mau vahine e hahaere ra

10 nō Tetepa

Nāhea vau e nehenehe e ’ite i te tāmāhanahanara’a i roto ia Iesu Mesia ’a pohe ai te hō’ē ta’ata herehia ?

1 Korinetia 14–16

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea te fāriura’a i ni’a i te Fatu e tauturu ai ia tātou ’ia fa’aruru i te mau tītaura’a ’e te mau tāmatara’a ?

• Aupuru i te feiā tei hina’aro i te tauturu. ’O vai tā tātou i ’ite tei hina’aro i tā tātou mau pure ’e tō tātou auhoara’a ?

• Ani i te mau ta’ata ato’a ’ia fāri’i i te ’evanelia. E aha te mau fa’anahora’a nō te fa’a’ite i te ’evanelia i tuatāpapahia i roto i te mau rurura’a ’āpo’ora’a feiā ’āpī pāroita ? Nāhea e nehenehe ai i tā tātou piha tamāhine ’aore rā pupu autahu’ara’a ’ia fa’aō i roto i te reira ?

• Tāhō’ē i te mau ’utuāfare ē a muri noa atu. Nāhea te ravera’a i te ’ohipa ’ā’amu ʼutuāfare i te ha’apūai i tō tātou aura’a ’e te Metua i te ao ra ’e ia Iesu ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

’Ia pohe ana’e te hō’ē ta’ata, e nehenehe te reira e riro ’ei ’ohipa pe’ape’a mau. E afa’i mai te ta’a-’ē-ra’a i tei herehia e tātou i te ’oto ’e te māuiui rahi. Terā rā, ’ua ha’api’i Paulo ē, i te hope’a, « ’ua horomi’ihia te pohe i te rē i riro ra » (1 Korinetia 15:54) maoti te ti’afa’ahoura’a o Iesu Mesia. ’Oia ho’i, te « tara o te pohe »—te mauiui ’e te ti’aturira’a ’ore tā tātou e fāri’i i te tāhuti nei—« ’ua horomi’ihia ïa i roto i te Mesia » (Mosia 16:7–8 ; ’a hi’o ato’a 1 Korinetia 15:54–57).

I te tahi taime, e ’ite te mau ta’ata ato’a i te pohe o te hō’ē ta’ata herehia. Nāhea ’oe i te tauturu i te feiā tā ’oe e ha’api’i ra ’ia ’ite i te tāmāhanahanara’a i roto i taua mau taime fifi ra nā roto i tō rātou fa’aro’o ia Iesu Mesia ? ’A feruri i teie uira’a ’a fa’aineine ai ’oe nō te ha’api’i nā roto i te tai’ora’a i te 1 Korinetia 15, Mosia 16:7–9, ’e Te Ha’api’ira’a Tumu ’e te mau Fafaura’a 42:44–46.

Ha’api’i ’āmui

E nehenehe ’oe e ani i te mau melo o te piha tamāhine ’aore rā o te pupu autahu’ara’a ’ia fa’a’ite mai i te taime ’a fāri’i ai rātou i te hō’ē mea e puta ra. I muri iho e nehenehe ’oe e ui, i tō rātou mana’o, nō te aha Paulo i fa’a’ohipa ai i te ta’o « tāra » nō te fa’ata’a i te pohe (hi’o 1 Korinetia 15:54–56). Hōro’a ia rātou te tahi nau minuti nō te tai’o fa’ahou i te 1 Korinetia 15 ’e ’ia fa’a’ite mai i te mau parau mau tei ’itehia ia rātou nāhea ’ia upo’oti’a i ni’a i te tara o te pohe. I muri iho, ’a feruri i te mau ’ohipara’a mai teie i raro nei nō te tauturu i te feiā ’āpī ’ia māramarama maita’i a’e nāhea e nehenehe ai i te Fa’aora ’ia tāmāhanahana ia tātou ’ia pohe ana’e te hō’ē ta’ata tā tātou e ha’apa’o nei.

• E nehenehe ’oe e vāhi i te mau melo o te piha tamāhine ’aore rā, o te pupu autahu’ara’a ’ei pupu piti ta’ata, ’e e ani i te pupu tāta’itahi ’ia hi’o ’āmui fa’ahou i te tahi mau ’īrava pāpa’ira’a mo’a i roto i te « Pue parau ha’amāramaramara’a ». E nehenehe rātou e pāpa’i i te mau pāhonora’a i te hō’ē uira’a mai teie « E aha te mau parau mau faufa’a rahi tā’u e ti’aturi nei e ha’amana’o ’ia mo’e ana’e te hō’ē ta’ata herehia ? » E ani ia rātou ’ia tu’u i te mau ha’amāramaramara’a nō roto mai i te mau īrava pāpa’ira’a mo’a i roto i tā rātou pāhonora’a. I muri iho e ani ia rātou ’ia fa’a’ite mai i te piha tamāhine i te mau parau mau faufa’a roa a’e nō rātou ’e nō te aha.

• E nehenehe e hi’o ’āmui i te hō’ē ’ā’amu nō roto mai i te hō’ē a’ora’a o te ’āmuira’a rahi e fa’a’ite ra nāhea te hō’ē ta’ata i te ’itera’a i te tīa’ira’a i roto ia Iesu Mesia ’a pohe ai te hō’ē ta’ata tei herehia e rātou. Te vai ra te mau hi’ora’a, i roto i te a’ora’a a te tuahine Reyna I. Aburto « ’Ua ’ere te pohe i tōna rē » (Liahona, Mē 2021, 85–86) ’aore rā, te a’ora’a a Elder S. Mark Palmer « E riro mai tō tātou ’oto ’ei ’oa’oa » (Liahona, Mē 2021, 88–89). E fa’auruhia paha ’oe ’ia fa’a’ite i tō ’oe iho ’itera’a ’aore rā ’ia ani i te feiā ’āpī ’ia fa’a’ite mai e mea nāhea tō rātou ’itera’a i te tāmāhanahanara’a e te tīa’ira’a i roto ia Iesu Mesia i muri a’e i te pohera’a te hō’ē ta’ata herehia.

• I muri a’e i te ferurira’a i te mau hina’aro o te mau melo o tā ’oe piha tamāhine ’e ’aore rā, o te pupu autahu’ara’a, ’a fa’a’ite i te hō’ē ’aore rā hau atu o te mau video i roto i « Pu’e parau ha’amāramaramara’a ». E ani i te feiā ’āpī ’ia fa’a’ite mai i tō rātou mau mana’o. E aha tā te ’itera’a ē, ’ua ti’afa’ahou mai Iesu Mesia, e fa’atupu i roto ia tātou i te huru nō tō tātou hi’ora’a i te pohe ? ’A ani i te mau melo o te piha tamāhine ’aore rā, o te pupu autahu’ara’a, ’ia fa’a’ite mai i tō rātou ’itera’a pāpū nō ni’a i te Fa’aora ’e tōna ti’afa’ahoura’a ’e nāhea teie ’ite i te ’āfa’i mai i te tīa’ira’a ia rātou.

• Tē fa’a’ite nei Ioane 11 i te ’ohipa i tupu i ni’a i te Fa’aora i te pohera’a te hō’ē tei herehia—tōna hoa ’o Lazaro. Pēnei a’e e nehenehe te piha tamāhine ’aore rā te pupu autahu’ara’a e tai’o ’āmui i te mau ’īrava1–45 ’e ’ia tai’o ana’e rātou, e nehenehe rātou e fa’a’ite mai i te mau mea tā rātou i ’apo mai nā roto mai i te hi’ora’a o te Fa’aora. E aha tā tātou e nehenehe e ’apo mai i roto i teie ’ā’amu ’o tē nehenehe e hōro’a ia tātou i te tāmāhanahanara’a ’ia pohe ana’e te hō’ē ta’ata tei herehia e tātou ? Nāhea e ti’a ai ia tātou ’ia pe’e i te hi’ora’a o te Fa’aora « ’ia ’oto ’a ’oto ai te feiā ’oto ra ; ’oia ïa, ’e ’ia tāmāhanahana ia rātou ’o tē au ’ia tāmāhanahanahia » ? (Mosia 18:9). E aha tā tātou i ha’api’i mai nā roto mai i Te Ha’api’ira’a Tumu ’e te mau Fafaura’a 42:45–46 ’o tē nehenehe e tauturu ia tātou ’ia rave i te reira ? E hina’aro paha ’oe e fa’a’ite i te video « Hō’ē-hō’ē (Aupuru ma te here) » (ChurchofJesusChrist.org).

Feiā ’āpī tamāroa e pure ra

E hōro’a mai tō tātou ’itera’a pāpū nō te ti’afa’ahoura’a o Iesu Mesia ia tātou i te ti’aturira’a a pohe ai te hō’ē ta’ata herehia.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Isaia 25:8 ; 1 Korinetia 15:20–22 ; Mosia 16:7–9 ; Alama 7:11–12 ; 11:42–44 ; 22:14 ; 28:12–14 ; 40:11–12

• Dallin H. Oaks, « E aha tā tō tātou Fa’aora i rave nō tātou ? », Liahona, Mē 2021, 75–77

• Moisés Villanueva, « Fa’ahereherehia e te Fatu i tō’u mau mahana », Liahona, Novema 2021, 44–46

• Mau video : « Fa’arurura’a i te pohe : E tae mai te sābati », « Te ’itera’a i te tīa’ira’a nā roto i te ti’afa’ahoura’a o te Mesia », « E hōro’a mai ’oia i te tauturu ia ’outou », « E tae noa atu i te taime e fārerei fa’ahou ai tātou » (ChurchofJesusChrist.org)

Ha’api’ira’a mai tā te Fa’aora

Te ha’api’ira’a, ’o te utuutura’a ïa ma te here, ’e te tauturura’a ia vetahi ’ē ’ia fāri’i i te mau ha’amaita’ira’a o te ’evanelia, ’e teie mau te tauturu tā te hō’ē melo paruparu o te piha tamāhine e hina’aro nei. Tītauhia ’ia ha’a ’āmui tātou pā’āto’a nō te toro i te rima i te feiā e fifi nei, ’e ’ei ’orometua ha’api’i, tei roto paha ’oe i te ti’ara’a hō’ē roa nō te tauturu.