tobu ni Papitaiso

26 ni Noveba

Au na Vukei Ira Vakacava na Noqu Qase e Liu mera Toro Voleka vei Jisu Karisito?

1 kei na 2 Pita

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava kina na veika sa veivosakitaki.

• Bulataka na kosipeli. Na ulutaga cava soti eratou sa veitalanoataka na matabisopi ena noda bose ni matabose ni itabagone ni tabanalevu? Na cava soti eda na rawa ni cakava vakalasi se kuoramu ka yavutaki ena veitalanoa oqori?

• Vukei ira era gadreva tu na veivuke. Eda na dodoliga yani vakacava vei ira na tamata ena sala vaKarisito ni da raica e dua na gagadre ka sega ni kila na ka meda kaya?

• Sureta na tamata kecega mera ciqoma na kosipeli. Na cava eda sa kunea ena kosipeli i Jisu Karisito e kauta mai vei keda na reki? E rawa vakacava nida wasea na reki oqori vei ira tale eso?

• Vakaduavatataki ni matavuvale ki na tawamudu. Na cava eda cakava tiko me kunei kina na yacadra na noda qase e liu era gadreva tu na cakacaka vakalotu ni valetabu? Na cava eda rawa ni cakava meda vukei ira tale eso mera kunea na yacadra na nodra qase e liu?

Ena itinitini ni lesoni, ke veiganiti, cakava na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti e a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Na cava ena yaco vei ira e bilioni vakacaca na tamata era sa mate ka sega na nodra madigi dina mera rogoca na kosipeli i Jisu Karisito se ciqoma na cakacaka vakalotu ni veivakabulai? E rawa nida kunea na idusi ni kena isau ena 1 Pita 3:18–20; 4:6, ka tukuna kina o Pita na kena vunautaki na kosipeli vei ira na mate. Na Vunau kei na Veiyalayalati 138 sa qai cereka na dina taucoko—o ira noda qase e liu e rawa nira lako vakataucoko vei Karisito kevaka era vakabauti Koya ka ciqoma na Nona kosipeli ka da vakayacora na cakacaka vakalotu e vakarautaki tu vei ira ena valetabu. Na veivakalougatataki oqo e gadrevi kina vei keda—na nodra kawa ka tu vei keda na kosipeli—me vakasaqara na yacadra, lako ki na valetabu, ka ciqoma na cakacaka vakalotu ni veivakabulai ena vukudra.

Na cava soti o sa sotava ena nomu vukei ira na nomu qase e liu me ra toro voleka yani vei Karisito? O na vukei ira vakacava o vakavulica mera marautaka vakalevu cake na cakacaka ni tuva kawa kei na valetabu ka yalodei vakalevu cake ena nodra rawata me ra cakava? Nio vakavakarau, sa rawa mo wilika na itukutuku nei Elder Dale G. Renlund “Cakacaka ni Valetabu kei na Tuva Kawa: Veivauci kei na Veivakabulai” (Liaona, Me 2018, 46–49).

Vulica Vata

Era na sauma vakacava na lewe ni nomu kalasi se kuoramu vua e dua e lomatarotarotaka na sala era rawa ni vakabulai kina na tamata vinaka ka sega na nodra madigi me ra ciqoma na kosipeli? Na cava era raica ena 1 Pita 3:18–20; 4:6 me vukea na saumi ni taro oqo? Na vidio oqo “Will I Do My Part?,” Elder Enrique R. Falabella e vakarautaka eso na ikuri ni vakasama.  Sa rawa mo tomana tiko na nomu veivosaki ena dua se sivia na vei itaviqaravi ka tarava.

• Na ivakavuvuli ni nodra vueti na mate e kunei duadua ga ena Lotu i Jisu Karisito ni Yalodododnu Edaidai. Sureti ira na lewe ni kalasi se kuoramu mera vulica na Vunau kei na Veiyalayalati 138:25–39 vaka tamata yadua se ilawalawa ka wasea na veika era vulica (raica na “iVurevure Veitokoni” me baleta na ikuri ni ivolanikalou ena ulutaga oqo). Na cava era vakatututaka na veitikina oqo baleta na loma ni Tamada Vakalomalagi vei ira taucoko na Luvena? E vukei ira vakacava na noda qase e liu na papitaiso ena vukudra na mate? E vukei keda vakacava oqo meda toro voleka yani vei Karisito ka vakalevutaka na noda vakabauti Koya?

• Na cava e rawa ni vakauqeti ira na itabagone me ra vakaitavi vakalevu cake ena cakacaka ni valetabu kei na tuva kawa? E rawa beka nira sarava e dua se ruarua na vidio e kune ena “iVurevure Veitokoni” ka vakasaqara na gaunisala e rawa me vakalougatakataki ira kina na cakacaka ni valetabu kei na tuva kawa. Mera vakasaqara na veivakalougatataki sa yalataki tu ena lisi vakadigo ena itukutuku nei Elder Dale G. Renlund “Cakacaka ni Tuva Kawa kei na Valetabu: Veivauci kei na Veivakabulai.” Sureti ira mera wasea na veivakalougatataki cava e vakaibalebale vei ira kei na vuna. Sa rawa talega mo veivosakitaka eso na ivakatatao e rawa ni tarovi keda mai na vakaitavi ena cakacaka ni valetabu kei na tuva kawa. Ena vukei keda vakacava na iVakabula meda vorata rawa na veivakataotaki oqo?

• Kevaka era rawa ni vakayagataka eso nai yaya vakalivaliva na lewe ni nomu kalasi se kuoramu, ena rawa mo taura e dua na gauna mo vakaraitaka vei ira na sala sa vakarawarawataka kina na Turaga na nodra kunei na qase e liu era gadreva na cakacaka vakalotu ni veivakabulai (raica na “iVurevure Veitokoni”). E rawa nio sureta e dua na daunivakasala ni cakacaka ni valetabu kei na tuvakawa ni tabanalevu me vukei ira na itabagone mera kila vinaka na ivurevure e tiko. E rawa talega nio vakayaloqaqataki ira na itabagone me tuvana mera vakadikeva na ivurevure e tiko mai vale ka qai ripote lesu mai ena dua tale na soqoni mai muri.

veivosaki tiko na goneyalewa

Nida vakayacora na veicakacaka vakalotu tabu ena valetabu, eda veivuke me vakarautaki na veivakalougatataki ni kosipeli vei ira era sa mate.

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa ni ra wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Malakai 4:5–6; Maciu 16:18–19; Joni 5:25; 1 Korinica 15:29; Vunau kei na Veiyalayalati 137:7–9 (Na ivakavuvuli ni nodra vakabulai na mate)

• “The Promised Blessings of Family History 1” kei na “The Promised Blessings of Family History 2” (vidio), ChurchofJesusChrist.org

• Na epi ni Vunikau ni Matavuvale (gadrevi na itabagone mera sainicuru kina mai na nodra akaude ni Lotu)

• RootsTech (Rawa mera sarava na itabagone eso na iwase ni koniferedi oqo ena monalivaliva.)

• FamilySearch.org (Sa rawa tale ga mo sikova na FamilySearch.org/discovery ka vakadikeva vata na vei itaviqaravi oqo.)

Veivakavulici ena iVakarau ni iVakabula

Nio sureti ira na itabagone me ra veivakavulici, taura na gauna mo vukei ira mera vakarau vakavinaka. Vakamacalataka na veika o cakava mo vakavakarau kina mo veivakavulici. Ena sala oqo o na vukei ira tiko na gone sega me baleta e dua ga na lesoni ia me baleta e dua na gauna ni bula taucoko ni vakatavulica na kosipeli ena ivakarau ni iVakabula.