iVakatakarakara kei Karisito

10 ni Tiseba

Na Cava e Cakava o Jisu Karisito me Rawati Kina nai iTuvatuva ni Tamada Vakalomalagi?

Ai Vakatakila 1–5

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava na veika sa veivosakitaki.

• Bulataka na kosipeli. Eda raica vakacava na liga ni Turaga ni cakacaka tiko ena noda bula?

• Nodra vukei o ira era gadreva tu na veivuke. E rawa nida veitokoni vakacava vakai keda ena veika eda sotava tiko?

• Sureta na tamata kecega me ra ciqoma na kosipeli. E rawa vakacava meda vakayagataka vakavinaka cake na tekinolaji me iyaya ni cakacaka me wasei kina na kosipeli?

• Vakaduavatataki ni matavuvale me tawamudu. Na cava eda sa cakava tiko me vukea na noda matavuvale me lako mai vei Karisito?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaka e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ena raivotu, a raica o Joni na Dauvakatakila e dua na ivola a sa “sega e dua mai lomalagi, ka sega talega e vuravura, se e rukui vuravura” sa kilikili me tevuka, a sa tagi kina ko koya (raica nai Vakatakila 5:3–4). Na ivola e matataka na “cakacaka ni Kalou,” oka kina na Nona ituvatuva me baleta na noda tawamate rawa kei na bula tawamudu (raica na Vunau kei na Veiyalayalati 77:6; Mosese 1:39). Ia ena raivotu nei Joni, a kune e dua na Lami “ni sa yaga me kauta na ivola, me cecega tale ga na kena drega” (Vakatakila 5:9). Na itukutuku lagilagi oqo e vakavuna me “oba vakatini na udolu, ka vuqa tale na udolu” na agilosi mera lagasere ka kaila ena reki (Vakatakila 5:11). O Jisu Karisito, na Lami ni Kalou, “sa voli keda me nona na Kalou ena [Nona] dra” (Vakatakila 5:9) ka yaco rawa kina na veivakalougatataki ni ituvatuva nei Tamada Vakalomalagi.

Vakasamataka vakatitobu na ka sa cakava vei iko na iVakabula. O sa bau vakila nio vakataki ira ena raivotu nei Joni ni “ ra sa cuva sobu ka vakarokoroko vei koya”? (Ai Vakatakila 5:14). Vakasamataka na sala o rawa ni vukei ira kina na lewe ni nomu kalasi se kuoramu me ra kila vakavinaka cake na uto ni itavi nei Jisu Karisito ena ituvatuva nei Tamada Vakalomalagi. Me ikuri ni i Vakatakila 1–5, sa rawa talega mo wilika na 2 Nifai 9; “Se Bula na Karisito: Nodra iVakadinadina na iApositolo” (ChurchofJesusChrist.org); kei na itukutuku nei Elder Ulisses Soares “Jisu Karisito: Na Dauveiqaravi ni Yaloda” (Liaona, Me 2021, 82–84).

Vulica Vata

O ira na lewe ni nomu kalasi se kuoramu e rawa nira marautaka me ra vakataka e dua na dau caka i yaloyalo yavala ka kerei me cakava e dua nai yaloyalo ni raivotu nei Joni ena i Vakatakila 5. Solia vei ira e vica na miniti mera railesuva na wase ka vakatulewataka na tikina cava era na vinakata me cakava na kenai yaloyalo. Na cava era nanuma ni na gauna veilauti duadua? Ena vukea vakacava na italanoa oqo na tarai cake ni vakabauta na iVakabula? Me tomani tiko na kena vukei na nomu kalasi se kuoramu mera vulica na itavi i Jisu Karisito ena ituvatuva ni veivakabulai nei Tamada Vakalomalagi, oqo e vica na vakatutu:

• E rawa mo vola na veiulutaga oqo ena papa: Bula Taumada, Bula Vakayago, kei na Bula ni Oti na Mate. Sureti ira na itabagone mera railesuva na veitiki ni ivolanikalou ena ruku ni “iVurevure Veitokoni” me kilai kina na sala sa rawati kina na ituvatuva nei Tamada ena ilesilesi ni iVakabula ena Nona bula taumada, ena Nona bula vakayago, ka oti Nona Tucaketale. Sa rawa mera vakalekalekataka na veika era sa vulica ena ruku ni kena ulutaga donu ena vava ni volavola. Solia vei ira na lewe ni nomu kalasi se kuoramu e dua na madigi me ra wasea na lomadra ena veika sa cakava vei ira na iVakabula.

• Me vukei ira na itabagone o vakavulica me ra kila vakavinaka cake na veika a cakava o Jisu Karisito me rawati kina na ituvatuva nei Tamada Vakalomalagi, droinitaka e dua na gaunisala ena papa me matataka na noda ilakolako lesu vua na Tamada mai Lomalagi. Droinitaka na veivakataotaki ena sala ka vakatokai me mate vakayago kei na mate vakayalo. (Kevaka e gadrevi, e rawa nira wilika na itabagone na ivakamacala ena “Mate Vakayago” kei na “Mate Vakayalo” ena iDusidusi ki na iVolanikalou [scriptures.ChurchofJesusChrist.org]). Sa vakarautaka vakacava vei keda na iVakabula na sala meda vorata rawa kina na veivakataotaki oqo? (raica na 2 Nifai 9:7–10). E rawa nira railesuva na itabagone na itukutuku nei Elder Ulisses Soares “Jisu Karisito: Na Dauveiqaravi ni Yaloda” ka vola na iyatuvosa eso mai na vosa me toka tikiva na sala e vakaraitaka nai valavala ni nona vukei keda o Jisu me da lesu tale vua na Kalou.

• Ni ra tarogi keda eso tale na tamata me baleta na noda vakabauta kei na digidigi eda cakava, sa rawa nida taura na madigi me da wasea na vuna e bibi kina vei keda o Jisu Karisito. E dua na sala mera vakarautaki kina na itabagone ki na madigi vakaoqo o ya mera sureti mera railesuva na itukutuku nei Elder Dieter F. Uchtdorf “Raica na Tamata!” (Liaona, Me 2018, 107–10) me vaqarai na dina eso me wasei baleti Jisu Karisito. Sa rawa mo vola eso na dina oqo ena papa. Sa rawa mo qai solia vei ira na itabagone na gauna mera vakatovotovotaka na nodra vakamacalataka vei ira vakai ira na vuna eda gadrevi Jisu Karisito kina kei na sala sa vakalougatataki kina na nodra bula baleta nira kila na iVakabula.

Na Vakoti nei Karisito, maivei Louise Parker

The Crucifixion of Christ [Na Vakoti nei Karisito], maivei Louise Parker

Cakacaka ena Vakabauta

Uqeti ira na lewe ni kuoramu se kalasi me ra vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira me ra vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito na nodra cakacakataka na nodra veivakauqeti.

iVurevure Veitokoni

• Joni 1:1–3, 10; Ica 3:14; Mosese 4:1–2 (Na ilesilesi ni iVakabula ena bula taumada)

• Mosaia 3:5–11; Alama 7:11–13; Vunau kei na Veiyalayalati 19:16–19 (Nai lesilesi na iVakabula ena Nona bula vakayago)

• Joni 14:2–3; 2 Nifai 9:15–17; Vunau kei na Veiyalayalati 45:3–5; 138:28–31 (Na ilesilesi ni iVakabula ni oti Nona mate kei na Tucaketale)

Veivakavulici ena iVakarau ni iVakabula

O ira yadua ena nomu kalasi era ivurevure ni ivakadinadina, veivakararamataki, kei na veika e sotavi ena bulataki ni kosipeli. Sureti ira mera veiwasei ka veivakatataki cake vakai ira.