Te tāra’ehara o te Fa’aora : Niu nō te keresetianora’a mau, nā Kirk Richards

Te tāra’ehara o te Fa’aora : Niu nō te keresetianora’a mau, nā Kirk Richards

25 nō Tiunu

E aha te aura’a nō’u te tāra’ehara a Iesu Mesia ?

Mataio 27 ; Mareko 15 ; Luka 23 ; Ioane 19

ītona ’āpo’o

’Āpo’o

’Arata’ihia e te hō’ē melo nō te peresidenira’a o te piha ’aore rā o te pupu ; nō te maorora’a 10–20 minuti

I te ’ōmuara’a o te rurura’a, e tai’o ’āmui te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona. I muri iho, ’a arata’i i te hō’ē ’āparaura’a nō ni’a i te ’ohipa nō te fa’aorara’a ’e te fa’ateiteira’a ma te fa’a’ohipa hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi,, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea tātou i te ha’afātata atu i te Fa’aora ? Nāhea tātou i te tāmata ’ia riro mai iāna ra te huru ?

• Aupuru i te feiā tei hina’aro i te tauturu. ’O vai tei roto i tō tātou ferurira’a ’aita i maoro a’e nei ? Nāhea tātou i te tauturu i teie mau ta’ata ?

• Ani i te mau ta’ata ato’a ’ia fāri’i i te ’evanelia. Nāhea tātou i te pāhono i te mau uira’a a tō tātou mau hoa nō ni’a i te ’Ēkālesia, ’o te ha’apūai i tō rātou fa’aro’o i te Fa’aora ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e tū’ati maita’i a’e i te mau melo o te ’utuāfare rahi, mai te mau metua pa’ari ’e te mau taea’e fēti’i ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe iho i te pae vārua

’Ua hi’o na Elder David A. Bednar ē, vetahi feiā mo’a i te mau mahana hope’a nei, « mai te huru ra ē, e fa’aro’o tō rātou i te Fa’aora, ’aita rā e ti’aturira’a i te mau ha’amaita’ira’a tāna i parau fafau mai ē, tē vai ra rātou » (« ’Āhiri ’outou i ’ite na iā’u », Liahona, Novema 2016, 104). E parauhia, noa atu tē ti’aturi nei tātou ē, ’ua mamae ’e ’ua pohe Iesu Mesia nō te mau hara a tō te ao nei, e nehenehe tātou e uiui ia tātou iho mai te mea ’ua mamae ’oia ’e ’ua pohe ta’a ’ē nō tā tātou mau hara. ’Ua tupu a’ena ānei te reira huru mana’o i roto ia ’oe ? Mai te hea te mau melo o tā ’oe te piha ’aore rā o tā ’oe pupu e ti’a ai ’ia hāro’aro’a ē, nō rātou iho te tāra’ehara o te Fa’aora ? Nāhea ’oe i te tauturu ia rātou ?

’A feruri i teie mau uira’a ’a tai’o ai ’oe i teie hepetoma nō ni’a i te fa’asātaurora’a o te Fa’aora. ’A fa’aineine ai ’oe i te ha’api’i i te nātura iho o te tāra’ehara o te Mesia, e nehenehe ’oe e tuatāpapa i te a’ora’a a te peresideni Dallin H. Oaks « E aha tā tō tātou Fa’aora i rave nō tātou ? » (Liahona, Mē 2021, 75–77).

Ha’api’i ’āmui

’A ani i te mau melo o te piha ’aore rā o te pupu, ’ia fa’a’ite mai i te mea tā rātou i ’apo mai i te hepetoma i ma’iri a’e nei nō ni’a i te fa’asātaurora’a o te Fa’aora, i roto i te Faufa’a ’Āpī ’e i tō rātou mau mana’o nō ni’a i te Fa’aora. Nō te fa’aitoito ia rātou, e ui i te uira’a mai teie « E aha tā tātou i ’apo mai nō ni’a ia Iesu Mesia, nā roto mai i te mau mea tāna i parau ’e i rave i tōna mau taime hope’a » ? ’Ei hi’ora’a, ’a hi’o haere i te mau tupura’a i te taime te Fa’aora, nā roto i te māuiuira’a nō te tā’āto’ara’a, ’ua fa’ariro noa i te feiā ’ati a’e iāna ma te aroha (hi’o, ’ei hi’ora’a, Luka 23:34, 39–43 ; Ioane 19:25–27)). E riro te reira i te arata’i atu i te hō’ē ’āparaura’a, e nāhea te tāra’ehara a Iesu Mesia e riro ai nō tō te ao ato’a nei ’e nō te ta’ata iho ato’a. E tauturu te mau ’ātivite mai teie i muri nei ia ’oe ’ia ’aparau rahi nō ni’a i te tāra’ehara a te Fa’aora.

• I roto i te paratarāfa mātāmua o tāna a’ora’a « E aha tā tō tātou Fa’aora i rave nō tātou ? », ua fa’ata’a mai te peresideni Dallin H. Oaks i te hō’ē ’āparaura’a ’e te hō’ē vahine tei ’ore i ti’aturi i tā Iesu Mesia i rave nōna. Penei a’e e nehenehe te mau melo o te piha ’aore rā o te pupu e tai’o i te reira paratarāfa, ma te fa’ariro ’o rātou te peresideni Oaks. E aha tā tātou e parau i teie vahine ? ’A hōro’a i te melo tāta’itahi o te piha ’aore rā o te pupu i te hō’ē o te mau tuha’a i nūmerahia nō te a’ora’a a te peresideni Oaks. Ma te fa’a’ohipara’a i te mea tā rātou i ha’api’i mai, ’e tae noa atu i tō rātou iho mau ’itera’a, i muri iho ’ia fa’a’ite mai rātou i tā rātou iho mau pāhonora’a i te uira’a « E aha tā Iesu Mesia i rave nō’u ? »

• Nō te fa’auru i te hō’ē ’āparaura’a e nāhea te tara’ehara a te Fa’aora i te fa’auru ia tātou iho, ’a pāpa’i i ni’a i te tāpura ’ere’ere te hō’ē pereota mai teie te huru Nō te mea ’ua mamae ’e ua pohe Iesu Mesia nō te mau ta’ata ato’a … . E hōro’a mau te mau melo o te piha ’aore rā o te pupu i te mau rāve’a nō te fa’a’ī i te pereota. ’Ia oti, e tāui ’oe i te pereota tai’o Nō te mea ’ua mamae ’e ’ua pohe Iesu Mesia nō’u … ’e e ani i te tahi atu ā mau mana’o. ’A tuatāpapa ai te piha tamāhine ’aore rā te pupu autahu’ara’a i teie mau fa’ahitira’a parau, ’a fa’aitoito ia rātou ’ia tai’o i te mau pāpa’ira’a mo’a i roto i te « Pu’e parau ha’amāramaramara’a ». E aha tā teie mau pāpa’ira’a mo’a e ha’api’i nei ia tātou nō ni’a i te fa’aurura’a o te tāra’ehara a te Fa’aora i roto i tō tātou iho orara’a ?

• Te tahi atu rāve’a nō te tuatāpapa i te mau pāpa’ira’a mo’a i roto i te « Pu’e parau ha’amāramaramara’a », ’o te anira’a ïa i te feiā ’āpī ’ia mono i te mau ta’o i roto i te mau ’īrava mai te huru ra ē, nō rātou iho teie mau ’īrava. Nāhea te reira i te ha’aputapū i tō tātou mau mana’o manava nō ni’a i te mau parau mau i roto i te mau ’īrava ? Nāhea tātou ’ia fa’a’ite i tō tātou māuruuru nō te tusia a te Fa’aora nō tātou ?

• E nehenehe te pehe mo’a e fa’a’ite pāpū ma te mana rahi nō Iesu Mesia. ’A ha’amana’o i te ani i te mau melo o te piha ’aore rā o te pupu, ’ia haere ineine mai nō te fa’a’ite i te mau hīmene ’o tei tauturu ia rātou ’ia fāri’i i te mana nō te tāra’ehara a te Fa’aora i roto i tō rātou iho orara’a. (E nehenehe rātou e hi’o i te mau hīmene ’ōro’a ’aore rā i te upo’o parau « Iesu Mesia—Fa’aora » i roto i te fa’ahorora’a o te mau parau tumu nō Te mau hīmene.) ’A ani i te mau melo o te piha ’aore rā o te pupu ’ia ’imi mai i te mau pereota i roto i te mau hīmene ’o tei tauturu ia rātou ’ia ’ite i te here o te Fa’aora nō rātou iho. E paraparau ato’a e nāhea te tusia a te Fa’aora i te ha’aputapū i tō tātou orara’a i te mau mahana ato’a. ’Ei hi’ora’a, nāhea te reira i te fa’atupu mai i roto i te mau mā’itira’a tā tātou e rave ?

te Mesia i Getesemane

Te Mesia i Getesemane, nā Dan Burr

Rave ma te fa’aro’o

’A fa’aitoito i te mau melo o te piha ’aore rā o te pupu ’ia feruri ’e ’ia pāpa’i i te mea ’o tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou mau tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• 1 Korinetia 15:20–22 ; 2 Korinetia 12:7–9 ; Alama 7:11–12 ; 3 Nephi 11:10–11

• Tad R. Callister, « Te tāra’ehara a Iesu Mesia », Liahona, Mē 2019, 85–87

Ha’api’ira’a mai tā te Fa’aora

E mana rahi tō te mau fa’a’itera’a mau nō te here o te HuruMesia, nō te tāmarū i te ’ā’au o te mau pīahi e aro nei ’e te ’evanelia. Pinepine, e hina’aro noa teie mau ta’ata ’ia ’ite ē, e hina’aro-mau-hia rātou ’e ’ua herehia rātou.