mau vahine e tauahi ra

24 nō Tetepa

Nāhea vau e nehenehe ai e pe’e i te hi’ora’a o te Fa’aora i roto i te tauturura’a i te feiā nava’i ore ?

2 Korinetia 8–13

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha tā tātou i ’āparau i te taime i ma’iri a’e nei, ’e e aha te mau anira’a ’aore rā te mau fa’auera’a ’ohipa i ravehia ? E aha tā tātou i rave nō te ’ohipa i ni’a i teie mau anira’a ’aore rā mau fa’auera’a ?

• Aupuru i te feiā tei hina’aro i te tauturu. E aha tā tātou e nehenehe e rave ’aore rā, e parau nō te toro atu i te rima i te feiā e mana’o mo’emo’e ’e te ātea i te Metua i te ao ra ?

• Ani i te mau ta’ata ato’a ’ia fāri’i i te ’evanelia. E aha te tahi mau rāve’a e nehenehe ai tātou e tauturu ia vetahi ’ē ’ia ’ite i te here o Iesu Mesia ?

• Tāhō’ē i te mau ’utuāfare ē a muri noa atu. E aha te mau manaʼo tā tātou e faʼaʼite i te tahi ʼe te tahi e ha’apūai ai i tō tātou mau ’utuāfare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

E aha te mau rāve’a tā ’oe ’e te mau melo nō tā ’oe piha tamāhine ’aore rā pupu autahu’ara’a nō te tāvini i te feiā nava’i ’ore ’ati a’e ia ’oe ? I te hō’ē tau ’a mauiui ai ’e ’a hina’aro ai te Feiā Mo’a i Ierusalema i te tauturu, ’ua papa’i Paulo i to Korinetia no te fa’aitoito ia rātou ’ia hōro’a hua noa mai ma te ’ā’au hōro’a, « ’eiaha ma te nounou ’ore, ’e te hina’aro ho’i : ’o te ta’ata hōro’a noa ho’i ta te Atua e hina’aro ». ’Ua fafau ’oia ē, mai te mea ē, e nā reira rātou, « e fa’atupu ’oia i te aroha mau i ni’a ia [rātou] » ’ia ti’a ia rātou ’ia « rahi roa i te mau ohipa maitata’i ato’a ra » (2 Korinetia 9:7–8).

’Ua fa’atoro Paulo i ni’a i te hi’ora’a o Iesu Mesia, tei « tao’a rahi ho’i ’oia, nō tō ’outou maita’i rā, ’ua veve ’oia, ’ia tao’a rahi ho’i ’outou i tōna veve » (2 Korinetia 8:9). Ua fa’atusia te Fa’aora ma te hina’aro mau i te mau tao’a rahi o te ra’i ’ia ti’a iāna ’ia tāvini ia tātou ’e ’ia fa’ariro ia tātou ’ei tao’a rahi ē a muri noa atu. ’A feruri i te mau hi’ora’a nō roto mai i tōna orara’a a toro ai oia i te rima nō te tāvini i te feiā ati a’e iāna. Ta’a ē noa atu i te tai’ora’a i te 2 Korinetia 8–9 ’a fa’aineine ai ’oe nō te ha’api’i, ’a ōpua i te tai’o i te a’ora’a a te tuahine Michelle D. Craig « E mata nō te hi’o » (Liahona, Novema 2020, 15–17).

Ha’api’i ’āmui

Nō te ha’amata i tā ’outou tāu’ara’a parau, ’a ani i te piha tamāhine ’aore rā i te pupu autahu’ara’a ’ia hāmani i te hō’ē tāpura nō te tahi o te mau tumu e ’ore ai te hō’ē ta’ata e tāvini ia vetahi ’ē i roto i te nava’i ’ore. E aha tā tātou e ha’api’i mai nei nā roto mai i te mau ha’api’ira’a a Paulo i roto i te 2 Korinetia 8:9 ; 9:7–8 ’o tē fa’auru ia tātou ’ia rave hau atu nō te tāvini i te feiā nava’i ’ore ? E nehenehe te mau ’ohipara’a i muri nei e tauturu i te feiā tā ’oe e ha’api’i nei ’ia hāro’aro’a maita’i a’e nāhea ’ia tauturu i te aupurura’a i te feiā ’āti a’e ia rātou.

• E rave rahi taime i roto i te mau pāpa’ira’a mo’a, ’ua ha’api’i te Fatu e aha tōna mana’o nō ni’a i te aupurura’a i te feiā veve ’e te nava’i ’ore. Te vai ra te tahi mau hi’ora’a i roto i te « Pu’e parau ha’amāramaramara’a ». Hō’ē rāve’a nō te hi’o fa’ahou i teie mau ha’api’ira’a, ’o te vāhira’a ïa i tā ’oe piha tamāhine ’aore rā pupu autahu’ara’a ’ei pupu e piti ta’ata ’e ’ia ani i te pupu tāta’itahi ’ia tuatāpapa i te tahi o te mau pāpa’ira’a mo’a. E ani ia rātou ’ia ’āparau e aha tā te mau ’īrava e ha’api’i nei nō ni’a i te aupurura’a i te feiā veve ’e te nava’i ’ore. Nō te aha e mea faufa’a rahi te ’atu’atura’a i te feiā veve ’e tei nava’i ’ore nō te Metua i te ao ra ’e nō Iesu Mesia ? E ani i te feiā ’āpī ’ia fa’anaho i te mau rāve’a e nehenehe ai rātou tāta’itahi e tauturu i te feiā nava’i ’ore.

• I te tahi taime, e pau noa tō tātou taime i roto i tō tātou iho mau māna’ona’ora’a, ’aita atu ra tātou e ’ite i te mau hina’aro o te ta’ata ’ati a’e ia tātou. I roto i tāna a’ora’a « Te mata nō te hi’o », ’ua hi’o fa’ahou te tuahine Michelle D. Craig i te ’ā’amu o te Atua i te ’īritira’a i te mata o te hō’ē taure’are’a tamāroa (hi’o 2 Te mau Ari’i 6:15–17). E aha tā tātou e ’apo mai i roto i teie ’ā’amu ? E aha tā tātou e nehenehe e ha’api’i mai nā roto mai i te tahi atu mau ’ā’amu tāna i fa’a’ite mai nō ni’a i te ’itera’a i te mau hina’aro o vetahi ’ē ’e te torora’a i te rima ia rātou ? (’a hi’o ato’a i te video « E pure nō te mata nō te hi’o mai tāna e hi’o ra » i ni’a i te ChurchofJesusChrist.org). E nehenehe ato’a te mau melo o te piha tamāhine ’aore rā o te pupu autahu’ara’a e fa’a’ite mai i te mau ’itera’a ’a ’ite ai te hō’ē ta’ata i tō rātou mau hina’aro e ’a aupuru ai ia rātou. I nāfea tō tātou ’itera’a i te mau hina’aro o vetahi ’ē ’e i te aupurura’a ia rātou ? E aha tō tātou huru ’ia fāri’i ana’e ’aore rā ’ia hōro’a ana’e tātou i taua huru aupurura’a ra ?

• ’Ua māramarama ānei te mau melo nō te piha tamāhine ’aore rā, o te pupu autahu’ara’a nāhea ’ia rave fa’aoti i tā rātou hōpoi’a nō te tauturu i te aupurura’a i te feiā nava’i ore ? ’A feruri i te ’āparau ’āmui i te Mosia 4:16–21 ’e te 18:8–10, ’oia ato’a te mau tuha’a faufa’a o te Buka arata’i rahi (10.2.2 nō te mau pupu Autahu’ara’a a Aarona ’aore rā 11.2.2 nō te feiā ’āpī tamāhine). E aha tē muhumuhuhia mai ia tātou ’ia rave i muri a’e i tō tātou tuatāpapara’a i teie mau rāve’a tauturu ? ’A feruri i te fa’anaho i te mau rāve’a nō te rave ’āmui i te ’ohipa nō te toro i te rima i te feiā nava’i ore i roto i tā ’oe piha tamāhine ’aore rā pupu autahu’ara’a, i te pāroita ’aore rā te ’oire. E hōro’a mai te mau video i roto i te « Pu’e parau ha’amāramaramara’a » i te tahi mau manaʼo. Nō te mau rāve’a tāvinira’a i tō ’oe fenua,’a hi’o JustServe.org.

feiā ’āpī tamāhine e ’āmui ra i roto i te hō’ē ’ohipa tauturu

E nehenehe tā tātou tāvinira’a mai tā te Mesia e ha’amaita’i i te orara’a o te feiā ’ati a’e ia tātou.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Mataio 25:31–45 ; Iakobo 1:27 ; Mosia 2:17 ; Alama 34:27–28 ; Moromona 8:35–39 ; Te Ha’api’ira’a Tumu ’e te mau Fafaura’a 104:14–18 (Te faufa’a rahi nō te aupurura’a i te feiā veve ’e tei nava’i ’ore)

• Jeffrey R. Holland, « E ’ere ānei tātou pā’āto’a e mau ta’ata tao’a ’ore ra ? », Liahona, Novema 2014, 44–47

• « Te ’ā’amu o Michelle », « Aupuru i te feiā veve e tei nava’i ore », « E ta’ata ē au : ’A here ’outou ia ’outou iho », « Te mau ō ha’apaera’a mā’a : E ’ere ānei tātou pā’āto’a e mau ta’ata tao’a ’ore ra » (videos), ChurchofJesusChrist.org

Ha’api’ira’a mai tā te Fa’aora

Te mau pāpa’ira’a mo’a ’e te mau parau a te mau peropheta ’e te mau ’āpōsetolo o teie mau mahana hope’a nei, ’o te puna ïa nō te mau parau mau tā tātou e ha’api’i nei. ’A fa’auru i te mau taime ato’a i te feiā tā ’oe e ha’api’i nei ’ia fāriu atu i ni’a i te parau a te Atua nō te arata’ira’a, nō te mau pāhonora’a i te mau uira’a, ’e nō te tauturura’a.