era taubale tiko na yalewa

10 ni Sepiteba

Au Na Kunea Vakacava na Vakacegu mai vei Jisu Karisito ni Mate e Dua na Lewenivuvale?

1 Korinica 14–16

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Ena vukei keda vakacava noda gole vua na Turaga meda sotava kina na bolebole kei na veivakatovolei?

• Vukei ira era gadreva tu na veivuke. O cei eda kila e gadreva tu na noda masu kei na noda veitokani?

• Sureta na tamata kecega me ra ciqoma na kosipeli. Na ituvatuva cava me wasei kina na kosipeli sa veivosakitaki ena bose ni matabose ni itabagone ni tabanalevu? Ena rawa ni vakaitavi vakacava na noda kalasi se kuoramu?

• Vakaduavatataki ni matavuvale me tawamudu. Ena vaqaqacotaka vakacava na noda veiwekani kei na Tamada Vakalomalagi kei Jisu na cakacaka ni tuva kawa?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ni sa mate e dua eda dau kauwaitaka, sa rawa ni vakamosiyalo. Na veitawasei mai vei ira na noda lewenivuvale e kauta mai na lomabibi levu kei na rarawa. Ia o Paula e vakavuvulitaka ena yaco me na “guce ko mate a sa muduki sara” (1 Koronica 15:54) ena vuku ni Tucaketale nei Jisu Karisito. Ena dua tale na kena itukutukuni, na “bati gaga ni mate”—na mosi kei na vakanuinui matewale eda vakila ena bula vakayago—“sa tiloma ko Karisito” (Mosaia 16:7–8; raica talega na 1 Koronica 15:54–57).

Ena dua na gauna, eda na sotava kece na mate ni dua na daulomani. O na vukei ira vakacava o vakavulica mera kune vakacegu ena gauna dredre oya ena nodra vakabauti Jisu Karisito? Vakasamataka na taro oqo nio vakavakarau mo veivakavulici ena wiliki ni 1 Koronica 15, Mosaia 16:7–9, kei na Vunau kei na Veiyalayalati 42:44–46.

Vulica Vata

Sa rawa mo sureti ira na lewe ni kalasi se kuoramu mera wasea na gauna era a vakila kina ni ra laukati. Sa rawa mo qai tarogi ira ena vuna era nanuma kina ni vakayagataka o Paula na vosa “bati gaga” me vakamacalataka na mate (raica na 1 Korinica 15:54–56). Solia vei ira e vica na miniti me ra railesuva kina na 1 Korinica 15 ka wasea na vei dina era kunea me baleta na kena rawai na bati gaga nei mate. Qai vakasamataka na itaviqaravi eso me vaka e koto e ra me vukei ira na itabagone me ra kila vakavinaka cake na sala e rawa ni vakacegui keda kina na iVakabula ni dua eda kauwaitaka e mate.

• Sa rawa mo wasea vakaisa na lewe ni kalasi se kuoramu ka kerea na veisa yadua me ra railesuva vata eso na malanivosa ni ivolanikalou ena “iVurevure Veitokoni.” E rawa ni ra vola na isaunitaro kina dua na taro me vaka “Na vei dina bibi cava soti au nuitaka meu na nanuma ena gauna au vakayalia kina e dua na daulomani?” Kerei ira mera okata na itukutuku mai na malanivosa ni ivolanikalou ena nodra isaunitaro. Mo qai sureti ira mera wasea ki na kalasi na dina e vakaibalebale vakalevu duadua vei ira kei na vuna.

• Navuca moni railesuva vata e dua na itukutuku mai na dua na vosa ni koniferedi raraba ka vakaraitaka na sala a kunea kina na inuinui vei Jisu Karisito e dua na tamata ni dua era dau kauwaitaka a mate. Na ivakaraitaki eso e oka kina na itukutuku nei Sisita Reyna I. Aburto “Sa Sega Kina Na Kaukauwa ni iBulubulu” (Liaona, Me 2021, 85–86) se na itukutuku nei Elder S. Mark Palmer “Noda Rarawa Ena Vuki me Reki” (Liaona, Me 2021, 88–89). O na rairai vakauqeti mo wasea na veika o sa sotava se sureti ira na itabagone mera wasea na sala era a kunea kina na vakacegu kei na inuinui mai vei Jisu Karisito ni mate e dua na daulomani.

• Nio vakasamataka oti na nodra gagadre na lewe ni nomu kalasi se kuoramu, vakaraitaka e dua se sivia na vidio ena “iVurevure Veitokoni.” Sureti ira na itabagone mera wasea na nodra vakanananu. E vakayaco-ka vakacava kina noda rai baleta na mate na noda kila ni sa tucaketale o Jisu Karisito? Sureti ira na lewe ni nomu kalasi se kuoramu mera wasea na nodra ivakadinadina me baleta na iVakabula kei na Nona Tucaketale kei na sala e kauta mai kina vei ira na inuinui na kila-ka oqo.

• Joni 11 e vakamacalataka na ka a sotava na iVakabula ena nona mate e dua ka daulomana—o Nona itokani o Lasarusa. Sa rawa kina kalasi se kuoramu mera wilika vata na tikina e 1–45, nira wilika, sa rawa mera wasea na veika era sa vulica mai na ivakaraitaki ni iVakabula. Na cava eda rawa ni vulica mai na itukutuku oqo ka rawa ni solia vei keda na vakacegu ni mate e dua eda dau kauwaitaka? Eda na muria vakacava na ivakaraitaki ni iVakabula ni “rarawa vata kei ira sa rarawa … ka vakacegui ira era sa gadreva na veivakacegui”? (Mosaia 18:9). Na cava eda vulica mai na Vunau kei na Veiyalayalati 42:45–46 e rawa ni vukei keda meda cakava oqo? O na via vakaraitaka beka na vidio “One-on-One (Ministering with Love)” (ChurchofJesusChrist.org).

vakasama vakatitobu tiko na cauravou

Na noda ivakadinadina baleta na Tucaketale i Jisu Karisito e solia vei keda na inuinui ni mate e dua na daulomani.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Aisea 25:8; 1 Korinica 15:20–22; Mosaia 16:7–9; Alama 7:11–12; 11:42–44; 22:14; 28:12–14; 40:11–12

• Dallin H. Oaks, “Na Cava sa Cakava na Noda iVakabula ena Vukuda?,” Liaona, Me 2021, 75–77

• Moisés Villanueva, “Lomani au Tiko na Turaga ena Noqu Veisiga Kecega,” Liaona, Nove. 2021, 44–46

• Vidio: “Dealing with Death: Sunday Will Come,” “Finding Hope through the Resurrection of Christ,” “He Will Give You Help,” “Until We Meet Again” (ChurchofJesusChrist.org)

Veivakavulici ena iVakarau ni iVakabula

Na veivakavulici e oka kina na veiqaravi ena loloma ka vukei ira na tamata mera ciqoma na veivakalougatataki ni kosipeli, kei na veivuke oqo e dau vakavuqa me sai koya sara ga na ka e gadreva e dua na lewe ni kalasi luluqa. Eda gadreva kece meda cakacaka vata ka gole yani kivei ira era sasaga bula tiko, ka sa gauna totoka oqo vei iko qasenivuli mo veivuke kina.