veimokomoko na marama

24 ni Sepiteba

Au na Muria Vakacava na iVakaraitaki ni iVakabula ena Nodra Vukei na Vakaleqai tu?

2 Korinica 8–13

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na cava eda a veivosakitaka ena soqoni sa oti, kei na veisureti se ilesilesi cava sa vakayacori? Na cava eda sa cakava meda cakacakataka kina na veisureti se ilesilesi oya?

• Vukei ira era gadreva tu na veivuke. Na cava eda rawa ni cakava se tukuna meda dodoliga yani vei ira era na rairai galili se yawa mai vua na Tamada Vakalomalagi?

• Sureta na tamata kecega mera ciqoma na kosipeli. Na cava eso na sala eda rawa ni vukei ira kina eso mera vakila na loloma i Jisu Karisito?

• Vakaduavatataki ni matavuvale me tawamudu. Na vakasama cava so eda rawa ni veiwasei kina vakai keda me vukea me vaqaqacotaka noda matavuvale?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na madigi cava soti e tu vei iko kei ira na lewe ni nomu kalasi se kuoramu mera qaravi ira era vakaleqai tu wavoliti iko? Ena dua na gauna era a vakararawataki ka gadreva kina na veivuke o ira na Yalododonu mai Jerusalemi, a vola o Paula vei ira na kai Korinica me vakayaloqaqataki ira mera dau soli ka ena yalololoma, “me kakua ena voraki, se me vakasaurarataki: ia ko koya sa solia ena marau sa vinakata na Kalou.” E yalataka o koya nira cakava oqo, na Kalou ena “vakalevutaka vei [kemudou] na ka ni loloma kecega” me rawa nira “uasivi cake kina ena cakacaka vinaka kecega” (2 Korinica 9:7–8).

A dusia talega o Paula na ivakaraitaki i Jisu Karisito, ni “sa vutuniyau ko koya, ia sa yaco me dravudravua ena vukumudou, mo dou vutuniyau mai ena vuku ni nona dravudravua” (2 Korinica 8:9). Na iVakabula a lomasoli me biuta tu yani nai yau kei lomalagi me rawa vei Koya me mai qaravi keda ka vakayacori keda meda vutuniyau tawamudu. Vakasamataka na ivakaraitaki eso mai na Nona bula ena Nona dodoliga yani me qaravi ira era tu wavoliti Koya. Me ikuri ni kena wiliki na 2 Korinica 8–9 nio vakavakarau mo veivakavulici, sa rawa mo wilika na itukutuku nei Sisita Michelle D. Craig “Na Mata me Raica” (Liaona, Nove. 2020, 15–17).

Vulica Vata

Me tekivu na nomuni veivosaki, kerea na kalasi se kuoramu mera vola eso na vuna e sega beka ni via qaravi ira kina na vakaleqai tu e dua na tamata. Na cava eda vulica mai na ivakavuvuli nei Paula ena 2 Korinica 8:9; 9:7–8 e vakauqeti keda meda cakava e levu cake na ka meda qaravi ira kina era vakaleqai tu? Na itaviqaravi eso ka tarava e rawa ni vukei ira o vakavulica mera kila vakamatata cake na sala mera qaravi kina na tiko wavoliti ira tu.

• Vakavica vata ena ivolanikalou, na Turaga e vakatavulica na lomana me baleta na nodra vukei na dravudravua kei na vakaleqai. Era vakarautaki tu eso na ivakaraitaki ena “iVurevure Veitokoni.” E dua na sala me railesuvi kina na ivakavuvuli oqo o ya me wasei vakaisa na nomu kalasi se kuoramu ka kerei ira na veisa yadua mera vulica eso na ivolanikalou. Kerei ira mera veivosakitaka na cava e vakavulica na veitikina oqo me baleta na nodra vukei na dravudravua kei na vakaleqai. Na cava sa rui bibi kina vei Tamada Vakalomalagi kei Jisu Karisito na nodra qaravi na dravudravua kei na vakaleqai? Sureti ira na itabagone me ra tuva na sala eso ena rawa kina vei ira yadua me vukei ira na vakaleqai tu.

• Ena so na gauna eda dau osooso vakalevu ena veika me baleti keda ga ka da sega ni kila kina na nodra gagadre o ira era tu wavoliti keda. Ena nona itukutuku “Na Mata me Raica,” a railesuva o Sisita Michelle D. Craig na italanoa ni nona dolava na matana e dua na cauravou na Kalou (raica na 2 Tui 6:15–17). Na cava eda vulica mai na itukutuku oqo? Na cava eda rawa ni vulica mai na itukutuku tale eso a wasea o koya me baleta na kilai ni nodra gagadre na tani ka dolele yani vei ira? Sa rawa talega vei ira na lewe ni kalasi se kuoramu mera wasea na gauna a vakila kina e dua na nodra gagadre ka qaravi ira. Ena gauna cava eda sa raica kina na nodra gagadre na tani ka qaravi ira? Na cava eda vakila ni da ciqoma se solia na veiqaravi vakaoqo?

• Era sa kila vinaka tiko beka na lewe ni nomu kalasi se kuoramu na sala mera vakayacora rawa kina na nodra itavi mera vukei ira na vakaleqai tu? Sa rawa moni veivosakitaka vata na Mosaia 4:16–21 kei na 18:8–10, vakakina na iwasewase veiganiti ni iVoladusidusi Raraba (10.2.2 me baleta na kuoramu ni Matabete i Eroni se 11.2.2 me baleti ira na goneyalewa). Na cava eda vakauqeti meda cakava mai na noda vulica na vei ivurevure oqo? Vakasamataka mo tuvanaka na sala eso moni cakacaka vata kina ka dodoliga yani vei ira era vakaleqai tu ena nomu kalasi se kuoramu, tabanalevu, se itikotiko raraba. Na vidio ena “iVurevure Veitokoni” e vakarautaka eso na vakasama. Me baleta na madigi ni veiqaravi ena nomu iwasewase, raica na JustServe.org.

vakaitavi tiko na goneyalewa ena dua na cakacaka ni veiqaravi

Na noda veiqaravi Va-Karisito e rawa ni vakalougatataka na nodra bula era tiko voliti keda.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Maciu 25:31–45; Jemesa 1:27; Mosaia 2:17; Alama 34:27–28; Momani 8:35–39; Vunau kei na Veiyalayalati 104:14–18 (Na bibi ni nodra vukei na dravudravua kei na vakaleqai)

• Jeffrey R. Holland, “Eda Sa Sega Li ni DravudravuaKecega?,” Liaona, Nove. 2014, 40–42

• “Michelle’s Story,” “Caring for the Poor and Needy,” “I Was a Stranger: Love One Another,” “Fast Offerings: Are We Not All Beggars” (vidio), ChurchofJesusChrist.org

Veivakavulici ena iVakarau ni iVakabula

Na ivolanikalou kei na nodra vosa na parofita kei na iapositolo ena gauna oqo era ivurevure ni dina eda vakavulica. Ena veimadigi kece sara o donumaka, vakauqeti ira o vakavulica ki na vosa ni Kalou me veituberi, sauma na taro, ka veitokoni.