Pinmuur eo an Rilo̧mo̧o̧r: Pedped in Mool in Kūrijin, jān Kirk Richards

Juun 25

Ta Meļeļein Pinmuur eo an Jisōs Kraist n̄an N̄a?

Matu 27; Mark 15; Luk 23; Jon 19

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe eo Eļap, 10.2, 11.2). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ewi wāween ad epaakeļo̧k Rilo̧mo̧o̧r? Ewi wāween ad kajjieon̄ erom̧ āinwōt E?

• Kea kōn ro rej pād ilo aikuj. Wōn eo eļakkar pād ilo ļōmņak ko ami? Ewi wāween ad maron̄ jipan̄ armej rein kajjojo?

• Karuwaineneik aolep n̄an bōk gospel eo. Ewi wāween ad uwaake kajjitōk ko an ro m̧ōttad kōn Kabun̄ in ilo juon wāween eo me enaaj kōkajoorļo̧k tōmak ko aer ilo Rilo̧mo̧o̧r?

• Kobaik baam̧le ko n̄an indeeo. Ta jet iaan wāween ko emaron̄ em̧m̧anļo̧k ad ekkejel ippān ro uwaan baam̧le eo, ro āinwōt ro jibūd im jim̧m̧aad im ro rilikiid?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Elder David A. Bednar ej lale bwe Armej ro Rekwojarjar ilo Raan-Kein Āliktata “ewōr aer tōmak ilo Rilo̧mo̧o̧r, ak rej jab tōmak kallim̧ur ko emōj An kallim̧ur kake rej peļļo̧k n̄an er” (““N̄e Koṃ ar jeḷā N̄a”,” Liaona, Nob. 2016, 104). Ilo bar jet naan, men̄e jej tōmak bwe Jisōs Kraist ekar en̄taan im mej kōn jerawiwi ko an laļ, jej kōļmenļo̧kjeņ eļan̄n̄e E kar en̄taan im mej kōn jerawiwi ko ad. Kwonan̄in ke kar en̄jake wāween in? Elmen an nej armej ro ilo kūlaaj ak doulul eo jeļā n̄an meļeļe bwe Pinmuur eo an Rilo̧mo̧o̧r ej n̄an er make? Elmen am̧ nej jipan̄ er?

Kejōkļo̧kjeņ kōn kajjitōk kein ilo am̧ riit kōn Debweel eo an Rilo̧mo̧o̧r wiik in. Ilo am̧ kōppopo n̄an katakin kōn mejatoto in an make Pinmuur eo an Kraist, komaron̄ katak ennaan eo an Būreejtōn Dallin H. Oaks “Ta eo Ad Rilo̧mo̧o̧r Ekar Kōm̧m̧ane n̄an Kōj?” (Liaona, Māe 2021, 75–77).

Ekkatak Ippān Doon

Karuwainene kūlaaj ak doulul eo n̄an kwaļo̧k juon men rekar katak kōn Dōbweel eo an Rilo̧mo̧o̧r ilo wiik ej jemļo̧k ilo Kallim̧ur Ekāāl im en̄jake ko aer kōn Rilo̧mo̧o̧r. N̄an jipan̄ kapooj er, komaron̄ kajjitōk “Ta eo jej ekatak kōn Jisōs Kraist jān men ko E kar ba im kōm̧m̧ani ilo awa ko An āliktata?” N̄an waanjon̄ak, komaron̄ kappukot iien ko Rilo̧mo̧o̧r eo ekar, ilo an kar en̄taan n̄an aolep, kar loe ro Ipeļaakin kōn tūriam̧o (lale, n̄an waanjon̄ak, Luk 23:34, 39–43; Jon 19:25–27). Menin emaron̄ tōl n̄an juon ekōnono kōn elmen an Pinmuur eo an Jisōs Kraist n̄an aolep im kōj make. Makūtkūt rōt kein ellaajrak emaron̄ jipan̄ kōļapļo̧k ekōnono in Pinmuur an Rilo̧mo̧o̧r.

• In eoon juon ilo ennaan eo an “Ta eo Ad Rilo̧mo̧o̧r Ekar Kōm̧m̧ane n̄an Kōj?,” Būreejtōn Dallin H. Oaks ej kōmeļeļe juon kōnono ippān juon kōrā eo ekar jab lukkuun jeļā bwe Jisōs Kraist ekar kōm̧m̧ane jabdewōt n̄an e. Bōlen membōr in kūlaaj im doulul eo remaron̄ riiti eoon juon, likūti er make ilo jikin Būreejtōn Oak. Ta eo jemaron̄ ba n̄an kōrā in? Komaron̄ leļo̧k kajjojo membōr in kūlaaj ak doulul eo juon iaan nōm̧ba in jekjon in ennaan eo an Būreejtōn Oak. Kōjerbale ta eo jekar katak, ippān en̄jake ko aer make, innem remaron̄ kwaļo̧k uwaak ko aer make n̄an kajjitōk in “Ta eo Jisōs Kraist ekar kōm̧m̧ane n̄an n̄a?”

• N̄an im̧we juon ekōnono kōn elmen an Pinmuur an Rilo̧mo̧o̧r jelet kōj make, komaron̄ jeki ilo boot eo juon jantōj āinwōt Kōnke Jisōs Kraist ekar en̄taan im mej kōn aolep armej … . Membōr ro an kūlaaj ak doulul eo remaron̄ lewaj wāween ko n̄an kadedeļo̧k jantōj in. Remaron̄ ukōte jantōj eo n̄an riit Kōnke Jisōs Kraist ekar en̄taan im mej kōn n̄a … im karuwainene jabdewōt kakobaba ko. Membōr in kūlaaj ak doulul eo rej kōnono kōn ennaan kein, rōjan̄ er n̄an riiti jeje ko rekwojarjar ilo “Kein Jipan̄ ko rej Rie.” Ta eo jeje ko rekwojarjar rej katakin kōj kōn im̧we eo an Pinmuur eo an Rilo̧mo̧o̧r ilo mour ko ad kajjojo.

• Juon bar wāween n̄an ekkatak jeje ko rekwojarjar ilo “Kein Jipan̄ ko rej Rie” emaron̄ n̄an karuwainene jodikdik ro n̄an joļo̧k naan ilo eoon ko bwe eoon ko ren kaju kōnono n̄an er. Elmen an kōm̧m̧ane men in jelet en̄jake ko ad kōn m̧ool ko ilo eoon kein? Elmen ad kwalo̧k kam̧m̧oolol ko ad kōn en̄taan eo an Rilo̧mo̧o̧r n̄an kōj?

• Al ko rekwojarjar remaron̄ kam̧ool eo ekajoor kōn Jisōs Kraist. Ļōmņak n̄an karuwainene membōr in kūlaaj ak doulul eo n̄an kōpooje juon al ej jipan̄ er en̄jake kajoor in Pinmuur eo an Rilo̧mo̧o̧r ilo mour ko aer make. (Remaron̄ lale al in kwojkwoj ko ak al in “Jesus Christ—Savior” ilo topics index of Hymns.) Kajjitōk ippān membōr in kūlaaj ak doulul n̄an pukōt jantōj ko ilo al eo ej jipan̄ er en̄jake iakwe eo an Rilo̧mo̧or n̄an er make. Komaron̄ barāinwōt kōnono kōn elmen an en̄taan eo an Rilo̧mo̧o̧r jelet mour ko ad kajjojo raan. N̄an waanjon̄ak, elmen an jelet kāālet ko jej kōm̧m̧ani?

Kraist ej pād ilo Gethsemane, jān Michael T. Malm

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• 1 Korint 15:20–22; 2 Korint 12:7–9; Alma 7:11–12; 3 Nipai 11:10–11

• Tad R. Callister, “Pinmuur eo an Jisōs Kraist,” Liaona, Māe 2019, 85–87

Katakin ilo Wāween eo an Rilo̧mo̧o̧r

Mwil ko raorōk ilo iakwe an Kraist ewōr aer kajoor n̄an kamed bōro ko an membōr in kūlaaj eo eļan̄n̄e rej apan̄. Ekkā an kajjojo armej rein aikuj jeļā bwe rej aikuji er im rej iakwe er.