papitaiso

13 ni Okosita

Ena Vukei Au Vakacava o Jisu Karisito Meu Veisau?

Roma 1–6

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Eda kunea vakacava na reki ena noda muri Jisu Karisito?

• Vukei ira era gadreva tu na veivuke. O cei ena noda tabanalevu se itikotiko e gadreva na noda veivuke? E rawa vakacava nida vukei ira?

• Sureta na tamata kecega mera ciqoma na kosipeli. Eda na veivukei vakacava vakai keda meda vakavakarau kina veiqaravi vakadaukaulotu?

• Vakaduavatataki ni matavuvale me tawamudu. Eda na cau vakacava kina sasaga ni noda tabanalevu meda cakava na tuva kawa kei na cakacaka ni valetabu?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na kosipeli i Jisu Karisito e kosipeli ni veisau!” Sa kaya oti o Peresitedi Russell M. Nelson (“Vakatulewa me baleta na Tawamudu,” Liaona, Nove. 2013, 108). Me vakakina, a vakamacalataka na iApositolo o Paula ni gauna eda papitaiso kina, eda sa “ivalavala vakatalega kina ena bula vou” (Roma 6:4). Ena vuku i Jisu Karisito, ena veisiga—sega walega ni siga eda a papitaiso kina—e rawa ni kauta mai na “bula vou” se dua na madigi me da lako vakayawa sara mai na ivalavala ca ka voleka vua na Kalou. Meda bulataka na kosipeli i Jisu Karisito e kena ibalebale meda veivutuni ka toro voleka vua na Kalou—ena veigauna, ena so na gauna e dau vakamalua—ni da kila ni noda sasaga ena muataki keda kina taucoko ni reki.

Vakasamataka vakatitobu na sala sa veisautaki iko tiko kina na iVakabula kei ira o vakavulica. Ena rawa vakacava mo ciqoma vakataucoko cake na kaukauwa ni iVakabula me veisautaki iko? Vakasamataka oqo nio wilika na Roma 1–6 kei na nomu vakavakarau mo veivakavulici. Sa rawa talega mo railesuva na itukutuku nei Peresitedi Russell M. Nelson “E Rawa ni Vinaka Cake na Veika Eda Cakava tiko meda Vinaka Cake kina” (Liaona, Me 2019, 67–69) se na itukutuku nei Sisita Becky Craven “Maroroya na Veisau” (Liaona, Nove. 2020, 58–60).

Vulica Vata

Vei eso vei keda, na “bula vou” e solia na Karisito (Roma 6:4) e dredre me kilai baleta ni dau yaco vakamalua, vei ira tale eso, ena yaco totolo sara na veisau oqo. Sa rawa mo sureta na lewe ni kalasi se kuoramu mera wasea na ibalebale ni “lako voli ena bula vou” kivei ira. Na cava eso na vosa kei na malanivosa mai na Roma 6 e vakamacalataka na noda bula ena veivakayarayarataki ni iVakabula kei koya e sega ? (Kevaka era gadreva na veivuke na itabagone, e rawa nira raica na tikina e 6, 11, 22–23.) Na vosa kei na malanivosa cava tale e rawa nida vakasamataka? Na sala cava e vakarautaka tu na iVakabula me vukei keda meda veisau? Na itaviqaravi vakaoqo ka tarava ena rawa ni veimuataki kina dua na veivosaki titobu ena ulutaga oqo.

• Me vukea na kalasi se kuoramu mera vakasamataka na veisau e rawa ni vukei ira kina na iVakabula, sureti ira mera wilika na kena ibalebale e ruku ni “Veivutuni,” ena iDusidusi ki na iVolanikalou (scriptures.ChurchofJesusChrist.org). Sa rawa talega mera veivosakitaka na ivakamacala nei Peresitedi Russell M. Nelson baleta na veivutuni ena imatai ni vitu na parakaravu ni nona itukutuku “E Rawa ni Vinaka Cake na Veika Eda Cakava tiko meda Vinaka Cake kina.” Na dina bibi cava soti eda vulica me baleta na veivutuni mai na vei ivakamacala oqo? Sa rawa talega mo solia kina kalasi se kuoramu na gauna me vakasamataka vakatitobu na ituvatuva nei Peresitedi Nelson me baleta na veika e kerei keda kina o Jisu meda veisautaka (ena i ka lima ni parakaravu ni nona itukutuku). Vakayaloqaqataki ira mera vola e dua na ka vakatabakidua era vakauqeti kina me ra veisautaka. Wasea na nomu ivakadinadina me baleta na kaukauwa ni iVakabula me vukei keda meda veivutuni ka veisau.

• E kaya o Sisita Becky Craven nio ira na nona itokani mai na veigauna sa oti era dau kaya, “O se sega sara ga ni veisau!” E rawa ni o wasea na ivakamacala nei Sister Craven baleta na ka oqo (raica na “Maroroya na Veisau,” 59–60). Kerei ira na lewe ni kalasi se kuoramu mera raitayaloyalotaka ni ena loma ni lima se tini na yabaki mai oqo, era sotava e dua na itokani makawa. Na veisau cava e rawa nira raica votu vei keda o ira na noda itokani? Na sala cava eso eda nuitaka ni da sa veisau kina? Ena vukei keda vakacava na vakabauti Jisu Karisito meda veisau? (raica na Mosaia 5:2–5, 7; Alama 5:11–13; Ica 12:27, se na “ivakarau ni veisau me tomani tikoga” e vakamacalataka o Sisita Craven ena va na parakaravu ni nona itukutuku vakatekivu ena “Niu se gone”). Sa rawa mo kerei ira na itabagone mera wasea e dua na gauna a vukei ira kina o Jisu Karisito me ra veisau.

• Ena so na gauna eda na nanuma beka nida namaki meda cakava vakaikeda na veisau se na vakavinakataki ni noda bula. E duidui vakacava oqo mai na veivutuni dina? Me vukea na nomu kalasi se kuoramu mera veivosakitaka na taro oqo, sa rawa moni railesuva vata na itukutuku ena “iVurevure Veitokoni.” Na cava eda rawa ni cakava ena gauna oqo meda vakasaqara na veivuke kei na kaukauwa ni iVakabula me rawa ni tudei ka rekitaki na noda veisau? Oqo e rawa ni dua na madigi vinaka vei ira na itabagone mera vakasamataka na nodra takete ni torocake yadudua. E rawa vakacava nida okata na iVakabula ena noda lalawa?

ra taubale tiko na goneyalewa

Na vakabauti Jisu Karisito e vukei keda meda veivutuni ka yaco meda vakataki Koya vakalevu cake ena veisiga.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• E vakatavulica o Peresitedi Russell M. Nelson: “E rawa nida veisautaka na noda itovo. Na noda gagadre sara mada ga e rawa ni veisau. E rawa vakacava? E dua ga na kena sala. Na veisau dina—veisau tudei—e rawa walega ni yaco mai ena kaukauwa veivakabulai, veivakasavasavataki, ka veivakaukauwataki ni Veisorovaki i Jisu Karisito. E lomani kemuni o Koya—o kemuni yadua! E vakatara vei kemuni moni rawata na Nona kaukauwa ena nomuni rokova na Nona ivakaro, ena yalo e vinakata, ena kena gauna totolo, ka vakadodonu” (“Vakatulewa me baleta na Tawamudu,” 108).

• O Elder Dale G. Renlund e vakavulica: “Na kaukauwa e rawa kina na veivutuni, sai koya [na] isoro ni veivakaduavatataki ni noda iVakabula. Na veivutuni dina e dodonu me okati kina na vakabauta na Turaga o Jisu Karisito, vakabauta ni rawa ni veisautaki keda o Koya, vakabauta ni rawa ni vosoti keda o Koya, kei na vakabauta ni na vukei keda o Koya meda levea na caka cala tale. Na mataqali vakabauta vakaoqori ena mana kina Nona Veisorovaki ena noda bula. Ni da qai … ‘vuki lesu mai’ [veivutuni] ena nona veivuke na iVakabula, eda na vakila na inuinui ena Nona yalayala kei na reki ni veivosoti. Kevaka e sega na Dauveivueti, na vakanuinui tudei kei na reki ena seyavu ka yaco na veivutuni me vakavoui walega ni itovo ca. Ia nida cakacakataka tiko na noda vakabauti Koya, sa yaco meda saumaki ki na Nona rawata kei na Nona lomasoli me vosota na ivalavala ca” (Dale G. Renlund, “Veivutuni: E Dua na Digidigi Rekitaki,” Liaona, Nove. 2016, 122).

Veivakavulici ena iVakarau ni iVakabula

Na itaviqaravi ena ituvatuva oqo e vakatura na sala eso me vukea na nomu kalasi se kuoramu mera vulica vata na veika me baleta na iVakabula kei na Nona kaukauwa me vukei keda meda veisau. Ena rairai tiko eso tale na iwalewale ena vinaka cake vei ira o vakavulica. Vakasaqara ena masumasu na veidusimaki ni Yalo nio tuvanaka na sala eso me tarai cake kina na vakabauti Jisu Karisito.