Delivered [Fānauhia], nā Jenedy Paige

24 nō Tītema

Nāhea Iesu Mesia i te fa’a’ite i tōna here iā’u ?

Noela

’Āpo’o

Arata’ihia e te hō’ē melo nō te peresidenira’a piha tamahine ’aore rā, nō te peresidenira’a pupu autahu’ara’a ; fātata e 10–20 minuti

I te ’ōmuara’a o te rurura’a, e tai’o ’āmui i te Parau tai’o a te Feiā ’Āpī Tamāhine ’aore rā te Parau tai’o a te pupu Autahu’ara’a Aarona. I muri iho, e arata’i i te hō’ē ’āparaura’a nō ni’a i te ’ohipa o te fa’aorara’a ’e o te fa’ateiteira’a ma te fa’a’ohipa i te hō’ē ’aore rā hau atu o te mau uira’a i raro nei ’aore rā i tā ’oe iho mau uira’a (hi’o Buka arata’i rahi, 10.2, 11.2). ’A fa’anaho i te mau rāve’a nō te fa’a’ohipa i te mea tā ’outou i tāu’aparau.

• Ora i te ’evanelia. Nāhea e ’itehia ai ia tātou te ’oa’oa i te pe’era’a ia Iesu Mesia ?

• Aupuru i te feiā tei hina’aro i te tauturu. ’O vai i roto i tā tātou pāroita ’aore rā tō tātou ’oire e hina’aro nei i tā tātou tauturu ? Nāhea e nehenehe ai ia tātou ’ia tauturu ia rātou ?

• Ani i te mau ta’ata ato’a ’ia fāri’i i te ’evanelia. Nāhea e nehenehe ai ia tātou ’ia tauturu i te tahi ’e te tahi ’ia fa’aineine nō te ’ohipa misiōnare ?

• Tāhō’ē i te mau ’utuāfare ē a muri noa atu. Nāhea e nehenehe ai ia tātou ’ia pāturu i te mau tauto’ora’a a tā tātou pāroita nō te rave i te ’ā’amu ’utuāfare ’e te ’ohipa hiero ?

I te hope’a o te ha’api’ira’a, mai te mea e tano, ’a rave i te mau mea i muri nei :

• Fa’a’ite pāpū nō te mau parau tumu i ha’api’ihia.

• Fa’aha’amana’o i te mau melo nō te piha tamāhine ’e nō te pupu autahu’ara’a nō ni’a i te mau ’ohipa i fa’anahohia ’e te mau anira’a manihini i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē fa’atere ta’ata pa’ari ’aore rā taure’are’a ; fātata e 25–35 minuti

Fa’aineine ia ’oe i te pae vārua

Hou ’a fānauhia mai ai ’oia, ’ua mātauhia Iesu Mesia ’ei Iehova rahi. ’O ’oia tā te Metua « i here ’e i ma’iti mai te mātāmua mai ā » (Mose 4:2), tei ’ī i te hanahana, te aroha ’e te parau mau (hi’o Ioane17:5 ; Te Ha’api’ira’a Tumu ’e te mau Fafaura’a 93:11). ’E i tōna fanau-ra’a-hia, « tu’u atu ra [Maria iāna] i roto i tā te pua’a vaira’a mā’a ; nō te mea ’aore atu ra rāua i ō i roto i te fare tīpaera’a » (Luka 2:7). Nō te aha Iesu Mesia i fāri’i ai i tōna ti’ara’a ’ei Fa’aora noa atu ē, te aura’a ra, e haere mai i ni’a i te fenua nei i roto i te mau huru ha’iha’i roa a’e o te orara’a ? Te pāhonora’a ’ōhie, ’oia ho’i, ’ua here ’oia ia tātou. I te ’itera’a Nephi i roto i te ’ōrama i te fānaura’a o te Fa’aora, fa’a’ite pāpū a’era ’oia « ’o tō te Atua aroha īa, tei tauturu mai i te ’ā’au o te mau tamari’i a te ta’ata nei ; nō reira, e mea hina’arohia īa i te mau mea ato’a » (1 Nephi 11:22).

E taime ta’a ’ē te Noela nō te feruri nāhea te fānaura’a o te Fa’aora e tāna tusia tāra’ehara e fa’a’ite nei i tōna here ia ’oe. ’A fa’aineine ai ’oe nō te tauturu i te feiā ’āpī tā ’oe e ha’api’i ra ’ia ’ite i te here o te Fa’aora, e nehenehe e hi’o fa’ahou i te Luka 4:16–21 ; Ioane 3:16–17 ; 3 Nephi 27:13–16 ; ’e te a’ora’a a Elder D. Todd Christofferson « Te here o te Atua » (Liahona, Novema 2021, 16–19).

Ha’api’i ’āmui

’A fātata ai tā ’oe piha tamāhine ’aore rā pupu autahu’ara’a i te hope’a o tā ’oe tuatāpapara’a i te Faufa’a ’Āpī i teie matahiti, e nehenehe ’oe e ani i te feiā ’āpī ’ia fa’a’ite mai i te tahi mau ’ā’amu au-roa-hia o te Faufa’a ’Āpī i reira tō te Fa’aora fa’a’itera’a i tōna here nō te feiā ati a’e iāna. E nehenehe ato’a ’outou e tai’o ’āmui i te tahi o teie mau ’ā’amu. E aha tā teie mau ’ā’amu e ha’api’i nei ia tātou nō ni’a i te here o te Fa’aora nō tātou ? Nō te tauturu ia ’oe ’ia ’āparau atu ā nō ni’a i te here o te Fa’aora, ’a fa’a’ohipa i te mau ’ohipara’a mai teie i muri nei.

• ’A ani i te mau melo o te piha tamāhine ’aore rā, te pupu autahu’ara’a ’ia feruri i te here o te Metua i te ao ra ’e o Iesu Mesia nō tātou mai te hō’ē pūpā tiare nehenehe (hi’o Russell M. Nelson, « Divine Love », Ensign, Fepuare 2003, 24). E nehenehe e hōro’a i te ta’ata tāta’itahi i te hō’ē tiare tāpūpūhia i roto i te ’api parau ’e ’ia ani ia rātou tāta’itahi ’ia tai’o i te hō’ē o te mau ’īrava i roto i te « Pu’e parau ha’amāramaramara’a. » E ani ia rātou ’ia pāpa’i i ni’a i tā rātou mau tiare i te mea tā rātou i ha’api’i mai nō ni’a i te here o te Metua i te ao ra ’e o Iesu nō tātou. ’A fa’a’ite ai rātou i te mea tā rātou i ha’api’i mai, e nehenehe rātou e ’āmui i tā rātou mau tiare nō te hāmani i te hō’ē pūpā. Nāhea e nehenehe ai ia tātou ’ia ’ite maita’i a’e i te mau rāve’a a te Metua i te ao ra ’e a Iesu Mesia nō te fa’a’ite mai i tō rāua here ia tātou ?

• E rave rahi hīmene e fa’ata’a nei i te huru nō te fa’a’itera’a te Fa’aora i tōna here ia tātou (hi’o, ’ei hi’ora’a, « ’Ua ’ite au tē ora nei tō’u Fatu », Te mau hīmene, N°69). E nehenehe te mau melo o te piha tamāhine ’aore rā o te pupu autahu’ara’a e mā’iti i te hō’ē hīmene ’e ’ia fa’a’ite mai i te mau ’itera’a i te taime ’a ’ite ai rātou i te here o te Fa’aora mai te huru i tō tei fa’ata’ahia i roto i te hīmene. E aha te tahi atu mau huru tō te Fa’aora fa’a’itera’a i tōna here ia tātou ? ’Ei feiā ’āpe’e i te Mesia, nāhea e ti’a ai ia tātou ’ia tauturu ia vetahi ’ē ’ia ’ite i tōna here ?

• E rave rahi mana’o hape i roto i te ao nō ni’a i te here o te Atua ia tātou. ’Ei hi’ora’a, e mana’o paha te tahi mau ta’ata ē, ’ia moni ’aore rā ’ia ’auhune ana’e te ta’ata, te aura’a ra, ’ua here te Atua ia rātou hau atu ia vetahi ’ē. E mana’o paha te tahi ē mai te mea ’ua here mau te Atua ia tātou, e fāri’i ’oia ia tātou mai te au i tō tātou huru ’e ’aita ’oia e ani ia tātou ’ia taui. E aha te mau poro’i hape nō ni’a i te here o te Atua tā tātou i fa’aro’o ? Nō te tauturu i te pāto’i i teie mau parau poro’i hape, e nehenehe ’oe e ani i te feiā ’āpī ’ia hi’o fa’ahou i te a’ora’a a Elder D. Todd Christofferson « Te here o te Atua » ’aore rā te a’ora’a a te peresideni Dallin H. Oaks « Te aroha ’e te ture » (Liahona, Novema 2009, 26–29). E aha te mau parau mau tā tātou e ’ite mai i roto i teie mau a’ora’a ’o tē tauturu ia tātou ’ia māramarama i te here o te Atua ia tātou ?

E nehenehe te here o te Metua i te ao ra ’e o Iesu Mesia e fa’aauhia i te hō’ē pūpā tiare nehenehe.

Rave ma te fa’aro’o

’A fa’aitoito i te mau melo o te piha tamāhine ’aore rā o te pupu autahu’ara’a ’ia feruri ’e ’ia pāpa’i e aha tā rātou e rave nō te fa’a’ohipa i te mau fa’a’itera’a mana’o tā rātou i fāri’i i teie mahana. Mai te mea e hina’aro rātou, e nehenehe rātou e fa’a’ite mai i tō rātou mau mana’o. E ani ia rātou ’ia feruri e nāhea te fa’a’ohipara’a i te mau mana’o tei tae mai, i te ha’apūai i tō rātou tā’amura’a i te Metua i te ao ra ’e ia Iesu Mesia.

Pu’e parau ha’amāramaramara’a

• Ioane 3:16–17 ; 15:9–13 ; Roma 8:35–39 ; Hebera 12:5–6, 9–11 ; 1 Nephi 11:21–23 ; Alama 7:11–12 ; 3 Nephi 11:13–17 ; Moroni 7:45–48

• Michael John U. Teh, « Tō tātou iho Fa’aora », Liahona, Mē 2021, 99–101

• Taniela B. Wakolo, « ’Ua here te Atua i tāna mau tamari’i », Liahona, Mē 2021, 94–96

Ha’api’ira’a mai tā te Fa’aora

Te mau mea ato’a tā te Fa’aora i rave i te tā’āto’ara’a o tāna tāvinira’a i ni’a i te fenua nei ’ua tūra’ihia ïa e te here—tōna here i tōna Metua ’e tōna here ia tātou pā’āto’a. Ma te here mau o te Mesia i roto i tō tātou ’ā’au, e ’imi īa tātou i te mau rāve’a ato’a nō te tauturu ia vetahi ’ē ’ia ’ite i te Mesia ’e ’ia haere atu Iāna ra. ’O te here atu ra ïa te tumu ’e te fa’aitoitora’a nō tā tātou ha’api’ira’a.