valetabu

Valetabu e Indianapolis Indiana

27 ni Okosita

Au na Vakaraitaka Vakacava niu Kila ni Yagoqu e dua na iSolisoli Tabu mai vua na Kalou?

1 Korinica 1–7

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveiliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na veika cava soti sa yaco oti sa kauti keda vakavoleka sara vua na Tamada Vakalomalagi kei Jisu Karisito?

• Nodra vukei o ira era gadreva tu na veivuke. E dua beka e se qai toki vou mai kina neitou tabanalevu se lewe ni Lotu vou? E rawa vakacava meda vukei ira mera vakila ni ra ciqomi?

• Sureta na tamata kecega me ra ciqoma na kosipeli. Na itaviqaravi cava soti e vakarau yaco ka rawa nida sureti ira na noda itokani mera tiko kina?

• Vakaduavatataki ni matavuvale kina tawamudu. Na sasaga cava soti e rawa ni da cakava meda vola kina na keda itukutuku makawa?

Ena itini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Se vinaka se ca, na Yalododonu Edaidai e rairai era kilai vakavinaka ena veika eda sega ni cakava. E vuqa vei ira na “sega” oqori e salavata tiko kei na sala eda qarauna kina na yagoda. Nai inaki ni veidigidigi oqori me baleta na veika meda cakava ni tiko kina eso na dina tawamudu—na ka eda kila. Ni dusimaka na noda digidigi na dina tawamudu, ena rawarawa cake na cakava na vei digidigi oqori me, rekitaki vakalevu, ka tudei cake. Na dina tawamudu ena vukei keda talega meda vakamacalataka na noda digidigi vei ira na noda itokani. E rairai me ikuri ni noda kilai ena veika eda sega ni cakava, e rawa nida kilai vakavinaka cake ena veika eda kila.

Vakasamataka na dina tawamudu o kila me baleta na yagoda—na vuna eda taukeni ira kina, na veika e vakila na Kalou me baleti ira, kei na sala e vinakata o Koya meda vakila me baleti ira. Sa vakalougatataki iko vakacava na nomu kila na dina eso oqo ka vakauqeta na nomu digidigi? Ena vakalougatataki ira vakacava na lewe ni nomu kalasi se kuoramu na kila-ka oqo? Nio vakasamataka vakatitobu oqo, wilika Na iVakatekivu 1:27; 1 Korinica 6:19–20; kei na vosa vei Peresitedi Russell M. Nelson “Your Body: A Magnificent Gift to Cherish” (Liaona, Oko. 2019, 50–55).

Vulica Vata

Nira vulica na ivolanikalou ena macawa oqo na lewe ni nomu kalasi se kuoramu, era na rairai vakasamataka beka na ivakavuvuli nei Paula me baleta na yagoda ena 1 Koronica 6. E dua na sala mera sureti kina me ra wasea na vei vakasama oya sai koya me soli vei ira yadua e dua na tiki ni pepa ka kerei ira mera vola e tolu na isaunitaro e rawa ni saumi kina na taro “E tautauvata vakacava na yagoda kei na valetabu?” Vakayaloqaqataki ira mera wilika na 1 Korinica 6:19–20 ni ra vakasamataka tiko na taro oqo. E rawa mera na qai wasea ki na kalasi na nodra nanuma. E vakayarayarataka vakacava na digidigi eda vakayacora na ivakavuvuli ni iVakabula me baleta na yagoda? Oqo eso tale na ikuri ni vakasama ni itaviqaravi ena ulutaga oqo; digidigi mai vei ira oqo, se tuva e dua na nomu.

• Kevaka o gadreva me dua tale na veivosaki me baleta na veivakatauvatani nei Paula baleta na yago kei na valetabu, navuca mo vakaraitaka na iyaloyalo ni vica na valetabu duidui. E rawa mo kunea eso tale ena temples.ChurchofJesusChrist.org. Sa rawa ki na lewe ni kalasi se kuoramu mera veivosakitaka na duidui era raica ena vei valetabu oqo, vata kei na veika era tautauvata kina. Era rawa talega ni veitalanoataka me baleta na veika era vakila nira tiko e loma ni valetabu. Na cava na vuna e yaco kina na valetabu me dua na vanua vakayalo, ka vanua tabu? Mo qai vakayaloqaqataki ira na kalasi se kuoramu mera semata vata na veika era sa veivosakitaka me baleta na valetabu ki na yagoda. Ena rawa vakacava kina ivakavuvuli me baleta na valetabu ena Vunau kei na Veiyalayalati 97:15–16; 109:8, 12 me semati kina yagoda?

• Era sa na sotava oti beka na lewe ni nomu kalasi se kuoramu—se ra na qai sotava—eso na madigi mera vakamacalataka na vuna era muria kina na ivakavuvuli ni iVakabula me baleta na qarauni ni yagodra. O na taroga beka eso vei ira ena ka era na kaya kevaka, me ivakaraitaki, e dua e tarogi ira se cava na vuna era sega kina ni gunu alakaolo, ti, se kofi se cava na vuna era sega ni daramaka kina eso na mataqali isulu. Na cava eso na dina mai na kosipeli i Jisu Karisito e tara na sala eda qarauna kina na yagoda? Sa rawa vei ira na lewe ni kalasi se kuoramu mera vakasaqara eso na dina oqo ena ruku ni “iVurevure Veitokoni.”

• Me vukea na nodra kila vakatitobu ka rokova na yagodra o ira o vakatavulica, e rawa mo vakaraitaka na video, “God’s Greatest Creation” (see also Russell M. Nelson, “Your Body: A Magnificent Gift to Cherish,” 50–55). Na cava e vinakata na Tamada Vakalomalagi kei Jisu Karisito meda vakila me baleta na yagoda? E rawa talega ni o veivosakitaka na sala eso e tovolea kina o Setani me vakauqeti keda meda beca se cata sara mada ga na yagoda. Na cava eda rawa ni cakava meda vorata rawa kina na nona lasu kei na veitemaki? Na vei dina cava ena vukei keda? Eso na ivurevure ena ruku ni “iVurevure Veitokoni” ena rawa ni veivuke.

cici tiko na itabagone

Na yagoda sa isolisoli mai vua na Kalou, ka vukei keda na dina ni kosipeli meda qarauni ira.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Nai Vakatekivu 1:27; 1 Korinica 6:19–20; Alama 11:42–44; 40:23; Vunau kei na Veiyalayalati 89; 130:22

• “Na Matavuvale: Ai Vakaro ki Vuravura Raraba,” vakabibi na imatai ni tolu na parakaravu

• Ko ni Solia Mai vei Au Nomuni Vale,” iVolanisere ni Gonelalai, 73

• iVola me baleta na yagoda ena Okosita 2019 New Era se Liaona

• Peresitedi Russell M. Nelson e vakavulica: “Ni sa solia vei keda na isolisoli ni yago, sa vakatara na Kalou meda taura e dua nai kalawa bibi meda yaco me vakataki Koya vakalevu cake. E kila vinaka tu o Setani na ka oqo. … O koya gona e vuqa, se levu sara, na veitemaki e biuta ena noda sala e vakavuna meda vakacacana na yagoda se yagodra eso tale. … Na yagomu na nomu valetabu vakai iko, a buli me vakavaletaka na yalomu tawamudu [raica na 1 Koronica 3:16–17; 6:18–20]. Na nomu qarauna na valetabu oqo e ka bibi. Oqo, au na tarogi iko, … o taleitaka cake beka mo vakasuluma ka sauna na yagomu mo totoka vei vuravura mai na nomu vakalomavinakataka na Kalou? Na nomu sauma sa itukutuku vakadodonu sara Vua me baleta na yalomu kina Nona isolisoli cecere vei iko.” (“E Rawa ni Vinaka Cake na Veika Eda Cakava tiko meda Vinaka Cake kina,” Liaona, Me 2019, 68).

• Elder D. Todd Christofferson e vakavulica: “O ira era vakabauta ni yagoda e dua walega na ka vua ni veiveisau vakacala-ka ka yaco vei keda era na sega ni vakila ni tu na nodra itavi me ra na tukunika vua na Kalou se vua e dua tale me baleta na veika era cakava ki yagodra. O keda e sa dua na noda ivakadinadina bula me baleta na dina rabailevu ni bula taumada, na bula oqo kei na tawamudu ni bula sa bera mai, ia, sa dodonu me da kila ni tu na noda itavi vua na Kalou me baleta na ulu ni Nona ibulibuli vakayago. … Me vaka ni yagoda e iyaya ni cakacaka ni yaloda, sa bibi sara kina meda dau qarauna sara vakavinaka. E dodonu meda vakatabuya na kena kaukauwa meda qarava ka tosoya na cakacaka i Karisito” (“Nanumi Lesu na Bula sa Vakatabui,” Liaona, Nove. 2010, 17).

Veivakavulici ena iVakarau ni iVakabula

Dau nanumi ira na lewe ni nomu kalasi se kuoramu era vakaleqai tu vakayago se so tale na ibolebole vakayago. Vukei ira mera kila ni yago ni tamata kece e ka talei ka kilikili me rokovi. Na loloma Vakarisito o vakaraitaka vei ira kece e rawa ni veivakayarayarataki vakaukauwa ki na sala era veiraici kina na lewe ni kalasi se kuoramu se na nodra raici ira vakai ira.