Hiero nō Indianapolis Indiana

27 nō ’Ātete

Nāhea vau e fa’a’ite ai ē, ’ua ’ite au ē, e hōro’a mo’a tō’u tino nō ’ō mai i te Atua ra ?

1 Korinetia 1–7

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau ’ohipa i tupu a’enei tei ha’afātata ia tātou i te Metua i te ao ra ’e ia Iesu Mesia ?

• Aupuru i te feiā tei hina’aro i te tauturu. ’Ua tae ’āpī mai ānei te tahi ta’ata i roto i tā tātou pāroita ’aore rā ’ua tomo ’āpī mai ānei i roto i te ’Ēkālesia ? Nāhea tātou ’ia tauturu ’ia ’ite rātou ē tē fāriʼi-poupou-hia nei rātou ?

• Ani i te mau ta’ata ato’a ’ia fāri’i i te ’evanelia. E aha te mau ’ohipara’a i ’ōpuahia ’o tā tātou e nehenehe e ani manihini i tō tātou mau hoa ’ia haere mai ?

• Tāhō’ē i te mau ’utuāfare ē a muri noa atu. E aha te mau tauto’ora’a e nehenehe e rave, nō te pāpa’i i tō tātou iho mau ’ā’amu ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Nō te mea maita’i ’aore rā nō te mea ino, mai te huru ra ē, e mea ’ite-maita’i-hia te Feiā Mo’a i te mau Mahana Hope’a nei nō te mau mea ’aita tātou e rave nei. E rave rahi ’o terā mau « ’aita » nō ni’a ïa i te huru nō tā tātou ravera’a i tō tātou tino tāhuti. I muri mai i teie mau mā’itira’a tāta’itahi nō ni’a i te ’ohipa e rave ’o te tahi ïa mau parau mau mure ’ore—te mea tā tātou i ’ite. ’Ia arata’i ana’e te mau parau mau mure ’ore i tā tātou mau mā’itira’a, e ’ōhie a’e ïa teie mau mā’itira’a ’ia rave, e mea ’oa’oa a’e ’e e vai-maoro a’e. E tauturu ato’a te mau parau mau mure ’ore ia tātou ’ia fa’ata’a i tā tātou mau mā’itira’a i tō tātou mau hoa. Pēnei a’e ta’a ’ē noa atu te ’itera’ahia tātou nō te mau mea ’aita tātou e rave, e nehenehe tātou e ’ite-maita’i-hia a’e nō te mau mea tā tātou i ’ite.

’A feruri i te mau parau mau mure ’ore tā ’oe i ’ite nō ni’a i tō tātou tino tāhuti—nō te aha tātou i fāri’i ai i te reira, e aha tō te Atua mana’o nō ni’a i te reira, ’e e aha tāna e hina’aro ’ia feruri tātou nō ni’a i te reira. Nāhea te ’itera’a i teie mau parau mau i te ha’amaita’ira’a ia ’oe ’e te fa’aurura’a i tā ’oe mau mā’itira’a ? Nāhea e nehenehe ai i teie ’itera’a ’ia ha’amaita’i i te mau melo o tā ’outou piha tamāhine ’aore rā pupu autahu’ara’a ? ’A feruri ai ’oe i te reira, ’a tai’o i te Genese 1:27 ; 1 Korinetia 6:19–20 ; and President Russell M. Nelson’s article « Your Body: A Magnificent Gift to Cherish » (Liahona, Aug. 2019, 50–55).

Ha’api’i ’āmui

’A tuatāpapa ai te mau melo o tā ’oe piha tamāhine ’aore rā te pupu autahu’ara’a i te mau pāpa’ira’a mo’a i teie hepetoma, e feruri paha rātou i te mau ha’api’ira’a a Paulo nō ni’a i tō tātou tino i roto i te 1 Korinetia 6. Hō’ē rāve’a nō te ani ia rātou ’ia fa’a’ite mai i teie mau mana’o, ’o te hōro’ara’a ïa ia rātou tāta’itahi i te hō’ē tuha’a api parau ’e ’ia ani ia rātou ’ia pāpa’i e toru a’e pāhonora’a i te uira’a « Nāhea tō tātou tino e riro ai mai te hiero ? » Fa’aitoito ia rātou ’ia tai’o i te 1 Korinetia 6:19–20 ’a feruri ai rātou i teie uira’a. I muri iho, e nehenehe rātou e fa’a’ite mai i tā rātou mau pāhonora’a i te tahi ’e te tahi. Nāhea te mau ha’api’ira’a a te Fa’aora nō ni’a i tō tātou tino i te fa’auru i te mau mā’itira’a tā tātou e rave ? Teie te tahi atu ā mau mana’o ’ohipara’a nō ni’a i teie tumu parau ; ’a ma’iti i te reira, ’aore rā ’a fa’anaho i tā ’oe iho.

• Mai te mea e hina’aro ’oe e ’āparau atu ā nō ni’a i te fa’aaura’a a Paulo i rotopū i te tino ’e te hiero, e nehenehe e fa’a’ite i te mau hōho’a nō te mau hiero e rave rahi. E ’itehia ia ’oe te tahi i ni’a i te temples.ChurchofJesusChrist.org. E nehenehe te mau melo nō te piha tamāhine ’aore rā, nō te pupu autahu’ara’a e ’āparau i te mau ta’a-’ē-ra’a tā rātou e ’ite nei i roto i teie mau hiero, ’e te mau mea e tū’ati ra. E nehenehe ato’a rātou e parauparau nō ni’a i te mea tā rātou e fāri’i ’a vai ai rātou i roto i te hiero. E aha te mea e fa’ariro nei i te hiero ’ei vāhi vārua ’e te mo’a ? I muri iho e nehenehe ’oe e fa’aitoito i te piha tamāhine ’aore rā i te pupu autahu’ara’a ’ia fa’aau i te mau mea tā rātou i ’āparau nō ni’a i te hiero i tō tātou tino. Nāhea te mau ha’api’ira’a nō ni’a i te mau hiero i roto i te Te Ha’api’ira’a Tumu ’e te mau Fafaura’a 97:15–16 ; 109:8, 12 e tū’ati ai i tō tātou tino tāhuti ?

• ’Ua fāri’i a’e nei paha tā ’oe mau piha tamāhine ’aore rā pupu autahu’ara’a—’aore rā e fāri’i paha rātou—i te mau rāve’a nō te fa’ata’a ē, nō te aha rātou e pe’e ai i te mau ha’api’ira’a a te Fa’aora nō ni’a i te aupurura’a i tō rātou tino. E nehenehe ’oe e ani i te tahi o rātou e aha tā rātou e parau, mai te mea ē, ’ei hi’ora’a, e ui mai te hō’ē ta’ata ia rātou nō te aha ’aita rātou e inu i te ava, te tī, ’aore rā te taofe, ’aore rā, nō te aha ’aita rātou e ō’omo i te tahi mau huru ahu. E aha te tahi mau parau mau nō roto mai i te ’evanelia a Iesu Mesia ’o tē arata’i ia tātou i roto i tā tātou huru ravera’a i tō tātou tino ? E nehenehe te mau melo nō te piha tamāhine ’aore rā nō te pupu autahu’ara’a e ’imi i te tahi ’o teie mau parau mau i raro a’e i « Pu’e parau ha’amāramaramara’a ».

• Nō te tauturu i te feiā tā ’oe e ha’api’i nei ’ia fa’ahōhonu i tō rātou fa’aturara’a i tō tātou tino semeio, e nehenehe ’oe e fa’a’ite i te video « Te hāmanira’a rahi roa a’e a te Atua » (hi’o ato’a Russell M. Nelson, « Your Body: A Magnificent Gift to Cherish », 50–55). Mai te aha te huru tā te Metua i te ao ra ’e ’o Iesu Mesia e hina’aro nei ’ia fāri’i tātou i tō tātou tino ? E nehenehe ato’a ’oe e ’āparau i te mau rāve’a tā Sātane e tāmata nei i te tāparu ia tātou ’ia ha’afaufa’a ’ore ’aore rā ’ia riri roa i tō tātou tino. E aha tā tātou e nehenehe e rave nō te upo’oti’a i ni’a i tāna mau ha’avare ’e mau fa’ahemara’a ? E aha te mau parau mau e tauturu ia tātou ? E riro te tahi o te mau rāve’a tauturu i raro a’e i « Pu’e parau ha’amāramaramara’a » ’ei mea faufa’a.

E mau hōro’a tō tātou tino nō ’ō mai i te Atua ra, ’e e tauturu te mau parau mau o te ’evanelia ia tātou ’ia ’atu’atu i te reira.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Genese 1:27 ; 1 Korinetia 6:19–20 ; Alama 11:42–44 ; 40:23 ; Te Ha’api’ira’a Tumu ’e te mau Fafaura’a 89 ; 130:22

• « Te ’Utuāfare : E Poro’i i tō te Ao nei », nā paratarāfa mātāmua iho ā rā e toru

• « Je demeure dans un temple », Chants pour les enfants, 73

• Te mau parau pāpa’i nō ni’a i tō tātou tino tāhuti i roto i te New Era nō ’Ātete 2019 ’aore rā Liahona

• ’Ua ha’api’i mai te peresideni Russell M. Nelson : « ’A hōro’a mai ai ’oia ia tātou i te hōro’a o te hō’ē tino, ’ua fa’ati’a te Atua ia tātou ’ia haere rahi atu ā i mua nō te rirora’a mai iāna te huru. ’Ua ta’a ia Sātane te reira… Nō reira e rave rahi,’o te rahira’a paha ’o te mau umera’a ’ia hara, tāna e tu’u nei i ni’a i tō tātou ’ē’a, nō te hāmani ’ino ïa i tō tātou nei tino ’aore rā tō vetahi ’ē tino… Tō ’outou tino tō ’outou iho ïa hiero, tei hāmanihia ’ei fare nō tō ’outou vārua mure ’ore [’a hi’o 1 Korinetia 3:16–17 ; 6:18–20]. E mea faufa’a rahi ’ia ha’apa’o māite ’outou i te reira hiero. I teienei, tē ui nei au ia ’outou […] tē ’ana’anatae rahi ra ānei ’outou i te fa’a’ahura’a ’e te fa’anehenehera’a ia ’outou ’ia hi’o mai tō te ao ’ia ’outou, ’aore rā ’ia rahi atu ā tō te Atua aura’a mai ? Tā ’oe pāhonora’a i teie uira’a, e poro’i ïa e tae ’āfaro iāna nō ni’a i tō ’oe mau mana’o i tāna tao’a hōro’a hau a’e nō ’outou » (« E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 68).

• Ua ha’api’i mai ’o Elder D. Todd Christofferson ē : « Te feiā ’o te ti’aturi nei ē, e mea tupu noa mai tō tātou mau tino ’aita ïa tō rātou mana’o ti’a’aura’a i mua i te Atua ’aore rā i mua i te tahi ’ē atu ta’ata nō te mea tā rātou e rave i tō rātou ra tino. ’O tātou ’o tei ’ite i te fa’anahora’a mau nō te orara’a mātāmua, te orara’a tāhuti nei ’e te orara’a amuri atu, nō reira e ti’a ia tātou ’ia ’ite ē, e hōpoi’a tā tātou i te Atua nō te tao’a hope’a nō te mau mea tāna i hāmani i te tino nei [ …] Nō te mea e mauha’a tō tātou tino nō tō tātou vārua, e mea faufa’a rahi ’e ’ia ’atu’atu tātou i te reira mai tei mara’a ia tātou. E ti’a ia tātou ’ia ha’amo’a i tōna mau pūai i te tāvinira’a ’e te fa’ahaerera’a i mua i te ’ohipa a te Mesia » (« Te mau māna’ona’ora’a i te hō’ē orara’a ha’amo’ahia », Liahona, Novema 2010, 17).

Ha’api’ira’a mai tā te Fa’aora

’A ha’apa’o maita’i i te feiā i roto i tā ’oe piha tamāhine ’aore rā pupu autahu’ara’a e fifi huma tō rātou ’aore rā, te tahi atu mau tāmatara’a pae tino. E tauturu ia rātou ’ia hāro’aro’a ē, e mea faufa’a rahi te tino o te mau ta’ata ato’a ’e e mea tītauhia ’ia fa’atura. E nehenehe te here mai tō te Mesia tā ’oe e fa’a’ite i te mau ta’ata ato’a e fa’atupu i te hō’ē fa’aurura’a pūai i ni’a i te huru o te mau melo o te piha tamāhine ’aore rā te pupu autahu’ara’a ’ia hi’o i te tahi ’e te tahi ’e ia rātou iho.