feiā ’āpī e haere ra

22 nō ’Ātopa

Nāhea vau e nehenehe ai e vai pūai noa i roto i tā’u fafaura’a ia Iesu Mesia ?

1 ’e 2 Tesalonia

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau ’itera’a ’aita i maoro a’enei tei ha’apūai i tō tātou mau ’itera’a pāpū ?

• Aupuru i te feiā tei hina’aro i te tauturu. ’O vai tē hina’aro i tā tātou tauturu ’e te mau pure ? E aha te mau mana’o e tura’i nei ia tātou e tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea tātou ’ia riro ’ei māramarama nō te mau melo o te ’utuāfare ’aore rā nō te mau hoa ’aita e fāri’i nei i tā tātou mau ti’aturira’a ?

• Tāhō’ē i te mau ’utuāfare ē a muri noa atu. Nāhea e nehenehe ai ia tātou ’ia fa’a’ite rahi atu ā i te here ’e te pāturura’a i tō tātou mau ’utuāfare ’e ’ia fa’atupu i te ta’a-’ē-ra’a maita’i i roto i tō tātou fare ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

’Ua mātau te rahira’a ’o tātou i te hō’ē ta’ata mai te huru ra ē, ’ua fafau hope roa iāna ia Iesu Mesia, terā rā, mai taua taime ra, ’ua fa’aātea ’ē i tōna fa’aro’o. E uiui iho ā tātou ē, « E nehenehe ānei te reira e tupu mai i ni’a iā’u ? » ’Ua ’ārue Paulo i te feiā mo’a nō Tesalonia nō tō rātou ha’apa’o maita’i, terā rā ’ua fa’auruhia ’oia ’ia fa’aara ia rātou nō ni’a i te mau ha’api’ira’a hape ’e te tahi atu mau fa’aurura’a ’o tē nehenehe e ha’aparuparu i tō rātou fa’aro’o. Noa atu ā te huru o te pūai o tā tātou fafaura’a i te Fa’aora i teienei, e rave rahi mea i te mau taime ato’a e nehenehe tātou e rave nō te « ha’amaita’i roa i tei toe i tō [tātou] fa’aro’o » (1 Tesalonia 3:10).

’A pure ai ’oe nō ni’a i te mau ta’ata i roto i tā ’oe piha tamāhine ’aore rā pupu autahu’ara’a, ’a fa’aro’o i te mau muhumuhu tā te Fatu e fa’atae mai ia ’oe. I tō ’oe mana’o, e aha te mea e tauturu ia rātou ’ia vai ha’apa’o maita’i noa i te Fa’aora noa atu te pāto’ira’a tā rātou e fa’aruru atu ? E aha tei tauturu ia ’oe ? ’A fa’aineine ai ’oe nō te ha’api’i, e nehenehe ’oe e tai’o fa’ahou i te a’ora’a a Elder Dale G. Renlund « Te fafau-’āueue-’ore-ra’a iāna ia Iesu Mesia » (Liahona, Novema 2019) ta’a ’ē atu te 1 ’e te 2 Tesalonia.

Ha’api’i ’āmui

Nō te tauturu i te feiā ’āpī ’ia hi’o fa’ahou i te mea tā rātou i tai’o i roto i te 1 ’e te 2 Tesalonia ’e ’ia fa’a’ite i te tumu parau nō te vai pūai-noa-ra’a i roto i tā tātou fafaura’a i te Fa’aora, e nehenehe ’outou e tai’o ’āmui i te 2 Tesalonia 2:1–3. E ’āparau e aha te aura’a nō te parau ra « tāiva ». E aha iho ā rā te aura’a nō te hō’ē ta’ata ’ia tāiva ia Iesu Mesia ? E nehenehe ’oe e fa’aau i teie ta’o i te tahi atu mau pereota tā Paulo i fa’a’ohipa, mai « te itoito ra ho’i ’outou i te Fatu » (1 Tesalonia 3:8) ’e « ’eiaha e tō’aru’aru i te ravera’a i te parau maita’i » (2 Tesalonia 3:13). I muri iho e nehenehe ’outou e tai’o fa’ahou i te 1 Tesalonia 5:15–23. Nāhea te pe’era’a i te parau a’o a Paulo i roto i teie mau ’īrava e nehenehe e tāpe’a ia tātou ’eiaha ’ia tāiva i tō tātou fa’aro’o ia Iesu Mesia—noa atu e fa’aruru tātou i te pāto’ira’a ? ’A fa’a’ohipa i te mau ’ohipara’a mai teie i muri nei nō te tauturu i te mau melo o te piha tamāhine e ’aore rā, o te pupu autahu’ara’a ’ia vai pūai noa i roto i tā rātou fafaura’a i te Fa’aora.

• E nehenehe e riro ’ei mea fa’auru ’ia ha’api’i mai nā roto mai i te mau hi’ora’a o vetahi ’ē tei vai ’āueue ’ore noa i roto i tō rātou fa’aro’o i te Mesia. ’Ei hi’ora’a, e nehenehe ’outou e tuatāpapa ’āmui i te hi’ora’a o te mau Aniti-Nephi-Lehi, tei riro na ’ei « feiā rata ’ore, ’e te ā’au eta’eta ’e te taehae » terā rā, « ’aita roa atu ra rātou i tāiva » i muri a’e i tō rātou « fa’afāriura’ahia i te Fatu ra » (Alama 17:14 ; 23:6–8). E aha tā Alama 24:8–18 e parau nei nō ni’a i te tumu rātou i vai ha’apa’o maita’i noa ai ? E aha te mau fafaura’a tumu tā rātou i rave ? Nāhea te Fatu i te tauturura’a ia rātou ? E ’itehia te tahi atu mau hi’ora’a i roto i te a’ora’a a Elder Dale G. Renlund « Te fa’aro’o āueue ’ore ia Iesu Mesia ». Pēnei a’e e nehenehe te tahi feiā ’āpī e tai’o i te tahi o teie mau hi’ora’a ’e ’ia fa’a’ite mai i te mea tā rātou i ’apo mai nō ni’a i te vai-pāpū noa-ra’a i te Mesia. Nāhea tātou i vai nati noa ai i te Fatu noa atu tō tātou mau hapehape ?

• I roto i tā tātou mau tauto’ora’a nō te ha’apūai i tō tātou fa’aro’o, e mea maita’i ’ia ’ite i te mau pūai e ’imi nei i te ha’aparuparu i te reira. Tē fa’ata’a nei te ’ōrama a Lehi nō te tumu rā’au o te ora i te tahi o teie mau pūai. Pēnei a’e e nehenehe ’oe e fa’a’ite i te hō’ē hōho’a nō te ōrama (hi’o Buka hōho’a o te ’evanelia [2009], N°69) ’e e hi’o ’āmui fa’ahou i te mau ha’amāramaramara’a, e ’itehia i roto i te 1 Nephi 8:10–34. I roto i te ’ōrama, e aha te mea i tāpe’a i te ta’ata ’ia ’ore ’ia fāna’o i te hotu o te tumu rā’au ? E aha te mea i tauturu i te ta’ata ’ia tae i pīha’i iho i te tumu rā’au ’e ’ia fa’aea i reira ? E aha tā teie mau mea e fa’ahoho’a nei i roto i tō tātou orara’a ?

• I roto i tāna a’ora’a « Te mana nō te upo’oti’a i ni’a i te ’enemi » (Liahona, Novema 2019, 110–12), ’ua tāpura Elder Peter M. Johnson e toru rāve’a tā Sātane e tāmata nei i te ha’aparuparu ia tātou. E nehenehe ’oe e fa’aue i te feiā ’āpī tāta’itahi ’ia tai’o i te hō’ē o teie mau mea ’e ’ia fa’a’ite i te piha tamāhine ’aore rā te pupu autahu’ara’a, i te mau hi’ora’a nō te huru fa’a’ohipara’a a Sātane i teie mauha’a i ni’a i te feiā ’āpī i teie mahana. I muri iho, e nehenehe rātou tāta’itahi e tai’o i te hō’ē o nā mana’o e maha a Elder Johnson nō te upo’oti’a i ni’a i te mau rāve’a a te enemi ’e ’ia fa’a’ite mai i te mea tā rātou i ’apo mai.

Iesu Mesia

Be Not Afraid [’Eiaha e mata’u], nā Michael Malm

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• 1 Nephi 2:9–10 ; Alama 17:1–3 ; Helamana 5:12

• Jeffrey R. Holland, « E te Fatu, ’ua fa’aro’o vau », Liahona, Mē 2013, 93–95

• Neil L. Andersen, « ’Eiaha roa e fa’aru’e iāna », Liahona, Novema 2010, 39–42

• Becky Craven, « Hi’o maita’i ’aore rā e tāu’a ’ore », Liahona, Mē 2019, 9–11

Ha’api’ira’a mai tā te Fa’aora

I te rahira’a o te taime, e mea maita’i ’ia ani i te mau pīahi ’ia tauturu i te tahi ’e te tahi ’ia ’imi i te mau pāhonora’a i tā rātou mau uira’a. ’Ia fa’auruhia ’oe e te Vārua, e nehenehe ’oe e fa’aoti ’ia rave i te reira noa atu ā tē mana’o nei ’oe ē ’ua ’ite ’oe i te pāhonora’a.