Ta’ata maita’i nō Samaria, nā Annie Henrie Nader

23 nō ’Ēperēra

Nāhea vau ’ia fa’a’ite i te here rahi a’e i te feiā ’ati a’e iā’u ?

Mataio 18 ; Luka 10

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e fa’ahiti ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau ’ohipa tei tupu iho nei, tei ha’afātata ia tātou i te Metua i te ao ra ’e ia Iesu Mesia ?

• Aupuru i te feiā tei hina’aro i te tauturu. ’Ua tae ’āpī mai ānei te tahi ta’ata i roto i tā tātou pāroita ’aore rā ’ua tomo ’āpī mai ānei i roto i te ’Ēkalesia ? Nāhea tātou i te tauturu ia rātou ’ia ’ite ē, tē fāriʼi-poupou-hia nei rātou ?

• Ani i te mau ta’ata ato’a ’ia fāri’i i te ’evanelia. E aha te mau ’ātivite i mua nei i reira tātou e ani manihini ai i tō tātou mau hoa ’ia haere mai ?

• Tāhō’ē i te mau ’ūtuāfare ē a muri noa atu. E aha te mau tauto’ora’a tā tātou e rave nō te pāpa’i i tō tātou iho ’ā’amu ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

I muri a’e i tō Iesu ha’api’ira’a i te hō’ē « ha’api’i ture » i te faufa’a rahi nō nā fa’auera’a rahi e piti—te aroha i te Atua ’e te aroha i tō tātou ta’ata tupu—ui atu ra te ha’api’i ture : « ’O vai ho’i tō’u ta’ata tupu » ? (hi’o Luka 10:25–29 ; Mataio 22:35–40). ’Ei pāhonora’a, hōro’a atu ra te Fa’aora i te parabole nō te ta’ata nō Samaria ’o tei ha’afifi i tōna ora nō te aupuru i te hō’ē ta’ata ’āti Iuda ’o tei ha’apēpēhia, ’ua ’āfa’i ’oia i taua ta’ata ra i te hō’ē fare ha’apūra’a ’ia aupuruhia, ’e ’ua ’aufau i te ha’amau’ara’a nō tōna rapa’aura’a. ’Aita te ta’ata Samaria i tau’a i te mau ta’a-’ē-ra’a i rotopū iāna iho ’e te ta’ata, ’o tei fa’ariro noa na ia rātou ’ei ’enemi nō te nūna’a, ’aore rā i ha’avā iāna ’aore rā i ’imi i te mau tumu ’eiaha e tauturu. ’Ua tāvini ’oia i taua ta’ata ra i roto i te fifi, noa atu te mau ha’atāfifira’a o te ta’ata iho ’e te tusiara’a, ’ua fa’a’ite noa ’oia i tōna here i te ta’ata ’e i te Atua. ’A feruri ai ’oe i te mau ha’api’ira’a a te Fa’aora i roto te Luka 10:25–37, ’a feruri na e aha mau te aura’a « aroha … i tō ta’ata tupu mai … ia ’oe iho na » (’īrava 27).

Nāhea ’oe i te tauturu i te feiā tā ’oe e ha’api’i ra ’ia hāro’aro’a ē, ’ia tāvini ana’e rātou i te feiā ’ati a’e ia rātou, tē fa’a’ite ra ïa rātou i tō rātou here i te Atua ? E aha te mea e fa’auru ia rātou ’ia here ’e ’ia tāvini ia vetahi ’ē ? ’A fa’aineine ai ’oe, e hi’o fa’ahou i te a’ora’a a te peresideni Russell M. Nelson « E piti fa’auera’a rahi » (Liahona, Novema 2019, 96–100).

Ha’api’i ’āmui

Nō te ha’amata i te hō’ē tāu’ara’a parau nō ni’a i te fa’a’itera’a i te here rahi a’e i te feiā ’ati a’e ia tātou, e ani i te mau melo o te piha ’aore rā o te pupu ’ia fa’a’ite mai, e aha tā rātou i ’apo mai nō ni’a i te herera’a ia vetahi ’ē nā roto mai i te parabole nō te ta’ata maita’i nō Samaria, i roto te Luka 10:25–37. E aha tā tātou i ’apo mai nō ni’a i te aura’a i rotopū i te mātāmua ’e te piti o te fa’auera’a rahi i roto te Luka 10:27 ’e te fa’ahitira’a parau a peresideni Dallin H. Oaks i roto te « Pu’e parau ha’amāramaramara’a » ? E tauturu te mau mana’o i muri nei ia ’oe, ’ia tāmau noa i te tāu’ara’a parau nō ni’a i te fa’a’itera’a i te here rahi a’e i te feiā ’ati a’e ia tātou.

• ’O Iesu Mesia tō tātou hi’ora’a maita’i rahi a’e nō te fa’a’itera’a i te here i te Atua nā roto i te tāvinira’a ia vetahi ’ē, ’e e fa’auruhia te mau melo o te piha ’aore rā o te pupu ’ia tuatāpapa i tōna hi’ora’a. ’A ani i te ta’ata tāta’itahi ’ia feruri i ni’a i te orara’a tāhuti o Iesu Mesia ’e ’ia mā’iti mai hō’ē ’ohipa i tupu nō roto mai i tōna orara’a ē fa’a’ite ra i tōna here rahi nō te tahi mau ta’ata. E ani i te ta’ata tāta’itahi ’ia fa’a’ite mai i te ’ohipa i tupu ’o tā rātou i mā’iti mai, ’e nō te aha ’ua riro te reira ’ei mea faufa’a nō rātou. E ani i te feiā tā ’oe e ha’api’i ra ’ia feruri i te hō’ē rāve’a, e hina’aro rātou e pe’e i te hi’ora’a nō te here o te Fa’aora. ’Ia fa’a’ite ato’a mai rātou i tō rātou mau mana’o nō ni’a i te hō’ē ta’ata tā rātou i mātau tei pe’e i teie hi’ora’a.

• ’A fa’a’ite ’e ’a ’āparau ’e te mau melo o te piha ’aore rā o te pupu i te fa’ahitira’a parau a te peresideni Russell M. Nelson e ’itehia i roto te « Pu’e parau ha’amāramaramara’a ». E ani i te mau melo o te piha ’aore rā o te pupu ’ia hi’o fa’ahou hō’ē ’aore rā hau atu o te mau a’ora’a o te ’āmuira’a rahi i fa’ahitihia i roto i teie arata’i ha’api’ira’a, ma te ’imi mai i te mau ha’api’ira’a ’o te arata’i atu i roto i tā tātou mau tauto’ora’a ’ia here ia vetahi ’ē. ’Ia rōtahi rātou i ni’a i te mau tuha’a i muri nei : te mau hi’ora’a nō ni’a i te huru e nehenehe ai tātou e tāvini, i roto « Te piti o te ture rahi » nā te peresideni Nelson ; te mau tuha’a I, II, ’e VI i roto i te a’ora’a a te peresideni Oaks « Te herera’a ia vetahi ē ’e te orara’a i roto i te ta’a-’ē-ra’a » ; ’e te ’ā’amu nō ni’a i te mau rāpiti ’e te a’o i te feiā ’āpī i roto « ’Ā’au i au-tahi-māite-hia » nā Elder Gary E. Stevenson. E tai’o ’āmui ato’a i te Mosia 2:17 ’e te Moroni 7:45–48. E tauturu maita’i te reira ’ia pāpa’ihia te mau ha’api’ira’a i ’āparauhia e te feiā ’āpī, i ni’a i te tāpura ’ere’ere. I muri iho, e nehenehe te piha ’aore rā te pupu e ’āparau ’āmui i ni’a i te mau rāve’a ta’a ’ē maita’i, e fa’a’ohipa maita’i ai rātou i teie mau ha’api’ira’a i roto i tō rātou mau aura’a ’e te mau melo o te ’utuāfare, ’e te mau hoa’, ’e tō rātou ’oire, e tae noa atu i te feiā e mea fifi ’ia here.

• E riro te mau tauto’ora’a a te mau melo o te piha ’aore rā o te pupu i roto i te ’ohipa nō te fa’aorara’a ’e te fa’ateiteira’a ’ei ’ohipa faufa’a a’e ’e te oa’oa, ’ia fa’auru-ana’e-hia rātou e te here. Nō te tauturu ia rātou ’ia hi’o e mea nāhea te tuha’a tāta’itahi o te ’ohipa fa’aorara’a ’e te fa’ateiteira’a (hi’o Buka arata’i rahi, 1.2) i te fa’a’ana’anataehia e te here, ’a pāpa’i i nā tuha’a e maha i ni’a i te tāpura ’ere’ere. I muri iho, e ani i te feiā ’āpī ’ia ’āparau e nāhea ’ia roa’a te ’ā’au tei ’ī i te here nō vetahi ’ē, i te taui i te huru ’a fa’aō mai ai rātou i roto i te tuha’a tāta’itahi. Tē vai ra paha te mau mea i tupu nō rātou nō roto mai i tō rātou iho orara’a ’aore rā te orara’a o vetahi ’ē ’o tā rātou e hina’aro e fa’ati’a mai.

’Ua ha’api’i te peresideni Russell M. Nelson, « Mai te mea ē, e here tātou i te Atua ma tō tātou ’ā’au ato’a, e fa’afāriu ’oia i tō tātou ’ā’au i ni’a i te ora maita’i o vetahi ’ē ».

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A ani ia rātou ’ia feruri e nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Dallin H. Oaks, « Te herera’a ia vetahi ’ē ’e te orara’a i roto i te ta’a-’ē-ra’a », Liahona, Novema 2014, 25–28

• Gary E. Stevenson, « ’Ā’au i au-tahi-māite-hia », Liahona, Mē 2021, 19–23

• « A Good Samaritan [Hō’ē ta’ata maita’i nō Samaria] », « The Greatest Commandment [Te fa’auera’a rahi a’e] » (mau video), ChurchofJesusChrist.org

• ’Ua ha’api’i te peresideni Dallin H. Oaks : « Terā rā, ’eiaha tō tātou ha’apa’o i teie fa’auera’a piti ’ia fa’aha’amo’e ia tātou i te ture mātāmua, ’ia hina’aro i te Atua ma tō tātou ’ā’au, te vārua ’e te mana’o ato’a … Tītauhia ia tātou ’ia tāmata i te ha’apa’o i nā ture rahi e piti. Nō te rave i te reira, e ha’amau tātou i te hō’ē rēni i rotopū i te ture ’e te here—te ha’apa’ora’a i te mau fa’auera’a ’e te haerera’a nā ni’a i te ’ē’a o te fafaura’a, ’a here noa ai i tō tātou ta’ata tupu i ni’a i te ’ē’a. E tītau taua haerera’a ra ia tātou ’ia ’imi i te fa’aurura’a nō ni’a i te mea e pāturu ’e i te mea e pāto’i, ’e nāhea ’ia here ’e ’ia fa’aro’o ma te fa’atura ’e ’ia ha’api’i i terā vaira’a. E tītau terā haerera’a tā tātou ’eiaha tātou ’ia fati i ni’a i te mau fa’auera’a, e fa’a’ite rā i te hāro’aro’a ’e te here rahi » (« E piti fa’auera’a rahi », Liahona, Novema 2019, 73–75).

• ’Ua ha’api’i Russell M. Nelson : « Te feiā mo’a i te mau mahana hope’a nei … tē hina’aro mau nei rātou e ora i te ture rahi mātāmua ’e te piti. Mai te mea ē, e here tātou i te Atua ma tō tātou ’ā’au ato’a, e fa’afāriu ’oia i tō tātou ’ā’au i ni’a i te ora maita’i o vetahi ’ē i roto i te hō’ē ’ohura’a nehenehe ’e te maita’i. … Te hōro’ara’a i te tauturu ia vetahi ’ē—te tauto’o-pāpū-ra’a nō te ’atu’atu ia vetahi ’ē mai ia tātou e ’atu’atu nei ia tātou iho ’aore rā, hau atu—tō tātou ïa ’oa’oa. Mai te peu iho ā rā ē, e ’ere te reira i te mea tano roa ia tātou, ’e mai te peu ē, e tītau te reira ’ia fa’aru’e tātou i tō tātou vāhi hau maita’i. Te orara’a i te piti o te ture rahi, o te tāviri ïa nō te riro mai ’ei pipi mau nā Iesu Mesia » (E piti fa’auera’a rahi », Liahona, Novema 2019, 97, 100).

Ha’api’ira’a mai tā te Fa’aora

E fa’ati’a tō ’oe iho ’ite rau ’ia ora i te ’evanelia ia ’outou, ’ia fa’a’ite i te hō’ē ’itera’a pāpū pūai nō te mau parau tumu ’o tā ’oe e ha’api’i nei. Nō te mea tē ora nei ’oe i te reira, e fa’a’ite te Vārua Maita’i ē e parau mau tā ’oe e ha’api’i ra.