Ālikin Jerkakpeje eo An, Rilo̧mo̧o̧r ekar tōl Kabun̄ eo An jān rikaļoor ro An, ekoba Piter.

Juļae 9

Elmen An Jisōs Kraist Tōl Kabun̄ in An?

Jerbal 1–5

Ko̧o̧njeļ Ippān Doon

Kar tōl jān eo juon uwaan būreejtōnji eo an doulul eo ak kūlaaj eo; tarrin 10-20 minit ko

Ilo jinoin kweilo̧k eo, āliji ippān doon Unin Tōl eo an Doulul eo an Jiron̄ ro ak Unin Tōl eo an Doulul eo an Priesthood eo an Aron Innem tōl juon iien ekōnono kōn jerbal in lo̧mo̧o̧r im mour eo eaibojooj ijo eutiej tata ilo ami kōjerbal juon ak elōn̄ļo̧k kajjitōk ko ilaļ ak kajjitōk ko am̧ make (lale Bok in Bōk Meļeļe eo Eļap, 10.2, 11.2). Karōk wāween ko n̄an kōm̧m̧ane ta eo kom̧ij kōnono kake.

• Mour kōn gospel eo. Ta unin kōnono ko me bisoprik eo rekar kōnono kaki ilo iien kweilo̧k ko an ward ko̧o̧njeļ eo an jodikdik ro? Ta eo jej aikuji n̄an kōm̧m̧ane āinwōt juon doulul ak kūlaaj pedped wōt ilo ekōnono ko?

• Kea kōn ro rej pād ilo aikuj. Ewi wāween ad jipan̄ armej ro ilo wāween ko an Kraist n̄e jej lo juon aikuj im jejjab jeļā ta eo jen ba?

• Karuwaineneik aolep n̄an bōk gospel eo. Ta eo jej loe ilo gospel eo an Jisōs Kraist me ej bōktok n̄an kōj lan̄lōn̄? Ewi wāween ad jeere lan̄lōn̄ in n̄an ro jet?

• Kobaik baam̧le ko n̄an indeeo. Ta eo jenaaj kōm̧m̧ane n̄an lo āt ko etan ro jibūd im jim̧m̧aad ro rej aikuj kain̄i ko an tampeļ? Ta eo jemaron̄ kōm̧m̧ane n̄an jipan̄ doon lo et ko etan ro jibūd im jim̧m̧aad?

Ilo jem̧ļo̧kin katak in, n̄e ekkar, kōm̧m̧ane laajrak in:

• Kam̧ool kōn pedped in katak ko kar katakin kaki.

• Kakeememej ro uwaan kūlaaj eo ak doulul eo kōn karōk ko im kūr ko me kar kōm̧m̧ane ilo iien kweilo̧k eo.

Katakin Katak eo

Kar tōl jān juon ritōl erūtto ak juon jodikdik; tarrin 25–35 minit

Kōpooj Eok Make ilo Jetōb

Ej juon men n̄an jeļā bwe Kabun̄ in em̧m̧an, bwe Kabun̄ ej katakin katak ko rem̧ool, ak bwe Kabun̄ ej jipan̄ kwe erom̧ juon armej em̧m̧anļo̧k. Ej bar juon men n̄an jeļā bwe Kabun̄ in rainin ej lukkuun Kabun̄ eo an Jisōs Kraist, kajutak jān E im tōl ilo e emake im wōnm̧aanļo̧k ilo E jān juon rikanaan emour. Bok in Jerbal elutōkļo̧k kōn kam̧ool ko me Rilo̧mo̧o̧r ej lukkuun in bōk koņaan ilo tōl Kabun̄ in An. Ilo am̧ riiti jebta 1–5, kappukot kein kam̧ool eo, im linūri elmen am̧ jeļā ke E ej wōnm̧aanļo̧k in tōl Kabun̄ in An rainin. Elmen an jeļāļo̧kjeņ in kar kōjeraam̧m̧an eok?

Ewōr ke an jodikdik ro kwōj katakin er naan in kam̧ool bwe Kabun̄ rej pād ie ej tōl jān Rilo̧mo̧o̧r E make? Elmen an naan in kam̧ool in kōjeraam̧m̧an er? Elmen am̧ maron̄ jipan̄ er bōk ak kōkajoorļo̧k naan in kam̧ool in? Kakobaba n̄an katakin jān Jerbal 1–5, komaron̄ barāinwōt riit jān ennaan eo an Elder Quentin L. Cook “Kōjeraam̧m̧an eo itok jān an Revelesōn Wōnm̧aanļo̧k Wōt n̄an Rikanaan ro im Revelesōn ko ad Make n̄an Tōl Mour ko Ad” (Liaona, Māe 2020, 96–100).

Ekkatak Ippān Doon

N̄an jino ekōnono eo am̧, komaron̄ jeki ilo boot eo Jisōs Kraist ekar tōl Kabun̄ in An jān revelesōn ko n̄an Rikaļoor ro An. Membōr in kūlaaj ak doulul eo remaron̄ kwaļo̧k juon men rej loe ilo aer katak jān Jerbal 1–5 me ej jipan̄ jantōj in. (N̄e emenin aikuj, komaron̄ tōl er n̄an Jerbal 1:1–8; 2:36–39; 4:1–13, 31–33.) Ta kein kam̧ool ko jej loe bwe Jisōs Kraist ej tōl Kabun̄ eo an ilo ejja wāween ko rainin? Makūtkūt āinwōt kein rej ellaajrak remaron̄ jipan̄ ro kwoj katakin kōkajoor tōmak eo aer ilo m̧ool in aorōk.

• Komaron̄ kōpooje jejjo kajjitōk ainwōt kein: Elmen an Jisōs Kraist Tōl Kabun̄ in An?? Elmen ad kōļaplo̧k tōmak eo ad ke Jisōs Kraist ej tōl Kabun̄ in An? Etke jej lōke rikanaan im rijilōk ro an Irooj? Leļo̧k n̄an kajjojo membōr in kūlaaj ak doulul eo juon iaan kajjitōk ko, im karuwainene er n̄an linūri kajjitok eo im ļōmņak kōn juon eoon emaron̄ jipan̄ er uwaak e (ne aikuj, lale “Kein Jipan̄ ko rej Rie” n̄an jet ļōmņak). Innem leļo̧k iien n̄an aolep n̄an kwaļo̧k ta eo rekar ekkatak.

• N̄an jipan̄ kūlaaj ak doulul eo loe elmen an Irooj tōl Kabun̄ in An, komaron̄ karuwainene er n̄an etale jekjon eo jinoin tata ilo ennaan eo an Elder Quentin L. Cook “Kōjeraam̧m̧an eo itok jān an Revelesōn Wōnm̧aanļo̧k Wōt n̄an Rikanaan ro im Revelesōn ko ad Make n̄an Tōl Mour ko Ad.” Bōlen kajjojo membōr in kūlaaj ak doulul eo remaron̄ kwaļo̧k juon men jān ennaan eo me ejipan̄ jeļā bwe Jisōs Kraist ej lukkuun jerbal im make tōl Kabun̄ eo An. Ta ko jet koj loi ilo jeje ko rekwojarjar ium̧win “Kein Jipan̄ ko rej Rie”?

• Remaron̄ barāinwōt jipan̄ jodikdik ro ekkatak eļļapļo̧k kōn elmen an Irooj tōl ward eo am̧. Komaron̄ kajjitōk ippān jodikdik ro n̄an kwaļo̧k juon waanjon̄ak elmen an Irooj tōl kajjojo ritōl ro ilo ward eo, ekoba būreejtōn eo an kūlaaj ak doulul eo. Ilo wiik eo m̧okta jān kūlaaj, komaron̄ kajjitōk ippān juon ward ritōl n̄an kwaļo̧k—ilo armej ak kam̧putōr—en̄jake ko aer ej kwaļo̧k bwe Irooj ej tōl er. Membōr in kūlaaj ak doulul eo remaron̄ kappukot kakobaba in waanjon̄ak ko ilo ennaan eo an Būreejtōn Henry B. Eyring “Irooj ej Tōl Kabun̄ eo An” (Liaona, Nob. 2017, 81–84). Etke eaorōk n̄an lōn̄ tōmak bwe Irooj ej im̧we ritōl ro ad ilo ward?

• Jet armej rej en̄jake bwe eļan̄n̄e kōj armej em̧m̧an im jej kōm̧m̧ani men ko rem̧m̧an, jej jab aikuj juon kabun̄. Komaron̄ kajjitōk ippān jodikdik ro elmen aer nej uwaak men in. Ilo ennaan eo an “Aikuj eo n̄an juon Kabun̄” (Liaona, Nob. 2021, 24–26), Būreejtōn Dallin H. Oaks ekar letok jejjo un ko etke kabun̄ ko, ekoba Kabun̄ eo an Irooj ekar jeplaaktok, raorōk. Jodikdik ro remaron̄ lale ennaan in ilo ruo armej, ilo kurup ko redik, ak āinwōt juon kūlaaj ak doulul im kwaļo̧k ta ko reloi.

Irooj ej tōl Kabun̄ eo An jān revelesōn, ekoba būreejtōnji an kūlaaj im doulul ko.

Jerbal kōn Tōmak

Rōjan̄ ro uwaan kūlaaj eo ak doulul eo n̄an kejōkļo̧kjeņ im je ta eo renaaj kōm̧m̧ane n̄an mour ekkar n̄an im̧we ko rej en̄jaki rainin. Eļan̄n̄e rej kōņaan, remaron̄ kwaļo̧k ļōmņak ko aer. Karuwainene er n̄an ļōmņak kōn ekōjkan an jerbali im̧we ko aer naaj kōkajoorļo̧k jem̧jerā eo aer ippān Jemedwōj Ilan̄ im Jisōs Kraist.

Kein Jipan̄ ko rej Rie

• Epesōs 2:19–20; 4:11–15; Katak im Bujen Ko 1:38; 21:1–6; Laajrak in Tōmak 1:5–6

Ekkatak ilo Wāween eo an Rilo̧mo̧o̧r

N̄an karuwainene Jetōn n̄an katakin ko am̧, rōjan̄ ro jet n̄an kwaļo̧k kam̧ool ko aer make kōn men ko kwōj kōnono kaki.