« ថ្ងៃទី ១១ ខែ មិថុនា ។ តើខ្ញុំអាចកាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ? យ៉ូហាន ១៤–១៧ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣ ( ឆ្នាំ ២០២២ )

« ថ្ងៃទី ១១ ខែ មិថុនា ។ តើខ្ញុំអាចកាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣

ថ្ងៃទី ១១ ខែ មិថុនា

តើខ្ញុំអាចកាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?

យ៉ូហាន ១៤–១៧

ប្រឹក្សាជាមួយគ្នា

ដឹកនាំដោយសមាជិកថ្នាក់ម្នាក់ ឬគណៈប្រធានកូរ៉ុម មានរយៈពេលប្រហែល ១០–២០ នាទី

នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ បន្ទាប់មកសូមដឹកនាំការពិភាក្សាមួយអំពីកិច្ចការនៃសេចក្តីសង្រ្គោះ និងភាពតម្កើងឡើង ដោយប្រើសំណួរមួយ ឬច្រើនដូចខាងក្រោម ឬសំណួររបស់បងប្អូនផ្ទាល់ ( សូមមើល ក្បួនខ្នាតទូទៅ ១០.២, ១១.២ ) ។ ដាក់ផែនការដើម្បីអនុវត្តតាមអ្វីដែលបងប្អូនពិភាក្សា ។

ការរស់នៅតាមដំណឹងល្អ ។ តើបទពិសោធន៍ថ្មីៗអ្វីខ្លះដែលបានពង្រឹងទីបន្ទាល់របស់យើង ?
ការមើលថែដល់អ្នកខ្វះខាត ។ តើមាននរណាម្នាក់ត្រូវការជំនួយ និងការអធិស្ឋានរបស់យើងដែរឬទេ ? តើយើងមានចំណាប់អារម្មណ៍ដើម្បីជួយពួកគេយ៉ាងណា ?
ការអញ្ជើញមនុស្សទាំងអស់ឲ្យទទួលយកដំណឹងល្អ ។ តើយើងអាចក្លាយជាពន្លឺបំភ្លឺដល់សមាជិកគ្រួសារ ឬមិត្តភក្តិដែលពុំមានសេចក្តីជំនឿដូចយើងយ៉ាងដូចម្តេច ?
ការបង្រួបបង្រួមក្រុមគ្រួសារសម្រាប់ភាពអស់កល្បភាពអស់កល្បជានិច្ច ។ តើយើងអាចបង្ហាញសេចក្ដីស្រឡាញ់ និងការគាំទ្រកាន់តែច្រើនចំពោះក្រុមគ្រួសាររបស់យើង និងធ្វើឲ្យមានភាពខុសប្លែកដ៏វិជ្ជមាននៅក្នុងផ្ទះយើងយ៉ាងដូចម្តេច ?

នៅចុងបញ្ចប់នៃមេរៀននេះ សូមធ្វើកិច្ចការដូចខាងក្រោម តាមការគួរ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី

រៀបចំខ្លួនខាងវិញ្ញាណ

ផ្លែឈើមិនអាចដុះនៅលើមែកដែលបែកចេញពីដើមរបស់វាបានឡើយ ។ តាមរបៀបដូចគ្នានេះដែរ យើងមិនអាចរីកចម្រើនខាងវិញ្ញាណឡើយ ប្រសិនបើយើងបែកចេញពីព្រះខាងវិញ្ញាណនោះ ( សូមមើល យ៉ូហាន ១៥:៤–៦ ) ។ ទោះយ៉ាងណាក៏ដោយ មានការជ្រៀតជ្រែកជាច្រើនដែលព្យាយាមបំបែកយើងចេញពីទ្រង់—ជួនកាលភាពឆ្មើងឆ្មៃរបស់យើងផ្ទាល់ ឬជម្រើសមិនល្អ ប៉ុន្តែជារឿយៗគ្រាន់តែជាលក្ខខណ្ឌនៃជីវិតរមែងស្លាប់ប៉ុណ្ណោះ ។ នៅពេលដែលព្រះយេស៊ូវបានជួបជាមួយពួកសិស្សរបស់ទ្រង់ជាលើកចុងក្រោយក្នុងព្រះជន្មរមែងស្លាប់ ទ្រង់បានជ្រាបថាទ្រង់នឹងបែកចេញពីពួកគេក្នុងពេលឆាប់ៗ ។ ដូច្នេះទ្រង់បានបង្រៀនពួកគេអំពីសារៈសំខាន់នៃការរក្សាទំនាក់ទំនងជិតស្និទ្ធជាមួយទ្រង់ និងព្រះវរបិតាទ្រង់—គឺការរួបរួមជាមួយនឹងពួកគេ ដូចជាមែកមួយទៅនឹងដើមឈើមួយដែរ ។ ទ្រង់បានហៅការណ៍នេះថា « នៅជាប់ » នឹងទ្រង់ ។ ហើយទ្រង់បានបង្រៀនពួកសិស្សរបស់ទ្រង់ពីរបៀបធ្វើការណ៍នេះ ។ សំខាន់បំផុត តាមរយៈការពលិកម្មដ៏ធួនរបស់ទ្រង់ ទ្រង់បានធ្វើឲ្យទំនាក់ទំនងនោះអាចកើតឡើងបាន ។

សូមពិចារណាពីទំនាក់ទំនងរបស់បងប្អូនជាមួយព្រះវរបិតាសួគ៌ និងព្រះយេស៊ូវគ្រីស្ទកាលបងប្អូនសិក្សា យ៉ូហាន ១៤–១៧ ។ សូមគិតផងដែរអំពីមនុស្សដែលបងប្អូនបង្រៀន និងបំណងប្រាថ្នារបស់ពួកគេដើម្បីខិតកាន់តែជិតព្រះ ។ តើបងប្អូននឹងធ្វើអ្វីខ្លះដើម្បីជួយដល់ពួកគេ ? បងប្អូនអាចគិតពិចារណាពី គោលលទ្ធិ និង សេចក្ដីសញ្ញា ៨៨:៦២–៦៨ កាលបងប្អូនរៀបចំខ្លួនដើម្បីបង្រៀន ។

រៀនជាមួយគ្នា

សូមពិចារណាពីរបៀបដែលបងប្អូនអាចបំផុសគំនិតដល់យុវវ័យឲ្យពិភាក្សាពីការបង្រៀនរបស់ព្រះអង្គសង្រ្គោះអំពីដើមទំពាំងបាយជូរ និងខ្នែងនៅក្នុង យ៉ូហាន ១៥:១–១២ ។ ប្រហែលជាបងប្អូនអាចប្រើគំនូរ រូបភាព ឬខ្នែងជាក់ស្តែងមួយដើម្បីជួយពួកគេស្រមៃឃើញនូវអ្វីដែលព្រះយេស៊ូវបានបង្រៀន ។ បងប្អូនអាចស្នើសុំឲ្យពួកគេនិយាយអំពីគ្រាដែលពួកគេមានអារម្មណ៍ជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទ—ឬគ្រាដែលពួកគេមានអារម្មណ៍ថានៅឆ្ងាយពីទ្រង់ទាំងទ្វេ ។ តើខគម្ពីរទាំងនេះបង្រៀនអ្វីខ្លះអំពីរបៀបដែលយើងអាចនៅជិតទ្រង់ទាំងទ្វេ ? សកម្មភាពដូចតទៅនេះ អាចជួយបន្តការសន្ទនានេះបាន ។

វាអាចនឹងមានតម្លៃក្នុងការចំណាយពេលខ្លះៗដើម្បីស្រាវជ្រាវសំណួរ « តើអ្វីដែលធ្វើឲ្យយើងនៅឆ្ងាយពីព្រះវរបិតាសួគ៌ និងព្រះយេស៊ូវគ្រីស្ទ ? » បងប្អូនអាចសរសេរសំណួរនេះនៅលើក្ដារខៀន ហើយសួររកចម្លើយ ។ បន្ទាប់មក ប្រហែលជាបងប្អូនអាចនិយាយអំពីអ្វីដែលយើងធ្វើដើម្បីបង្កើតទំនាក់ទំនងជាមួយមិត្តភក្តិ និងសមាជិកគ្រួសារ ។ តើការណ៍នេះដូចគ្នា—ហើយខុសគ្នា—ពីរបៀបដែលយើងបង្កើតទំនាក់ទំនងជាមួយព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្តេច ? តើព្រះយេស៊ូវគ្រីស្ទជួយយើងឲ្យជិតស្និទ្ធនឹងទ្រង់ និងព្រះវរបិតាទ្រង់យ៉ាងដូចម្តេច ? សូមលើកទឹកចិត្តសមាជិកថ្នាក់ ឬកូរ៉ុមឲ្យអានខគម្ពីរនៅក្នុង « ធនធានគាំទ្រ » ដើម្បីជួយពួកគេឆ្លើយសំណួរនេះ ។ យុវវ័យអាចទទួលបានអត្ថប្រយោជន៍ពីការសិក្សាខគម្ពីរទាំងនេះជាដៃគូ និងការចែកចាយអ្វីដែលពួកគេរៀន ។
គ្មាននរណាដែលនៅជិតនឹងព្រះជាព្រះវរបិតាជាងព្រះរាជបុត្រាស្ងួនភ្ញាដែលជាព្រះយេស៊ូវគ្រីស្ទឡើយ ។ តើយើងរៀនអ្វីខ្លះពីព្រះអង្គសង្រ្គោះអំពីការខិតជិតនឹងព្រះ ? សមាជិកថ្នាក់ ឬកូរ៉ុមអាចសញ្ជឹងគិតសំណួរនេះកាលដែលពួកគេអាន លូកា ២២:៤១–៤៣; យ៉ូហាន ៦:៣៨; ១៧:៣, ២០–២៣; នីហ្វៃទី ៣ ១១:១១; គោលលទ្ធិ និងសេចក្តីសញ្ញា ៥០:៤៣ ។ តើយើងអាចក្លាយជាតែមួយជាមួយព្រះវរបិតាសួគ៌ និងព្រះយេស៊ូវគ្រីស្ទដោយរបៀបណា ?
នៅក្នុងសារលិខិតរបស់លោក « ព្រះអង្គសង្រ្គោះផ្ទាល់របស់យើង » អែលឌើរ ម៉ៃឃល ចន យូ ថេ នឹកឃើញគ្រាមួយដែលលោកបានដឹងថា « អ្វីដែលខ្ញុំដឹងអំពីព្រះអង្គសង្គ្រោះមានទម្ងន់ច្រើនជាង ខ្ញុំស្គាល់ទ្រង់ដោយពិត » ( Liahona ខែ ឧសភា ឆ្នាំ ២០២១ ទំព័រ ៩៩ ) ។ បងប្អូនអាចស្នើសុំឲ្យសមាជិកថ្នាក់ ឬកូរ៉ុមរបស់បងប្អូនពិភាក្សាពីភាពខុសគ្នារវាងការដឹងអំពីព្រះយេស៊ូវគ្រីស្ទ និងការស្គាល់ទ្រង់ពិតប្រាកដ ។ ពួកគេអាចនិយាយអំពីអ្វីដែលពួកគេកំពុងធ្វើដើម្បីដឹងអំពីទ្រង់ និងអ្វីដែលពួកគេកំពុងធ្វើដើម្បីស្គាល់ទ្រង់ពិតប្រាកដ ។ បន្ទាប់មកពួកគេអាចស្វែងរកផ្នែកនៃសារលិខិតរបស់អែលឌើរ ថេ ដើម្បីស្វែងរកដំបូន្មានដែលលោកបានផ្តល់ឲ្យ អំពីការមកស្គាល់ព្រះអង្គសង្គ្រោះយ៉ាងពិតប្រាកដ ។ តើជីវិតយើងមានពរដោយរបៀបណាតាមរយៈការខិតខំស្គាល់ទ្រង់ ?
នៅក្នុងវីដេអូ « He Knows Me » យុវវ័យពីរនាក់មកពីប្រទេស ហ្គាណា បានពិពណ៌នាពីការខិតខំរបស់ពួកគេដើម្បីខិតទៅជិតព្រះ ។ ប្រហែលជាសមាជិកថ្នាក់ ឬកូរ៉ុមអាចមើលវីដេអូ ហើយកាលដែលពួកគេមើលវីដេអូ សូមធ្វើបញ្ជីពីគំនិតដែលវាផ្តល់ឲ្យពួកគេ អំពីរបៀបដើម្បីពង្រឹងទំនាក់ទំនងរបស់ពួកគេជាមួយនឹងព្រះវរបិតាសួគ៌របស់ពួកគេ ។ សូមអញ្ជើញពួកគេឲ្យចែកចាយអ្វីមួយចេញពីបញ្ជីរបស់ពួកគេ ។ ប្រសិនបើអាចធ្វើបាន ពួកគេអាចនឹងរីករាយក្នុងការបង្កើតវីដេអូខ្លីៗរបស់ពួកគេដែលពិពណ៌នាអំពីរបៀបដែលពួកគេខិតទៅជិតព្រះ ។

យុវនារីកំពុងអានព្រះគម្ពីរ — កាលដែលយើងមកស្គាល់ព្រះអង្គសង្រ្គោះ និងរក្សាបទបញ្ញត្តិរបស់ទ្រង់ នោះយើងនៅជាប់នឹងសេចក្តីស្រឡាញ់របស់ទ្រង់ ( សូមមើល យ៉ូហាន ១៥:១០ ) ។

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។

ធនធានគាំទ្រ

យ៉ូហាន ១៤:៦; ធីម៉ូថេ ទី១ ២:៥–៦; យ៉ាកុប ៤:១១; ម៉ូសាយ ៣:១៩; គោលលទ្ធិ និងសេចក្តីសញ្ញា ៨៨:៦៣; ម៉ូសេ ៦:៥២

ការបង្រៀនតាមរបៀបរបស់ព្រះអង្គសង្គ្រោះ

ព្រះអង្គសង្រ្គោះបានរៀបចំសម្រាប់ការងារបម្រើរបស់ទ្រង់នៅលើផែនដីតាមរយៈការអធិស្ឋាន និងការតមអាហារដើម្បីទ្រង់អាចខិតទៅជិតព្រះវរបិតារបស់ទ្រង់ ( សូមមើល ម៉ាថាយ ៤:១–២; លូកា ៤:១–២ ) ។ នៅពេលបងប្អូនរៀបចំបង្រៀន សូមចំណាយពេលដើម្បីស្វែងរកការណែនាំរបស់ព្រះវរបិតាសួគ៌ សម្រាប់បងប្អូនបង្រៀនបុត្រាបុត្រីរបស់ទ្រង់ !