10 nō Tītema

Nāhea Iesu Mesia i te fa’atupu i te fa’anahora’a a te Metua i te ao ra ?

Apokalupo 1-5

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea tātou i te ’itera’a i te rima o te Fatu i roto i tō tātou orara’a ?

• Aupuru i te feiā tei hina’aro i te tauturu. Nāhea e nehenehe ai ia tātou ’ia pāturu i te tahi ’e te tahi i roto i te mau mea e fa’aruruhia nei e tātou ?

• Ani i te mau ta’ata ato’a ’ia fāri’i i te ’evanelia. Nāhea tātou e nehenehe e fa’a’ohipa maita’i a’e i te mau rāve’a ’āpī ’ei mauha’a nō te fa’a’ite i te ’evanelia ?

• Tāhō’ē i te mau ’utuāfare ē a muri noa atu. E aha tā tātou e rave nei nō te tauturu i tō tātou mau ’utuāfare ’ia haere mai i te Mesia ra ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

I roto i te hō’ē ’ōrama, ’ua ’ite Ioane te Heheu parau i te hō’ē buka « ’aore roa e ta’ata i ni’a i te ra’i, ’aore ato’a i raro a’e i te fenua nei » i ti’a ’ia heheu, ’e ’ua ’oto roa ’oia (hi’o Apokalupo 5:3–4). Tē fa’ahōho’a nei te buka i « te mau ’ohipa a te Atua », ’e tae noa atu i tāna fa’anahora’a nō tō tātou tāhuti ore ’e te ora mure ’ore (hi’o Te Ha’api’ira’a Tumu ’e te mau Fafaura’a 77:6 ; Mose 1:39). I roto rā i te ’ōrama a Ioane, ’ua ’itehia te hō’ē ’Ārenio « E au … ’ia rave i te buka ’e ’ia vāhi i te mau tāpa’o ra » (Apokalupo 5:9). Nā teie parau ’āpī hanahana i fa’atupu e « ’ua muriadi i te muriadira’a, ’e ’ua tausani i te tausanira’a » o te mau melahi i te hīmenera’a ’e te pi’ihuara’a te reo i te ’oa’oa (Apokalupo 5:11). ’Ua fa’aora Iesu Mesia, te Ārenio a te Atua, « ’e ’ua ho’o [’oia] ia tātou ’ei ta’ata nō te Atua, i [tōna] … toto » (Apokalupo 5:9) ’e ’ua fa’atupu i te mau ha’amaita’ira’a o te fa’anahora’a a tō tātou Metua i te ao ra.

’A feruri e aha tā Iesu Mesia i rave nō ’oe. ’Ua tupu a’enei i roto ia ’oe te mana’o mai te mau ta’ata i roto i te ’ōrama a Ioane « ’ua tīpapa ihora … ’e ’ua ha’amori iāna » ? (Apokalupo 5:14). ’A feruri nāhea e ti’a ai ia ’oe ’ia tauturu i te mau melo o tā ’oe piha tamāhine ’aore rā, o tā ’oe pupu autahu’ara’a ’ia māramarama maita’i a’e i te ti’ara’a tumu o Iesu Mesia i roto i te fa’anahora’a a te Metua i te ao ra. Ta’a ē noa atu te Apokalupo 1–5, e nehenehe ato’a ’oe e tai’o i te 2 Nephi 9 ; « Te Mesia Ora : Te ’itera’a pāpū o te mau ’āpōsetolo » (ChurchofJesusChrist.org) ; ’e te a’ora’a a Elder Ulisses Soares « Iesu Mesia : Te utuutu o tō tātou vārua » (Liahona, Mē 2021, 82–84).

Ha’api’i ’āmui

E au paha te mau melo nō tā ’oe piha tamāhine ’aore rā pupu autahu’ara’a ’ia fa’ahua fa’ariro ia rātou ’ei ta’ata hāmani hōho’a teata tei anihia ’ia hāmani i te hō’ē hōho’a teata nō te ōrama a Ioane i roto i te ’Apokalupo 5. ’A hōro’a ia rātou i te tahi tau minuti nō te hi’o fa’ahou i te pene e ’ia fa’ata’a e aha te mau hōho’a tā rātou e hina’aro e tāviri. I tō rātou mana’o, e aha te mau taime pūai roa a’e ? Nāhea teie hōho’a teata i te tauturu i te patura’a i te fa’aro’o i te Fa’aora ? Nō te tāmau noa i te tauturu i tā ’oe piha tamāhine ’e ’aore rā, i tā ’oe pupu autahu’ara’a ’ia ha’api’i mai nō ni’a i te ti’ara’a o Iesu Mesia i roto i te fa’anahora’a nō te fa’aorara’a a te Metua i te ao ra, teie te tahi mau mana’o :

• E nehenehe ’oe e pāpa’i i teie mau upo’o parau i ni’a i te tāpura ’ere’ere : Te orara’a hou te tāhuti nei, te orara’a tāhuti nei, ’e te orara’a i muri mai i te pohe. E ani i te feiā ’āpī ’ia hi’o fa’ahou i te mau tuha’a pāpa’ira’a mo’a i raro a’e i te « Pu’e parau ha’amāramaramara’a » nō te ha’api’i mai nāhea te misiōni a te Fa’aora i roto i tōna orara’a hou te tāhuti nei, i roto i tōna orara’a tāhuti nei, ’e i muri iho i tōna ti’afa’ahoura’a, e fa’atupu ai i te fa’anahora’a a te Metua. E nehenehe rātou e pāpa’i i te mea tā rātou i ha’api’i mai i raro a’e i te mau upo’o parau i ni’a i te tāpura ’ere’ere. ’A hōro’a i te mau melo o tā ’oe piha tamāhine ’aore rā pupu autahu’ara’a i te hō’ē rāve’a nō te fa’a’ite mai i tō rātou mau mana’o nō ni’a i te mea tā te Fa’aora i rave nō rātou.

• Nō te tauturu i te feiā ’āpī tā ’oe e ha’api’i nei ’ia māramarama maita’i a’e i te mea tā Iesu Mesia i rave nō te fa’atupu i te fa’anahora’a a te Metua i te ao ra, ’a pāpa’i hōho’a i te hō’ē ē’a i ni’a i te tāpura ’ere’ere e fa’ahōho’a i tō tātou tere ho’ira’a i tō tātou Metua i te ao ra. Pāpa’i hōho’a i te mau ha’afifira’a i ni’a i te ’ē’a tei tāpa’ohia pohe tāhuti ’e pohe vārua. (Mai te mea e hina’arohia, e nehenehe te feiā ’āpī e tai’o i te mau aura’a i raro a’e i « te pohe, tāhuti » ’e « te pohe, vārua » i roto i te Arata’i nō te mau pāpa’ira’a mo’a[scriptures.ChurchofJesusChrist.org.]). Nāhea tō te Fa’aora fa’ati’ara’a ia tātou ’ia upo’oti’a i ni’a i teie mau fifi ? (hi’o 2 Nephi 9:7–10). E nehenehe te feiā ’āpī e hi’o fa’ahou i te a’ora’a a Elder Ulisses Soares « Iesu Mesia te ta’ata aupuru i tō tātou vārua » ’e ’ia pāpa’i i te mau parau i roto i te a’ora’a i pīha’i iho i te ē’a e fa’a’ite ra e nāhea Iesu i te tauturu ia tātou ’ia ho’i i te Atua ra.

• ’Ia ui mai te tahi atu mau ta’ata ia tātou i te mau uira’a nō ni’a i tō tātou mau ti’aturira’a ’e te mau mā’itira’a tā tātou e rave, e nehenehe tātou e rave i te taime nō te fa’a’ite nō te aha Iesu Mesia i riro ai ’ei mea faufa’a nō tātou. Hō’ē rāve’a nō te fa’aineine i te feiā ’āpī nō taua taime ra, ’o te anira’a ïa ia rātou ’ia hi’o fa’ahou i te a’ora’a a Elder Dieter F. Uchtdorf « ’A hi’o mai na i taua ta’ata nei ! » (Liahona, Mē 2018, 107–10) ma te ’imi i te mau parau mau nō te fa’a’ite nō ni’a ia Iesu Mesia. E nehenehe ’oe e tāpura i te tahi o teie mau parau mau i ni’a i te tāpura ’ere’ere. I muri iho, e nehenehe ’oe e hōro’a i te feiā ’āpī i te taime nō te ha’api’ipi’i ’ia fa’ata’a i te tahi ’e te tahi nō te aha tātou e hina’aro ai ia Iesu Mesia ’e nāhea tō rātou orara’a i te ha’amaita’ira’ahia nō te mea ’ua ’ite rātou i te Fa’aora.

The Crucifixion of Christ [Te fa’asātaurora’a o te Mesia], nā Louise Parker

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Ioane 1:1–3, 10 ; Etera 3:14 ; Mose 4:1–2 (Te misioni a te Fa’aora i roto i te orara’a hou te tāhuti nei)

• Mosia 3:5–11 ; Alama 7:11–13 ; Te Ha’api’ira’a Tumu ’e te mau Fafaura’a 19:16–19 (Te misiōni a te Fa’aora i roto i tōna orara’a tāhuti nei)

• Ioane 14:2–3 ; 2 Nephi 9:15–17 ; Te Ha’api’ira’a Tumu ’e te mau Fafaura’a 45:3–5 ; 138:28–31 (Te misioni a te Fa’aora i muri a’e i tōna pohera’a e tōna ti’afa’ahoura’a)

Ha’api’ira’a mai tā te Fa’aora

’Ua riro te ta’ata tāta’itahi i roto i tā ’oe piha tamāhine ’ei puna rahi nō te ’itera’a pāpū, te mau mana’o, ’e te mau ’itera’a i te orara’a i te ’evanelia. ’A ani ia rātou ’ia fa’a’ite mai i tō rātou mana’o ’e ’ia fa’aitoito te tahi i te tahi.