13 nō ’Ātete

Nāhea Iesu Mesia e tauturu ai iā’u ’ia taui ?

Roma 1–6

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea e ’itehia ai ia tātou te ’oa’oa i roto i te pe’era’a ia Iesu Mesia ?

• Aupuru i te feiā tei hina’aro i te tauturu. ’O vai i roto i tā tātou pāroita ’aore rā ’oire e hina’aro nei i tā tātou tauturu ? Nāhea ia tātou ’ia tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea ia tātou ’ia tauturu i te tahi ’e te tahi ’ia fa’aineine nō te ’ohipa misiōnare ?

• Tāhō’ē i te mau ’utuāfare ē a muri noa atu. Nāhea ia tātou ’ia pāturu i te mau tauto’ora’a a tā tātou pāroita ’ia rave i te ’ohipa o te ’ā’amu ’utuāfare ’e o te hiero ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

« Te ’evanelia ’a Iesu Mesia, e ’evanelia ïa nō te tauira’a ! » ’Ua parau te peresideni Russell M. Nelson (« Te mau fa’aotira’a nō te tau a muri noa atu », Liahona, Novema 2013, 108). ’Ua fa’ata’a ato’a mai te ’āpōsetolo Paulo ē, ’ia bāpetizo-ana’e-hia tātou, e « ha’apa’o tātou i te haere’a e au i te ora ’āpī » (Roma 6:4). Maoti Iesu Mesia, e nehenehe te mau mahana ato’a—’eiaha te mahana noa tātou i bāpetizohia ai—e hōpoi mai i « te ora ’āpī » ’aore rā i te fāna’ora’a ’ia haere ātea atu ā i te hara ’e ’ia fātata atu ā i te Atua. Te aura’a nō te orara’a i te ’evanelia a Iesu Mesia ’o te tātarahapara’a ïa ’e te ha’afātatara’a atu ā i te Atua—ma te tāmau māite, i te tahi taime, ma te haere marū noa—ma te ’ite ē, e arata’i tā tātou mau tauto’ora’a ia tātou i te īra’a o te ’oa’oa.

’A feruri tē nāhea ra te Fa’aora i te taui ia ’oe ’e i te mau ta’ata tā ’oe e ha’api’i nei. Nāhea ’oe i te fāri’i hope atu ā i te mana o te Fa’aora nō te taui ia ’oe ? ’A feruri i te reira ’a tai’o ai ’oe i te Roma 1–6 ’e ’a fa’aineine ai ’oe nō te ha’api’i. E nehenehe ato’a ’oe e hi’o fa’ahou i te a’ora’a a te peresideni Russell M. Nelson « E nehenehe tātou e rave maita’i a’e ’e e ha’amaita’i ia tātou » (Liahona, Mē 2019, 67–69) ’aore rā, te a’ora’a a te tuahine Becky Craven « Tāpe’a noa atu » (Liahona, Novema 2020, 58–60).

Ha’api’i ’āmui

Nō te tahi pae o tātou, e mea fifi ’ia ’ite i te « maita’i ’āpī o te ora » tā te Mesia e pūpū nei (Roma 6:4) nō te mea e tupu marū noa te reira, nō vetahi ’ē rā, e tupu ’oi’oi noa teie tauira’a. E nehenehe ’oe e ani i te mau melo o te piha tamāhine ’aore rā o te pupu autahu’ara’a ’ia fa’a’ite mai e aha te aura’a nō rātou « ’ia haere nā roto i te ora ’āpī » nō rātou. E aha te tahi mau ta’o ’e te tahi mau pereota i roto i te Roma 6 ’o tē fa’ata’a nei i tō tātou orara’a ma te fa’aurura’a ’e ma te fa’aurura’a ’ore a te Fa’aora ? (Mai te mea e hina’aro te feiā ’āpī i te tauturu, e nehenehe rātou e hi’o i roto i te mau ’īrava 6, 11, 22–23.) E aha te tahi atu mau ta’o ’e mau pereota tā tātou e nehenehe e feruri ? E aha te parau a te Fa’aora nō te tauturu ia tātou ’ia taui ? E nehenehe te mau ’ohipara’a mai teie i muri nei e arata’i atu i te hō’ē tāu’ara’a parau hōhonu a’e nō ni’a i teie tumu parau.

• Nō te tauturu i te piha tamāhine ’aore rā i te pupu autahu’ara’a ’ia feruri i te mau tauira’a tā te Fa’aora e nehenehe e tauturu ia rātou ’ia rave, e ani ia rātou ’ia tai’o i te tātarara’a i raro a’e i te« Tātarahapa, Tātarahapara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org). E nehenehe ato’a rātou e ’āparau i te tātarara’a a te peresideni Russell M. Nelson nō ni’a i te tātarahapara’a i roto i nā paratarāfa mātāmua e hitu o tāna a’ora’a « E nehenehe tātou e rave maita’i a’e ’e e ha’amaita’i ia tātou ». E aha te mau parau mau faufa’a rahi tā tātou e ha’api’i mai nei nō ni’a i te tātarahapara’a nā roto mai i teie mau tātarara’a ? E nehenehe ato’a ’oe e hōro’a i te taime i te piha tamāhine ’aore rā i te pupu autahu’ara’a ’ia feruri hōhonu i te tāpura a te peresideni Nelson ’o te mau mea tā Iesu e ani nei ia tātou ’ia taui (i roto i te paratarāfa pae o tāna a’ora’a). E fa’aitoito ia rātou ’ia pāpa’i i te tahi mea ta’a ’ē tā rātou e mana’o ra ē, tē tūra’ihia ra rātou ’ia taui. ’A fa’a’ite i tō ’oe ’itera’a pāpū nō ni’a i te mana o te Fa’aora nō te tauturu ia tātou ’ia tātarahapa ’e i’a taui.

• ’Ua parau te tuahine Becky Craven ē, i te tahi mau taime e parau mai te mau hoa tahito ē, « ’Aita roa atu ’oe i taui ! » E nehenehe tā ’oe e fa’a’ite i te mau mana’o o te tuahine Craven nō ni’a i te reira (hi’o « Tāpe’a noa atu », 59–60). ’A ani i te mau melo o te piha tamāhine ’aore rā o te pupu autahu’ara’a ’ia feruri ē, i roto e pae ’aore rā ’ahuru matahiti, e fārerei rātou i te hō’ē hoa nō te mātāmua ra. E aha te mau tauira’a e ’ite-pāpū-hia e tō tātou mau hoa ? E aha te mau tauira’a tā tātou e ti’aturi nei ? Nāhea te fa’aro’o ia Iesu Mesia i te tauturu ia tātou ’ia taui ? (hi’o Mosia 5:2–5, 7 ; Alama 5:11–13 ; Etera 12:27, ’aore rā te « hōho’a tāmau nō te tauira’a » tā te tuahine Craven i fa’a’ite mai i roto i nā paratarāfa e maha o tāna a’ora’a, ha’amata nā ni’a i te « I tō’u ’āpīra’a »). E nehenehe ’oe e ani i te feiā ’āpī ’ia fa’a’ite mai i te mau ’ohipa i tupu ’a tauturu ai Iesu Mesia ia rātou ’ia taui.

• I te tahi taime e mana’o paha tātou ē, ’ua tītauhia ia tātou ’ia rave i te mau tauira’a ’aore rā te mau ha’amaita’ira’a i roto i tō tātou orara’a nā roto ia tātou iho. E aha te ta’a-’ē-ra’a o te reira i te tātarahapa mau ? Nō te tauturu i tā ’oe piha tamāhine ’aore rā pupu autahu’ara’a ’ia ’āparau i teie uira’a, e nehenehe ’outou e hi’o ’āmui fa’ahou i te mau fa’ahitira’a parau i roto i « Pu’e parau ha’amāramaramara’a ». E aha tā tātou e nehenehe e rave i teienei nō te ’imi i te tauturu ’e te mana o te Fa’aora e ti’a ai i tō tātou mau tauira’a ’ia vai tāmau noa ’e ’ia ’oa’oa ho’i ? E nehenehe te reira e riro ’ei taime maita’i nō te feiā ’āpī ’ia feruri i tā rātou iho mau ōpuara’a nō te fa’ahotura’a. Nāhea e nehenehe ai ia tātou ’ia tu’u i te Fa’aora i roto i tā tātou mau fā ?

E tauturu te fa’aro’o ia Iesu Mesia ia tātou ’ia tātarahapa ’e ’ia riro hau atu mai iāna ra te huru i te mahana tāta’itahi.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• ’Ua ha’api’i mai te peresideni Russell M. Nelson : « E nehenehe tā tātou e taui i tō tātou huru. E nehenehe i tō tātou mau hina’aro iho e taui. Nāhea ? Hō’ē ana’e rave’a e vai nei. E nehenehe te tauira’a mau—te tauira’a tamau—e tae mai nā roto ana’e i te mana fa’aora, te mana tāmā ’e te mana pūai nō te Tāra’ehara a Iesu Mesia. ’Ua here ’oia ia ’outou—ia ’outou tāta’itahi ! Tē fa’ati’a nei ’oia ’ia noa’a mai tōna mana ia ’outou ’ia ha’apa’o ana’e ’outou i tāna mau fa’auera’a, ma te ’ā’au tae, ma te hina’aro mau ’e te pāpū » (« Te mau fa’aotira’a nō te tau a muri atu », 108).

• ’Ua ha’api’i mai Elder Dale G. Renlund : « Te mana e fa’ati’a i te tātarahapara’a, ’o te tusia tāra’ehara ïa a tō tātou Fa’aora. E tiʼa ’ia vai mai i roto i te tātarahaparaʼa mau te faʼaroʼo i te Fatu ra ia Iesu Mesia, te faʼaroʼo e nehenehe tāna e taui ia tātou, te faʼaroʼo e nehenehe tāna e faʼaore i tā tātou mau hara, ʼe te faʼaroʼo e tauturu ʼoia ia tātou ’ia ʼape i te tahi atu ā mau hape. Nā teie huru fa’aro’o e fa’ariro i tāna Tāra’ehara ’ei mea maita’i i roto i tō tātou orara’a. ’Ia…’fariu ana’e tātou’ [tātarahapa] nā roto i te tauturu a te Fa’aora, e nehenehe tātou e ’ite i te tīa’ira’a i roto i tāna mau fafaura’a ’e te ’oa’oa nō te fa’a’orera’a hara. ’Ia ’ore te Fa’aora, e morohi te ti’aturira’a ’e te ’oa’oara’a, ’e e riro noa ïa te tātarahapa ’ei tauira’a noa nō te huru o te ta’ata. Nā roto rā i te fa’a’ohipara’a i te fa’aro’o iāna, e fa’afāriuhia tātou i tōna ’aravihi ’e tōna hina’aro ’ia fa’a’ore i te hara » (Dale G. Renlund, « Te tātarahapa : Hō’ē mā’itira’a ’oa’oa », Liahona, Novema 2016, 122).

Ha’api’i mai tā te Fa’aora

Tē hōro’a mai nei te mau ’ohipara’a i roto i teie arata’i ha’api’ira’a i te mau rāve’a nō te tauturu i tā ’oe piha tamāhine ’aore rā pupu autahu’ara’a ’ia ha’api’i ’āmui mai nō ni’a i te Fa’aora ’e tōna mana nō te tauturu ia tātou ’ia taui. Tē vai ra paha te tahi atu mau arata’ira’a e tano maita’i a’e nō te feiā tā ’oe e ha’api’i ra. E ’imi nā roto i te pure i te arata’ira’a a te Vārua a fa’anaho ai ’oe i te mau rāve’a nō te patu i te fa’aro’o ia Iesu Mesia.