vakasaqa o tina kei iratou na luvena goneyalewa

8 ni Okotova

Ena Vukei Au Vakacava na Kosipeli i Jisu Karisito meu Vaqaqacotaka na Noqu Matavuvale?

Efeso

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na iToko ni Goneyalewa se na iToko ni Kuoramu ni Matabete i Eroni. Me, ikuri ni veivakasalataki ena bisinisi vakatabakidua ni kuoramu se kalasi, o na rairai via veivosakitaka na vosa kei na ulutaga eso mai na koniferedi raraba. E na rawa ni veivuke na taro eso oqo.

• Na ulutaga se itukutuku cava soti e vakaibalebale vei keda? Na cava e vakaqaqacotaka na noda vakabauti Jisu Karisito?

• Na cava e vakaqaqacotaka na noda ivakadinadina me baleti ira na parofita bula? Na cava eda sa vakauqeti me da cakava ena vuku ni veika eda sa vulica se vakila?

• Na cava e gadrevi me da na cakava vaka kuoramu se kalasi me da na nanuma kina ka vakayacora na ivakasala eda sa rogoca ena koniferedi raraba?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Eso na tamata ena nomu kalasi se kuoramu era lewena na matavuvale kaukauwa, ka veilomani ka susugi cake kina na vakabauta kei na bula vakayalo. Eso beka era na tu duadua beka ena nodra sasaga mera bulataka na kosipeli, ka so era na sotava beka na veileti kei na mosi ni yalo mai vale. Ia e sega ni dua ena nomu kalasi se kuoramu e sa taucoko na nona matavuvale, ka galala mai na bolebole. Kei na tamata kecega sa rawa ni rawata na kaukauwa i Jisu Karisito, ka rawa ni vakabula ka vaqaqacotaka na matavuvale.

Na iVakabula e via vakalougatataka na matavuvale. Ena so na gauna na sala e cakava kina oqo o Koya oya ena loloma kei na ivakaraitaki ni dua na tamata gone e segata tiko me muri Koya ka bulataka na Nona kosipeli. Nio vakavakarau mo vakavulici ira na itabagone me baleta na kaukauwa e vakarautaki tu vei ira kei na nodra matavuvale mai vei Jisu Karisito, vakasamataka vakatitobu na ivakavuvuli eso ena Efeso ka rawa ni vukei keda me da vaqaqacotaka na veimaliwai vakamatavuvale. Sa rawa talega mo railesuva “Na Matavuvale: Ai Vakaro ki Vuravura Raraba” (ChurchofJesusChrist.org).

Vulica Vata

Ni oti na soli ni gauna ki na lewe ni kalasi se kuoramu mera wasea na veika a vakavulica vei ira na Yalo ena macawa oqo ni ra vulica na Efeso, vakasaqara na sala eso me vakatakilai kina na ulutaga ni sala e rawa ni vukei keda kina o Jisu Karisito me vaqaqacotaka na noda matavuvale. Me ivakaraitaki, o rawa ni sureti ira na itabagone mera raica ka wasea na veitikina ena Efeso ka tu kina na ivakavuvuli e rawa ni da vakayagataka me vaqaqacotaki kina na veimaliwai vakamatavuvale. Eso na ivakaraitaki e rawa ni oka kina na Efeso 2:19–22; 3:14–19; 4:1–3, 25–26, 29–32; 5:1–2; 6:1–4. Ena vakalougatataka vakacava e dua na matavuvale na ivakasala ena veitikina oqo? E sa veivakalougatataki vakacava na iVakabula kei na Nona kosipeli ena noda itikotiko? Oqo eso tale na ikuri ni vakasama ni itaviqaravi e semati kina ulutaga oqo.

• Kevaka o gadreva mo veivosakitaka na ivakaro mo “vakarokorokotaki rau na tamamu kei na tinamu” (Efeso 6:2), sa rawa mo tekivu ena nomu tarogi ira na lewe ni kalasi se kuoramu ena ibalebale ni vakarokoroko vei ira. Sa rawa vua e dua me wasea na ivakamacala mai na dua na ivolavosa se na iDusidusi ki na iVolanikalou (scriptures.ChurchofJesusChrist.org). Sureti ira na itabagone me ra veivosakitaka na sala e rawa ni ra vakayagataka kina na ivakaro oqo ena nodra dui bula. E rawa talega ni veivakauqeti me vakadikevi na sala e rokova kina o Jisu Karisito na Tamana mai Lomalagi kei Tinana, o Meri (raica, me ivakaraitaki, na Luke 2:41–52; iVakadewa i Josefa Simici, Joni 2:4 [ena Joni 2:4,footnote a]; Joni 8:29; 19:25–27). Na cava eda rawa ni vulica mai na ivakaraitaki i Jisu ka rawa ni vaqaqacotaka na noda veimaliwai kei ira na noda itubutubu?

• Ena rawa ni veivuke me veivosakitaki na iyaya cava e gadrevi me tara kina e dua na vale kaukauwa. Na cava eso na ka e gadrevi me tarai cake kina e dua na matavuvale kaukauwa? Me tiki ni veivosaki oqo, e rawa ni o wasea na itukutuku oqo mai vei Elder L. Whitney Clayton: “Na ka e vakabetena vakalevu oya na ukutaki ni loma ni yalodra na lewena, sega ni yaya vakataki koya.” (“Na Veitikotiko Totoka Vakaoti,” Liaona, Me 2020, 107–9). Sa rawa talega mo veivosakitaka na va na vakatutu a solia o Elder Clayton ena nona itukutuku me baleta na sala me tarai cake kina “na vuvale totoka.”

• “Na Matavuvale: Ai Vakaro ki Vuravura Raraba” e tiko kina na yalayala oqo: “Ena qai kune na marau ena bula vakamatavuvale ni sa yavutaki ena ivakavuvuli ni Turaga o Jisu Karisito.” E bulia vakacava na yavu ni dua na matavuvale mamarau na ivakavuvuli ni iVakabula? Na ivakaro ki na matavuvale kei na vei ivolanikalou ena ruku ni “iVurevure Veitokoni” e vakarautaka na ivakaraitaki eso. Era na veivukei vakacava vakai ira na lewe ni matavuvale mera bulataka na ivakavuvuli oqo?

• E rawa me ra sarava na lewe ni kalasi na vidio “Through Small Things,” koya eratou veitalanoataka e tolu na veitacini me ratou ciqoma na nona veisureti na bisopi me ratou vakasamataka eso na gaunisala me vakatabui cake kina na nodratou loma ni vale. E ratou vakalougatataki vakacava na vuvale mai na nodratou ivalavala na itabagone oqo? Na cava ena vakatabuia e dua na loma ni vale? Nanuma mo sureti ira na itabagone me ciqoma talega na veisureti vata mai vei bisopi. Mera na vukei ena vakanananu oqo, e rawa mo veitalanoataka kei ira na veitaro ena vidio: “Na cava o na cakava me rawa ni tiko kina na Yalotabu ena nomu vale?”

era vuli vata tiko na matavuvale

Na ivakavuvuli i Jisu Karisito sa yavu ni bula marau ena bula vakamatavuvale.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Maciu 5:21–24, 38–42; 6:14; 7:1–5; 22:36–39; 3 Nifai 18:21; Moronai 7:33; Vunau kei na Veiyalayalati 18:10–13

• Henry B. Eyring, “Na iTikotiko e Vakaicili Kina na Yalo ni Turaga,” Liaona, Me 2019, 22–25

• “Loloma e Vale,” “Vale Me Vaka mai Lagi,” Serenilotu, naba 178, 181

Veivakavulici ena iVakarau ni iVakabula

Kevaka era kidava na itabagone ni o vakabauti ira, ena tubu na nodra yalodei me baleta na kedra ituvaki vakalou, ka ra na vakidacalataki iko ena veika era na rawata. Vukei ira mera raica rawa na vanua e kila tu na Tamada Vakalomalagi ni rawa mera yacova.