Iesu ma Ona Soo, © Balage Balogh/Art Resource, NY

23 Iulai

O Le a Le Uiga o le Avea o Se Soo o Iesu Keriso?

Galuega 10–15

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O faapefea ona tatou vaaia le aao o le Alii i o tatou olaga?

• Tausia o i latou e lē tagolima. E mafai faapefea ona tatou lagolagoina le tasi ma le isi i mea o loo tatou feagai?

• Valaaulia tagata uma ia talia le talalelei. E mafai faapefea ona sili atu lo tatou faaaogaina o tekinolosi o se meafaigaluega e faasoa atu ai le talalelei?

• Tuufaatasia o aiga mo le faavavau. O a a tatou mea o loo fai e fesoasoani ai i o tatou aiga ia o mai ia Keriso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O loo tusia i leMataupu 11 o le Galuega e faapea mo le taimi muamua “o le au soo sa ta‘ua o Kerisiano” (fuaiupu 26). O se avanoa paia ma se tiutetauave le lauiloa o se tasi o soo o Keriso ma valaauina i Lona suafa. E pei ona faapea mai Peresitene M. Russell Ballard: “O tatou iloa ea le faamanuiaina o i tatou i le ave i o tatou luga o le suafa o le Alo Pele e Toatasi na Fanaua o le Atua? Pe o tatou malamalama ea i le taua o lena mea? O le suafa o le Faaola, ua na o le pau lea o le suafa i lalo ifo o le lagi e mafai ona faaolaina ai le tagata” (“O Le Taua o se Igoa,” Liahona, Nov. 2011, 79).

O le a le uiga ia te oe o le avea ma se Kerisiano---se soo o Iesu Keriso? O le a le uiga i tagata o lau vasega po o le korama? E faapefea e le tauaveina o Lona suafa i ou lava luga ona faatosinaina oe? Atonu foi e te mafaufau i taimi na musuia ai oe e le faataitaiga a se tasi sa galue o se soo moni o Keriso.

A o e sauni e aoao atu, e faaopoopo atu i le faitauina o le Galuega 10–15, mafaufau e faitau se tasi pe sili atu o savali o le konafesi aoao o loo maua i le “Punaoa Lagolago.”

Aoao Faatasi

Ina ia fesoasoani i tagata o lau vasega po o le korama ia malamalama i le uiga o le avea ma se soo o Iesu Keriso, e mafai ona e valaaulia i latou e faauma le faamatalaga lenei: “O se soo o Iesu Keriso o se tasi e …” E mafai ona latou toe faamanatu le Galuega 11:19–26, ma vaavaai mo malamalamaaga i fuaiupu 21, 23–24, 26 e uiga i le ala na faaalia ai e nei tagata o le Ekalesia o i latou o ni soo. E faapefea e le avea ma soo o Iesu Keriso ona faatosinaina o tatou mafaufauga ma amioga? O gaoioiga faapenei e mafai ona faaopoopo i lenei talanoaga.

• E mafai ona fesoasoani le talanoaina po o le a le soo o Iesu Keriso (tagai i le saunoaga a Elder Robert D. Hales i le “Punaoa Lagolago”). E mafai ona e fai atu i le autalavou e faasoa mai nisi o aoaoga a Iesu Keriso e musuia ai i latou ma nisi o mea na latou aoaoina mai Lana faataitaiga. E mafai ona latou suesue i nisi o mau i le “Punaoa Lagolago,” po o isi latou te iloa, mo ni manatu. E mafai ona latou lisi i luga o le laupapa mea sa latou aoaoina e uiga i le Faaola mai fuaitau. Ona mafai lea ona latou talanoa e uiga i auala e mafai ai ona latou mulimuli ma le faamaoni i aoaoga ma faataitaiga o loo lisiina i luga o le laupapa.

• Fai atu i tagata o le vasega po o le korama e mafaufau po o le a le uiga o le avea ma se Kerisiano. E mafai ona latou faia se lisi o uiga auaumama o le a latou faamoemoe e maua i le olaga o se tasi e mulimuli ia Iesu Keriso (tagai, mo se faataitaiga, i le Ioane 13:34–35). E mafai ona e vaevaeina le autalavou i ni vaega se lua ma fai atu i vaega taitasi e faitau se tasi o savali nei ma vaavaai mo nisi uiga auaumama faaopoopo o le a latou faaopoopo atu i la latou lisi: Elder Terence M. Vinson, “O Soo Moni o le Faaola” (Liahona, Nov. 2019, 9–11) ma Elder Massimo De Feo, “Alofa Mama: O Le Faailoga Moni o Soo Moni Uma o Iesu Keriso” (Liahona, Me 2018, 81–83). Valaaulia le autalavou e mafaufau loloto i se mea i luga o le lisi latou te mananao e faaleleia atili.

• E mafai ona e fesili i tagata o le vasega po o le korama po o le a le uiga ia i latou o le valaauina i le suafa o Iesu Keriso. Atonu e mafai ona latou faasoa mai ni aafiaga na latou oo i ai ina ua iloa e se tasi o i latou o ni tagata O Le Ekalesia a Iesu Keriso o le Au Paia o Aso e Gata Ai. O a ni o tatou lagona e uiga i le lauiloa o ni soo o Iesu Keriso ma tagata o Lana Ekalesia? E mafai foi e le autalavou ona suesue i ni mau po o se tasi o savali i le “Punaoa Lagolago,” ma vaavaai mo malamalamaaga na e musuia ai i latou e ola e tusa ai ma le suafa o Iesu Keriso, lea ua latou tauaveina i o latou lava luga. E faapefea e le valaauina i le suafa o Iesu Keriso ona aafia ai filifiliga tatou te faia?

I le avea ai ma tagata o le Ekalesia a Keriso, o i tatou o Ona soo ma ua valaauina i Lona suafa.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 5:38–47; 6:19–21; 7:1–5; 25:31–40; Luka 10:25–37; Ioane 13:34–35; 14:15 (Aoaoga a Iesu Keriso)

• Mataio 4:1–11; Mareko 6:35–44; Luka 4:16–19; 22:39–42; 23:33–34; Galuega 10:38 (Faataitaiga a Iesu Keriso)

• Ieremia 15:16; Mosaea 5:7–15; Alema 46:12–15; 3 Nifae 27:3–8 (Tauaveina o le suafa o le Faaola i o tatou luga)

• Lisa L. Harkness, “Faamamaluina o Lona Suafa,” Liahona, Nov. 2019, 60–62

• Paul B. Pieper,“E Ao i Tagata Uma ona Ave i o Latou Luga le Suafa Ua Tuuina Mai e le Tama,” Liahona, Nov. 2018, 43–45

• Sa aoao mai Elder Robert D. Hales: “O le a le uiga o le avea ma se soo o lo tatou Alii o Iesu Keriso? O se soo o se tasi ua papatisoina ma ua naunau e tauave i ona luga le suafa o le Faaola ma mulimuli ia te Ia. O se soo e tauivi ia avea faapei o Ia i le tausia o Ana poloaiga i le olaga faaletino, e pei ona saili se tagata faigaluega faataitai ia avea faapei o lona matai.

  “O le toatele o tagata e faalogo i le upu soo ma mafaufau na pau lona uiga o se ‘tagata e mulimuli.’ Ae o le avea ma soo moni o se tulaga faaletagata. Ua fautuaina mai e lenei mea e sili atu nai lo le suesue ma le faaaogaina o se lisi o uiga paia faaletagata lava ia. E soifua ia soo ina ia mafai ona lalagaina i totonu o latou tagata ia uiga o Keriso, e pei o se ie lalaga faaleagaga” (“Avea o se Soo o lo Tatou Alii o Iesu Keriso,” Liahona, Me 2017, 46).

Aoao Atu i le Ala a le Faaola

I le avea o se faiaoga, e mafai ona e faamalosia ni talanoaga faagaeetia faamauoaina e ala i aafiaga ma molimau a tagata aoao.