na gonelailai ko Jisu

Delivered [Vakasucumi], mai vei Jenedy Paige

24 ni Tiseba

E Vakaraitaka Vakacava o Jisu Karisito na Nona Loloma vei Au?

Siganisucu

ivakatakilakila ni veivakasalataki vata

Veivakasalataki Vata

Me liutaka e dua na lewe ni mataveliutaki ni kuoramu se kalasi; me rauta ni 10–20 na miniti

Ena itekivu ni soqoni, cavuta vata na Itoko ni Goneyalewa se na Itoko ni Kuoramu ni Matabete i Eroni. Qai liutaka e dua na veivosaki me baleta na cakacaka ni veivakabulai kei na bula vakacerecerei ena nomu vakayagataka e dua se sivia na taro e ra se nomu taro vakai iko (raica na iVoladusidusi Raraba, 10.2, 11.2). Tuvana na sala mo cakava kina na veika sa veivosakitaki.

• Bulataka na kosipeli. Eda sa kunea tiko vakacava na reki ena noda muri Jisu Karisito?

• Vuekei ira era gadreva tu na veivuke. O cei ena noda tabanalevu se itikotiko e gadreva na noda veivuke? E rawa vakacava nida vukei ira?

• Sureta na tamata kecega mera ciqoma na kosipeli. Eda na veivukei vakacava vakai keda meda vakavakarau ki na veiqaravi vakadaukaulotu?

• Vakaduavatataki ni matavuvale ki na tawamudu. Eda na cau vakacava ki na sasaga ni noda tabanalevu meda cakava na tuva kawa kei na cakacaka ni valetabu?

Ena itini ni lesoni, ke veiganiti, vakayacora na veika oqo:

• Vakadinadinataka na ivakavuvuli eso e sa vakatavulici.

• Vakananumi ira na lewe ni kuoramu se kalasi me baleta na ituvatuva kei na veisureti a caka ena gauna ni soqoni.

ivakatakilakila ni vakavulici ni ivunau

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Ni se bera ni sucu o Koya, a kilai tu o Jisu Karisito me o Jiova sa cecere. O Koya sa “Daulomana ka Digitaka mai na ivakatekivu” ko Tamana (Mosese 4:2), sinai ena lagilagi, loloma soli wale, kei na dina (raica na Joni 17:5; Vunau kei na Veiyalayalati 93:11). Ia ni sa sucu oti o Koya, o Meri sa qai “vakadavora ena nodra tikina na manumanu; ni sa sega na tiki ni bure me nodratou” (Luke 2:7). Na cava na vuna a lomasoli kina o Jisu Karisito me ciqoma na Nona itavi vaka iVakabula dina ga ni kena ibalebale me lako mai i vuravura ena ituvaki lolovira duadua? Na kena isau rawarawa oya ni o Koya e lomani keda. Ni raica o Nifai na sucu ni iVakabula ena raivotu, a vakadinadinataka na “loloma ni Kalou, sa sovaraki koya yani kina yalodra na luve ni tamata; o koya, sa ka gadrevi vakalevu duadua kina mai vei ira na ka kecega” (1 Nifai 11:22).

Na Siganisucu sa gauna talei meda vakasamataka kina vakatitobu ni nona sucu na iVakabula kei na Nona isoro ni veivakaduavatataki e vakaraitaka na Nona loloma vei iko. Nio vakavakarau mo vukei ira na itabagone o vakavulica me ra vakila na loloma ni iVakabula, vakasamataka mo railesuva na Luke 4:16–21; Joni 3:16–17; 3 Nifai 27:13–16; kei na itukutuku nei Elder D. Todd Christofferson “Na Loloma ni Kalou” (Liaona, Nove. 2021, 16–19).

Vulica Vata

Ni roro mai nai cavacava ni nomuni vulica vakalasi se kuoramu na Veiyalayalati Vou ena yabaki oqo, o na kerei ira beka na itabagone mera wasea eso na italanoa taleitaki ena Veiyalayalati Vou ka vakaraitaka kina na iVakabula na Nona loloma vei ira era tu wavoliti Koya. E rawa sara mada ga nio ni wilika vata eso na italanoa oqo. Na cava era vakavulica vei keda na vei italanoa oqo me baleta na loloma ni iVakabula vei keda? Me vukei iko me tosoi na veivosakitaki ni loloma ni iVakabula, vakayagataka na itaviqaravi eso ka tarava.

• Sureti ira na lewe nikalasi se kuaromu mera vakasamataka na loloma ni Tamada Vakalomalagi kei Jisu Karisito vei keda me vaka edua na ivutu senikaru (raica Russell M. Nelson, “Divine Love,” Ensign, Feb. 2003, 24). Vakasamataka mo solia ki na tamata yadua e dua na senikau koti mai na pepa ka kerei ira yadua me ra wilika e dua na malanivosa ni ivolanikalou ena “iVurevure Veitokoni.” Kerei ira mera vola ena nodra senikau na veika era sa vulica me baleta na loloma ni Tamada Vakalomalagi kei Jisu me baleti keda. Nira wasea na veika era sa vulica, e rawa nira biuta vata na nodra senikau mera bulia kina e dua na ivutu. Eda na kila vakavinaka cake vakacava na sala e vakaraitaka kina na Tamada Vakalomalagi kei Jisu na Nodrau loloma vei keda?

• E vica na serenilotu e vakamacalataka na sala eso e vakaraitaka kina na iVakabula na Nona lomani keda (raica, me kena ivakaraitaki, “Au Sa Kila ni Bula Tu,” Serenilotu, naba 76). Sa rawa kina lewe ni kalasi se kuoramu mera digitaka e dua na serenilotu ka wasea na gauna era a vakila kina na loloma ni iVakabula ena sala e tautauvata kei na kena era vakamacalataki tiko ena serenilotu. Na cava eso tale na sala sa vakaraitaka kina na iVakabula na Nona loloma vei keda? Nida sa daumuri Karisito, eda na vukei ira vakacava eso tale mera vakila na Nona loloma?

• E sa vuqa tu na veivakasama lasu e vuravura me baleta na loloma ni Kalou vei keda. Me vakaoqo, eso beka era na nanuma ni gauna era vutuniyau se tiko vinaka kina na tamata, e kena ibalebale ni Kalou e lomani ira vakalevu cake mai vei ira tale eso. Eso beka era na nanuma ni kevaka e lomani keda dina na Kalou, ena ciqomi keda enai tuvaki ni bula oqo ka sega ni kerei keda meda veisau. Na itukutuku lasu cava me baleta na loloma ni Kalou eda sa rogoca? Me vukea na kena vorati na vei itukutuku lasu vakaoqo, sa rawa mo kerei ira na itabagone mera railesuva na itukutuku nei Elder D. Todd Christofferson “Na Loloma ni Kalou” se itukutuku nei Peresitedi Dallin H. Oaks “Na Loloma kei na Lawa” (Liaona, Nove. 2009, 26–29). Na dina cava soti eda kunea ena vei itukutuku oqo e vukei keda me da kila vinaka na loloma ni Kalou vei keda?

senikau

Na loloma nei Tamada Vakalomalagi kei Jisu Karisito e rawa ni vakatauvatani ki na dua na ivutu senikau totoka.

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vakatitobu ka vola na cava era na cakava mera vakayacora kina na veivakauqeti era ciqoma nikua. Kevaka era vinakata, e rawa nira wasea na nodra vakasama. Sureti ira mera vakasamataka na sala ena vaqaqacotaka kina na nodra veiwekani kei na Tamada Vakalomalagi kei Jisu Karisito e na nodra cakacakataka na nodra veivakauqeti.

iVurevure Veitokoni

• Joni 3:16–17; 15:9–13; Roma 8:35–39; Iperiu 12:5–6, 9–11; 1 Nifai 11:21–23; Alama 7:11–12; 3 Nifai 11:13–17; Moronai 7:45–48

• Michael John U. Teh, “Na Noda iVakabula Yadua,” Liaona, Me 2021, 99–101

• Taniela B. Wakolo, “Na Kalou sa Lomani Ira na Luvena,” Liaona, Me 2021, 94–96

Veivakavulici ena iVakarau ni iVakabula

Na veika kece a cakava na iVakabula ena gauna taucoko ni Nona cakacaka vakalotu e vuravura a vakauqeti ena loloma—na Nona lomani Tamana kei na Nona lomani keda kece. Ni sa tiko e lomada na loloma sa Vakarisito, eda na vakasaqara na sala kecega e rawa meda vukei ira na tamata mera vuli vei Karisito ka lako mai Vua. Na loloma sa inaki kei na veivakauqeti meda na veivakavulici kina.