itabagone e taubale tiko

22 Okotova

Au Na Tudei Tiko Vakacava ena Noqu Yalayala vei Jisu Karisito?

1 kei na 2 Cesalonaika

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Na cava so e sotavi wale tikoga oqo e sa vakaqaqacotaka na noda ivakadinadina?

• Vukei ira era gadreva tu na veivuke. O cei e gadreva na noda veivuke kei na masu? Na cava eda sa vakauqeti kina me da na vakayacora mera vukei kina?

• Sureta na tamata kecega mera ciqoma na kosipeli. E rawa vakacava meda na vu ni rarama kivei ira na lewe ni matavuvale se itokani ka ra sega ni duavata kei na noda vakabauta?

• Vakaduavatataki ni matavuvale ki na tawamudu. Eda vakaraitaka vakacava na loloma kei na veitokoni levu cake kina noda matavuvale ka vakayaco veisau vinaka ena noda itikotiko?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

E vuqa vei keda eda kila e dua a rairai yalodina sara vei Jisu Karisito ena dua na gauna ia sa lutu tani mai na nodra vakabauta. Sa matau tu me dau vakananumi, “E rawa beka ni yaco vei au oya?” E vakacaucautaki ira na Yalododonu mai Cesalonaika o Paula ena nodra yalodina ia a vakauqeti me vakasalataki ira me baleta na ivakavuvuli lasu kei na veivakayarayarataki tale eso e rawa ni vakamalumalumutaka na nodra vakabauta. Se vakacava sara na kaukauwa ni noda dinata na iVakabula ena gauna oqo, ena levu sara na ka eda rawa ni cakava meda “tinia vinaka na ka sa sega ena [noda] vakabauta” (1 Cesalonaika 3:10).

Nio masulaki ira na tamata ena nomu kalasi se kuoramu, vakarogoca na veivakauqeti ni Turaga e soli tiko mai. Na cava o nanuma ni na vukei ira mera yalodina tikoga vua na iVakabula se cava ga na veisaqasaqa era na sotava? Na cava e sa vukei iko? Nio vakavakarau mo veivakavulici, e rawa nio railesuva na itukutuku nei Elder Dale G. Renlund “Yalayala Tawa Yavalati Rawa vei Jisu Karisito” (Liaona, Nove. 2019, 22–25) me ikuri ni 1 kei na 2 Cesalonaika.

Vulica Vata

Me vukei ira na itabagone mera railesuva na veika era sa wilika ena 1 kei na 2 Cesalonaika ka vakaveikilaitaka na ulutaga ni tudei tiko ena noda yalodina vua na iVakabula, sa rawa moni wilika vata na 2 Cesalonaika 2:1–3. Me veivosakitaki na ibalebale ni vosa na “vuki tani”. Vakauasivi, na cava na ibalebale ni dua na tamata me vuki tani mai vei Jisu Karisito? E rawa nio veidutaitaka vata na vosa oqo kei na veimalanivosa tale eso a vakayagataka o Paula, me vaka na “tu dei tiko vua na Turaga” (1 Cesalonaika 3:8)) ka “kakua ni oca ena cakacaka vinaka” (2 Cesalonaika 3:13). Sa rawa mo qai railesuva na 1 Cesalonaika 5:15–23. Ena vukei keda vakacava na muria na ivakasala nei Paula ena veitikina oqo meda kakua kina ni vuki tani mai na noda vakabauti Jisu Karisito—ena gauna mada ga eda sotava kina na veisaqasaqa? Vakayagataka na vei itaviqaravi ka tarava me vukea na lewe ni kalasi se kuoramu mera tudei tiko ena nodra yalodina vua na iVakabula.

• E rawa ni veivakauqeti meda vuli mai na nodra ivakaraitaki eso tale era a sega ni yavalati rawa ena nodra yalodina vei Karisito. Me vakataka, sa rawa moni vulica vata na nodra ivakaraitaki na Anitai-Nifai-Liai, era sa “tamata kila, yalokaukauwa ka yalo vakarerevaki” ia “era sa sega ni lutu tani tale” ni ra sa “saumaki vua na Turaga” (Alama 17:14; 23:6–8). Na cava e vakatura tiko na Alama 24:8–18 me baleta na vuna era yalodina tikoga kina? Na digidigi bibi cava era a cakava? A vukei ira vakacava na iVakabula? Na ikuri ni ivakaraitaki e rawa ni kune ena itukutuku nei Elder Dale G. Renlund “Yalayala Tawa Yavalati Rawa vei Jisu Karisito.” Sa rawa vei ira e vica na itabagone mera wilika eso na ivakaraitaki oqo ka wasea na veika era sa vulica me baleta na dina tiko vei Karisito. Eda sa dina tiko vakacava vua na Turaga se cava ga na noda malumalumu?

• Ena noda sasaga me vaqaqacotaka na noda vakabauta, e veivuke me da kila na vei kaukauwa era dau segata me vakamalumalumutaka. Na raivotu nei Liai baleta na vunikau ni bula e vakamacalataka tiko eso na kaukauwa oqo. E rawa beka nio vakaraitaka e dua na iyaloyalo ni raivotu (raica na iVola ni Yaloyalo Vakosipeli [2009], naba 69) ka railesuva vata na kena matailalai, e tiko ena 1 Nifai 8:10–34. Ena raivotu, na cava era tarova tiko na tamata mai na nodra marautaka tiko na vua ni vunikau? Na cava a vukei ira na tamata mera yacova na vunikau ka tiko ga e kea? Na cava era vakatakarakarataka na veika oqo ki na noda bula?

• Ena nona itukutuku “Kaukauwa me Vorata na Vu ni ca” (Liahona, Nove. 2019, 110–12), a tuva o Elder Peter M. Johnson e tolu na sala e dau tovolea kina o Setani me vakamalumalumutaki keda. Sa rawa mo lesi ira yadua na itabagone mera wilika e dua vei ira oqo ka wasea ki na kalasi se kuoramu na ivakaraitaki ni sala e vakayagataka kina o Setani nai yaragi oqo me baleti ira na itabagone nikua. Mera qai wilika yadua e dua vei iratou na va na vakatutu nei Elder Johnson me vorati kina na ivadi ni meca ka wasea na veika era sa vulica.

Jisu Karisito

Be Not Afraid [Dou Kakua ni Rere], mai vei Michael Malm

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• 1 Nifai 2:9–10; Alama 17:1–3; Ilamani 5:12

• Jeffrey R. Holland, “Kemuni na Turaga, Au Sa Vakabauta,,” Liaona, Me 2013, 93–95

• Neil L. Andersen, “Kakua Ni Biuti Koya,” Liaona, Nove. 2010, 39–42

• Becky Craven, “Na Qaqarauna kei na Vakawelewele,” Liaona, Me 2019, 9–11

Veivakavulici ena iVakarau ni iVakabula

Ena vuqa na gauna, ena veiganiti me ra sureti na vuli me ra veivukei vakai ira ena kena kunei na isau ni nodra taro. Nio vakauqeti mai vua na Yalo, ona nanuma beka mo vakayacora oqo kevaka sara mada ga o nanuma nio kila na kena isau.