’Āpōsetolo Petero e parauparau ra i te naho’a ta’ata

I muri a’e i tōna ti’a-fa’ahou-ra’a, ’ua arata’i te Fa’aora i tāna ’Ēkalesia nā roto i tāna mau ’Āpōsetolo, mai ia Petero.

9 nō Tiurai

Nāhea Iesu Mesia i te arata’i i tāna ’Ēkalesia ?

Te ’Ohipa 1–5

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a A’arona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te evanelia. E aha te mau tumu parau tā te episekōpora’a i ’āparau i roto i tā mātou mau rurura’a ’āpo’ora’a feiā ’āpī a te pāroita ? E aha tā tātou e nehenehe e rave ’ei piha tamahine ’aore rā ’ei pupu autahu’ara’a tei fa’atumuhia i ni’a i te reira mau ’āparaura’a ?

• Aupuru i te feiā tei hina’aro i te tauturu. Nāhea tātou e toro ai i te rima i te mau ta’ata, mai te Mesia ra te huru, ’ia ’ite ana’e tātou i te hina’aro ’aita rā i ’ite e aha tē parau atu ?

• Ani i te mau ta’ata ato’a ’ia fāri’i i te evanelia. E aha tā tātou i ’ite mai i roto i te evanelia a Iesu Mesia ’o tē hōro’a mai ia tātou i te ’oa’oa ? Nāhea e ti’a ai ia tātou ’ia fa’a’ite i teie ’oa’oa ia vetahi ē ?

• Tāhō’ē i te mau ’utuāfare ē a muri noa atu. E aha tā tātou e rave nei nō te imi i te i’oa o te mau tupuna tei tītauhia te mau ’ōro’a o te hiero ? E aha tā tātou e nehenehe e rave nō te tauturu ia vetahi ’ē ’ia imi i te i’oa o tō rātou mau tupuna ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Hō’ē mea ’ia ’ite ē, e mea maita’i te ’Ēkālesia, e tē ha’api’i nei te ’Ēkālesia i te mau parau tumu mau, ’aore rā, e nehenehe te ’Ēkālesia e tauturu ia ’oe ’ia riro mai ’ei ta’ata maita’i a’e. E mea ’ē atu ā ’ia ’ite ē, te ’Ēkālesia i teie mahana, o te ’Ēkālesia mau ïa a Iesu Mesia, tei ha’amauhia e āna e tei arata’i-tāmau-hia e āna nā roto i te hō’ē peropheta ora. Tē hōro’a nei te buka nō Te ’Ohipa i te mau fa’a’itera’a e rave rahi ē, tei roto roa te Fa’aora i te fa’aterera’a i tāna ’Ēkālesia. ’A tuatāpapa ai ’oe i te mau pene 1–5, ’a ’imi i te reira fa’a’itera’a, e a feruri nāhea tō ’oe ’itera’a ē, tē tāmau nei ā oia i te arata’i i tāna ’Ēkālesia i teie mahana. Nāhea teie ’itera’a i te ha’amaita’ira’a atu ia ’oe ?

E ’itera’a pāpū ānei tō te feiā ’āpī tā ’oe e ha’api’i nei ē, nā te Fa’aora iho e arata’i nei i te ’Ēkālesia tei roto rātou ? Nāhea taua ’itera’a pāpū ra ’ia ha’amaita’i ia rātou ? Nāhea e ti’a ai ia ’oe ’ia tauturu ia rātou ’ia noa’a ’aore rā, ’ia ha’apūai i teie ’itera’a pāpū ? Ta’a ’ē noa atu te tuatāpapara’a i Te ’Ohipa 1–5, e nehenehe ato’a ’oe e tai’o i te a’ora’a a Elder Quentin L. Cook « Te ha’amaita’ira’a nō te heheura’a tāmau i te mau peropheta ’e nō te heheura’a i te ta’ata hō’ē, nō te arata’i i tō tātou orara’a » (Liahona, Mē 2020, 96–100).

Ha’api’i ’āmui

Nō te ha’amata i tā ’outou ’āparaura’a, e nehenehe ’oe e pāpa’i i ni’a i te tāpura ’ere’ere Tē arata’i nei Iesu Mesia i tāna ’Ēkālesia nā roto i te heheura’a i tāna mau ’āpōsetolo. E nehenehe te mau melo o te piha tamāhine ’aore rā o te pupu autahu’ara’a e fa’a’ite mai i te hō’ē mea tei ’itehia ia rātou i roto i tā rātou tuatāpapara’a i Te ’Ohipa 1–5 ’o tē turu i teie fa’ahitira’a parau. (Mai te mea e tītauhia, e nehenehe ’oe e arata’i ia rātou i Te ’Ohipa 1:1–8 ; 2:36–39 ; 4:1–13, 31–33.) E aha te fa’a’itera’a tā tātou e ’ite nei ē, tē nā reira ato’a nei Iesu Mesia i te fa’atere i tāna ’Ēkālesia i teie mahana ? E nehenehe te mau ’ohipara’a mai teie i muri nei e tauturu i te feiā tā ’oe e ha’api’i ra ’ia ha’apūai i tō rātou fa’aro’o i roto i teie parau mau faufa’a rahi.

• E nehenehe ’oe e fa’aineine e rave rahi uira’a mai teie : Nāhea Iesu Mesia i te arata’i i tāna ’Ēkālesia ? Nāhea tātou i te fa’arahi i tō tātou fa’aro’o ē, tē arata’i nei Iesu Mesia i tāna ’Ēkālesia ? Nō te aha ’oe e ti’aturi ai i te mau peropheta e te mau ’āpōsetolo a te Fatu ? ’A hōro’a i te melo tāta’itahi o te piha tamāhine ’e nō te pupu autahu’ara’a i te hō’ē o te mau uira’a, e a ani ia rātou ’ia feruri hōhonu i te uira’a e ’ia feruri i te mau pāpa’ira’a mo’a ’o tē nehenehe e tauturu ia rātou ’ia pāhono i te reira (mai te mea e hina’arohia, ’a hi’o « Pu’e parau ha’amāramaramara’a » nō te tahi mau mana’o). I muri iho, ’a hōro’a i te taime nō te tā’āto’ara’a ’ia fa’a’ite mai e ’ia ’āparau i te mea tā rātou i ha’api’i mai.

• Nō te tauturu i te piha tamāhine ’aore rā, i te pupu autahu’ara’a ’ia ’ite nāhea te Fatu ’ia arata’i i tāna ’Ēkālesia, e nehenehe ’oe e ani ia rātou ’ia hi’o fa’ahou i te tuha’a mātāmua o te a’ora’a a Elder Quentin L. Cook « Te ha’amaita’ira’a o te heheura’a tāmau i te mau peropheta ’e o te heheura’a a te ta’ata iho nō te arata’i i tō tātou orara’a ». Pēnei a’e e nehenehe te melo tāta’itahi o te piha tamāhine ’aore rā te pupu autahu’ara’a ’ia fa’a’ite mai i te hō’ē mea nō roto mai i te poro’i ’o tē tauturu ia rātou ’ia ’ite ē, tē arata’i itoito nei Iesu Mesia iho i tāna ’Ēkālesia. E aha te tahi atu ā mau mana’o tā tātou e ’ite nei i roto i te mau pāpa’ira’a mo’a i raro a’e i « Pu’e parau ha’amāramaramara’a » ?

• E riro ato’a ’ei tauturura’a nō te feiā ’āpī ’ia ha’api’i rahi atu ā nō ni’a i te huru te Fatu e arata’i nei i tā ’outou pāroita. E nehenehe ’oe e ani i te feiā ’āpī ’ia fa’a’ite mai i te mau hi’ora’a e nāhea te Fatu e arata’i nei i te feiā fa’atere o te pāroita, tae noa atu i te peresideni o te piha tamāhine ’aore rā te pupu autahu’ara’a. I roto i te hepetoma hou te ha’api’ira’a, e nehenehe ’oe e ani i te tahi mau fa’atere o te pāroita ’ia fa’a’ite—tino roa mai ’aore rā nā roto i te roro uira—i te mau ’ohipa i tupu e fa’a’ite ra nāhea te Fatu e arata’i nei ia rātou. E nehenehe te mau melo o te piha tamāhine ’aore rā, te pupu autahu’ara’a e ’ite mai i te tahi atu mau hi’ora’a i roto i te a’ora’a a te peresideni Henry B. Eyring « Tē arata’i nei te Fatu i tāna ’Ēkālesia » (Liahona, Novema 2017, 81–84). Nō te aha e mea faufa’a roa ’ia roa’a te fa’aro’o ē tē fa’auru nei te Fatu i tā tātou mau fa’atere pāroita ?

• Tē mana’o nei te tahi mau ta’ata ē, mai te mea e mau ta’ata maita’i tātou ’e e rave tātou i te mau ’ohipa maita’i, ’aita tātou e hina’aro i te hō’ē ’ēkālesia. E nehenehe ’oe e ani i te feiā ’āpī e nāhea rātou i te pāhono i te reira. I roto i tāna a’ora’a « E mea hina’arohia te hō’ē ’Ēkālesia » (Liahona, Novema 2021, 24–26), ’ua hōro’a te peresideni Dallin H. Oaks e rave rahi tumu nō te aha e mea faufa’a te mau ’Ēkālesia, tae noa atu i te ’Ēkālesia a te Fatu tei fa’aho’i-fa’ahou-hia mai. E nehenehe te feiā ’āpī e imi i teie parau poro’i ’ei pea, ’ei pupu na’ina’i, ’aore rā ’ei piha tamāhine ’aore rā ’ei pupu autahu’ara’a e ’ia fa’a’ite mai i te mea i ’itehia mai ia rātou.

e feiā ’āpī tamāroa e putuputu ra

Tē arata’i nei te Fatu i tāna ’Ēkālesia nā roto i te heheura’a, tae noa atu i te mau peresidenira’a piha tamāhine ’e te pupu autahu’ara’a.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Ephesia 2:19–20 ; 4:11–15 ; Te Ha’api’ira’a Tumu ’e te mau Fafaura’a 1:38 ; 21:1–6 ; Te mau Hīro’a Fa’aro’o 1:5–6

Ha’api’ira’a mai tā te Fa’aora

Nō te ani i te Vārua i roto i tā ’oe ha’api’ira’a, ’a fa’aitoito ia vetahi ē ’ia fa’a’ite i tō rātou ’itera’a pāpū nō ni’a i te parau mau tā ’oe e tuatāpapa ra.