’āpo’o bāpetizora’a

26 nō Novema

Nāhea vau e nehenehe ai e tauturu i tō’u mau tupuna ’ia ha’afātata atu ā ia Iesu Mesia ?

1 ʼe 2 Petero

ītona ’āpo’o

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. E aha te mau tumu parau tā te ’episekōpora’a i ’āparau i roto i tā tātou mau rurura’a ’āpo’ora’a feiā ’āpī a te pāroita ? E aha tā tātou e nehenehe e rave ’ei piha tamāhine ’aore rā ’ei pupu autahu’ara’a tei fa’atumuhia i ni’a i te reira mau ’āparaura’a ?

• Aupuru i te feiā tei hina’aro i te tauturu. Nāhea e nehenehe ai ia tātou ’ia toro i te rima i te mau ta’ata, mai te Mesia te huru, ’ia ’ite ana’e tātou i te hina’aro ’aita rā i ’ite e aha te parau atu ?

• Ani i te mau ta’ata ato’a ’ia fāri’i i te ’evanelia. E aha tā tātou i ’ite mai i roto i te ’evanelia a Iesu Mesia ’o tē hōro’a mai ia tātou i te ’oa’oa ? Nāhea e ti’a ai ia tātou ’ia fa’a’ite i te reira ’oa’oa ia vetahi ’ē ?

• Tāhō’ē i te mau ’utuāfare ē a muri noa atu. E aha tā tātou e rave nei nō te ’imi i te i’oa o tō tātou mau tupuna tei tītau i te mau ’ōro’a o te hiero ? E aha tā tātou e nehenehe e rave nō te tauturu ia vetahi ’ē ’ia ’imi i te mau i’oa o tō rātou mau tupuna ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

ītona ha’api’i i te ha’api’ira’a tumu

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

E aha tē tupu i ni’a i te rahira’a miria ta’ata tei pohe ma te ’ore e fāri’i i te rāve’a pāpū nō te fa’aro’o i te ’evanelia a Iesu Mesia ’aore rā nō te fāri’i i te mau ’ōro’a fa’aorara’a ? E nehenehe e ’itehia ia tātou te tahi mau pāhonora’a i roto i te 1 Petero 3:18–20 ; 4:6, i reira Petero i parau ai i te parau nō te ’evanelia e porohia i te feiā i pohe. I muri iho, tē fa’a’ite mai nei Te Ha’api’ira’a Tumu ’e te mau Fafaura’a 138 i te parau mau tā’āto’a—e nehenehe tō tātou mau tupuna e haere hope roa mai i te Mesia ra mai te mea e fa’aro’o tō rātou iāna ’e e fāri’i i tāna ’evanelia ’e e rave tātou i tō rātou mau ōro’a i roto i te hiero. Tē tītau nei teie ha’amaita’ira’a ia tātou—tō rātou mau hua’ai tei mau i te ’evanelia—’ia ’imi i tō rātou mau i’oa, ’ia haere i te hiero, ’e ’ia fāri’i i te mau ōro’a fa’aorara’a ’ei mono nō rātou.

E aha te mau ’itera’a tā ’oe i fāri’i nō te tauturura’a i tō ’oe mau tupuna ’ia ha’afātata atu i te Mesia ? Nāhea e nehenehe ai ia ’oe ’ia tauturu i te feiā tā ’oe e ha’api’i ra ’ia ’ana’anatae rahi atu ā i te ’ohipa ’ā’amu ’utuāfare ’e te ’ohipa hiero ’e ’ia ti’aturi rahi a’e i tō rātou aravihi ’ia rave i te reira ? ’A fa’aineine ai ’oe, e nehenehe ’oe e tai’o i te a’ora’a a Elder Dale G. Renlund « Te ’ohipa ’ā’amu ’utuāfare ’e te ’ohipa hiero : Tā’atira’a ’e fa’aorara’a » (Liahona, Mē 2018, 46–49).

Ha’api’i ’āmui

Nāhea te mau melo o tā ’oe piha tamāhine ’aore rā pupu autahu’ara’a ’ia pāhono i te hō’ē ta’ata ’o tē uiui nei ē, nāhea te mau ta’ata maita’i tei ’ore i fāna’o ’ia fāri’i i te ’evanelia, e nehenehe ai e fa’aorahia ? E aha tā rātou e ’ite mai i roto i te 1 Petero 3:18–20 ; 4:6 nō te tauturu i te pāhono i teie uira’a ? I roto i te video « E rave ānei au i tā’u tuha’a ? », tē hōro’a mai nei Elder Enrique R. Falabella i te tahi atu ā mau mana’o. E nehenehe ’outou e tāmau noa i tā ’outou ’āparaura’a e te hō’ē ’aore rā hau atu o te mau ohipara’a i muri nei.

• Te ’Ēkālesia a Iesu Mesia i te Feiā Mo’a i te mau Mahana Hope’a nei ana’e tē mau nei i te ha’api’ira’a tumu nō te fa’aorara’a i te feiā i pohe. ’A ani i te mau melo o te piha tamāhine ’aore rā o te pupu autahu’ara’a ’ia tuatāpapa i te Te Ha’api’ira’a Tumu ’e te mau Fafaura’a 38:25–39 ’ei ta’ata hō’ē ’aore rā ’ei pupu, ’e ’ia fa’a’ite mai i te mea tā rātou i ’apo mai (hi’o « Pu’e parau ha’amāramaramara’a » nō te tahi atu ā mau pāpa’ira’a mo’a nō ni’a i teie tumu parau). E aha tā teie mau ’īrava e parau nei nō ni’a i te huru o te mana’o o te Metua i te ao ra nō ni’a i te tā’āto’ara’a o tāna mau tamari’i ? Nāhea te bāpetizora’a nō te feiā pohe e tauturu i tō tātou mau tupuna ’ia ha’afātata atu i te Mesia ? Nāhea te reira i te tauturu ia tātou ’ia ha’afātata atu ā i te Mesia ’e ’ia fa’arahi i tō tātou fa’aro’o iāna ?

• E aha te mea e nehenehe e fa’auru i te feiā ’āpī ’ia fa’aō rahi atu ā i roto i te ’ohipa hiero ’e te ’ā’amu ’utuāfare ? Pēnei a’e e nehenehe tā rātou e māta’ita’i hō’ē ’aore rā i nā video to’opiti e ’itehia i roto i te « Pu’e parau ha’amāramaramara’a » ’e ’ia ’imi i te mau rāve’a e nehenehe ai te ’ohipa hiero ’e te ’ā’amu ’utuāfare e ha’amaita’i ia rātou. E nehenehe ato’a rātou e ’imi i te mau ha’amaita’ira’a i fafauhia i roto i te tāpura mana’o i roto i te a’ora’a a Elder Dale G. Renlund « Te ’ohipa ’ā’amu ’utuāfare ’e te ohipa hiero : Tā’atira’a ’e fa’aorara’a ». E ani ia rātou ’ia fa’a’ite mai e aha te mau ha’amaita’ira’a faufa’a rahi nō rātou e nō te aha. E nehenehe ato’a ’outou e ’āparau i te tahi o te mau fifi e tāpe’a ia tātou ’ia ’ore ’ia ’āmui atu i roto i te ’ohipa hiero ’e te ’ā’amu ’utuāfare. Nāhea e ti’a ai i te Fa’aora ’ia tauturu ia tātou ’ia upo’oti’a i ni’a i teie mau ha’afifira’a ?

• Mai te mea e nehenehe te mau melo o tā ’oe piha tamāhine ’aore rā pupu autahu’ara’a e fa’a’ohipa i te mau mātini rorouira, e nehenehe ’oe e fa’ata’a i te tahi taime nō te fa’a’ite ia rātou e mea nāhea te Fatu i te fa’a’ōhiera’a i te ’imira’a i te mau tupuna e tītau ra i te mau ’ōro’a fa’aorara’a (hi’o « Pu’e parau ha’amāramaramara’a »). E nehenehe ’oe e ani i te hō’ē tauturu ’ohipa hiero ’e ’ā’amu ’utuāfare nō te pāroita ’ia tauturu i te feiā ’āpī ’ia māramarama i teie mau rāve’a tauturu. E nehenehe ato’a ’oe e fa’aitoito i te feiā ’āpī ’ia hāmani i te mau fa’anahora’a nō te tuatāpapa i teie mau mātēria i te fare ’e ’ia fa’a’ite mai i te parau fa’a’ite i roto i te hō’ē putuputura’a a muri a’e.

feiā ’āpī tamāhine e parauparau ra

’A rave ai tātou i te mau ’ōro’a mo’a i roto i te hiero, tē tauturu ra ïa tātou ’ia nehenehe ’ia roa’a te mau ha’amaita’ira’a o te ’evanelia i te feiā tei pohe.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Malaki 4:5–6 ; Mataio 16:18–19 ; Ioane 5:25 ; 1 Korinetia 15:29 ; Te Ha’api’i’ra’a Tumu ’e te mau Fafaura’a 137:7–9 (Te ha’api’ira’a tumu nō te fa’aorara’a i te feiā pohe)

• « Te mau ha’amaita’ira’a i fafauhia nō te ’ā’amu ’utuāfare 1 » ’e « Te mau ha’amaita’ira’a tei fafauhia mai nō te ’ā’amu ’utuāfare 2 » (mau video), ChurchofJesusChrist.org

• Fa’anahora’a tumu rā’au ’utuāfare (tītauhia i te feiā ’āpī ’ia tomo i roto ma te fa’a’ohipa i tā rātou nūmera o te ’Ēkālesia)

• RootsTech (E nehenehe te feiā ’āpī e māta’ita’i i te mau ha’apurorora’a nā ni’a i te natirara.)

• FamilySearch.org (e nehenehe ’oe e haere e māta’ita’i FamilySearch.org/discovery ’e e tuatāpapa ’āmui i teie mau ’ohipara’a.)

Ha’api’ira’a mai tā te Fa’aora

’Ia ani ana’e ’oe i te feiā ’āpī ’ia ha’api’i, ’a rave i te taime nō te tauturu ia rātou ’ia fa’aineine maita’i. E fa’ata’a i te mea tā ’oe e rave nō te fa’aineine nō te ha’api’i. Nā roto i teie rāve’a, e tauturu ïa ’oe i te feiā ’āpī ’eiaha nō te hō’ē noa ha’api’ira’a, nō te hō’ē rā orara’a tā’āto’a i te ha’api’ira’a i te ’evanelia mai tā te Fa’aora.