tamāhine e pure ra

11 nō Tiunu

Nāhea e ti’a ai iā’u ’ia ha’afātata atu i tō tātou Metua i te ao ra ’e ia Iesu Mesia ?

Ioane 14–17

ītona ’āpo’o

’Āpo’o

Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, ’a tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona I muri iho, ’a arata’i i te hō’ē ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau tupura’a ’ohipa tei ha’apūai i tō tātou ’itera’a pāpū ?

• Aupuru i te feiā tei hina’aro i te tauturu. ’O vai tē hina’aro i tā tātou tauturu ’e i tā tātou mau pure ? E aha te mea e tūra’i nei ia tātou ’ia rave nō te tauturu ?

• Ani i te mau ta’ata ato’a ’ia fāri’i i te ’evanelia. Nāhea tātou ’ia riro ’ei māramarama nō te mau melo o te ’utuāfare ’aore rā nō te mau hoa, ’aita e fāri’i nei i tō tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea tātou i te fa’a’ite rahi atu ā i te here ’e i te turura’a i tō tātou ’utuāfare ’e ’ia rave i te ta’a-’ē-ra’a maita’i i roto i tō tātou fare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe iho i te pae vārua

E’ita te hotu e tupu i ni’a i te hō’ē ’āma’a tei fa’ata’a-’ē-hia i tōna tumu. Mai te reira ato’a nō tātou, e’ita tātou e tupu i te rahi i te pae vārua, mai te mea ’ua ta’a ’ē atu tātou i te Atua (hi’o Ioane 15:4–6). Nō reira, e mea rahi te mau ’umera’a e ’imi nei i te fa’ata’a ’ē ia tātou iāna ra—i te tahi taime o tō tātou iho te’ote’o ’aore rā tā tātou mau mā’itira’a tano ’ore, i te rahira’a rā o te taime o te mau huru ’ōhie ïa o te orara’a tāhuti nei. I te fārerei-hōpe’a-ra’a Iesu i tāna mau pipi i te tāhuti nei, ’ua ’ite ’oia ’ua fātata roa te taime e ta’a ’ē ai ’oia ia rātou. Nō reira, ’ua ha’api’i ’oia ia rātou i te faufa’a rahi ’ia mau noa i te hono fātata e ’ōna ’e i tōna Metua—’ia vai tāhō’ē noa rātou ia rāua, mai te hō’ē ’āma’a i tōna tumu. ’Ua pi’i ’oia i te reira ’ia « ’ati » iāna. ’E ’ua ha’api’i ’oia i tāna mau pipi nāhea ’ia rave i te reira. Hau atu i te faufa’a i te mau mea ato’a, nā roto i tāna tusia tāra’ehara, ’ua nehenehe iāna e fa’atupu i taua tū’atira’a ra.

’A feruri i tō ’oe tū’atira’a ’e te Metua i te ao ra ’e ia Iesu Mesia ’a tuatāpapa ai ’oe i te Ioane 14–17. ’A feruri ato’a i te feiā ’o tā ’oe e ha’api’i nei ’e i tō rātou mau hina’aro ’ia ha’afātata atu ā i te Atua. E aha tā ’oe e rave nō te tauturu ia rātou ? ’A feruri i Te Ha’api’ira’a Tumu ’e te mau Fafaura’a 88:62–68 ’a fa’aineine ai ’oe nō te ha’api’i.

Ha’api’i ’āmui

’A feruri e nāhea ’oe ’ia fa’auru i te feiā ’āpī ’ia ’āparau i te mau ha’api’ira’a a te Fa’aora nō ni’a i te vine ’e te mau ’āma’a i roto i te Ioane 15:1–12. E fa’a’ohipa paha ’oe i te hō’ē hōho’a pāpa’i, i te hō’ē hōho’a ’aore rā i te hō’ē ’āma’a mau nō te tauturu ia rātou ’ia ’ite maita’i i te mea tā Iesu e ha’api’i ra. E ani ia rātou ’ia paraparau mai nō ni’a i te mau taime ’a ’ite ai rātou ’ua fātata atu rātou i te Metua i te ao ra ’e ia Iesu Mesia—’aore rā i te mau taime ’a ātea ai rātou ia rāua. E aha tā teie mau ’īrava e ha’api’i nei e nāhea tātou i te parahi fātata atu ia rāua ? E riro te mau ’ātivite mai teie i muri nei i te tauturu ’ia fa’ahōhunu i teie ’āparaura’a.

• E riro e mea faufa’a ’ia rave i te tahi taime nō te hi’o fa’ahou te uira’a « E aha te mea e fa’aātea ia tātou i tō tātou Metua i te ao ra ’e ia Iesu Mesia ? » E nehenehe ’oe e pāpa’i i te uira’a i ni’a i te tāpura ’ere’ere ’e e ani atu i te pāhonora’a. Penei a’e e ani atu i muri iho, i te mea tā tātou e rave nō te fa’atupu i te hoara’a ’e te hō’ē hoa ’aore rā i te hō’ē melo nō te ’utuāfare. Nāhea te reira e tū’ati ai—’e e ta’a ’ē ai—i te huru tātou e fa’atupu i te hō’ē aura’a ’e tō tātou Metua i te ao ra ’e ia Iesu Mesia ? Nāhea Iesu Mesia i te tauturu ia tātou ’ia ha’afātata atu ā iāna ’e i tōna Metua ? Fa’aitoito i te mau melo o te piha tamāhine ’aore rā i te pupu autahu’ara’a ’ia tai’o i te mau pāpa’ira’a mo’a i roto i te « Pu’e parau ha’amāramaramara’a » nō te tauturu ia rātou ’ia pāhono i teie uira’a. E riro e fāna’o te feiā ’āpī ’ia tuatāpapa rātou i teie mau ’īrava ’ei pea ’e te fa’a’itera’a mai i te mea tā rātou i ha’api’i mai.

• ’Aore e ta’ata e piri atu ā i te Atua te Metua, maori rā tāna Tamaiti Here, ’o Iesu Mesia. E aha tā tātou i ha’api’i mai nā roto mai i te Fa’aora nō ni’a i te ha’afātatara’a atu ā i te Atua ? ’Ia feruri te mau melo o piha ’aore rā o te pupu i teie uira’a, ’a tai’o ai rātou i te Luka 22:41–43 ; Ioane 6:38 ; 17:3, 20–23 ; 3 Nephi 11:11 ; Te Ha’api’ira’a Tumu ’e te mau Fafaura’a 50:43. Nāhea tātou ’ia riro ’ei hō’ē i tō tātou Metua i te ao ra ’e ia Iesu Mesia ?

• I roto i tāna a’ora’a « Tō tātou iho Fa’aora », ’ua fa’aha’amana’o mai Elder Michael John U. Teh i te hō’ē taime ’a ’ite ai ’oia ē, « te mea tā’u i ’ite nō ni’a i te Fa’aora e mea rahi a’e ïa tā’u e ’ite mau nei iāna » (Liahona, Me 2021, 99). E ani i tā ’oe piha tamāhine ’aore rā pupu autahu’ara’a ’ia ’āparau mai nō ni’a i te mau ta’a-’ē-ra’a i rotopū i te ’itera’a nō ni’a ia Iesu Mesia ’e te ’itera’a mau iāna. E mātutu rātou nō ni’a i te mea tā rātou e rave nō te ’ite nō ni’a iāna ’e te mea tā rātou e rave nei nō te ’ite mau ’iāna. I muri iho, e ’imi rātou i te mau tuha’a nō te a’ora’a a Elder Teh, nō te hi’o mai i te mau parau a’o tāna i hōro’a mai nō te ’ite mau i te Fa’aora. Nāhea tō tātou orara’a i te ha’amaita’ira’ahia nā roto i te ’imira’a ’ia ’ite iāna ?

• I roto i te video « ’Ua ’ite ’oia iā’u », e piti nā feiā ’āpī nō Ghana [’Āfirika] tei fa’ata’a mai i tā rāua mau tauto’ora’a nō te ha’afātata atu ā i te Atua. E nehenehe te mau melo o te piha tamāhine ’aore rā o te pupu autahu’ara’a e māta’ita’i i te video ’e ’a nā reira ai rātou, ’ia hāmani mai i te hō’ē tāpura nō te mau mana’o tā rātou e hōro’a nō ni’a i te ha’amaita’ira’a i tō rātou aura’a e tō rātou Metua i te Ao ra. ’A ani ia rātou ’ia fa’a’ite mai i te tahi mea nō roto i tā rātou tāpura. Mai te mea e ti’a, e au paha rātou e tāviri i tā rātou iho video poto, e fa’a’ite ra nāhea rātou i te ha’afātata atu ā i te Atua.

feiā ’āpī tamāhine e tai’o ra i te mau pāpa’ira’a mo’a

’A ha’api’i mai ai tātou ’ia ’ite mau i te Fa’aora ’e ’ia ha’apa’o i tāna mau fa’auera’a, e vai noa tātou i roto i tōna here (hi’o Ioane 15:10).

Rave ma te fa’aro’o

’A fa’aitoito i te mau melo o te piha ’aore rā o te pupu autahu’ara’a ’ia feruri ’e ’ia pāpa’i i te mea tā rātou e rave nō te fa’a’ohipa i te mau mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai tō rātou mau mana’o. E ani ia rātou ’ia feruri nāhea te fa’a’ohipara’a i te mau mana’o tei tae mai i te ha’apūai i tō rātou mau tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Ioane 14:6 ; 1 Timoteo 2:5–6 ; Iakoba 4:11 ; Mosia 3:19 ; Te Ha’api’ira’a Tumu ’e te mau Fafaura’a 88:63 ; Mose 6:52

Ha’api’ira’a mai tā te Fa’aora

’Ua fa’aineine te Fa’aora i tāna tāvinira’a i te fenua nei nā roto i te pure ’e te ha’apaera’a mā’a oi piri ho’i ’oia i tōna ra Metua (hi’o Mataio 4:1–2 ; Luka 4:1–2). ’A fa’aineine ai ’oe i te ha’api’i, ’a rave i te taime nō te hi’o i te arata’ira’a a tō Metua i te ao ra, inaha ho’i tē ha’api’i nei ’oe i tāna mau tamari’i !