e mea ta’a ’ē te mau fa’aipoipora’a i te mau mea e monohia mai teie te huru ? I muri iho, e tai’o i te piha ’aore rā i te pupu i te tuha’a o te a’ora’a a te peresideni Uchtdorf tei upo’o-parau-hia « Fa’aorara’a i tō tātou fa’aipoipora’a » ’e ’a fa’a’ite mai i te mau rāve’a e ’ohipa ai te tāne ’e te vahine fa’aipoipo nā roto i te hō’ēra’a ’e e te Fa’aora nō te ha’apūai i tō rātou fa’aipoipora’a. E aha tā tātou e rave i teienei nō te fa’aineine ia tātou nō teie mau fa’aipoipora’a pūai ’e te tāhō’ē ?

• ’A ha’amana’o i te pāpa’i Te hō’ēra’a i roto i te fa’aipoipora’a i ni’a i te tāpura ’ere’ere ’e te anira’a i te feiā ’āpī ’ia tāpura mai i te mau mea tā te vahine ’e tā te tāne fa’aipoipo e rave nō te riro ’ei hō’ē. I muri iho ’a ani i te feiā ’āpī ’ia ’imi « Te ’Utuāfare : E Poro’i i tō te Ao nei » (ChurchofJesusChrist.org) nō te mau mana’o tā rātou e tu’u atu i roto i tā rātou tāpura. E aha te mau peu maita’i tā te piha ’aore rā tā te pupu e ’ite nei i roto i te tahi ’e te tahi ’aore rā i roto i te mau ta’ata fa’aipoipohia ’o tā rātou i mātau, tei riro ’ei mea faufa’a roa nō te hō’ēra’a i roto i te fa’aipoipora’a ? Nō te aha e mea faufa’a ’ia fa’ananea ’e ’ia fa’a’ohipa i teie mau parau tumu i roto i tō tātou mau aura’a i teienei ? E hōro’a mai te mau video i roto te « Pu’e parau ha’amāramaramara’a » i te tahi mau hi’ora’a nō teie mau peu maita’i e fa’a’ohipahia nei.

• Mai te mea noa atu e uira’a ’aore rā e māna’ona’ora’a tō te piha ’aore rā tō te pupu nō ni’a i te fa’ata’ara’a, ’a feruri i te hi’o fa’ahou i te mau tuha’a o te a’ora’a a te peresideni Dallin H. Oaks « Fa’ata’a-’ē-ra’a » (Liahona, Mē 2007, 70–73).

E ha’amata mai ia Adamu ’e ’o Eva, ’ua ’imi tō tātou Metua i te ao ra ’e ’o Iesu Mesia ’ia ha’apūai ’e ’ia tāhō’ē te mau vahine ’e te mau tāne i roto i te fa’aipoipora’a.

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A ani ia rātou ’ia feruri e nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Korinetia I 11:11 ; Te Ha’api’ira’a Tumu ’e te mau Fafaura’a 42:22 ; 49:15–17 ; Mose 3:18, 21–24 (Te faufa’a nō te hō’ēra’a i roto i te fa’aipoipora’a)

• « Renaissance of Marriage [Fa’a’āpī-fa’ahou-ra’a i te fa’a’ipoipora’a], » « Let Us Be Men [’Ia riro ’ei mau tāne], » « Expressions of Love [Mau fa’a’itera’a nō te here] » (video), ChurchofJesusChrist.org

Ha’api’ira’a mai tā te Fa’aora

Te fa’a’itera’a i te aroha mai te HuruMesia, e mana rahi tō te reira nō te tāmarū i te ’ā’au o te mau pīahi e ’aro nei. Nō te tauturu i te mau melo o te piha ’ia ’ite ē, tē hina’arohia nei rātou ’e ’ua herehia rātou, e ani ia rātou ’ia ’āmui mai i roto i te hō’ē ha’api’ira’a i muri nei, nā roto i te fa’a’itera’a mai i te hō’ē ’itera’a ’aore rā i tō rātou mau mana’o nō ni’a i te hō’ē pāpa’ira mo’a.