9 nō ’Ēperēra

Nāhea vau i te ha’apūai i tō’u ’itera’a pāpū nō te ti’afa’ahoura’a o Iesu Mesia ?

Pāsa

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e fa’ahiti ’āmui i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, hau atu i te ’āparaura’a nō ni’a i te ’ohipa ta’a ’ē a te piha ’aore rā i te terera’a ’ohipa a te pupu, e hina’aro paha ’outou e ’āparau i te mau mana’o ’e i te mau tumu parau nō roto mai i te ’āmuira’a rahi. E tauturu te mau uira’a i muri nei.

• E aha te mau tumu parau ’aore rā te mau a’ora’a tei ha’aferuri ia tātou ? E aha tei ha’apūai i tō tātou fa’aro’o ia Iesu Mesia ?

• E aha tei ha’apūai i tō tātou ’itera’a pāpū nō te mau peropheta ora ? E aha tei fa’auruhia ia tātou ’ia rave, nō te mea tā tātou i ha’api’i mai, ’aore rā tei ha’aputapū ia tātou ?

• E aha tā tātou e rave ’ei piha ’aore rā ’ei pupu nō te ha’amana’o ’e nō te fa’a’ohipa i te mau parau a’o, tā tātou i fa’aro’o i te ’āmuira’a rahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Tē fa’a’ite pāpū nei te mau ’āpōsetolo i tahito ra ’e i teie ’anotau ē, tē ora nei Iesu Mesia ! ’Ua māuiui ’oia ’e ’ua pohe i ni’a i te sātauro, ’ua hunahia ’oia i roto i te hō’ē mēnema, ’e i te toru o te mahana ’ua ti’afa’ahou mai ’oia. Nā roto i tōna upo’oti’ara’a i ni’a i te pohe, e ti’afa’ahou mai tātou pā’āto’a. ’Ua hōpoi mai te ti’afa’ahoura’a o te Fa’aora i te fafaura’a o te tāhuti ’ore ’e te tīa’ira’a o te ora mure ’ore. Tei roto teie fafaura’a i te māfatu o te Pāsa.

’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e tumu ta’a ’ē tō tātou ’ia ti’aturi ē, ’ua ti’afa’ahou mai Iesu Mesia. Ta’a ’ē noa atu te mau ’itera’a o te mau ta’ata nō te tau o te Faufa’a ’Āpī, tē vai nei ia tātou te mau ’itera’a pāpū o te feiā tei ora na i te tau o te Buka a Moromona, o te peropheta Iosepha Semita ’e o tō tātou mau peropheta ’e mau ’āpōsetolo ora. E fāri’i ato’a tātou i tō tātou iho ’itera’a pāpū nō te ti’afa’ahoura’a nā roto i te Vārua Maita’i. Nāhea ’oe i te tauturu i te feiā ’āpī ’ia ha’apūai i tō rātou ’itera’a pāpū ē, ’ua ti’afa’ahou mai Iesu Mesia ? ’A fa’aineine ai ’oe, ’a feruri i te tuatāpapa i te a’ora’a a te tuahine Reyna I. Aburto « ’Ua ’ere te pohe i tōna rē » (Liahona, Mē 2021, 85–86) ’e te a’ora’a a Elder S. Mark Palmer « E riro mai tō tātou ’oto ’ei ’oa’oa » (Liahona, Mē 2021, 88–89).

Ha’api’i ’āmui

’A ha’amata i te hō’ē ’āparaura’a nō ni’a i te ti’afa’ahoura’a o Iesu Mesia, nā roto i te anira’a i te feiā ’āpī ’ia fa’a’ite mai i te mea tā rātou i rave i teie hepetoma nō te fa’ahanahana i te Pāsa. E ani ia rātou e aha tā rātou i tuatāpapa ’aore rā i rave ’ei ta’ata hō’ē ’aore rā e tō rātou ’utuāfare, nō te ha’apūai i tō rātou ’itera’a pāpū nō te ti’afa’ahoura’a o te Fa’aora. Teie i raro nei te mau ’ātivite nō te tauturu i te mau melo o tā ’oe piha ’aore rā tā ’oe pupu ’ia ha’apūai i tō rātou ’itera’a pāpū.

• ’A ’āparau ’āmui nō te aha e mea faufa’a te mau ’ite i roto i te orara’a i te mau mahana ato’a. I muri iho, ’a tāpura i te rahira’a ta’ata tei ’ite i te ti’afa’ahoura’a o Iesu ’o tā tā ’oe piha ’aore rā pupu i feruri mai. ’Ia oti, e mā’iti mai rātou tāta’itahi i te hō’ē ’pāpa’ira’a mo’a i roto i tera tei tāpurahia i roto te « Pu’e parau ha’amāramaramara’a » nō te ’ite rahi mai nō ni’a i te tahi o teie mau ’ite. E ani i te mau melo o te piha ’aore rā o te pupu ’ia fa’a’ite mai e aha tā rātou i ’apo mai. ’A fa’aitoito ia rātou ’ia fa’a’ite ato’a mai, nāhea teie mau ’ite i te ha’apūaira’a i tō rātou ’itera’a pāpū nō te ti’afa’ahoura’a o Iesu Mesia.

• I teihea mau tupura’a ’ohipa tātou e nehenehe ai e fa’a’ite atu i tō tātou ’itera’a pāpū nō te ti’afa’ahoura’a o te Fa’aora ? Mai te mea tē vai ra hō’ē ta’ata i roto i te piha ’aore rā i te pupu, tei ’āparaura’a atu i te hō’ē ta’ata nō te ti’afa’ahoura’a o te Fa’aora, ’a ha’amana’o i te ani iāna ’ia fa’ati’a mai i te ’ohipa i tupu. ’A fa’aitoito i tō te piha ’aore rā i tō te pupu ’ia feruri nāhea rātou i te tauturu i te hō’ē ta’ata ’ia hāro’aro’a i te ti’afa’ahoura’a o Iesu Mesia ’e ’ia roa’a te ’itera’a pāpū ē, maoti ’oia e ti’afa’ahou mai tātou pā’āto’a. E aha te mau parau mau faufa’a rahi nō te ti’afa’ahoura’a o te mau ta’ata ato’a, e riro ’ei mea faufa’a nō te ha’api’i ia vetahi ’ē ? E ’ite mai te mau melo o te piha ’aore rā o te pupu i te mau pāhonora’a i roto i te mau pāpa’ira’a mo’a i roto te « Pu’e parau ha’amāramaramara’a ».

• I te paraura’a te mau ’āpōsetolo ia Toma ē ’ua ’ite rātou i te Fa’aora tei ti’afa’ahou, ’ua parau Toma e’ita ’oia e ti’aturi maori rā ’ia ’ite mata roa ’oia. I muri iho, ’ua parau atu Iesu ia Toma, « E ao tō te feiā ’aore i ’ite iā’u, ’a fa’aro’o mai ai ». E hi’o ’āmui fa’ahou i te ’ohipa i tupu ia Toma i roto i te Ioane 20:24–29. Nāhea tātou i te ha’amaita’ihia nō te ti’aturi noa i te Fa’aora ma te ’ore i ’ite mata iāna ? Nāhea tātou ’ia fa’arahi i tō tātou fa’aro’o ia Iesu Mesia ? ’A ani i te mau melo o te piha ’aore rā o te pupu ’ia ’imi mai hō’ē ’aore rā hau atu mau poro’i a te feiā fa’atere o te ’Ēkālesia i roto te « Pu’e parau ha’amāramaramara’a » ’e ’ia fa’a’ite mai nō te aha rātou i māuruuru ai nō te ti’afa’ahoura’a o te Fa’aora. Nāhea tō tātou ’itera’a ē e ti’afa’ahou mai tātou i te fa’atupu mai i roto ia tātou, te ferurira’a i ni’a i tō tātou tino ’e i ni’a i te mau fa’aotira’a tā tātou e rave ?

’Ia ’ite ’outou ē, nā Gary L. Kapp

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A ani ia rātou ’ia feruri e nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Mataio 28:1–10 ; Luka 24:13–35 ; Luka 24:36–48 ; Ioane 20:11–29 ; Korinetia I 15:3–8 ; 3 Nephi 11:1–15 ; Etera 12:38–39 ; Te Ha’api’ira’a Tumu ’e te mau Fafaura’a 76:19–24 (Te rahira’a ta’ata tei ’ite i te ti’afa’ahoura’a)

• 2 Nephi 9:10–15 ; Mosia 16:8–11 ; Alama 11:42–45 ; Alama 40:23–25 ; Te Ha’api’ira’a Tumu ’e te mau Fafaura’a 93:33–34 (Te mau pāpa’ira’a mo’a e ha’api’i nei nō ni’a i te ti’afa’ahoura’a o te mau ta’ata ato’a)

• D. Todd Christofferson, « Te tiʼafaʼahouraʼa o Iesu Mesia », Liahona, Me 2014, 111–14.

• Gerrit W. Gong, « Hosana ’e Aleluia—Te Iesu Mesia ora : te pū nō te Fa’aho’i-fa’ahou-ra’a ’e te Pāsa », Liahona, Mē 2020, 52–55

• Reyna I. Aburto, « ’Ua ’ere te pohe i tōna rē », Liahona, Mē 2021, 85–86

• S. Mark Palmer, « E riro mai tō tātou ’oto ’ei ’oa’oa », Liahona, Mē 2021, 88–89

• Te mau video nō te pāsa e ’itehia i ni’a ChurchofJesusChrist.org/study/video/easter-videos.

Ha’api’ira’a mai tā te Fa’aora

Te ta’ata ’o te ’ite nāhea i tē tātara mai i te aura’a o te mau pāpa’ira’a mo’a ’e ’o te fāriu atu i ni’a i te reira i te mau mahana ato’a, e noa’a ïa iāna te arata’ira’a nō te upo’oti’a i ni’a i te mau tāmatara’a ato’a. ’A ha’api’i ai ’oe, ’a ui ’ei tumu e ’imi ai te mau pīahi i te mau pāhonora’a i roto i te mau pāpa’ira’a mo’a.