8 nō ’Ātopa

Nāhea te ’evanelia a Iesu Mesia e nehenehe ai e tauturu iā’u ’ia ha’apūai i tō’u ’utuāfare ?

Ephesia

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, ta’a ’ē atu te ’āparaura’a nō ni’a i te ’ohipa ta’a ’ē a te piha tamāhine ’aore rā, a te pupu autahu’ara’a, e hina’aro paha ’oe e ’āparau i te mau mana’o tei tae mai, ’e te mau tumu parau nō roto mai i te ’āmuira’a rahi. E tauturu te mau uira’a i muri nei.

• E aha te mau parau tumu ’aore rā te mau parau poro’i tei ha’aputapū ia tātou ? E aha tei ha’apūai i tō tātou fa’aro’o ia Iesu Mesia ?

• E aha tei ha’apūai i tō tātou ’itera’a pāpū nō te mau peropheta ora ? E aha tei fa’auruhia ia tātou ’ia rave nō te mau mea tā tātou i ha’api’i mai ’aore rā i ha’aputapū ia tātou ?

• E aha tē ti’a ia tātou ’ia rave ’ei piha tamāhine ’aore rā ’ei pupu autahu’ara’a nō te ha’amana’o ’e nō te fa’a’ohipa i te a’ora’a tā tātou i fa’aro’o i roto i te ’āmuira’a rahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Tē vai ra paha te tahi mau ta’ata i roto i tā ’oe piha tamāhine ’aore rā pupu autahu’ara’a e mau ’utuāfare pūai ’e te here tō rātou ’o tē fa’a’amu nei i te fa’aro’o ’e te vārua. E nehenehe vetahi ’ē e vai ’ōtahi noa i roto i tā rātou mau tauto’ora’a ’ia ora i te ’evanelia, ’e e nehenehe te tahi pae e fa’aruru i te mārōra’a ’e te māuiui o te ’ā’au i te fare. ’Aita rā hō’ē ta’ata i roto i tā ’oe piha tamāhine ’aore rā pupu autahu’ara’a, e ’utuāfare maita’i roa tōna, ’aita e fifi. ’E e roa’a i te mau ta’ata ato’a te mana o Iesu Mesia, ’o tē nehenehe e fa’aora ’e e ha’apūai i te mau ’utuāfare.

Tē hina’aro nei te Fa’aora ’ia ha’amaita’i i te mau ’utuāfare. I te tahi taime, te huru ’oia e rave ai i te reira, e mea nā roto ïa i te here ’e te hi’ora’a o te hō’ē taure’are’a tamāroa e tūtava nei i te pe’e iāna ’e i te ora i tāna ’evanelia. ’A fa’aineine ai ’oe nō te ha’api’i i te feiā ’āpī nō ni’a i te mana e roa’a ia rātou ’e tō rātou ’utuāfare nā roto ia Iesu Mesia, ’a feruri i te mau parau tumu i roto i te Ephesia ’o tē nehenehe e tauturu ia tātou ’ia ha’apūai i te mau aura’a ’utuāfare. E nehenehe ato’a ’oe e tuatāpapa i « Te ’Utuāfare : E Poro’i i tō te ao nei » (ChurchofJesusChrist.org).

Ha’api’i ’āmui

I muri a’e i te hōro’ara’a i te mau melo o te piha tamāhine ’aore rā o te pupu autahu’ara’a, i te hō’ē taime nō te fa’a’ite mai e aha tā te Vārua i ha’api’i ia rātou i teie hepetoma ’a tuatāpapa ai rātou i te Ephesia, ’a ’imi i te mau rāve’a nō te fa’a’ite mai i te tumu parau e nāhea Iesu Mesia i te tauturu ia tātou ’ia ha’apūai i tō tātou ’utuāfare. ’Ei hi’ora’a, e nehenehe ’oe e ani i te feiā ’āpī ’ia ’imi ’e ’ia fa’a’ite mai i te mau ’īrava i roto i te Ephesia tei roto te mau parau tumu e nehenehe tātou e fa’a’ohipa nō te ha’apūai i te mau aura’a ’utuāfare. Teie te tahi mau hi’ora’a Ephesia 2:19–22 ; 3:14–19 ; 4:1–3, 25–26, 29–32 ; 5:1–2 ; 6:1–4. Nāhea te parau a’o i roto i teie mau ’īrava i te ha’amaita’i i te hō’ē ’utuāfare ? Nāhea te Fa’aora ’e tāna ’evanelia i riro ai ’ei ha’amaita’ira’a i roto i tō tātou ’utuāfare ? Teie te tahi atu ā mau mana’o ’ohipara’a e tū’ati i teie tumu parau.

• Mai te mea e hina’aro ’oe e ’āparau i te fa’auera’a ’ia « fa’atura i tō metua tāne ’e tō metua vahine » (Ephesia 6:2), e nehenehe ’oe e ha’amata nā roto i te anira’a i te mau melo o te piha tamāhine ’aore rā pupu autahu’ara’a, e aha te aura’a te ta’o fa’atura nō rātou. Pēnei a’e e nehenehe te hō’ē ta’ata e fa’a’ite mai i te tātarara’a nō roto mai i te fa’atoro parau ’aore rā te Arata’i nō te mau pāpa’ira’a mo’a (scriptures.ChurchofJesusChrist.org). E ani i te feiā ’āpī ’ia parauparau mai e nāhea rātou i te fa’a’ohipa i teie fa’auera’a i roto i tō rātou iho orara’a. E riro ato’a ’ei mea fa’auru ’ia tuatāpapa nāhea Iesu Mesia i te fa’aturara’a i tōna Metua i te ao ra ’e i tōna metua vahine, ’o Maria (hi’o, ’ei hi’ora’a, Luka 2:41–52 ; ’Īritira’a a Iosepha Semita, Ioane 2:4 [i roto Ioane 2:4, nota i raro i te ’api a] ; Ioane 8:29 ; 19:25–27). E aha tā tātou e nehenehe e ’apo mai i roto i te hi’ora’a o Iesu ’o tē nehenehe e ha’apūai i tō tātou mau aura’a e tō tātou mau metua ?

• E nehenehe e riro ’ei tauturura’a ’ia parauparau nō ni’a i te mau mātēria e hina’arohia nō te patu i te hō’ē fare pa’ari. E aha te tahi mau mea e tītauhia nō te patu i te hō’ē ’utuāfare pūai ? ’Ei tuha’a nō teie ’āparaura’a, e nehenehe ’oe e fa’a’ite i teie fa’ahitira’a parau a Elder L. Whitney Clayton : « Te mea faufa’a a’e ’o te fa’anahora’a roto ïa o te mau vārua o te mau ta’ata i roto, ’eiaha tōna iho huru hāmanira’a » (« Te mau fare maita’i a’e », Liahona, Mē 2020, 107–9). E nehenehe ato’a ’oe e ’āparau i nā mana’o e maha tā Elder Clayton i hōro’a i roto i tāna a’ora’a e nāhea ’ia patu i « te mau fare maita’i a’e ».

• Teie te parau fafau e vai ra i roto i « Te ’Utuāfare : E Poro’i i tō te Ao Nei » « E mea pāpū a’e te ’oa’oa i roto i te orara’a ’utuāfare i te roa’a, mai te mea ē, ’ua fa’atumuhia te reira i ni’a i te mau ha’api’ira’a a te Fatu ra o Iesu Mesia ». Nāhea te mau ha’api’ira’a a te Fa’aora i te fa’atupu i te niu nō te hō’ē ’utuāfare ’oa’oa ? Tē hōro’a nei te poro’i nō ni’a i te ’utuāfare ’e te mau pāpa’ira’a mo’a i raro a’e i te « Pu’e parau ha’amāramaramara’a » i te mau hi’ora’a. Nāhea te mau melo o te ’utuāfare e nehenehe ai e tauturu i te tahi ’e te tahi ’ia ora i teie mau ha’api’ira’a ?

• Pēnei a’e e nehenehe te melo o te piha tamāhine e māta’ita’i i te video « Nā roto i te mau mea iti », i reira e toru taea’e e mau tuahine e parauparau ai nō ni’a i te fāri’ira’a i te anira’a a tō rātou episekōpo ’ia feruri i te mau rāve’a nō te fa’ariro i tō rātou fare ’ei vāhi mo’a a’e. Nāhea te ’utuāfare i roto i te video i ha’amaita’ihia ai maoti te mau ’ohipa a teie feiā ’āpī ? E aha tē nehenehe e fa’ariro i te hō’ē fare ’ei vāhi mo’a ? ’A feruri ’ia ani i te feiā ’āpī ’ia fāri’i i te reira ato’a anira’a tā te ’episekōpo e hōro’a mai. Nō te tauturu ia rātou ’ia feruri e aha tā rātou e nehenehe e rave, e nehenehe ’outou e ’āparau i te uira’a i uihia i roto i te video : « E aha tā ’outou e hina’aro e rave nō te fāri’i i te Vārua i roto i tō ’outou ’utuāfare ? »

’Ua riro te mau ha’api’ira’a a Iesu Mesia ’ei niu nō te ’oa’oa i roto i te orara’a ’utuāfare.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Mataio 5:21–24, 38–42 ; 6:14 ; 7:1–5 ; 22:36–39 ; 3 Nephi 18:21 ; Moroni 7:33 ; Te Ha’api’ira’a Tumu ’e te mau Fafaura’a 18:10–13

• Henry B. Eyring, « Hō’ē fare i reira e pārahi ai te Vārua o te Fatu », Liahona, Mē 2019, 22–25

• « Nō te aroha », « E riro te ’utuāfare nei mai te ao ra », Te mau hīmene, N° 179, 181

Ha’api’ira’a mai tā te Fa’aora

Mai te mea e ’ite te feiā ’āpī ē tē ti’aturi nei ’oe ia rātou, e tupu ïa i te rahi tō rātou ti’aturira’a i tō rātou ’aravihi hanahana, ’e e hitimahuta ïa ’oe i te mau mea tā rātou e nehenehe e rave. ’A tauturu ia rātou ’ia noa’a te ’itera’a nō te mea tā te Metua i te ao ra i ’ite e riro mai rātou.