juon jiron̄ ej jar

Juun 11

Elmen Aō Eddōkļo̧k im Epaakeļo̧k Jemedwōj Ilan̄ im Jisōs Kraist?

Jon 14-17

pija eo ej bōk jikin ko̧o̧njeļ ippān doon

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe eo Eļap, 10.2, 11.2). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta en̄jake ko kiiō rekar kōkajoorļo̧k naan in kam̧ool ko ad?

• Kea kōn ro rej pād ilo aikuj. Wōn eo ej aikuji jipan̄ eo ad im jar ko ad? Ta eo jej im̧we n̄an kōm̧m̧ane n̄an jipan̄?

• Karuwaineneik aolep n̄an bōk gospel eo. Ewi wāwen jemaron̄ erom̧ juon meram n̄an ro uwaan baam̧le eo ak ro m̧ōttad ro rejjab jān Kabun̄ in ad?

• Kobaik baam̧le ko n̄an indeeo. Ewi wāween ad kwaļo̧k eļap iakwe im rie n̄an baam̧le ko im kōm̧m̧an juon oktak em̧m̧an ilo m̧ōko m̧ōd?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

pija ej bōk jikin katakin katak eo

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Leen wōjke eban eddōk ilo juon ra eļan̄n̄e ejepel jān wōjke eo. Ilo ejja wāween in wōt, jeban eddōk ilo jetōb eļan̄n̄e jej jepel jān Anij (lale Jon 15:4–6). Ak ewōr men ko rej booje kōj bwe jān jepel jān E jet iien ad make uteij bōro ak kāālet ko rebōd ak ekkā men ko jej iooni ilo mour in. Ke Jisōs ekar kweiļo̧k ippān rikaļoor ro An āliktata ilo mour in, E kar jeļā bwe En kar m̧ōttan jidik jepel jān er. Innem E kar katakin er aorōk in aer ped wōt ilo aer kepaake E im Jemed— juon wōt ippāer āinwōt juon ra n̄an wōjke eo. Ekar ņae etan menin “atartar” ilo E. Im E kar katakin rikaļoor ro An elmen kōm̧m̧ane men in. Men eo aorōk iaan aolep, kōn pinmuur in en̄taan eo An, E kar kōm̧m̧ane bwe wōr koneekjen.

Kejōkļo̧kjeņ kōn koneekjen in ippān Jemedwōj Ilan̄ im Jisōs Kraist ilo am̧ ekkatak Jon 14–17. Ļōmņak barāinwōt kōn armej ro kwōj katakin im ikideelel eo aer n̄an epaake Anij. Ta eo jenaaj kōm̧m̧ane n̄an jipan̄ er? Komaron̄ linūri Katak im Bujen Ko 88:62–68 ilo am̧ kōppopo n̄an katakin.

Ekkatak Ippān Doon

Ļōmņak elmen am̧ nej im̧we jodikdik ro n̄an kōnono kōn katak ko an Rilo̧mo̧o̧r kōn to ko im ra ko ilo Jon 15:1–12. Bōlen komaron̄ kōjerbal juon jin̄a, juon pija, ak juon lukkuun ra n̄an jipan̄ er pijakiļo̧k ta eo Jisōs ekar katakin. Komaron̄ kajjitōk ippāer n̄an kōnaan kōn juon iien rekar en̄jake aer epaake Jemedwōj Ilan̄ im Jisōs Kraist—ak juon iien rekar en̄jake aer ettoļo̧k jān Er. Ta eo eoon kein rej katakin kōn elmen ad epaake wōt Er? Makūtkūt rōt kein ellaajrak emaron̄ jipan̄ kōļapļo̧k ekōnono in.

• Emaron̄ juon men aorōk n̄an bōk jet iien kapukōt kajjitōk in “Ta eo ej kattoļo̧k kōj jān Jemedwōj Ilan̄ im Jisōs Kraist?” Komaron̄ je kajjitōk in ioon boot im kajjitōk kōn uwaak ko. Innem komaron̄ kōnaan kōn ta eo jej kōm̧m̧ane n̄an kalōk jem̧jerā eo ippān juon mōttad ak membōr in baamle eo ad. Ewi wāween an menin āinwōt—im oktak jān—wāween eo jej kalōk juon jem̧jerā ippān Jemedwōj Ilan̄ im Jisōs Kraist. Elmen an Jisōs Kraist jipan̄ kōj epaake E im Jemen? Rōjan̄ membōr in kūlaaj ak doulul n̄an riiti jeje ko rekwojarjar ilo “Kein Jipan̄ ko rej Rie” n̄an aer uwaak e kajjitōk in. Jodikdik ro remaron̄ jeraam̧m̧an jān ekkatak eoon kein ilo ruo armej im kwaļo̧k ta eo rekar katak.

• Ejeļo̧k juon epaake Anij eo Jemed jān eo Nejin Ejitōnbōro, Jisōs Kraist. Ta eo jej ekkatak jān Rilo̧mo̧o̧r kōn epaakeļo̧k Anij? Membōr ro an kūlaaj im doulul remaron̄ linūri kajjitōk in ilo aer riiti Luk 22:41–43; Jon 6:38; 17:3, 20–23; 3 Nipai11:11; Katak im Bujen Ko 50:43. Ewi wāween ad erom eļapļo̧k āinwōt Jemedwōj Ilan̄ im Jisōs Kraist?

• Ilo ennaan eo an “Ad Make Rilo̧mo̧o̧r,” Elder Michael John U. Teh rej keememejļo̧k juon iien ekar kile, “Ta eo ijeļā kōn Rilo̧mo̧o̧r ekar ļapļo̧k jān jon̄an aō lukkuun jeļā kajjeen E.” (Liaona, Māe 2021, 99). Komaron̄ kajjitōk ippān kūlaaj im doulul eo n̄an kōnono oktak ko ikōtaan jeļā kōn Jisōs Kraist im lukkuun jeļā E. Remaron̄ kōnaan kōn ta ko rej kōm̧m̧ani n̄an jeļā kōn E im ta ko rej kōm̧m̧ane n̄an lukkuun jelā E. Remaron̄ kappukot jidik in ennaan eo an Elder Teh n̄an kappukot ko̧o̧njeļ eo ej letok kōn itok n̄an lukkuun jeļā Rilo̧mo̧o̧r. Elmen an mour ko ad jeraam̧m̧an ilo ad kappukot n̄an jeļā E?

• Ilo pijan alooj eo “He Knows Me,” ruo jodikdik rej kōmeļeļe kijejeto eo aer n̄an epaakeļo̧k Anij. Bōlen membōr in kūlaaj ak doulul eo remaron̄ alooje pija in im, ilo aer alooj, kōm̧m̧an laajrak ko ej leļo̧k n̄an er kōn elmen n̄an kakōm̧anm̧an jem̧jerā eo aer ippān Jemed ilo Lan̄. Karuwainene er n̄an kwaļo̧k juon men ilo elaajrak eo aer. N̄e emaron̄, remaron̄ kōm̧m̧ane juon aer make pija in alooj ej kōmeļeļeik elmen aer epaakeļo̧k Anij.

jiron̄ eo ej riiti jeje ko rekwojarjar

Ilo ad itok n̄an jeļā wōn Rilo̧mo̧o̧r im kōjpārok kien ko An, jenaaj atartar ilo iakwe eo An (lale Jon 15:10).

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Jon 14:6; 1 Timote 2:5–6; Jekab 4:11; Mosaia 3:19; Katak im Bujen Ko 88:63; Moses 6:52

Ekkatak ilo wāween eo an Rilo̧mo̧o̧r

Rilo̧mo̧o̧r kar kōppopo n̄an jerbal ko An ilo laļin ilo an jar im jitļo̧k bwe E en emaron̄ epaakeļo̧k Jemen (lale Matu 4:1–2; Luk 4:1–2). Ilo am̧ kōppopo n̄an katakin, bōk iien n̄an bōk tōl jān Jemedwōj Ilan̄, bwe kwe eo ej katakin ajri ro Nejin.