Iesu e tāna mau pipi, © Balage Balogh/Art Resource, NY

23 nō Tiurai

E aha te aura’a o te parau ’ia riro ’ei pipi nā Iesu Mesia ?

Te ’Ohipa 10–15

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a A’arona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te evanelia. Nāhea tātou i te ’itera’a i te rima o te Fatu i roto i tō tātou orara’a ?

• Aupuru i te feiā tei hina’aro i te tauturu. Nāhea e nehenehe ai ia tātou ’ia pāturu i te tahi e te tahi i roto i te mau mea e fa’aruruhia nei e tātou ?

• Ani i te mau ta’ata ato’a ’ia fāri’i i te evanelia. Nāhea e nehenehe ai ia tātou ia fa’a’ohipa maita’i a’e i te mau rāve’a ’āpī ’ei mauha’a nō te fa’a’ite i te evanelia ?

• Tāhō’ē i te mau ’utuāfare ē a muri noa atu. E aha tā tātou e rave nei nō te tauturu i tō tātou mau ’utuāfare ia haere mai i te Mesia ra ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Tē parau nei te pene 11 nō Te ’Ohipa ē, nō te taime mātāmua « ua parauhia te mau pipi ’ei keresetiano » (’īrava 26). E ha’amaita’ira’a ’e e hōpoi’a mo’a ’ia ’itehia ’ei ta’ihō’ē o te mau pipi a te Mesia e ia pi’ihia i tōna ra i’oa. Mai tā peresideni M. Russell Ballard i parau : « Tē ’ite ra ānei tātou i te ha’amaita’ira’a rahi ia rave i ni’a ia tātou i te i’oa o te Tamaiti Here e te Fanau Tahi a te Atua ? Tē māramarama ra ānei tātou i te faufa’a rahi no te reira ? Te i’oa o te Fa’aora o te i’oa ana’e ïa i raro a’e i te ra’i e ti’a ai i te ta’ata ’ia fa’aorahia » (« Te faufa’a o te hō’ē i’oa », Liahona, Novema 2011, 79).

E aha te aura’a nō ’oe te rirora’a ’ei keresetiano—ei pipi nā Iesu Mesia ? E aha te aura’a nō te mau melo o tā ’oe piha tamāhine ’aore rā pupu autahu’ara’a ? Nāhea te ravera’a i tōna i’oa i ni’a iho ia ’oe i te fa’auru ia ’oe ? E nehenehe ato’a ’oe e feruri i te mau taime ’a fa’auruhia ai ’oe e te hi’ora’a o te hō’ē ta’ata tei ’ohipa ’ei pipi mau nā te Mesia.

’A fa’aineine ai ’oe nō te ha’api’i, ta’a ’ē noa atu te tai’ora’a i Te ’Ohipa 10–15, ’a feruri ’ia tai’o hō’ē ’aore rā hau atu o te mau poro’i o te ’āmuira’a rahi e ’itehia i roto i te « Pu’e parau ha’amāramaramara’a ».

Ha’api’i ’āmui

Nō te tauturu i te mau melo piha tamāhine ’aore rā pupu autahu’ara’a ’ia māramarama e aha te aura’a ’ia riro ’ei pipi nā Iesu Mesia, e nehenehe ’oe e ani ia rātou ’ia fa’aoti i teie fa’ahitira’a parau : « Hō’ē pipi nā Iesu Mesia ’o te hō’ē ïa ta’ata […] » E nehenehe rātou e hi’o fa’ahou i Te ’Ohipa 11:19–26, ma te ’imi i te mau mana’o i roto i te mau ’īrava 21, 23–24, 26 nō ni’a i te huru o tō teie mau melo o te ’Ēkālesia fa’a’itera’a ē, e mau pipi rātou. Nāhea te rirora’a ’ei pipi nā Iesu Mesia i te fa’auru i tō tātou mau mana’o ’e tā tātou mau peu ? E nehenehe te mau ’ohipara’a mai teie e ha’amaita’i atu ā i teie tāu’ara’a parau.

• E riro ’ei tauturura’a ’ia ’āparau e aha te hō’ē pipi a Iesu Mesia (hi’o i te fa’ahitira’a parau a Elder Robert D. Hales i roto i te « Pu’e parau ha’amāramaramara’a »). E nehenehe ’oe e ani i te feiā ’āpī ’ia fa’a’ite mai i te tahi mau ha’api’ira’a a Iesu Mesia ’o tē fa’auru ia rātou ’e i te tahi mau mea tā rātou i ha’api’i mai nā roto mai i tōna hi’ora’a maita’i. E nehenehe rātou e ’imi i te tahi mau mana’o i roto i te tahi mau pāpa’ira’a mo’a i roto i te « Pu’e parau ha’amāramaramara’a », ’aore rā i roto i te tahi atu tā rātou i ’ite. E nehenehe rātou e pāpa’i i ni’a i te tāpura ’ere’ere i te mea tā rātou i ha’api’i mai nō ni’a i te Fa’aora i roto i te mau ’īrava. I muri iho, e nehenehe rātou e parauparau nō ni’a i te mau rāve’a e nehenehe ai rātou e pe’e pāpū i te mau ha’api’ira’a ’e te mau hi’ora’a i tāpurahia i ni’a i te tāpura ’ere’ere.

• ’A ani i te mau melo o te piha tamāhine ’aore rā o te pupu autahu’ara’a ’ia feruri e aha te aura’a ’ia riro ’ei keresetiano. E nehenehe rātou e hāmani i te hō’ē tāpura nō te mau huru maita’i tā rātou e tīa’i ra ’ia ’ite mai i roto i te orara’a o te hō’ē ta’ata ’o tē pe’e nei ia Iesu Mesia (hi’o, ’ei hi’ora’a, Ioane 13:34–35). E nehenehe ’oe e vāhi i te feiā ’āpī i roto i nā pupu e piti ’e ’ia ani i te pupu tāta’itahi ’ia tai’o i te hō’ē o te mau a’ora’a i muri nei ma te ’imi i te tahi atu mau maita’i tā rātou e tu’u atu i roto i tā rātou tāpura : Elder Terence M. Vinson, « E mau pipi mau nā te Fa’aora » (Liahona, Novema 2019, 9–11) ’e Elder Massimo De Feo, « Te here mau : Te tāpa’o mau o te pipi mau a Iesu Mesia » (Liahona, Mē 2018, 81–83). E ani i te feiā ’āpī ’ia feruri i te hō’ē mea i ni’a i te tāpura tā rātou e hina’aro e ha’amaita’i atu.

• E nehenehe ’oe e ani i te mau melo o te piha tamāhine ’aore rā o te pupu autahu’ara’a e aha te aura’a nō rātou ’ia pi’ihia i te i’oa o Iesu Mesia. Pēnei a’e e nehenehe tā rātou e fa’a’ite mai i te mau ’ohipa i tupu nō rātou a ’ite ai te hō’ē ta’ata ē, e melo rātou nō Te ’Ēkālesia a Iesu Mesia i te Feiā Mo’a i te mau Mahana Hope’a nei. E aha tō tātou mana’o ’ia ’itehia ē, e mau pipi tātou nā Iesu Mesia ’e e mau melo nō tāna ’Ēkālesia ? E nehenehe ato’a tā te feiā ’āpī e hi’ohi’o e rave rahi pāpa’ira’a mo’a ’aore rā hō’ē o te mau a’ora’a i roto i te « Pu’e parau ha’amāramaramara’a », ma te ’imi i te mau mana’o e fa’auru ia rātou ’ia ora i te fāito ’o tē i’oa o Iesu Mesia, tā rātou i rave i ni’a iho ia rātou iho. E aha tā te pi’ira’ahia i te i’oa o Iesu Mesia e fa’atupu i ni’a i te mau mā’itira’a tā tātou e rave ?

’Ei melo nō te ’Ēkālesia a te Mesia, e mau pipi tātou nāna ’e ’ua pi’ihia tātou i tōna i’oa.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i tō rātou mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Mataio 5:38–47 ; 6:19–21 ; 7:1–5 ; 25:31–40 ; Luka 10:25–37 ; Ioane 13:34–35 ; 14:15 (Te mau ha’api’ira’a a Iesu Mesia)

• Mataio 4:1–11 ; Mareko 6:35–44 ; Luka 4:16–19 ; 22:39–42 ; 23:33–34 ; Te ’Ohipa 10:38 (hi’ora’a maita’i o Iesu Mesia)

• Ieremia 15:16 ; Mosia 5:7–15 ; Alama 46:12–15 ; 3 Nephi 27:3–8 (Te ravera’a i te i’oa o te Fa’aora i ni’a iho ia tātou)

• Lisa L. Harkness, « Fa’aturara’a i tōna i’oa », Liahona, Novema 2019, 60–62

• Paul B. Pieper, « ’Ia rave tātou pā’āto’a rātou i ni’a iho ia tātou i te i’oa i hōro’ahia mai e te Metua e ti’a ai », Liahona, Novema 2018, 43–45

• ’Ua ha’api’i Elder Robert D. Hales : « E aha te aura’a ’ia riro ’ei pipi nā tō tātou Fatu o Iesu Mesia ? Hō’ē pipi o te hō’ē ïa ta’ata tei bāpetizohia ’e tei hina’aro e rave i ni’a iāna i te i’oa o te Fa’aora ’e ’ia pe’e iāna. E tūtava te hō’ē pipi ’ia riro mai iāna ra te huru nā roto i te ha’apa’ora’a i tāna mau fa’auera’a i te tāhuti nei, mai te au i te hō’ē ta’ata ’imi ’i te rave’a ’ia riro mai tōna ra fatu.

  « E rave rahi ta’ata e fa’aro’o nei i te ta’o pipi ’e tē mana’o nei ē, te aura’a ra, e ’ ta’ata pe’e noa.’ Terā rā, ’ua riro te ti’ara’a pipi mau ’ei huru ta’ata. ’Ua hau atu te reira i te tuatāpapara’a ’e i te fa’a’ohipara’a i te hō’ē tāpura nō te mau huru o te ta’ata hō’ē. E ora te mau pipi ’ia ti’a i te huru o te Mesia ’ia rara’ahia i roto i te uaua o tō rātou tino, mai te au i roto i te hō’ē vavau pae vārua » (« ’Ia riro ’ei pipi nā tō tātou Fatu ’o Iesu Mesia », Liahona, Mē 2017, 46).

Ha’api’ira’a mai tā te Fa’aora

’Ei ’orometua ha’api’i, e nehenehe tā ’oe e fa’aitoito i te mau ’āparaura’a fa’aitoito tei ha’afaufa’ahia e te mau ’ohipa i tupu ’e te ’itera’a pāpū o te mau pīahi.