feiā ’āpī tamāroa e ’ōpere ra i te ’ōro’a mo’a

12 nō Novema

Nāhea vau e nehenehe ai e ha’afātata atu ia Iesu Mesia nā roto i te mau ’ōro’a mo’a ’e te mau fafaura’a mo’a ?

Hebera 7–13

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea tātou i te ha’afātatara’a atu i te Fa’aora ? Nāhea tātou i te tāmata ’ia riro hau atu mai iāna te huru ?

• Aupuru i te feiā tei hina’aro i te tauturu. ’O vai tei vai i roto i tō tātou ferurira’a ’aita i maoro a’enei ? Nāhea e nehenehe ai ia tātou ’ia tauturu i teie mau ta’ata ?

• Ani i te mau ta’ata ato’a ’ia fāri’i i te ’evanelia. Nāhea e nehenehe ai ia tātou ’ia pāhono i te mau uira’a a tō tātou mau hoa nō ni’a i te ’Ēkālesia, ’o tē ha’apūai i tō rātou fa’aro’o i te Fa’aora ?

• Tāhō’ē i te mau ’utuāfare ē a muri noa atu. E aha te tahi mau rāve’a e nehenehe ai tātou e fa’atū’ati maita’i a’e i te mau melo o te ’utuāfare, mai te mau metua rū’au ’e te mau fēti’i ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

I te roara’a o te mau tenetere ’ua rave itoito te mau tamari’i Īserā’ela, tei pi’ihia i te tahi taime te mau Hebera, i te mau ōro’a tei tū’atihia i te sēkene ’e te ture a Mose. Noa atu rā i te reira, e rave rahi o rātou ’aita i ’ite ē, teie mau mea ’o « te mau hoho’a [ïa] o te mau mea o te ra’i ra »—« e ata ana’e nō te mau mea maitata’i a muri atu » (Hebera 9:23 ; 10:1). ’Ua ’ōpuahia te mau ’ōro’a nō te ha’api’i ia rātou nō ni’a ia Iesu Mesia. ’O te mea ïa tā Paulo i fa’ata’a i roto i tāna ’episetole i tō Hebera. E mea faufa’a ato’a tāna poro’i nō tātou i teie mahana nō te mea e mau ōro’a mo’a ato’a tā tātou ’e te hō’ē ā ōpuara’a. Nō reira, e mea maitai ’ia ui ia tātou iho i teie mau uira’a : Tē tauturu ra ānei teie mau ōro’a ia tātou ’ia ha’amana’o ia Iesu Mesia ? Tē vai ra ānei te tahi atu mau mea e nehenehe ia tātou ’ia rave nō te ’ite i te mana o Iesu Mesia nā roto i te mau ’ōro’a o te ’evanelia ? ’Aore rā mai te mau Hebera i tahito ra ānei tātou, i te ’erera’a i te aura’a hōhonu o te reira ?

’A feruri i teie mau uira’a ’a tai’o ai ’oe i te Hebera 7–13 ’e ’a fa’aineine ai ’oe nō te ha’api’i e nāhea te mau ’ōro’a ’e te mau fafaura’a i te ha’afātata ia tātou ia Iesu Mesia. E nehenehe ato’a ’oe e tuatāpapa i te tahi o te mau a’ora’a o te ’āmuira’a rahi i fa’ahitihia i roto i teie arata’i ha’api’ira’a.

Ha’api’i ’āmui

Nō te tauturu i te feiā tā ’oe e ha’api’i ra ’ia ’ite e nāhea rātou ’ia ha’afātata atu ā ia Iesu Mesia nā roto i te mau ’ōro’a ’e te mau fafaura’a o tāna ’evanelia, e nehenehe ’oe e ani ia rātou ’ia pāpa’i i ni’a i te tāpura ’ere’ere i te tahi mau ’ōro’a o te ’evanelia ’e te mau fafaura’a e tū’ati i ni’a i te reira mau ’ōro’a (hi’o te mau tumu parau o te ’evanelia, « Mau ’ōro’a », « Fafaura’a », topics.ChurchofJesusChrist.org). E aha tā teie mau ’ōro’a ’e mau fafaura’a e ha’api’i nei ia tātou nō ni’a i te Mesia ’e tāna tāra’ehara ? Tē hōro’a nei te fa’ahitira’a parau a Elder David A. Bednar i roto i te « Pu’e parau ha’amāramaramara’a » i te hō’ē tātarara’a nō te mau ’ōro’a ’e te tahi atu mau mana’o faufa’a rahi. E nehenehe ato’a te mau ’ohipara’a mai teie i muri nei e tauturu.

• E nehenehe ’oe e ani i te feiā ’āpī ’ia tai’o i Te Ha’api’ira’a Tumu ’e te mau Fafaura’a 84:19–22 ’e ’ia tāu’aparau i te mau uira’a mai teie : E aha te aura’a o « te mana nō te huru Atua » ? Nāhea te mau ’ōro’a ’e te mau fafaura’a i te tauturura’a ia tātou ’ia ’ite i taua mana ra ? E aha te mau ta’a-’ē-ra’a tā te mau ’ōro’a ’e te mau fafaura’a e fa’atupu i roto i tō tātou orara’a ? Nāhea te reira i te tauturu ia tātou ’ia vai tū’ati noa i te Fa’aora ? Nō te tauturu i te pāhono i teie mau uira’a, e nehenehe te feiā ’āpī e tai’o i nā paratarāfa mātāmua e maha o te a’ora’a a Elder Kent F. Richards « Te mana nō te huru Atua » (Liahona, Mē 2016, 118) ’aore rā, te a’ora’a a Elder Bednar « ’Ia hāmanihia teie nei fare i tō’u nei i’oa » (Liahona, Mē 2020, 84–87), te tuha’a iho ā rā « Mai roto i rāpae. »

• E nehenehe e ani i te feiā tā ’oe e ha’api’i ra, nāhea rātou ’ia fa’ata’a i te ’ōro’a nō te ’ōro’a mo’a i te hō’ē ta’ata tei ’ore i ’ite i te hō’ē noa a’e mea nō ni’a i te reira. E hōro’a mai te tuha’a « Te ’itera’a rau ’e te ’itera’a pāpū » i roto i te a’ora’a a Elder Taniela B. Wakolo « E ’āfaʼi mai te mau ʼōroʼa faʼaoraraʼa i te māramarama faʼahiahia ia tātou » (Liahona, Mē 2018, 39–41) i te hō’ē hi’ora’a. E ’ite-ato’a-hia i te feiā ’āpī te mau ha’api’ira’a faufa’a rahi i roto i te video « ’Ia ha’amana’o tāmau noa iāna » (ChurchofJesusChrist.org). Nāhea te ’ōro’a mo’a i te ha’afātata ia tātou ia Iesu Mesia ? E aha tā tātou mau rāve’a nō te ha’api’i ia vetahi ’ē nō ni’a i te reira ?

• E nehenehe te hi’o-fa’ahou-ra’a i nā mana’o e pae i roto i te a’ora’a a Elder Peter F. Meurs « E tauturu te ’ōro’a ia tātou ’ia riro ’ei ta’ata mo’a » (Liahona, Novema 2016, 85–87) e tauturu i te feiā ’āpī ’ia māramarama e nāhea ’ia fa’aineine maita’i a’e nō te ’ōro’a mo’a. ’Aore rā, mai te mea e feiā ’āpī tā ’oe tē fa’aineine ra nō te fāri’i i tō rātou ’ōro’a hiero, ’a tai’o ’āmui i te tuha’a tei parauhia « Nō ni’a i te ’ōro’a hiero » i te temples.ChurchofJesusChrist.org. E ’āparau nāhea teie mau ’ōro’a mo’a ’e te mau fafaura’a e tū’ati i te reira e nehenehe ai e ha’afātata ia tātou i te Fa’aora.

• E nehenehe e pāpa’i i te mau ta’o ’ōro’a mo’a, bāpetizora’a, ’e Hiero i ni’a i te tāpura ’ere’ere. I raro a’e i te reira, ’a ani i te feiā ’āpī ’ia tāpura i te mau fafaura’a tā tātou e rave. E nehenehe te mau fa’ahorora’a e ’itehia i roto i te « Pu’e parau ha’amāramaramara’a » e tauturu. ’Āparau ’āmui nāhea teie mau fafaura’a i te tauturu ia tātou ’ia ha’afātata atu ā ia Iesu Mesia.

• E nehenehe ’oe e vāhi i tā ’oe piha tamāhine ’aore rā pupu autahu’ara’a ’ei pupu, ’e e fa’aue i te pupu tāta’itahi ’ia hi’o fa’ahou i te hō’ē tuha’a o te a’ora’a a Elder Ronald A. Rasband « Tāpe’a i tā tātou mau parau fafau ’e te mau fafaura’a » (Liahona, Novema 2019, 53–56) ’aore rā te a’ora’a a Elder D. Todd Christofferson « Nō te aha te ’ē’a nō te fafaura’a » (Liahona, Mē 2021, 116–19). E fa’aitoito ia rātou ’ia fa’a’ite mai e aha tā rātou i ha’api’i mai nō ni’a i te huru o te ha’apa’ora’a i tā rātou mau fafaura’a i te ha’apūai i tō rātou auta’atira’a i ni’a ia Iesu Mesia.

feiā ’āpī tamāhine e hāhaere ra nā rāpae i te hiero

E hōpoi mai te mau ’ōro’a mo’a o te ’evanelia i « te mana nō te huru Atua » i roto i tō tātou orara’a (hi’o Te Ha’api’ira’a Tumu ’e te mau Fafaura’a 84:19–22).

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Mosia 18:8–10 (fafaura’a nō te bāpetizora’a)

• Moroni 4–5 (fafaura’a o te ’ōro’a mo’a)

• ’Ua ha’api’i Elder David A. Bednar : « Tei te pū mau o te ’evanelia a te Fa’aora te mau ’ōro’a mo’a, nā reira ato’a te ’ohipa tau maoro nō te haerera’a Iāna e ’imi ai i te fānau-fa’ahou-ra’a i te pae vārua. Te mau ’ōro’a, e mau ’ohipa mo’a ïa ’e te fā pae vārua ’e te aura’a mure ’ore, ’e ’o tē tū’ati i te mau ture ’e te mau fa’aturera’a a te Atua […]

  ’Ua hau atu te mau ’ōro’a nō te fa’aorara’a ’e nō te fa’ateiteira’a e ravehia nei i roto i te ’Ēkālesia a te Fatu tei fa’aho’i-fa’ahou-hia mai, i te mau peu ’aore rā i te mau ’ohipa taipe. Mai te huru te reira i te mau fa’atahera’a i ha’amanahia, i reira te mau ha’amaita’ira’a ’e te mau mana o te ra’i e tahe ai i roto i tō tātou orara’a tāta’itahi […]

  « E mea faufa’a rahi te mau ōro’a tei fāri’ihia e tei fa’aturahia ma te parau-ti’a nō te fāri’i i te mana atua e te mau ha’amaita’ira’a tei hōro’ahia mai nā roto i te tāra’ehara a te Fa’aora » (« ’Ia vai matara noa tā ’outou mau hara », Liahona, Mē 2016, 59–60).

Ha’api’ira’a mai tā te Fa’aora

’A ani ai ’oe i tā ’oe mau pīahi ’ia fa’a’ohipa i te ha’api’ira’a tumu mau, tē tauturu ra ïa ’oe ia rātou ’ia fa’ahaere atu i te ohipa ha’api’ira’a mai i roto i tō rātou ’utuāfare ’e tō rātou orara’a i te mau mahana ato’a.