rurura’a ’āpo’ora’a pāroita

26 nō Māti

Nāhea te feiā ’āpī tamāhine ’e te feiā ’āpī tamāroa ’ia ’ohipa ’āmui nō te tauturu i te patura’a i te bāsileia o te Atua ?

Mataio 13 ; Luka 8 ; 13

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e fa’ahiti ’āmui i te Parau tai’o a te Feiā ’Āpī Tamāhine ’aore rā i te Parau tai’o a te pupu Autahu’ara’a a Aarona. I muri iho, ’a arata’i i te hō’ē tāu’ara’a parau nō ni’a i te ’ohipa o te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea e ’itehia mai ai ia tātou te ’oa’oa i te pe’era’a ia Iesu Mesia ?

• Aupuru i te feiā tei hina’aro i te tauturu. ’O vai i roto i tā tātou pāroita ’aore rā i te ’oire e hina’aro i tā tātou tauturu ? Nāhea tātou i te tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea tātou i te tauturu i te tahi ’e te tahi ’ia fa’aineine nō te ’ohipa misiōnare ?

• Tāhō’ē i te mau ’utuāfare ē a muri noa atu. Nāhea tātou ’ia fa’aō atu i roto i te mau tauto’ora’a a tā tātou pāroita nō te rave i te ’ā’amu ’utuāfare ’e i te ’ohipa hiero ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Ma te hō’ē pāpa’a parabole e ’itehia i roto te Mataio 13, ’ua ha’api’i te Fa’aora i te mau parau mau faufa’a rahi nō ni’a i te bāsileia o te Atua ’e tōna tupura’a ruperupe i tō tātou nei ’anotau. I roto e piti o teie mau parabole, mai te hō’ē mea iti ’e te ha’iha’i ’ua tupu mai te hō’ē mea rarahi. ’E nā te mau ’ohipa a te hō’ē tamaiti ’aore rā a te hō’ē tamāhine a te Atua i tauturu i te temeio ’ia tupu. ’Ua riro mai te hō’ē huero sīnapi iti ’ei hō’ē tumu rā’au rahi nō te mau manu o te reva « ’ia tau noa mai … i roto i te mau ’āma’a » ’inaha « nā te hō’ē ta’ata i tanu [i te reira] i roto i tāna ra ’auā » (Mataio 13:31–32). ’E te hō’ē fāito iti o te hōpue tei ha’amara’a i te hō’ē fāito rahi o te ’īpo faraoa, ’a āno’i ai « te hō’ē vahine i roto i nā fāri’i faraoa e toru » (Mataio 13:33). E tupu ’e e parare te bāsileia o te Atua i tō tātou nei ’anotau nō te mea te ’ohipa nei tōna feiā mo’a—’oia ato’a te feiā ’āpī tamāhine ’e te feiā ’āpī tamāroa—’e ’ōna nō te patu i te reira.

Ta’a ’ē noa atu i te tai’ora’a i te Mataio 13 ’e te Luka 8 ;13 i teie hepetoma, ’a ha’amana’o i te tai’o i te a’ora’a a te peresideni M. Russell Ballard « Te mau tāne ’e te mau vahine i roto i te ’ohipa a te Fatu » (New Era, ’Ēperēra 2014, 2–5) ’e te a’ora’a a te peresideni Jean B. Bingham « Tāhō’ē i roto i te fa’aotira’a i te ’ohipa a te Atua » (Liahona, Mē 2020, 60–63).

Ha’api’i ’āmui

Nō te tauturu i te feiā ’āpī tā ’oe e ha’api’i nei ’ia hi’ohi’o mai i te mau parabole i roto te Mataio 13, ’a feruri i te pia atu i te mau hōho’a o te hō’ē huero sīnapi, te hōpue, te hō’ē poe ’e te hō’ē ’ūpe’a. E tai’o fa’ahou te feiā ’āpī i te Mataio 13:31–33, 45–48 ’e e fa’a’ite mai e aha tā te parabole tāta’itahi e ha’api’i nei ia rātou nō ni’a i te bāsileia o te ra’i. Nāhea tātou i te fa’a’ohipa i te mau parau poro’i o teie mau parabole i roto i tō tātou iho orara’a ? E aha tā tātou e rave nō te tauturu i te Fatu ’ia patu i tōna bāsileia ? Teie te tahi mau ’ātivite e tauturu i roto i te ’āparaura’a.

• Hou te purera’a, e ani i te mau melo o te piha ’aore rā o te pupu ’ia ha’api’i mai nō ni’a i te mau vahine ’e te mau tāne tei riro ’aore rā i riro na ’ei mau hi’ora’a maita’i i roto i te tauturura’a ’ia patu i te bāsileia o te Atua. E feiā ānei te reira nō roto mai i te mau pāpa’ira’a mo’a (hi’o « Pu’e parau ha’amāramaramara’a »), i te ’ā’amu o te ’Ēkālesia ’aore rā i tō rātou iho orara’a. E ani i te feiā ’āpī ’ia fa’a’ite mai i te mea tā rātou i ’apo mai. Mea nāhea teie mau ta’ata i te tauturura’a i te Fatu ’ia patu i tōna bāsileia ? Nāhea tātou ’ia peʼe i tō rātou hiʼoraʼa ?

• Mai te mea e ha’api’i ’oe i te feiā ’āpī tamāroa, e ani ia rātou ’ia hi’o fa’ahou i te a’ora’a a te peresideni Bonnie L. Oscarson « Te feiā ’āpī tamāhine i roto i te ’ohipa » (Liahona, Mē 2018, 36–38) ’e ’a ’imi mai ’e ’a fa’a’ite mai i te mau rāve’a i ravehia e te feiā ’āpī tamāhine nō te tauturu i te ’ohipa a te Atua nō te fa’aorara’a ’e te fa’ateiteira’a. ’Ia nā reira ato’a mai te feiā ’āpī tamāhine i te ’imi mai i roto i te a’ora’a a te taea’e Douglas D. Holmes « Te mea e ti’a i te feiā ato’a e mau nei i te autahu’ara’a a Aarona ’ia māramarama » (Liahona, Mē 2018, 50–53). Nāhea te mau hōpoi’a a te feiā ’āpī tamāhine ’e a te feiā ’āpī tamāroa i tueā ai ? Nāhea tātou ’ia ’ohipa ’āmui maita’i a’e ’a rave ai tātou i te ’ohipa a te Atua ?

• Nō te tauturu i te feiā ’āpī ’ia hāro’aro’a e mea nāhea te mau vahine ’e te mau tāne ’ia ’ohipa ’āmui nō te patu i te bāsileia o te Atua, ’a pāpa’i i te mau uira’a i ni’a i te tāpura ’ere’ere mai teie : Nō te aha te Atua e hina’aro ai i te mau vahine ’e te mau tāne ’ia ’ohipa ’āmui nō te tauturu i te patu i tōna bāsileia ? Nāhea te mau peresidenira’a o te piha ’e o te pupu ’ia rave ’āmui maita’i a’e i te ’ohipa ? ’Ia hi’o fa’ahou te feiā ’āpī i te mau tuha’a o te a’ora’a a te peresideni M. Russell Ballard « Te mau tāne ’e te mau vahine i roto i te ’ohipa a te Fatu » ’aore rā te a’ora’a a Jean B. Bingham « Tāhō’ē i roto i te fa’a’otira’a i te ’ohipa a te Atua », te tuha’a iho ā rā e ha’amata nei mai teie « Nō reira, e aha tō te reira aura’a nō ’outou ’e nō’u ? » E hōro’a mai te feiā ’āpī i te mau pāhonora’a i te mau uira’a i ’itehia mai e rātou.

• Nō te tauturu i te feiā ’āpī ’ia māramarama e nāhea rātou i te tauturu i te patu i te bāsileia o te Atua, ’a feruri i te fa’a’ite atu i te hō’ē ’aore rā hau atu o te mau video « We Are Strong Together [E mea pūai tātou], » « A Promise for the Lord’s Battalion [Hō’ē fafaura’a nō te nu’u a te Fatu], » ’e « Youth Responsibility in the Work of Salvation [Te hōpoi’a a te feiā ’āpī i roto i te ’ohipa nō te fa’aorara’a » (ChurchofJesusChrist.org). E aha tā tātou e rave nei i roto i tō tātou fare, tā tātou pāroita ’e i roto i tō tātou ’oire nō te tauturu i te ’ohipa a te Atua ? ’A ha’amana’o i te ani i te peresideni o te piha ’aore rā o te pupu ’ia fa’atae mai i te mau fifi i tāu’aparauhia i roto i te ’āpo’ora’a pāroita a te feiā ’āpī, e ti’a ’ia fa’a’itehia. E ani i te mau melo o te piha ’aore rā o te pupu ’ia fa’a’ite mai i tō rātou mau mana’o, e nāhea rātou i te tauturu ’ia fa’a’āfaro i teie mau fifi.

tamāhine ’āpi e ’ō ra i te ’āpo’o.

Tē hina’aro nei te Atua i te mau vahine ’e i te mau tāne ’ia ’ohipa ’āmui i roto i te patura’a i tōna bāsileia.

Rave ma te fa’aro’o

’A fa’aitoito i te mau melo o te piha ’aore rā o te pupu, ’ia feruri ’e ’ia pāpa’i i te mea tā rātou e rave nō te ha’a i ni’a i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e hōro’a mai i tō rātou mau mana’o. ’A ani ia rātou ’ia feruri e nāhea te ha’ara’a i ni’a i tō rātou mau mana’o, i te ha’apūai i tō rātou mau aura’a ’e tō rātou Metua i te ao ra ’e ia Iesu Mesia.

Pu’e parau ha’amāramaramara’a

• Luka 2:21–38 (Simeona ’e Ana) ; Te ’Ohipa 9:36–41 (Tabita, ’aore rā Doreka) ; Mosia 18:1–17 (Alama) ; Mosia 28:1–3 (te mau tamari’i tamāroa a Mosia) ; Alama 8:18–27 (Amuleka) ; Alama 19:15–17 (Abisa) ; Te Ha’api’ira’a Tumu ’e te mau Fafaura’a 25:5–8 (Emma Smith) ; Mose 5:10–12 (Adamu ’e ’o Eva)

Ha’api’ira’a mai tā te Fa’aora

’Ia fa’atae ana’e ’oe i te hō’ē anira’a ’ia ora i te tahi parau tumu, ’a tauturu i te mau pīahi ’ia ’ite i te mau ha’amaita’ira’a tā te Atua i fafau i te feiā e ora i taua parau tumu ra.