vota tiko na sakaramede na cauravou

12 Noveba

Au Na Toro Voleka Vakacava vei Jisu Karisito ena Cakacaka Vakalotu kei na Veiyalayalati Tabu?

Iperiu 7–13

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Eda sa toso voleka vakacava vua na iVakabula? Eda sa saga tiko vakacava meda vakataki Koya vakalevu cake?

• Vukei ira era gadreva tu na veivuke. O cei e sa tiko e na noda vakananu e na dua na gauna lekaleka oqo? Eda na vukei ira vakacava na vei tamata yadua oqo?

• Sureta na tamata kecega mera ciqoma na kosipeli. Eda na sauma vakacava na nodra taro na noda itokani me baleta na Lotu ena sala e vaqaqacotaka na nodra vakabauta na iVakabula?

• Vakaduavatataki ni matavuvale me tawamudu. Na cava eso na sala e rawa ni da sema vakavinaka cake kina vei ira na isema ni lewe ni matavuvale, me vakataki ira na tubuda kei na tavaleda?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ena vica vata na senijiuri, o ira na luvei Isireli, ka dau vakatokai ena so na gauna mera kai Iperiu, era a vakaitavi vagumatua ena cakacaka vakalotu ka semati ki na valecavu kei na lawa i Mosese. Ia e vuqa vei ira era sega tu ni kila ni veika oqo era sa “ivakatakarakara ni veika mai lomalagi”—“na ivakatakarakara ni veika vinaka me na muri mai” (Iperiu 9:23; 10:1). Na cakacaka vakalotu taucoko a nakiti me vakavulici ira me baleti Jisu Karisito. Oqo na ka e vakamacalataka o Paula ena nona iVola vei ira na Iperiu. Sa ka bibi talega vei keda nikua na nona itukutuku baleta ni tu talega vei keda na veicakacaka vakalotu tabu ena inaki vata ga. Sa na yaga beka meda tarogi keda ena veitaro oqo: Era sa vukei keda tiko beka na cakacaka vakalotu oqo meda nanumi Jisu Karisito? E levu tale beka na ka eda rawa ni cakava meda vakila kina na kaukauwa i Jisu Karisito ena cakacaka vakalotu ni kosipeli? Se eda, vakataki ira na Iperiu ena gauna eliu, eda sega tu ni kila na kedrai balebale titobu?

Vakasamataka vakatitobu na veitaro oqo ni o wilika na Iperiu 7–13 ni o vakavakarau mo vakavulica na sala e kauti keda vakavoleka kina vei Jisu Karisito na cakacaka vakalotu kei na veiyalayalati. Sa rawa talega mo vulica eso na itukutuku ni koniferedi raraba e cavuti ena ituvatuva oqo.

Vulica Vata

Me vukei ira o vakavulica mera raica na sala e rawa nira toro voleka kina vei Jisu Karisito mai na cakacaka vakalotu kei na veiyalayalati ni Nona kosipeli, sa rawa mo sureti ira mera vola eso na cakacaka vakalotu ni kosipeli kei na nodra veiyalayalati veisemati ena vava ni volavola (raica Ulutaga Vakosipeli, “Cakacaka Vakalotu,” “Veiyalayalati,” topics.ChurchofJesusChrist.org) Na cava e vakavulica vei keda na cakacaka vakalotu kei na veiyalayalati oqo me baleti Karisito kei na Nona Veisorovaki? Na itukutuku nei Elder David A. Bednar ena “iVurevure Veitokoni” e vakarautaka na ibalebale ni cakacaka vakalotu kei na veivakararamataki bibi tale eso. Na itaviqaravi vakaoqo ka tarava ena rawa talega ni veivuke.

• Sa rawa mo sureti ira na itabagone mera wilika na Vunau kei na Veiyalayalati 84:19–22 ka veivosakitaka na taro vakaoqo: Na cava na ibalebale ni “kaukauwa ni bula vakalou”? E sa vukei keda vakacava na cakacaka vakalotu kei na veiyalayalati meda vakila na kaukauwa oya? Na veisau cava soti era kauta mai na cakacaka vakalotu kei na veiyalayalati kina noda bula? Era na vukei keda vakacava meda sema tikoga vua na iVakabula? Me vukea na saumi ni taro oqo, sa rawa ni ra wilika na itabagone na imatai ni va na parakaravu ni itukutuku nei Elder Kent F. Richards “Na Kaukauwa Vakalou” (Liaona, Me 2016, 118) se na itukutuku nei Elder Bednar “Me Tara na Vale Oqo ki na Yacaqu” (Liaona, Me 2020, 84–87), vakabibi na wase “Mai Loma ki Tuba.”

• Vakasamataka mo tarogi ira o vakavulica ena sala mera vakamacalataka kina na cakacaka vakalotu ni sakaramede vua e dua e sega ni kila e dua na ka me baleta. Na iwase ena “Veika Sotavi kei na iVakadinadina” ena itukutuku nei Elder Taniela B. Wakolo “Na Cakacaka Vakalotu ni Veivakabulai ena Kauta Mai vei Keda na Rarama Vakasakiti” (Liaona, Me 2018, 39–41)e vakarautaka na kena ivakaraitaki. Era na rawa ni kunea na itabagone na ivakavuvuli bibi ena vidio na “Always Remember Him” (ChurchofJesusChrist.org). E kauti keda vakavoleka vakacava vei Jisu Karisito na sakaramede? Na madigi cava soti e tiko vei keda meda vakavulici ira kina eso tale me baleta na ka oqo?

• Na railesuvi ni lima na vakatutu ena itukutuku nei Elder Peter F. Meurs “Sa Rawa ni Vukei Keda na Sakaramede Meda Vakatabui” (Liaona, Nove. 2016, 85–87) e rawa ni vukei ira na itabagone mera kila na sala mera vakavakarau vakavinaka cake baleta sakaramede. Se, kevaka e dua na itabagone e vakarautaki koya me ciqoma na nona edaumeni, raica vata na iwase ni ulutaga “About the Temple Endowment” ena temples.ChurchofJesusChrist.org. Veivosakitaka na sala e rawa ni vukei keda kina na vei cakacaka vakalotu tabu oqo kei na kena veiyalayalati veisemati me kauti keda vakavoleka vua na iVakabula.

• Sa rawa mo vola na vosa Sakaramede, Papitaiso, kei na Valetabu ena papa. Ena ruku ni vosa yadua, sureti ira na itabagone me a vola kina na veiyalayalati eda cakava. Na idusidusi e kune ena “iVurevure Veitokoni” e rawa ni veivuke. Veivosakitaka vata na sala era na vukei keda kina na veiyalayalati oqo meda toro voleka kina vei Jisu Karisito.

• E rawa ni o wasea vakailawalawa na nomu kalasi se kuoramu ka lesia na ilawalawa yadua me railesuva e dua na iwase ni itukutuku nei Elder Ronald A. Rasband “Tutaka Tiko na Noda Yalayala kei na Veiyalayalati” (Liaona, Nove. 2019, 53–56) se itukutuku nei Elder D. Todd Christofferson “Na Cava na Vuna Me Salatu Kina ni Veiyalayalati” (Liaona, Me 2021, 116–19). Vakayaloqaqataki ira mera wasea na veika era sa vulica ena sala e vaqaqacotaka kina na nodra veiwekani kei Jisu Karisito na maroroi ni nodra veiyalayalati.

goneyalewa era taubale e taudaku ni valetabu

Na veicakacaka vakalotu tabu ni kosipeli e kauta mai na “kaukauwa ni bula vakalou” kina noda bula (raica na Vunau kei na Veiyalayalati 84:19–22).

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito e na nodra cakacakataka na nodra veivakauqeti.

iVurevure Veitokoni

• Mosaia 18:8–10 (Veiyalayalati ni Papitaiso)

• Moronai 4–5 (Veiyalayalati ni Sakaramede)

• E vakavulica o Elder David A. Bednar ni: “Na cakacaka tabu vakalotu sa usutu ni kosipeli ni iVakabula ka sa cakacakataki kina na noda gole Vua ka me kunei na sucu tale vakayalo. Na cakacaka vakalotu sa cakacaka tabu e vakayalo na kedra inaki, bibi tawamudu, ka semati ki na lawa kei na ivakaro ni Kalou. …

  Na cakacaka vakalotu ni veivakabulai kei na bula vakacerecerei e qaravi ena Lotu vakalesui mai ni Turaga e uasivi cake mai na soqoni ni vakatakarakara se ivakatakilakila. Ia, era sa sala vakadonui vakalawa e drodro mai kina na veivakalougatataki kei na kaukauwa kei lomalagi ki na noda dui bula yadua. …

  “Na cakacaka vakalotu e ciqomi ka rokovi ena dodonu sa ka bibi kina kena rawati na kaukauwa ni bulavakalou kei na veivakalougatataki kece e rawati mai na Veisorovaki ni iVakabula” (“Ka na Bokoci na Nomu iValavala Ca,” Liaona, Me 2016, 59–60).

Veivakavulici ena iVakarau ni iVakabula

Nio sureti ira o vakavulica mera bulataka na ivakavuvuli dina, ko sa vukei ira tiko mera vakatetea yani na vuli kina loma ni nodra veivale kei na bula ni veisiga.